Yohaannisi Beꞌido Ajjuutaa 20:1-15
20 Taani xaha ollaa qulppiyanne gita sanssalataa ba kushiyan oyqqida issi kiitanchchay saluwappe wodhdhishin beꞌaas.
2 I miimminttiya, beni shooshshaa, Dabloosanne Seexaanaa oyqqidi, 1,000 laytti qachchiis.
3 Qassi A xaha ollan yibiddiisinne ollaa A bolli gorddidi attamiis; hegaappe denddidaagan, I hegaappe guyyiyan 1,000 layttay wurana gakkanaashin dereta balettenna. Hegaappe simmin, I guutta wodiyawu birshshettana bessees.
4 Qassi taani araatata beꞌaas; he araatatun uttidaageeti pirddana mala, etayyo maatay imettiis. Ee, Yesuusabaa markkattido gishshawunne Xoossaabaa yootido gishshawu worido* shemppota* taani beꞌaas, qassi eti doꞌawu woy A misiliyawu goynnibookkona; hegaa bollikka, bantta somꞌꞌuwaninne bantta kushiyan malaataa wotissibookkona. Qassi eti deꞌon deꞌiyogaa doommidosonanne kawo gididi 1,000 laytti Kiristtoosaara haaridosona.
5 (Hayqqida harati 1,000 layttay wurana gakkanaashin deꞌon deꞌiyogaa doommibookkona.) Hagee koyro dendduwa.
6 Koyro dendduwa denddiya ooninne geeshsha, qassi ufayttees; eti naaꞌꞌantto hayquwa hayqqokkona, shin eti Xoossaanne Kiristtoosa kahineta gidana, qassi eti kawo gididi aara 1,000 laytti haarana.
7 Qassi 1,000 layttay wurosaara, Seexaanay qashuwappe birshshettana;
8 I saꞌawu oyddu zooziyan deꞌiya dereta, Googanne Maagooga olawu issippe shiishshanawu, balettanaassi kiyana. Hageetu qooday abbaa shafiya keena.
9 Eti kumetta saꞌaa gakkidosona, qassi geeshshatu qatuwanne Xoossay siiqiyo katamaa dooddidosona. Shin tamay saluwappe wodhdhidi, eta mi bayiis.
10 Qassi doꞌaynne hiraagaa* yootays giya worddanchchay deꞌiyo, tamaanne diinniya abban, eta balettida Dabloosi yibidettiis; qassi eti gallassinne qammi meri merinawu seelan barchchiya beꞌana.*
11 Hegaa bollikka, taani wogga bootta araataanne an uttidaagaa beꞌaas. Saꞌaynne Saloy A sinttappe baqatidosona, qassi etayyo ciray xayiis.
12 Hegaa bollikka, hayqqidaageeti, gitatinne guuttati araataa sinttan eqqidaageeta taani beꞌaas, qassi maxaafati* dooyettidosona. Shin hara maxaafaykka dooyettiis; hegee deꞌuwa maxaafaa. Maxaafatun xaafettidaban, hayqqidaageetuyyo eta oosuwadan pirdday imettiis.
13 Qassi abbay ba giddon deꞌiya hayqqidaageeta yeddiis; hayqoynne Duufoy* bantta giddon deꞌiya hayqqidaageeta yeddidosona, qassi ubbawu eta oosuwadan oosuwadan pirdday imettiis.
14 Qassi hayqoynne Duufoy* tamaa abban yibidettidosona; ha tamaa abbay naaꞌꞌantto hayquwa gishshaa eqqiyaba.
15 Hegaa bollikka, deꞌuwa maxaafan xaafettibeenna ooninne tamaa abban yibidettiis.
Footnotes
^ Mise, “kalttan worido.”
^ Qonccissuwa, qassi Aj 6:9 tohossa qofaa xeella.
^ Woykko “Xoossay erissidobaa.”
^ Woykko “xaaxettida maxaafati.”
^ Woykko “Hedes,” hegeekka, asi ubbi moogettiyo sohuwa. Qonccissuwa xeella.
^ Woykko “Hedes,” hegeekka, asi ubbi moogettiyo sohuwa. Qonccissuwa xeella.
