Yohaannisi Beꞌido Ajjuutaa 13:1-18
13 Qassi I* abbaa shafiya bolli tollu giidi eqqiis.
Qassi taani tammu kacetinne laappun huupheti deꞌiyo issi doꞌay abbaappe kiyishin beꞌaas; A kacetun tammu kallachchati,* qassi A huuphetun Xoossaa toochchiya sunttati deꞌoosona.
2 Taani beꞌido doꞌay maahiya mala, shin A tohoy beeriyagaa mala, qassi A doonay gaammuwagaa mala. Miimminttee doꞌawu wolqqaa, araataanne gita aawatettaa immiis.
3 Taani A huuphetuppe issoy woriya masunttaa masunxxidaba milatiyogaa beꞌaas, shin woriya A masunttay paxiis, qassi kumetta saꞌay malaalettidi he doꞌaa kaalliis.
4 Qassi miimminttee doꞌawu maataa immido gishshawu, eti miimminttiyawu goynnidosona; hegaa bollikka eti, “Doꞌaa mali ooni deꞌii, qassi aara ooni olettanawu danddayii?” yaagiiddi doꞌawu goynnidosona.
5 Otorobaanne Xoossaa toochchiyabaa haasayiya doonay awu imettiis, qassi 42 aginaa oottiyo maatay awu imettiis.
6 Hegaa bollikka, I Xoossaa, A sunttaa, I deꞌiyo sohuwa saluwanne yan deꞌiyageeta ba doonan toochchiyogaa doommiis.
7 I geeshshatuura olettanaadaaninne eta xoonanaadan maatay awu imettiis, qassi yaratu, asa sheeshshatu, doona* ubbaa haasayiyageetunne deretu ubbaa bolli awu aawatettay imettiis.
8 Qassi saꞌan deꞌiyageeti ubbay awu goynnana. Shuhettida Dorssaa deꞌuwa maxaafan* saꞌay doomettoosaappe* eta sunttaappe issoynne xaafettibeenna.
9 Ooyyonne haytti deꞌikko, siyo.
10 Ooninne qashettana bessikko, qashetto. Ooninne bisuwan worikko,* A bisuwan worana bessees. Geeshshatuyyo genccaynne ammanoy koshshiyoy hegaassa.
11 Hegaappe simmin, taani issi doꞌay saꞌaappe pude biishin beꞌaas, ayyo dorssaagaa mala naaꞌꞌu kaceti deꞌoosona, shin I miimminttiyadan haasayiyogaa doommiis.
12 I koyro doꞌay beꞌishin A maataadan oottees. Qassi I saꞌaynne an deꞌiyageeti woriya masunttay paxido koyro doꞌawu goynnanaadan oottees.
13 Qassi I haray atto, asay beꞌishin saluwappe saꞌan tamay wodhdhanaadan oottidi malaaliya* gitabata oottees.
14 I doꞌay beꞌishin oottanaadan ayyo maatay imettido malaaliyabatuppe denddidaagan, saꞌan deꞌiyageeta balettees; qassikka bisuwan shocettikkonne paxida doꞌawu saꞌan deꞌiyageeti misiliya medhdhanaadan I yootees.
15 Qassi doꞌaa misiliyawu shemppiyo shemppuwa* immanaadan awu maatay imettiis; hegaappe denddidaagan, doꞌaa misilee haasayana, qassi doꞌaa misiliyawu goynnenna ubbaa woranaadan azazana.
16 Guuttaynne gitay, dureenne hiyyeesay, goqaynne ayllee, asay ubbay ba ushachcha kushiyan woy ba somꞌꞌuwan malaataa wotissanaadan I giddees;
17 he malaatay, hegeekka, doꞌaa sunttay woy A sunttaa paydoy baynna ooninne shammana woy bayzzana danddayenna.
18 Hagawu hayyoy koshshees: Akeekanchcha asi doꞌaa payduwa qoodo; ayssi giikko, he paydoy asaba,* qassi A paydoy 666.
