Yaalepelinwaaya Aroma 9:1-33
9 Ntoko mutthareli a Kristu; miyo nkinootha, kinhima ekhaikhai. Yoosuweliha ya murima aka enhooleliwa ni munepa wootteela, ennahelela onamoona eyo:
2 Murima wookiriipa, ni onnatepa okivoreya murima.
3 Miyo kaawera, kaari oolikaneene okhala ottayi wa Kristu ntoko mutthu oowuulumeliwa weera asinnaka, ayuda, ettottele mureerelo.
4 Awosa ana a israeli, ni ti yaawo Muluku aathanliyaawe weera ekhale anamwane awe. Muluku ohaavaha ovuwa, oopakano nivarihano, ohaavaha Nlamulo, ni aavahiwa eparakha yonvarela muteko* ni ti yaawo evahinwe soolaihera.
5 Ti weiwo ekhummaayawo makholo ahu, nave-tho Kristu okhumme nloko nene nenno. Muluku onlamulela itthu sootheene,* avuwihiwe wa mahiku ootheene. Amem.
6 Vanonto, yoolaihera ya Muluku khayinteñye. Woona weera khaiyene ootheene ale ekhumme wa ana Israeli, “ana a Israeli eekhaikhai”.
7 Naari khaiyene weera osuulu* wootheene wa Abrahamu eri anamwane a ekhaikhai; opwaha mwa yeeyo, Muluku aamulenle Abrahamu weera: “Osuulu* awe waakela okhumelela moorweela mwa Isaki.”
8 Eyo enoonihera weera anamwane eyarinwe ni Abrahamu khaiyene anamwane a Muluku, opwaha mwa yeeyo, anamwane eyarinwe mwaha wa yoolaihera ya Muluku, eri anamwane eekhaikhai a Abrahamu.
9 Masu ene a yoolaihera yaari ala: “Eyaakha ya omaalo, etempu ene siiyeela, miyo kinootthika, ni Sara aneereke amuyanreene mwaana.”
10 Eyo khayeereñye etempu ene yeele paahi, mene-tho, yaaheereya emaara Rebeka aarupanlaawe maphapo aiyawe, Isaki, nikholo nahu.
11 Maphapo ehinaaye oyariwa, naari ehinaaye opaka etthu yooreera naari yoonanara, Muluku aahoonihera weera yootthuna awe khayaakela olipa mwaha wa miteko, mene mwaha wa ole omuthanliyaawe ni omwiithannaawe.
12 Muluku enre: “Mwaana oopatxera oyariwa onkela okhala kaporo a mwaana mwaamukhaani.”*
13 Hiiho ntoko sinhimaayano Soolepa: “Miyo koomusivela Yakobe, mene koomwiitta Esawu.”
14 Neereke nintthuna ohima weera Muluku toohixariya? Hooye!
15 Mwaha wooweera Muluku aamweerela Mose: “Kinommorela ikharari ole kineeraaka kimuthanle weera kimmorele ikharari, ni kinoomureerela murima ole kineeraaka kimuthanle weera kimureerele murima.”
16 Tivawonto, eyo khenlipa ni otthuna wa mutthu naari wiilipihera wa mutthu, mene enlipa ni omoriwa ikharari wa Muluku.
17 Yoolepa ennamuhima Farawo emweerelaka: “Miyo koohiñye mwayiineene ovirelelaka okhala mukumi: weera koonihere owera waka mwaha wa nyuwo ni weera nsina naka nilaleiwe elapo yootheene”.
18 Muluku onnammorela ikharari ole ommutthunaawe, mene Owo onnaakhulela weera ootheene ale entthuna okhala oottiya maaru, ekhale oottiya maaru.
19 Atthu akina pooti okikoha: “Mwaha wa heeni nlelo owo onnoopaawe mulattu? Taani onwera okhootta yootthuna awe?”
20 Nyuwo mutthu piswa, owera heeni mukhalannaanyu woomuthoriha Muluku? Neereke etthu epakinwe enoowera omweerela ole opanke: “Mwaha wa heeni mukipankaanyu hiiha?”
21 Neereke mulipa oopaka* minyaapu, khaanoono owera woopakela oloko mmoharu yoowo mwaapu onvareleya muteko nihiku noothanleya ni mwaapu onvareleya muteko nihiku piswa?
22 Onoolikana ni Muluku. Muluku oolakela woonihera esara awe ni owera wawe emaara yeeyo aavilelaawe moopixa murima atthu ale yaamunyoonyiha ni yaaphwanela onyaanyiwa.
23 Owo aapanke eyo weera awoonihere ovuwa wawe ale yeera yaakhulele omoriwa wawe ikharari. Owo ohaareherera weera yaakhele ovuwa.
24 Hiyo atthu yaawo owo owiitthannaawe, ohiya paahi variyari va ayuda, mene-tho wa maloko makina.
25 Eyo eneereya moovarihana ni ele owo ohimmaawe va Hoseya: “Ale ehikhanle atthu a nloko naka, kinoowiitthana ‘nyuwosa atthu a nloko naka’; ni ale miyo kahaasivelaaka, kinkela oweerelaka ‘kinnaasivela’.
26 Ni nipuro ohimmwalaayaavo weera: ‘nyuwosa khaiyene atthu aka’, onkela ohimmwa-vo, ‘mwa anamwane a Muluku mukumi’.”
27 Eyo etthu Yesaya onkhuwelaawe woohima sa ana a israeli: “Nnaamweera nummero na ana a israeli nantteene ntoko mihaava sa mphareya, mene akina a yaawo paahi eneera evuluxiwe.
28 Mwaha wooweera Yehova* onoothoriha elapo moomalela, ni moohipisa.”
29 Ni ntoko hiihaale Yesaya aahimenraawe weera yaamweereya eeraka: “Waari weera Yehova* aanakhotto khaanihiyenre hiyo osuulu,* naakela olikanaka ni oSodoma, ni naarowa okhalaka ntoko oGomora.”
30 Vanonto, eheeni nikhanlaahu oohima? Atthu a maloko makina ahoonihera nroromelo ni awo ahooniwa okhala anaxariya nnaamweera yahaasaasa exariya.
31 Mene ana a israeli nnaamweera yaasaasa nlamulo na exariya, awo khewenre okhala moovarihana ni nlamulo nno.
32 Mwaha wa heeni ehiwenraaya okhala moovarihana ni nlamulo nno? Mwaha wooweera yeerera opaka eyo moorweela mwa miteko, ehooniheraka nroromelo. Awo aakwattuwa “vanlukuni nookwattuliha.”
33 Ntoko sinhimaayano Soolepa: “Nkoonani! oSiyoni kinoohiyawo nluku nenno nneera naakwattulihe atthu ni nluku nneera naanyoonyihe* atthu, mene mutthu ole oneera aroromele nluku nno, khankela wuuliwa muru.”
