Yaalepelinwaaya Aroma 5:1-21
5 Vanonto nikhalihinwaahu anaxariya mwaha wa nroromelo nahu, nipuheke* murettele wa Muluku ahu moorweela mwa Pwiya ahu Yesu Kristu.
2 Omuroromela wahu Yesu Kristu onnaneeriha omwaattamela Muluku ni ottottela mureerelo oreera murima otokweene wa Muluku. Hiyo ninnahakalala mwaha wooweera nookhalano yooweherera yoowaakhela ovuwa wa Muluku.
3 Ohiya yeeyoru paahi, hiyo-tho nintthuneya ohakalala emaara ninvirihaahu maxupo, woona weera maxupo awo ennakumihera ovilela;
4 mene ovilela iwo; onnaneeriha waakhuleliwa ni Muluku, waakhuleliwa ni Muluku, onnanivaha yooweherera,
5 ni yooweherera khenkhulumula; mwaha wooweera Muluku onvarela muteko munepa awe wootteela yoowo onnivahaawe ooniheraka weera onnanisivela.
6 Ni nlelo nireene atthu ootteettheya, Kristu ohaakhwela atthu oonanara murima etempu yoophwanelela ya Muluku.
7 Ti wooxupa mutthu okhwa weera anvuluxe naxariya; apaale wa mutthu ooreera murima, mutthu pooti weereraka wiivaherera.
8 Mene Muluku oonoonihera nsivelo nawe hiyo, mwaha wooweera, nnaamweera naareene anamattheka, Kristu oonikhwela hiyo.
9 Vanonto, woona weera nookhalihiwa anaxariya moorweela mwa ephome ya Yesu, moohihovela, hiyo niroromeleke weera nnoovuluxiwa mwa esara ya Muluku moorweela mwa yoowo.
10 Nnaamweera hiyo naareene amwiittani a Muluku, vano nookhala asinthamwene awe moorweela mwa okhwa wa Mwanawe. Eyo ennanroromeliha vantxipale weera nnoovuluxiwa moorweela mwa Yesu, vano nraahu asinthamwene a Muluku.
11 Etthu Muluku onipakenlaawe moorweela mwa Pwiya ahu Yesu Kristu, ennanihakalaliha, woona weera ti moorweela mwa yoowo, vano nikhalannaahu onthamwene ni Muluku.
12 Yoottheka yoovolowa mulaponi mwaha wa mutthu mmoha, ni yoottheka eyo yookumihera okhwa. Hiiho okhwa wohaaphwanya atthu ootheene, woona weera atthu ootheene aattheka.
13 Nihinaaye okhala Nlamulo, yoottheka yaakhala mulaponi, mene naahikhala nlamulo, khaavo mutthu onoopiwa mulattu mwaha wootupha nlamulo.
14 Nookhwa oolamulela ntoko mwene ovinyera etempu ya Adamu mpaka ya Mose, waahela mpuwa atthu yahaapanke yoottheka yaalikana ni Adamu. Adamu aamoonihera ole aakela okhumelela muhoolo.
15 Menento, yoovaha ya Muluku, khenlikana ni yoottheka ya Adamu. Woona weera atthu antxipale ahookhwa mwaha wa yoottheka ya mulopwana owo. Nto oreera murima otokweene wa Muluku ni yoovaha awe ya mahala moorweela mwa oreera murima otokweene wa mulopwana mmoha, Yesu Kristu, otokweene. Moorweela mwa soovaha sene seiya, Muluku onnaavaha mareeliho atthu antxipale!
16 Nave-tho etthu emphwanyihaaya yoovaha ya Muluku,* yoovirikana ni ele yoottheka ya mutthu mmoha ekumihenraaya. Woona weera yoottheka ya mutthu mmoha yookumihera mulattu, menento atthu epakakaru soottheka sintxipale, etthu Muluku aavanhaawe atthu ti waakhaliha anaxariya.
17 Vanonto okhwa waavolonweene mulaponi mwaha wa yoottheka ya mutthu mmoha, nankhanto ale enaakhela mahala mantxipale a Muluku* ni yoovaha ya mahala ya exariya, awo enrowa otepa olamulela ereene akumi moorweela mwa Yesu Kristu!
18 Ntoko hiihaale yoottheka ya mutthu mmoha ekumihenraaya mulattu wa atthu ootheene, hiiho-tho muteko mmoha wa exariya wooweeriha atthu ootheene okhala anaxariya weera yaakhele ekumi.
19 Hiiha ntoko ohiiwelela wa mutthu mmoha weerinhaaya weera atthu antxipale ekhale anamattheka, emoha-moharu-tho, wiiwelela wa mutthu mmoha onimweeriha weera atthu antxipale ekhale anaxariya.
20 Nlamulo nivahinwe weera noonihere soottheka sa atthu. Vanonto soottheka sooniherinwaaya weera sookhala, oreera murima otokweene wa Muluku wohaatxeerereya.
21 Mwaha wa heeni? Mwaha wooweera hiihaale ntoko yoottheka enlamulelaaya ekumiheraka okhwa, hiiho-tho, oreera murima otokweene wa Muluku onnalamulela ntoko mwene moorweela mwa exariya. Ni eyo enimwaaphwanyiha ekumi yoohimala moorweela mwa Yesu Kristu, Pwiya ahu.
