Yaalepelinwaaya Aroma 13:1-14
13 Nintthuneya weera niwiiweleleke anamalamulela,* woona weera khawaavo olamulelo okhanle ohaakhulelinwe ni Muluku. Anamalamulela ekhanle, Muluku taakhalinhe mmapuroni mwaya mmo.
2 Menento, naahiwiiwelelaka anamalamulela, khanniiwelela nlamulo nivahinwe ni Muluku. Ale enkhootta wiiwelela mareherero ala a Muluku, enoothorihiwa.*
3 Anamalamulela enooviwa ni atthu ale empaka itthu soonanara, ohiya ni atthu ale empaka itthu sooreera. Nyuwo mwaahitthunaka vale owoova anamalamulela, tthiri, nvireleleke opaka itthu sooreera. Mwapaka eyo, awo enimoottottopelani.
4 Awo arumeyi a Muluku envara weera yookhavihereni nyuwo. Mene mwaapakaka itthu soonanara, mookhalano tthiri mathowa oowoova. Woona weera awo aavahiwa edireitu ni owera woowaattaruxa ale empaka itthu soonanara. Awosa arumeyi a Muluku weera emuttaruxeke mutthu ompaka itthu soonanara.
5 Aakhala mathowa ooreera eneera eweerihekeni nyuwo owiiwelela awo,* ohiya paahi otthawa ottaruxiwa naawo,* mene-tho weera mukhaleno yoosuweliha ya murima yooreera.
6 Tivawonto nyuwosa-tho munlivaanyu mpostu; woona weera awo arumeyi a Muluku enaavarela muteko atthu ootheene ni envara muteko owo etempu yootheene.
7 Munvaheke mutthu ti mutthu ele ophwanenlaiye waakhela: Mmuliveke mpostu ole onvekela mpostu, ole onvekela musurukhu wa kuvernu, munvaheke musurukhu wa kuvernu; ole onvekela wooviwa, mmooveke; ole onvekela ottittimihiwa, mmuttittimiheke.
8 Muhimukophele mutthu etthu, ohikhanle osivelana mukina ni mukhwaawe. Woona weera ole ommusivela mukhwaawe, onniiwelela Nlamulo.
9 Malamulo eneera: “muhiraruwe, muhiive, muhiiye, muhinlele itthu sa mwaneene”, ni nlamulo nri poothe nikina nikhanle, yuuluulinwe ni masu ala: “Mmusivele mukhwiinyu ntoko muniisivelaanyuno.”
10 Ole ommusivela mukhwaawe; khanampakela itthu soonanara, tivawonto, ole onsivela, onniiwelela Nlamulo.
11 Mpakeke eyo mwaha wooweera moosuwela etempu nraahu, weera ewoora yoovinya mukhoveni, woona weera vano ovuluxiwa wahu wohaattamela opwaha etempu naapatxenraahu okhalano nroromelo.
12 Ohiyu ohanle omala, ohanle oxa, nikhootteke miteko sa epiphi ni nikuxeke ikaruma sa ekhotto sa muthuko.
13 Nipakeke itthu sooreera, ntoko atthu eneettela waara wa othana, nihipakeke ifeesta soohireerela, naari ohapaliwa, okonihana woohireerela ni makhalelo oowuuliha muru,* naari onyakulihana ni nrima.
14 Opwaha mwa yeeyo, ntthareke nnene sene ntakihero na Apwiya Yesu Kristu. Ni muhimpakeke palano weera mukwanihere sootthuna sa erutthu.*
