Yaalepelinwaaya Aroma 2:1-29
2 Vano, woohipwattha nyuwo taani, khamwaano masu oowiisaakiha wakhala weera munnaathoriha atthu akina mwaha woopaka itthu imoha-moharu seiyo nyuwo mumpakaanyu. Emaara munaathorihaanyu atthu awo, muniithoriha muneene anyu.
2 Mene, noosuwela weera emaara Muluku onaathorihaawe atthu empaka itthu iyo, othoriha wawe onvarihana ni ekhaikhai.
3 Nyuwo munuupuwela weera munoovuluwa emaara Muluku onkelaawe waathoriha atthu ale empaka itthu imoha-moharu nyuwo mumpakaanyu?
4 Nyuwo khamusuwenle weera owo onwooniherani oreera wawe murima otokweene, ovilela ni opixa wawe murima? Nyuwo khamunoona vaavo weera Muluku oneerera wookhaviherani weera muttharuwe?
5 Mene emaara yeeyo nyuwo munttiyaanyu maaru ni mukhoottaka ottharuwa, moohihovela, Muluku onimoothorihani nihiku na esara awe, emaara yeeyo onkelaawe woonihera othoriha wawe wa exariya.
6 Owo onoomuliva mutthu ti mutthu moovarihana ni miteko sawe:*
7 owo onimwaavaha ekumi yoohimala ale eneera evirelele* opaka itthu sooreera. Atthu awo ennaasaasa ovuwa, nttittimiho ni ekumi ya mahiku ootheene;
8 opwaha mwa yeeyo, isara ni onyoonyiwa wa Muluku, onimwaaphwanya ale ehiniiwelela ekhaikhai ni empaka itthu soonanara.
9 Atthu ootheene akhale muyuda, akhale mukereku, yoowo oneera apake itthu soonanara onookumanano maxupo.
10 Mene ootheene ole oneera apake itthu sooreera onimwaakhela ovuwa, nttittimiho ni murettele, epatxeraka ayuda nave-tho akereku.
11 Woona weera Muluku khaano nthalu.
12 Atthu ootheene eneera ettheke ehikhanleno nlamulo na Mose, enkela okhwa-tho ehikhanleno nlamulo. Mene ootheene ale eneera ettheke esuwenleene nlamulo, enrowa othorihiwa moovarihana ni nlamulo nno.
13 Muluku khanwoona atthu paahi okhala anaxariya mwaha woowiiwa Nlamulo. Mene ale paahi enrowa opakaka itthu moovarihana ni Nlamulo, eneera ehimmwe okhala anaxariya.
14 Atthu a maloko makina* ehikhanleno nlamulo yaapakaka itthu moovarihana ni ele nlamulo ninhimaaya, eyo enoonihera weera vamurimani vaya aakhalano malamulo.
15 Atthu awo ennoonihera weera itthu sinxuttihaaya nlamulo, silempwale vamurimani vaya woona weera yoosuweliha aya ya murima ennaahelela onamoona, nave muupuwelo aya onnaaleela waari weera awo toottheka naari hooye.
16 Eyo, enimweereya nihiku Muluku moorweela mwa Kristu Yesu, onkelaawe othoriha itthu atthu empakaaya mwa esiiri.* Itthu sootheene iya, sineerela eparte mitthenka sooreera kinlaleyaaka.
17 Mene, mwaareene muyuda, ni munroromela Nlamulo ni muniiteexa mwaha wookhalano onthamwene ni Muluku;
18 nyuwosa mwaasuwenleene yootthuna ya Muluku ni mwaakhulelaka itthu sooreera mwaha wooweera mooxuttihiwa ni Nlamulo;
19 mwaaroromelaka weera mwa mutthu munweettiha atthu oohoona, ni mwa muthuko wa atthu eri mweepiphini,
20 muxuttiha aatthu oohiisuwela,* muxuttiha aanamwane ni moosuwela itthu ikhaanini ni munnasuwela ekhaikhai eri mu Nlamuloni;
21 vano, nyuwo munaaxuttiha atthu akina, khamuniixuttiha mwaneene anyu? Nyuwo munlaleya weera: “Muhiiye”, munniiya?
22 Nyuwo munxuttiha weera: “Muhiraruweke”, munnararuwa? Nyuwo munhima weera munnaathanya amiluku eethiru, munniiya itthu siri mutemplu?
23 Nyuwo muniisunnuwiha mwaha woosuwela* nlamulo na Muluku, neereke munnanveeha Muluku mutuphaka Nlamulo?
24 “Nsina na Muluku ninnaveehiwa ni atthu a mulaponi mwaha wa nyuwo”, hiiho ntoko soolepa sinhimaaya.
25 Mweekhaikhai, wiineliwa onvareleya muteko wakhala weera nyuwo munnatthara Nlamulo; vano mwaahittharaka Nlamulo, munkhala ntoko khamutonkoru wiineliwa.
26 Menento, vaavo mutthu oohiineliwa onttharaawe mwa exariya ele enoopereraaya Nlamulo, neereke Muluku khamoona mutthu owo okhala ntoko oowiineliwa?
27 Nyuwo mooxuttihiwa woohima sa wiineliwa ni Nlamulo nilempwale, mene nyuwo khamuntthara. Nto vaavo mutthu oohiineliwa onttharaawe Nlamulo, owo onnamuthoriha mutthu oowiineliwa.
28 Okhala muyuda khaiyene etthu yoomokoni paahi, ni wiineliwa wa ekhaikhai, khaiyene ti wa weerutthuni paahi.
29 Okhala muyuda eekhaikhai onhela mpuwa ele mutthu oraaweno vamurimani. Ni wiineliwa wawe, oniineliwa vamurimani ni munepa wootteela wa Muluku, ohiya ni Nlamulo. Ottottopeliwa wa mutthu owo, onkhuma wa Muluku ohiya wa atthu.
