Yaalepelinwaaya Aroma 3:1-31
3 Okhala muyuda, onkumihera mureerelo heeni? Naari mureerelo heeni onkumiheraaya wiineliwa?
2 Sookhala mireerelo sintxipale. Yoopatxera, Muluku aahaaroromela ayuda aavahaka masu awe.
3 Vanonto wakhala weera akina a yaawo kheroromeleñye, neereke ohiroromeleya waya ontaphulela weera Muluku khaiyene toororomeleya?
4 Hooye! Nnaamweera atthu ootheene ekhalaka anamootha, Muluku nlelo anaakhale eekhaikhai hiiha ntoko sinhimaaya Soolepa: “Moorweela mwa masu anyu munoohimmwa weera nyuwo mutthu oneettela exariya, ni emaara munkelaanyu othorihiwa munookhumela nnene.”
5 Vaavo nimpakaahu itthu soonanara atthu ennoonelela weera Muluku naxariya. Vanonto, neereke eyo entaphulela weera Muluku toohixariya vaavo onnithorihaawe? (Kinuuluma moota atthu akina enuupuwelaaya.)
6 Hooye! Waari weera ti hiiho, Muluku onkela othoriha moota heeni elapo?
7 Opwaha mwa yeeyo, wakhala weera wootha waka onnoonihera ekhaikhai ya Muluku ni onnanvuwiha Owo, atthu akina pooti okoha: ‘Mwaha wa heeni nto kinthorihiwaaka ntoko namattheka?’
8 Ni mwaha wa heeni nihinhimaahu weera: “Nipakeke itthu soonanara weera sikhumemo sooreera?” Ntoko atthu akina ennootheraaya weera ninhima hiiho? Atthu ale anhima itthu iya, enkela othorihiwa moovarihana ni exariya.
9 Vanonto eyo, enoonihera eheeni? Neereke nri nnene waapwaha atthu akina ehikhanle ayuda? Hooye! Hiiha ntoko niiwanyeihalaahu, ayuda naari akereku ootheene aattheka.
10 Hiihaale ntoko Soolepa sinhimaaya: “Khaavo naxariya naari mmoha mano;
11 khaavo mutthu ori ni iseru; khaavo mutthu ommwaasa Muluku.
12 Atthu ootheene aathweelela ehiyaka weettela ephiro ya Muluku, ootheene toohivareleya muteko. Khaavo naari mutthu mmoha mano onoonihera oreera murima.”
13 “Masu aya toowiiva; envarela muteko nlumi naya weera ehime itthu soowootha.” “Itthu sinkhuma mmwaano mwaya sinkhala ntoko evenenu ya enowa.”
14 “Mmwaano mwaya aasareya masu oonanara ni oowali.”
15 “Manaani aya ennaakuvela wiiva.”*
16 “Awosa, ikwaha sootheene ennaahasula atthu ni ennaakumihera maxupo,
17 ni awo khenwera okhala ni murettele ni atthu akina.”
18 “Awosa khemmuttittimiha Muluku.”
19 Vano, hiyo noosuwela weera itthu sootheene silempwale mu Nlamuloni sinvareleya muteko wa atthu ale entthara Nlamulo. Yootthuna aya ti owootxeeliha atthu weera yaasaasereke mathowa, ni woonihera elapo yootheene weera yookhalano nthowa vamaithoni va Muluku, ni ennaphwanela othorihiwa.
20 Vano, khaavo okhanle oohimmwa ni Muluku okhala naxariya mwaha woopaka itthu sinoopereriwa mu Nlamuloni. Mweekhaikhai, Nlamulo ninnanoonihera* nnene sene yoottheka.
21 Mene vano, Muluku ohoonihera exariya awe woohihela mpuwa nlamulo, ntoko Nlamulo ni maprofeta yaahimenraaya,
22 aani, exariya ya Muluku yohooniheriwa moorweela mwa nroromelo na Yesu Kristu wa atthu ootheene enoonihera nroromelo nno. Woona weera khanaavo nloko nootepa otthuneya opwaha nikina.
23 Atthu ootheene aattheka, ni khemphwanya ovuwa wa Muluku.
24 Kristu Yesu, ohaavuluxa alivaka soottheka saya, nto mwaha wa yeeyo, awo ti anaxariya vamaithoni va Muluku. Mwaha wa oreera wawe murima otokweene, Muluku ohaavaha yoovaha eyo mwa mahala ene.
25 Muluku onvaha Kristu ntoko makeya weera atthikihere onthamwene ahu ni Muluku mwaha woororomela ephome ya Yesu. Muluku opanke eyo weera oonihere exariya awe. Ohiya paahi woonihera opixa wawe murima, owo oolevelela soottheka seiyo saapakinwe khalayi,
26 nave-tho viinaano va, owo onnanoonihera exariya awe, amuhimaka okhala naxariya mutthu ole ommuroromela Yesu.
27 Vano, neereke nookhalano mathowa oowiisunnuwiha?* Hooye. Nintthuneya wiisunnuwiha* mwaha wootthara nlamulo? Hooye, nintthuneya paahi otthara nlamulo na nroromelo.
28 Mwaha wooweera hiyo noosuwela weera mutthu onnahimmwa okhala naxariya mwaha wookhalano nroromelo, ohiya otthara ele nlamulo nnoopereraaya.
29 Naari neereke Muluku, Muluku paahi aayuda? Owo khaiyene-tho Muluku aatthu a maloko ootheene? Aani, owo Muluku-tho aatthu a maloko ootheene.
30 Woona weera ori Muluku mmoha paahi, owo onnaahima okhala anaxariya atthu ale oowiineliwa ni oohiineliwa mwaha wa nroromelo naya.
31 Neereke eyo entthuna ohima weera nootxipiha nlamulo moorweela mwa nroromelo nahu? Hooye! Opwaha mwa yeeyo, ninnaakhulela nlamulo.
