Yaalepelinwaaya Aroma 4:1-25
4 Eheeni nikhanlaahu oohima woohima sa nikholo nahu Abrahamu?
2 Waakhanle weera Abrahamu aahiitthaniwa naxariya mwaha wa etthu aapankaawe, owo aamukhalano nthowa noowiisunnuwiha, mene khaiyene vamaithoni va Muluku.
3 Yoolepa enhima eheeni? “Abrahamu aamuroromela Yehova,* ni mwaha wa yeeyo aahooniwa okhala naxariya.”
4 Mutthu onvara muteko weera aakhele musurukhu, khaiyene onaakhelela mwaha wa oreera murima wa patarawu awe, mene onaakhela mwaha wooweera onnaphwanela.*
5 Mene etempu mutthu ommuroromelaawe Muluku ohilipaka ni miteko paahi, Muluku onnamoona mutthu owo okhala naxariya mwaha wa nroromelo nawe. Muluku onaakhaliha anamattheka okhala anaxariya.
6 Davidi-tho onnuuluma woohima sa ohakalala wa mutthu yoowo Muluku ommwiitthanaawe okhala naxariya nnaamweera soopaka sawe sihikhalaka moovarihana ni nlamulo:
7 “Oohakalala taale elevelelinwe miteko saya soonanara, ni elevelelinwe soottheka saya;
8 oohakalala tuule Yehova* ohimpwatthaawe yoottheka awe.”
9 Neereke ohakalala iwo enkhalano paahi atthu ale oowiineliwa, naari ni oohineliwa ene? Ohima nneera: “Nroromelo na Abrahamu naahooniwa okhala naxariya.”
10 Etempu heeni nroromelo nawe nooninwaaya okhala na exariya? Yaari etempu iinelinwaawe naari ahiinelinwe? Yaari etempu ahiinelinwaawe.
11 Muhoolo mwaya, owo aahaakhela ethoonyero, ethoonyero ene, wiineliwa, ntoko yoororomeliha weera aari naxariya mwaha wa nroromelo nawe oonihenraawe ahinaaye wiineliwa, weera akhale tiithi aatthu ootheene erino nroromelo nlelo ehinaaye wiineliwa, ni yootthuna weera yooniwe okhala anaxariya.
12 Owo-tho, aakhala tiithi a osuulu wa atthu oowiineliwa. Menento, khaiyene wa atthu ale oowiineliwa, mene-tho wa ale entthara ephiro ya nroromelo ya tiithi ahu Abrahamu aaraaweno nlelo owo ahinaaye wiineliwa.
13 Mwaha wooweera khawaakhanle mwaha wa Nlamulo Abrahamu naari osuulu* awe yaakhenlaaya yoolaihera yooweera owo aamuhiyeriwa elapo, mene waari mwaha wa exariya yaakhumelela mwaha wa nroromelo.
14 Waari weera ale* enroromela Nlamulo eneera ehiyeriwe elapo, nroromelo khanaakela ovareleya-tho muteko, ni yoolaihera yaamwinteya.
15 Mweekhaikhai, Nlamulo ninnakumihera esara ya Muluku; mene, nipuro nihikhanlaayavo Nlamulo, khawaavoovo-tho otthekela nlamulo.
16 Tivawonto naakhenlaahu soolaihera moorweela mwa nroromelo, mwaha wooweera yoovaha ya mahala Muluku onivanhaawe hiyo. Osuulu* wootheene wa Abrahamu, pooti waakhela yoovaha eyo, ohiya paahi ale eniiwelela Nlamulo, mene-tho atthu ootheene erinono nroromelo ntoko na Abrahamu, yoowo ori tiithi aatthu ootheene hiyo.
17 (Eyo ti etthu Soolepa sinhimaaya: “Miyo kohookhaliha tiithi a maloko mantxipale.”) Abrahamu aahoonihera okhalano nroromelo ohoolo wa yoowo onaakhaliha atthu ookhwa akumi ni onuuluma itthu nlelo sihikhanle ntoko sirookhala.
18 Abrahamu khaaweherera waayara anamwane, mene moovarihana ni yooweherera, owo aakhalano nroromelo weera aamukhala tiithi a maloko mantxipale moovarihana ni moota Muluku aalenlaawe, eeraka: “Osuulu* anyu onrowa okhala hiiha.”
19 Ni, nnaamweera nroromelo nawe nahaavukunwe, Abrahamu aasuwela weera khaawera waayara anamwane (woona weera aarino iyaakha sooweeraka 100), ni weera-tho, Sara khaakela owera oyara woona weera aahuuluvala.
20 Menento, mwaha wa yoolaihera ya Muluku, owo khanahovele naari khaahiñye ororomela. Opwaha mwa yeeyo, nroromelo nawe namulipiha ni anvuwiha Muluku.
21 Owo annaroromela weera Muluku aamukwanihera etthu aalaihenraawe.
22 Vano, mwaha wa nroromelo nawe, “owo aahooniwa okhala naxariya.”
23 Menento, masu ooweera “aahooniwa okhala”, khaalepelinwe paahi Abrahamu,
24 nave-tho nlepelinwe hiyo. Hiyo-tho nnoorowa wooniwa okhala anaxariya mwaha wooweera ninnamuroromela Ole onvinyererinhe Yesu, Pwiya ahu, mwa alipa ookhwa.
25 Owo ovahererinwe weera akhwe mwaha wa soottheka sahu, ni ovinyererihinwe weera nikhale anaxariya.
