Yaalepelinwaaya Aroma 11:1-36
11 Vano kinnakoha: Neereke Muluku ohaakhootta atthu awe? Hooye, khaakhontte! Woona weera miyo-tho mwisraeli, osuulu wa Abrahamu, a nloko na Benjamini.
2 Muluku khaakhontte atthu awe, yaawo owo aathanliyaawe woopatxerani. Nyuwo khamusuwenle ele Soolepa sinhimaaya woohima sa Eliya yoowo anvekenle Muluku aavekelelaka ana a israeli?
3 “Yehova,* aawiiva maprofeta aa; aahaanyaanya altaari aa, ni miyo meekhaaka kihanle paahi, ni vano entthuna okiiva.”
4 Vano, Muluku aamwaakhunle moota heeni? “Ni nlelo miyo kookhalano atthu 7.000 ehimukokhorenle Bayaali.”
5 Vamoha-moharu, mahiku ahu ala-tho, yookhala ekhurupu emoha ekhaanini ya atthu oothanliwa* mwaha wa oreera murima otokweene wa Muluku.
6 Vano, waareene mwaha wa oreera murima otokweene wa Muluku nthanlinwaahu, eyo enoonihera weera khaiyene mwaha wa miteko sahu. Waari hiiho, oreera wawe murima otokweene wa Muluku, khawaarowa okhala oreera murima otokweene wa Muluku.
7 Vanonto nihimeke eheeni? Ana a israeli ele yaasaayaxa khewenre ophwanya, menento oothanliwa aaphwanya. Mene akina khayaatthunne wiiwa.
8 Ntoko sinhimaaya Soolepa: “Muluku ooweeriha okona ikhove soowiixera,* weera maitho aya ehoone ni maaru aya ehiiwe, mpaka olelo.”
9 Nave-tho Davidi enre: “Ifeesta saya ikhale miraakho, aani, ikhale miraakho weera saamorihe ni weera ettaruxiwe.
10 Maitho anyu eriipe weera ehoone-tho, ni mithana sanyu suurame wa mahiku ootheene.”
11 Vano, kinnakoha: Neereke ayuda ekwattuwakaru emora, khewenre ovinya? Hooye! Mwaha wa omora waya, atthu ehikhanle ayuda aaphwanya ovuluwa, ni etthu eyo yootannyera ehatxe wa ayuda.
12 Vanonto waareene weera omora wanyu woophwanyiha muhakhu elapo, ni otthikela wanyu ottuli waataphulelaka waaphwanyiha muhakhu mwintxipale atthu a maloko makina, eyo enoonihera weera mareeliho enrowa okhala mantxipale woohima sa nummero noomalela na ayuda ni atthu a maloko makina yathukumanyiwa vale!
13 Vano, kinuuluma ni nyuwo atthu a maloko makina. Woona weera miyo murummwa a maloko makina, miyo kinnavaha mwiitti muteko kinanvarelaaka Muluku.
14 Nave kinweherera weera wawereya vale, atthu a nloko naka ekhaleno ehatxe mwaha wa itthu mwaakhenlaanyu ni kaavuluxe akina a yaawo.
15 Mwaha wookhoottiwa, wohaakhavihera atthu akina a mulaponi okhalano onthamwene ni Muluku. Wakhala weera onoowaakhulela* otthika, onkela okhala ntoko waavinyereriha mwa alipa ookhwa.
16 Opwaha mwa yeeyo, wakhala weera eparte yoopatxera ya ipaawu ennavahiwa ntoko soowiima soopatxera ti yootteela, nto eyo enoonihera weera epaawu yootheene ti yootteela. Ni mukakaari wa mwiri wakhala wootteela, itamphi saya-tho ti sootteela.
17 Vanonto, itamphi ikina soothikiliwa vamwirini. Avinyaka moottopaanyeriwa ni itamphi ikina sa mwiri sa oliveira wa vaate,* nnaamweera nyuwo mwaari itamphi sa mwiri wa oliveira ommela mutuphini. Vano, nyuwo munnattottela mureerelo mikakaari sa oliveira
18 mene muhuupuweleke weera nyuwo tootthuneyaxa opwaha itamphi ikina iye ikumihinwe. Waari weera nyuwo muniisoona okhala ootthuneyaxa, muupuweleke weera nyuwo khamunkhavihera mikakaari, mene mikakaari sinookhaviherani nyuwo.
19 Atthu akina pooti weera: “Mikakaari mikina soothikiliwa weera kittopaanyeriwevo miyo.”
20 Ekhaikhai! Awo aathikiliwa mwaha wooweera khayaakhanleno nroromelo, mene nyuwo munnavirelela okhala va nipuroni vawo mwaha wa nroromelo nanyu. Menento, muhiisunnuwiheke, mukhaleno woova.
21 Vanonto waari weera Muluku oothikila itamphi saamelenlaayano mwiri, munuupuwela weera owo onoowuurelani nyuwo?
22 Nyuwo pooti woona weera Muluku tooreera murima ni etempu emoharu yeeyo toowuuma murima. Owo toowuuma murima ni atthu ale emonre mwaha wooweera khayaarino nroromelo. Mene Muluku onimooreerelani murima nyuwo mwavirelelaru okhala mooreerani mwawe murima. Mwaaheeraru hiiho, itamphi sanyu-tho sinoothikiliwa vamwirini.
23 Ni wakhala weera ayuda enoopatxera woonihera nroromelo, awo enootthikiheriwa veeli ophatteiwa vamwirini vaya, mwaha wooweera Muluku ookhalano owera woowaatthikihera vamwirini vaya.
24 Itamphi sanyu sithikilinwe mwiri sa oliveira wa mutuphini munaphatteiwa mwiri sa oliveira wa vaate ni, moohiyana ni mwiri waapattuxerinwaayano. Eyo enoonihera weera onkela okhala wookhweya itamphi sa mwiri waalelinwaaya otthikiheriwa ophatteiwa vamwirini vaya wa oliveira!
25 Asinna, kintthuna weera musuwele esiiri ela ya Muluku, weera muhuupuweleke weera nyuwo ta miruku: Eparte ekina ya ana a israeli khayiiwelenle mpaka nummero noomalela na atthu a maloko makina ovolowa,
26 ti moota ene yoola ana a israeli ootheene enkelaaya ovuluxiwa. Ntoko sinhimaaya Soolepa: “Nvuluxa onkela okhuma oSiyoni, ni onimoomola soopaka soonanara sa vaate va Yakobe.
27 Ni nna nivarihano kineeraaka kapake naawo kaakumiha soottheka.”
28 Ekhaikhai weera, ayuda akina amwiittani a mitthenka sooreera, ni eyo yohoophwanyihani mureerelo nyuwo. Mene awo ethanlinwe ni Muluku ni owo onnaasivela mwaha wa makholo aya.
29 Muluku khattharuwa mwaha woowaavaha itthu aavanhaawe ni owo khattharuwa owiitthana ale owiitthannaawe.
30 Khalayi, nyuwo khamwaamwiiwelela Muluku, mene vano mwaha woohiiwelela wa ayuda, owo ohoomorelani ikharari.
31 Vano awo khemmwiiwelela Muluku, ni Muluku oowooniherani omoriwa wawe ikharari nyuwo. Mene awosa-tho Muluku pooti waamorela ikharari ntoko oomorenlaaweni nyuwo.
32 Woona weera Muluku onnawoona okhala atthu ootthukiwa mwaha woohiiwelela waya. Hiiho, owo onimwaamorela ikharari ootheene.
33 Mihakhu, miruku ni osuwela wa Muluku, ti soowiixera! Ni mathorihelo awe, khaavo onwera osuwela, ni iphiro sawe khaavo onwera osuwela!
34 “Taani osuwenle minyuupuwelo sa Yehova,* ni taani okhanle onvaha miruku?”
35 Naari “taani opatxenre onvaha etthu Muluku weera Muluku atthuneke omutthikihera?”
36 Mwaha wooweera itthu sootheene ti sa Muluku, ti sawawe ni sinkhuma wa yoowo. Owo onnaphwanela waakhela ovuwa mahiku ootheene. Amem.
