Yaalepelinwaaya Aroma 1:1-32
1 Ekaarta ela elempwale ni Paulo, kaporo a Kristu Yesu. Kohiitthaniwa weera kikhale murummwa ni koothanleliwa weera kaasuwelihe atthu mitthenka sooreera sa Muluku.
2 Muluku aalaihera mwa Soolempwa mitthenka iya sooreera ovinyera khalayi, moorweela mwa maprofeta awe.
3 Mitthenka sene, woohima sa Mwanawe, yoowo aari osuulu wa* Davidi.
4 Ekhaikhai weera owo Mwaana a Muluku, mwaha wooweera Muluku aavarenle muteko owera wa munepa awe wootteela weera anvinyererihe mookhwaani, aani, Yesu Kristu, Pwiya ahu,
5 moorweela mwa yoowo, Muluku oonoonihera oreera wawe murima.* Nto Yesu ookithanla weera kikhale murummwa ni yootthuna weera kaakhavihere atthu a maloko ootheene weera yoonihereke nroromelo ni wiiwelela, ni ottittimiha nsina nawe.
6 Nyuwosa-tho munneerela eparte ya atthu ale a mulaponi yiitthaninwe* weera emutthareke Yesu Kristu.
7 Ekaarta ela mulepelinwe nyuwo ootheene munkhala oRoma, wa ale Muluku onwooniheraawe nsivelo nawe, yaawo owo aathanlalaawe* weera ekhale oororomeleya:
Oreera murima otokweene wa Muluku ni murettele onkhuma wa Muluku, Tiithi ahu, ni wa Apwiya Yesu Kristu, okhale ni nyuwo.
8 Woopatxerani, kinnamuxukurela Muluku aka moorweela mwa Yesu Kristu mwaha wa nyuwosa, mwaha wooweera atthu antxipale a elapo yootheene ennuuluma woohima sa nroromelo nanyu.
9 Kinnanvarela muteko Muluku ni murima aka wootheene, kilaleyaka mitthenka sooreera woohima sa Mwanawe, ni Muluku oosuwela weera miyo kinnooromolani mmavekeloni mwaka woohihiyerereya.
10 Kinnanvekela Muluku weera, wakhala weera ti woowereya ni wakhala weera ti yootthuna ya Muluku, kiwe wooxekurani.
11 Woona weera miyo, kinnatthunaxa owoonani weera kookhavihereni mwa mukhalelo woomunepani, weera mukhaleno nroromelo noolipa;
12 naari keere, nyuwo mulipihe nroromelo naka moorweela mwa nroromelo nanyu, ni miyo kilipihe nroromelo nanyu moorweela mwa nroromelo naka.
13 Asinna, musuwele weera, mwa ikwaha sintxipale miyo kannatthuna wooxekurani, mene khavaawereya. Miyo kaatthuna woona itthu sooreera sinkhumelela mwaha wa muteko ahu, ntoko eneereyaaya ilapo ikina.
14 Miyo kookhalano muritti woowaakhavihera atthu ootheene: akereku ni anamawa,* asuweli ni oohisuwela;
15 nto mwaha wa yeeyo, kinnatthuna vantxipale woolaleerani mitthenka sooreera nyuwosa-tho munkhala oRoma.
16 Miyo nkinuuleliwa muru mitthenka sooreera. Woona weera iyo, owera wa Muluku weera aavuluxe atthu ootheene erino* nroromelo, aapatxeraka ayuda nave-tho akereku.
17 Exariya* ya Muluku ennoonihereya wa atthu ale enoonihera nroromelo, ni eyo ennalipiha nroromelo naya, hiiha ntoko Soolepa sinhimaaya: “Naxariya, anaakhale mwaha wa nroromelo nawe.”
18 Isara sa Muluku sinkhuma wiirimu, sinnaakhuruwela atthu ootheene empaka itthu soonanara. Awosa ennakhoottihera osuweliwa ekhaikhai.
19 Awo ahooniheriwa itthu sikhanle soosuweliwa sa Muluku; ni Muluku mwaneene, owoonihenre itthu iyo.
20 Mene, mikhalelo sawe hiyo nihinweraahu woona, pooti woona wakhala weera nnoowehexexa moota owo opattunxaawe elapo. Hiyo nnoowera omusuwela Muluku niwehexexaka soopattuxiwa owo opattunxaawe. Itthu iya owo opattunxaawe, sinnoonihera owera wawe woohimala, ni sinnoonihera weera owo Muluku. Nto mwaha wa yeeyo, atthu khayaanoono mathowa weera ehimuroromeleke Muluku.
21 Nnaamweera atthu awo yaamusuwenle Muluku, awo khemuttittiminhe ntoko Muluku aya ni khemuxukurenle. Mene awo, muupuwelo aya khawuupuwela etthu, ni khayiiwexexa.
22 Nnaamweera atthu awo yiihimaka okhala oosuwela, awosa toohisuwela.*
23 Ohiya omuttittimiha Muluku yoowo ohinkhwa, awosa enttittimiha ilataratho sa atthu yaawo enkhwa, vamoha ni ilataratho sa apalame, sa asinama a metto mixexe ni iye siniipurula.
24 Vano, Muluku onnaakhulela weera epakeke sootthuna soonanara sa murima aya, ni awosa ennapakela erutthu aya itthu soowuuliha muru.
25 Awo aatxentxiha ekhaikhai ya Muluku ni wootha, enkokhorela ni envarela muteko itthu Muluku opattunxaawe, ohiya Mpattuxa omphwanela ovuwihiwa wa mahiku ootheene. Amem.
26 Tivawonto, Muluku ohaakhulela weera yootthuna aya ya okonihana woohireerela woohoona wuuliha muru, waawere awo. Asithiyana aatxentxiha okonihana ni alopwana, evirikanyihaka ele Muluku ahimmaawe.
27 Opwaha mwa yeeyo, asilopwana aahiya okonihana ni asithiyana ntoko yaapakelinwaaya, ni ensivelana alopwanaru epakaka itthu soowuuliha muru mukina ni mukhwaawe. Mene awo enoorowa ottaruxiwa mwaha wa soopaka saya soonanara.
28 Nto woona weera awo khayoona weera ti wootthuneya omusuwela Muluku,* Muluku ohaahiya ovirelela yuupuwelaka itthu soohivareleya muteko, ni opaka itthu yahaaphwanelaaya opaka.
29 Atthu awo yaasareya itthu sootheene sa ohixariya, onanara murima, ohikwaneya, opaka itthu soonanara. Ni awosa aasareya nrima, wiiva, waakhulana, wootha, ni aakhalano yootthuna yoowaahasula atthu akina, nave-tho anamwaapa,
30 anamootha, amwiittani a Muluku, oowiikuxa, oowiisoona, ni yaapakaka apalano oonanara. Ni awo khenwiiwelela asipapaya,
31 oohikhalano miruku, oohikwanihera ele elaihenraaya ni oohimoriwa ikharari.
32 Awosa aasuwela nnene sene weera Muluku ohimme weera atthu empaka itthu sene seiya ennaphwanela wiiviwa, ohiya paahi opakaru itthu iya, awo-tho ennawaakhulela atthu akina envirelela opaka itthu iya.
