Yaalepelinwaaya Aroma 6:1-23
6 Neereke eyo entthuna ohima weera nintthuneya ovirelela opaka yoottheka weera oreera murima otokweene wa Muluku onnooniheraawe hiyo waatxeerereye?
2 Hooye! Khanikhanle akaporo a yoottheka, vanonto ninwera hayi ovirelela okhala mwa yoottheka?
3 Nyuwosa khamusuwenle weera ootheene hiyo nipatisinwe mwa Kristu Yesu, nipatisinwe weera neereleke eparte okhwa wawe?*
4 Mwa yeeyo, moorweela mwa opatiso ahu, noovithiwa vamoha ni yoowo mookhwaani mwawe. Hiihaale ntoko Yesu Kristu ovinyererihinwaawe mookhwaani moorweela mwa ikuru sa Atiithi, hiyo-tho nookhalano ekumi enyowani.
5 Hiyo nohiiraana nuuwo mwaha wooweera owo ohookhwa oweharu-tho hiyo nohookhwa, hiyo nnookhala oowiiraana nuuwo weera navinyererihiwe weera naakhele ekumi ntoko hiihaale owo ovinyererihinwaawe weera aakhele ekumi.
6 Noosuwela weera ekumi ahu ya khalayi yookhomeliwa vamoha nuuwo vamwirini ni yootthuna yooweera avenxe yoottheka murutthuni mwahu, weera nihikhale-tho akaporo a yoottheka.
7 Mwaha wooweera mutthu okhwiiye ooleveleliwa yoottheka awe.
8 Vanonto, waari weera ninkhwa mwa Kristu, niroromeleke-tho weera nnookhala-tho ni ekumi ni yoowo.
9 Noosuwela weera, vano Kristu ovinyererihinwaawe mwa alipa ookhwa, khankhwa-tho. Okhwa khommulamulela-tho.
10 Owo okhwiiye weera amalihe yoottheka wa mahiku ootheene. Vano ekumi oraaweno viinaano, opaka yootthuna ya Muluku.
11 Vamoha-moharu, nyuwosa-tho muntthuneya weera mwiisooneke ntoko atthu ookhwa woohima sa yoottheka, mene mukhalaka weera mpake yootthuna ya Muluku ntoko atthareli a Kristu Yesu.
12 Vanonto muhihiye yoottheka evirelelaka woolamulelani erutthu anyu eweerihakani wiiwelela sootthuna saya.*
13 Muhivaherere erutthu anyu yoottheka weera mpakeke itthu soonanara, mene mwiivaherere wa Muluku ntoko atthu ekhumme akumi mookhwaani. Vanonto nvaherere ekumi anyu wa Muluku weera mpake itthu sooreera.
14 Yoottheka khenoolamulelani-tho nyuwo ntoko apwiya anyu, woona weera vano nyuwo khamuneettihiwa ni Nlamulo, mene ni oreera murima otokweene wa Muluku.
15 Woona weera khanintthara Nlamulo, neereke eyo entaphulela weera hiyo pooti opaka yoottheka mwaha wooweera nneettihiwa ni oreera murima otokweene wa Muluku? Hooye!
16 Nyuwo khamusuwenle weera mwiivaherera wa mutthu weera mmwiiweleleke ntoko kaporo, nyuwo munnakhala kaporo a mutthu owo? Vanonto, neereke nyuwo akaporo a yoottheka enroiha wookhwaani, naari akaporo oowiiwelela enkumihera exariya?
17 Ninnamuxukurela Muluku mwaha wooweera nnaamweera khalayi mwaari akaporo a yoottheka, vano nyuwo munniiwelela ni murima anyu wootheene sooxuttiha muxuttihinwaanyu.
18 Mwataphuliwa vale yoottheka, nyuwosa munrowa okhala akaporo a exariya.
19 Mene mwaha wootteettheya erutthu anyu, kinuuluma ni nyuwo kivarelaka muteko masu atthu esuwenlaaya. Nyuwosa ntoko akaporo mwaavaherera irutthu sanyu miteko soonanara ni itthu soonanara, mene vano, nvaherere irutthu sanyu sa exariya weera mpakeke itthu sooreera.
20 Mwaha wooweera emaara nyuwosa mwaaraanyu akaporo a yoottheka, nyuwosa khamwaatthuneya opaka itthu sooreera.
21 Soopaka sanyu sa khalayi, saakumihera eheeni? Saakumihera itthu vano sinwuulihani muru, ni itthu iyo sinnaroiha mookhwaani.
22 Mene vano mutaphulinwaanyu mwa yoottheka, mpakeke itthu sootteela ntoko akaporo a Muluku. Itthu iyo sinnaphwanyiha ekumi yoohimala.
23 Nlivo na yoottheka, ti okhwa, mene etthu Muluku onnivahaawe, ekumi yoohimala moorweela mwa Kristu Yesu, Pwiya ahu.
