Yaalepelinwaaya Aroma 10:1-21
10 Asinna, yootthuna ya murima aka ni etthu kinanvekelaaka Muluku ti yooweera atthu a nloko naka evuluxiwe.
2 Miyo kinnahelela onamoona weera awo enniilipihera weera emukokhorele Muluku mwa nthiti, mene empaka eyo ehimusuwenle nnene Muluku.
3 Woona weera awo khesuwenle ele Muluku onhimaawe weera ti ya exariya, awo ennatthara ele awo enoonaaya okhala ya exariya. Yookhumelelaaya, awo khentthara exariya ya Muluku woohima sa etthu yooreera.
4 Mwaha wooweera Kristu oomaliha Nlamulo. Vano ootheene ole ommuroromela owo, onnahimmwa okhala naxariya.
5 Mose oolepa woohima sa moota woophwanya exariya moorweela mwa Nlamulo: “Mutthu ompaka itthu sene seiyo, onookhala mukumi moorweela mwa itthu sene seiyo.”
6 Mene woohima sa exariya enkhumelela mwaha wookhalano nroromelo, masu a Muluku eneera: “Muhihime vamurimani vanyu: ‘Taani oneera awele wiirimu?’ eyo tiiyo, oneera amukuruxe Kristu wiirimu;
7 naari, ‘Taani oneera akhuruwele munlittini moowiixa?’ eyo tiiyo, weera anvinyererihe Kristu mwa alipa ookhwa.”
8 Vano, Soolepa sinhima eheeni? “Nsu nri vakhiviru vanyu, mmwaanoni mwanyu, ni vamurimani vanyu.” Eyo enhima, “nsu” na nroromelo, hiyo ninlaleyaahu.
9 Wakhala weera munoolaleya ni eyano anyu weera Yesu ti Pwiya, ni vamurimani vanyu mwakhalano nroromelo weera Muluku onvinyereriha mwa alipa ookhwa, nyuwo munoovuluxiwa.
10 Mwaha wooweera, weera mukhale naxariya, ontthuneya woonihera vamurimani vanyu weera mookhalano nroromelo, ni weera nvuluwe, ontthuneya olaleya mitthenka iyo ni eyano anyu.
11 Yoolepa emoha ennamuhima Kristu yeeraka: “Ole ommuroromela yoowo khawa uuliwa muru.”
12 Muyuda ni mukereku khevirikanne. Atthu ootheene awo, Pwiya aya ori mmoha, yoowo ori oovaha, onnaavaha atthu ootheene enanvekela nikhavihero.
13 Vano “ootheene ale envekela eromolaka nsina na Yehova,* enoovuluxiwa”.
14 Vano, enanvekele hayi yoowo awo ehimuroromenlaaya? Ni enaamuroromele hayi yoowo awo ehiiwalaaya aromoliwaka? Ni eniiwe hayi ahikhanle mutthu oowaalaleera?
15 Ni enkela olaleera hayi ehirummwale? Hiiho ntoko silempwalaaya: “Ooreera, manaani aatthu ale enlaleya mitthenka sooreera sa itthu sooreera!”
16 Mene khaiyene weera atthu ootheene enimwiiwelela mitthenka sooreera. Mwaha wooweera Yesaya ohimme ha: “Yehova,* taani ororomenle ele ninlaleyaahu?”*
17 Mwa yeeyo, mutthu onkhalano nroromelo iiwa masu. Ni masu enniiwiwa wakhala weera ennuulummwa* woohima sa Kristu.
18 Vano, nikoho naka ti nna: Neereke awo khayiiwale nnene mitthenka iya? Aani, ahiiwa. Mweekhaikhai, Soolepa sinhima ha, ahiiwa: “Mwaha wooweera soolaleiwa elapo yootheene ya vathi, ni ale enkhala woorakamela, ahiiwa”.
19 Miyo-tho kinnakoha veeli: Neereke Israeli khiiwexenxe nnene? Ohiiwa, mwaha wooweera Mose woopatxerani ohimme weera: “Moorweela mwa maloko makina miyo kinimootannyerani ehatxe. Ni kinooweerihani okhala oonyoonyiwa kaavarelaka muteko atthu a maloko makina ehikhanleno miruku.”*
20 Vano, Yesaya moolipa murima onneera: “Koophwanyiwa ni yaale yahaakaasa miyo; ni koosuweliwa ni yaale yahaakikoha.”
21 Mene owo onneera woohima sa Israeli: “Mahiku ootheene kinnawookolela matata aka atthu ala oohiiwelela ni oottiya maaru.”
