Yaalepelinwaaya Aroma 16:1-27
16 Kinnoovekelani weera mmwaakhele murokorihu, Febe, yoowo onkhavihera muloko wa oKenkhereya.
2 Txontte, mmwaakhele moophwanelela moovarihana ni moota enaakhelanaaya atthu Aapwiya. Ni mmukhavihereke mwa itthu owo oneeraawe ahaaweleke, mwaha wooweera owo oowaakiha asinna antxipale okihela mpuwa miyo.
3 Munvaherere isalaamu saka Priska ni Akila, yaawo kinvaraakano muteko wa Kristu Yesu.
4 Awosa aahela ekumi aya veerisani mwaha wa miyo.* Miyo vamoha ni miloko sootheene sa atthu ehikhanle ayuda ninnaaxukurela awosa.
5 Nvaherere-tho isalaamu saka muloko onthukumana owannyayasa. Munvaherere isalaamu oosiveleya aka Epeneto, yoowo oneerela eparte ya atthu oopatxera omusuwela Kristu wAsia.
6 Munvahe isalaamu Maria, ovanre muteko moowiilipihera weera ookhavihereni.
7 Munvahe isalaamu Androniko ni Junia, yaawo eri amusi aka ni asikhwaaka kaatthukinwaakano vamoha. Awosa atthu oosuweliwa nnene sene ni arummwa, ni awo, atthareli a Kristu mwa etempu yintxipale okipwaha miyo.
8 Munvaherere isalaamu saka Ampliato, nthamwene aka oosiveleya, yoowo ori mutthareli Aapwiya.
9 Munvahe isalaamu Urbano, yoowo ninvaraahuno vamoha muteko wa Kristu. Ni nthamwene aka oosiveleya Stakhi.
10 Munvahe isalaamu Apele, yoowo ori murumeyi oowaakhuleliwa a Kristu. Ni mwaavaherere isalaamu atthu a vaate va Aristobulo.
11 Munvaherere isalaamu mmusi aka Erodiani. Mwaavaherere isalaamu atthu enkhala vaate va Narsisio, yaawo eri arumeyi Aapwiya.
12 Munvaherere isalaamu Trifena ni Trifosa asithiyana yaawo eniilipihera ovara muteko wa Apwiya. Munvahe isalaamu Perside murokora nimmusivela ahu, woona weera owo onniilipihera waavarela muteko Apwiya.
13 Munvahe isalaamu Rufo, oothanliwa ni Apwiya, ni ameyawe, yaawo-tho yaari ntoko ameyaka miyo.
14 Munvahe isalaamu Asinkrito, Flegonti, Herme, Patroba, Herma ni asinna eri vamoha naawosa.
15 Munvahe isalaamu Filologo ni Julia, Nereyo ni murokoriye, ni Olimpia ni atthu ootheene a Muluku eri naawosa.
16 Nvahaneke isalaamu mukina ni mukhwaawe ni epeexu. Miloko sootheene sa Kristu sinnoovahani isalaamu.
17 Vanonto asinna, kinnoovekelani weera mwiikosoope ni ale enkumihera* okawanyeya ni enweeriha atthu akina ohikhalano nroromelo,* evirikanyihaka itthu nyuwo muxuttenraanyu. Mukhale ottayi ni atthu awo.
18 Mwaha wooweera atthu awo khaiyene akaporo Apwiya ahu Kristu, mene akaporo a sootthuna saya. Awosa ennaawoka atthu ni masu aya oowootha, ni ooweepesa.
19 Mene atthu ootheene aasuwela weera nyuwo toowiiwelela, ni miyo kinnahakalala mwaha wa yeeyo. Kintthuna weera mukhale a miruku weera mpakeke itthu sooreera ni mukhaleke atthu oohisuwela musempaka opaka itthu soonanara.
20 Moohipisa va, Muluku onvaha murettele onoomunyaanya Satana vathi va manaani anyu. Oreera murima otokweene wa Apwiya ahu Yesu Kristu okhale ni nyuwo.
21 Timotiyu yoowo kinvaraakano vamoha muteko, onnoovahani isalaamu, nave-tho amusi aka Lusio, Yasoni ni Sosipatro, ennoovahani isalaamu.
22 Miyo Tersio, kilempe ekaarta ela, kinnoovahani isalaamu mwa Apwiya.
23 Gaio, yoowo onkivaha nipuro noophiyera owannyawe, ni muloko wootheene onthukumana owannyawe, onnoovahani isalaamu. Ni Erasto mulipa oowiiyaathi musurukhu wa esidade, onnoovahani isalaamu. Nave-tho munnawe, Kwarto, onnoovahani isalaamu.
24 * ——
25 Muluku pooti wookhalihani oolipa moorweela mwa mitthenka sooreera miyo kinlaleyaaka, ni olaleya wa Yesu Kristu. Mitthenka iya sooreera sinnavarihana ni okumiheriwa wa esiiri ya Muluku yeeyo yaavithinwe etempu yintxipale.
26 Mene vano, yohooniheriwa* ni aasuwelihiwa atthu a maloko ootheene, moorweela mwa Soolempwa sa eprofesiya. Eyo ennavarihana ni yooruma ya Muluku yoowo onkhala wa mahiku ootheene. Owo ontthuna weera atthu a maloko ootheene, emuroromeleke ni emwiiweleleke.
27 Muluku yoowo paahi ori oosuwela, onnaphwanela ovuwihiwa mahiku ootheene, moorweela mwa Kristu Yesu. Amem.
