Yaalepelinwaaya Aroma 14:1-23
14 Mmwaakheleke nnene mutthu ole orinono nroromelo nootteettheya,* mene muhaathoriheke atthu ale erinono moonelo woovirikana ni wawinyu.
2 Mutthu orinono nroromelo noolipa, onnatxa yootxa eri poothe. Mene mutthu orinono nroromelo nootteettheya* ontxa paahi maponttaru.
3 Mutthu ole ontxa yootxa eri poothe, ahimuramuseke ole ohintxa yootxa eri poothe. Ni mutthu ole ohintxa yootxa eri poothe, ahimuthoriheke ole ontxa yootxa eri poothe. Woona weera Muluku oomuthanla mutthu owo.
4 Nyuwo taani weera mmuthoriheke murumeyi a mutthu mukina? Pwiya akaporo owo tonoona waari weera kaporo owo oopaka etthu yooreera naari hooye. Akhaviheriwaka ni Yehova,* mutthu owo pooti okhumela nnene.
5 Atthu akina enuupuwela weera nookhala nihiku nri nootepa otthuneya opwaha mahiku makina, ni akina, enuupuwela weera nenne nri nihiku, nnoolikana ni mahiku makina. Yoole ori mutthu, aroromeleke woohima sa etthu othanliyaawe.
6 Atthu ale enoona weera nookhala nihiku nri nootepa otthuneya, empaka eyo weera emuttittimihe Yehova.* Atthu ale entxa yootxa eri poothe, entxa weera emuttittimihe Yehova,* woona weera ennamuxukurela Muluku mwaha wa yootxa. Nave-tho wa ale ehintxa yootxa eri poothe, emmuttittimiha Yehova* ni ennamuxukurela Muluku.
7 Mweekhaikhai, khaavo a hiyo oniikhalela mwaneene awe, ni khaavo oniikhwela mwaneene awe.
8 Woona weera naakhalaka ni ekumi nimmukhalela Yehova.* Ni naakhwaaka, nimmukhwela Yehova.* Tivawonto, nikhale akumi, nikhwe, hiyo atthu a Yehova.*
9 Tivawonto Kristu okhwiiyaawe ni ovinyerenraawe,* weera akhale Pwiya aatthu ookhwa ni aatthu akumi.
10 Vanonto, mwaha wa heeni mummuthorihaanyu munninyu? Naari, mwaha wa heeni mummuramusaanyu munninyu? Ootheene hiyo nnoorowa okhala ohoolo wa Muluku, ni owo ononthoriha.
11 Woona weera yoolempwa: “‘Miyo kinnalipela’, ohimme Yehova,* ‘atthu ootheene enookokhora ohoolo waka ni atthu ootheene enrowa osuwela weera miyo ka Muluku’.”
12 Tivawonto, mutthu ti mutthu a hiyo onrowa waakhula meekhaawe ohoolo wa Muluku.
13 Vanonto, muhithorihaneke-tho mukina ni mukhwaawe. Opwaha mwa yeeyo, mukhaleno yoolakela, yoohipaka etthu eneera etteettheihe* nroromelo na munna naari ommoriha.
14 Miyo kinnaroromela wa Apwiya Yesu weera khiyaavoovo etthu nintxaahu eri ya mwiikho. Vano, mutthu oonaka weera yootxa emoha ti ya mwiikho, yootxa eyo enkhalaaya ya mwiikho weera owo ahitxe.
15 Wakhala weera munninyu ookwattuwa mwaha wa yootxa nyuwo muntxaanyu, nyuwo khamunoonihera nsivelo. Kristu omukhwenle mutthu owo, muhiive nroromelo nawe mwaha wa yootxa nyuwo muntxaanyu.
16 Muhimphwanyihe mathowa mutthu weera uulumeke onyala woohima sa itthu sooreera nyuwo mumpakaanyu.
17 Omwene wa Muluku khaiyene woohima sa etthu nintxaahu naari ninwuraahu, etthu yootepa otthuneya ori hiyo okhala anaxariya, okhala ni murettele ni ohakalala ni munepa wootteela.
18 Mwaha wooweera ootheene ole onanvarela Kristu moota ene yoola, onnaakhuleliwa ni Muluku ni onnaakhuleliwa ni atthu.
19 Tivawonto, niilipihereke waasaasa itthu sinkumihera murettele ni itthu sinkhavihera olipihana mukina ni mukhwaawe.
20 Muhiye okumula miteko sa Muluku mwaha wa yootxa. Ekhaikhai weera sootxa sootheene sinnaakhuleliwa otxa, mene ti woonanara otxa etthu enweeriha atthu akina okwattuwa.*
21 Ti wooreera ohikhuura enama, ohiwura eviinyu, naari ohipaka etthu eri poothe ekina, ekhanle yoomukwattuliha* munna.
22 Itthu nyuwo munroromelaanyu woohima sa itthu iya, ti yawinyu nyuwo vamoha ni Muluku. Oohakalala tuule ompaka itthu moovarihana ni yoothanla awe ni ohiniithoriha mwaha wa yoothanlaawe.
23 Mene, wakhala weera mutthu onnahovela ni nnaamweera vareene hiiho, anatxa, owo ookhalano nthowa. Mwaha wooweera etthu ompakaawe khenvarihana ni nroromelo. Ni yeele eri etthu nimpakaahu ehinvarihana ni nroromelo, yoottheka.
