1. U ya nga 1 Petro 3:8, ndi ngani ri tshi takalela u vha na vhathu vha re na ndavha na mutakalo washu na nḓila ine ra ḓipfa ngayo?

RI TAKALELA u vha na vhathu vha re na ndavha na mutakalo washu na nḓila ine ra ḓipfa ngayo. Vha lingedza u ḓivhea vhuimoni hashu u itela u pfesesa nḓila ine ra humbula na u ḓipfa ngayo. Vha ṱhogomela zwine ra zwi ṱoḓa nahone vha a ri thusa na musi ri sa athu vha humbela. Ri dzhiela nṱha vhathu vhane vha sumbedza uri vha a ri “[pfela] vhuṱungu.” *—Vhalani 1 Petro 3:8.

2. Ndi ngani zwi songo leluwa u pfela vhaṅwe vhuṱungu?

² Sa Vhakriste, ri ṱoḓa u pfela vhaṅwe vhuṱungu. Fhedzi ngoho ndi ya uri ri tea u shumela khazwo. Ndi ngani? Ndi ngauri a ro ngo fhelela. (Vharoma 3:23) Nga nṱhani ha zwenezwo, ri fanela u lwisana na mukhwa we ra bebwa nawo wa u humbulela riṋe vhaṋe fhedzi. Nahone vhaṅwe vhashu ri kundelwa u pfela vhuṱungu nga nṱhani ha nḓila ye ra aluswa ngayo kana zwe zwa itea vhutshiloni hashu. Nahone ri nga vha ri tshi ṱuṱuwedzwa nga nḓila ine vhathu vhane ra tshila navho vha humbula ngayo. Kha ano maḓuvha a vhufhelo, vhathu vhanzhi a vha pfeli vhaṅwe vhuṱungu. Nṱhani hazwo, vha “funa vhone vhaṋe fhedzi.” (2 Tim. 3:1, 2) Ndi mini zwine zwa nga ri thusa uri ri kunde khaedu dzine dza ita uri zwi ri konḓele u pfela vhaṅwe vhuṱungu?

3. (a) Ri nga khwinisa hani nḓila ine ra pfela ngayo vhuṱungu? (b) Ri ḓo haseledza mini kha ino thero?

³ Arali ra edzisa Yehova Mudzimu na Murwa wawe Yesu Kristo, ri ḓo pfela vhuṱungu nga ho engedzeaho. Yehova ndi Mudzimu wa lufuno nahone u ri vhetshela tsumbo yavhuḓi ya u pfela vhuṱungu. (1 Yoh. 4:8) Yesu o edzisa tsumbo ya Khotsi awe nga ho fhelelaho. (Yoh. 14:9) Musi e kha ḽifhasi, o sumbedza nḓila ine muthu  a nga sumbedza ngayo u pfela vhuṱungu. Kha ino thero, ri ḓo thoma nga u haseledza nḓila ye Yehova na Yesu vha sumbedza ngayo uri vha a pfela vhaṅwe vhuṱungu. Nga murahu, ri ḓo haseledza nḓila ine ra nga vha edzisa ngayo.

4. Yesaya 63:7-9 i sumbedza hani uri Yehova u na ndavha na nḓila ine vhashumeli vhawe vha ḓipfa ngayo?

⁴ Bivhili i ri funza uri Yehova u na ndavha na nḓila ine vhashumeli vhawe vha ḓipfa ngayo. Sa tsumbo, ṱhogomelani nḓila ye Yehova a ḓipfa ngayo musi Vhaisiraele vha kale vha tshi ṱangana na milingo. Bivhili i ri: “Hoṱhe he vha vhaisala, o pfa a tshi vhaisala-vho.” (Vhalani Yesaya 63:7-9.) Nga murahu, a tshi shumisa muporofita Sakaria, Yehova o amba uri musi vhathu vhawe vha tshi farwa nga nḓila i si yavhuḓi hu vha hu tshi tou nga ndi ene ane a khou farwa nga nḓila i si yavhuḓi. Yehova o vhudza vhashumeli vhawe uri: “Ane a vhuya a ni kwama o nndonga munwe iṱoni.” (Sak. 2:8, Bivhili Khethwa.) Yeneyo ndi nḓila yavhuḓi vhukuma ine ya sumbedza uri Yehova u pfela vhathu vhawe vhuṱungu!

5. Ṋeani tsumbo ya nḓila ye Yehova a dzhia ngayo vhukando u itela u thusa vhashumeli vhawe vhe vha vha vha tshi khou tambula.

⁵ Yehova ha sokou pfela vhuṱungu vhashumeli vhawe vhane vha khou tambula, fhedzi u ita zwo engedzeaho. U dzhia vhukando u itela u vha thusa. Sa tsumbo, musi Vhaisiraele vhe vhupulini ngei Egipita, Yehova o vha a tshi pfesesa vhuṱungu havho nahone zwenezwo zwo mu ita uri a vha vhofholole. Yehova o vhudza Mushe uri: “Ngangoho vhusiwana ha vhathu vhanga . . . , ndo vhu vhona, zwililo zwavho ndo zwi pfa . . . Maṱhupho avho ndi a a ḓivha. Ndo ḓela zwone uri ndi vha tshidze zwanḓani zwa Vha-Egipita.” (Ek. 3:7, 8) Yehova o vhofholola vhathu vhawe vhupulini ngauri o vha a tshi vha pfela vhuṱungu. Nga murahu ha miṅwaha minzhi, Vhaisiraele vho ṱhaselwa nga maswina avho musi vhe Shangoni ḽo Fulufhedziswaho. Yehova o aravha hani? O “vha pfela vhuṱungu vha tshi khou tambudzwa nga vhapwanyeledzi na vhaṱhuphi.” U pfela hawe vhuṱungu zwo dovha zwa mu sudzulusela uri a thuse vhathu vhawe. O rumela vhahaṱuli uri vha tshidze Vhaisiraele zwanḓani zwa maswina avho.—Vhahaṱ. 2:16, 18.

6. Ṋeani tsumbo ya nḓila ye Yehova a pfela ngayo vhuṱungu muthu we a humbula nga nḓila yo khakheaho.

 ⁶ Yehova u pfela vhuṱungu vhathu vhawe naho nḓila ine vha humbula ngayo nga tshiṅwe tshifhinga i tshi vha yo khakhea. Ṱhogomelani tsumbo ya Yona. Mudzimu o ruma onoyo muporofita uri a ye u ḓivhadza mulaedza wa khaṱulo kha vhathu vha Ninive. Mudzimu o khetha u sa vha fhelisa musi vha tshi rembuluwa. Fhedzi Yona ho ngo takadzwa nga yeneyo phetho. Zwo “mu sinyuwisa” ngauri vhuporofita hawe ha uri Ninive u ḓo fheliswa a ho ngo ḓadzea. Fhedzi Yehova ho ngo fhelela Yona mbilu nahone o mu thusa uri a shandule nḓila ine a humbula ngayo. (Yona 3:10–4:11) Nga u ya ha tshifhinga, Yona o pfesesa zwe Yehova a vha a tshi khou mu funza zwone nahone Yehova o mu shumisa uri a ṅwale eneo mafhungo u itela u vhuyedza riṋe.—Vharoma 15:4. *

7. Nḓila ine Yehova a shumisana ngayo na vhathu vhawe i ri khwaṱhisedza mini?

⁷ Nḓila ine Yehova a shumisana ngayo na vhathu vhawe i ri khwaṱhisedza uri u pfela vhuṱungu vhashumeli vhawe. U a zwi vhona musi muṅwe na muṅwe washu a tshi pfa vhuṱungu na u tambula. Yehova u “ḓivha dzimbilu dza vhana vha vhathu.” (2 Koron. 6:30) U pfesesa zwoṱhe zwine ra zwi humbula, nḓila ine ra ḓipfa ngayo na zwine ra kundelwa u zwi ita. Nahone a nga si ḓo “tenda [ri] tshi lingwa lune [ra] sa ḓo kona u konḓelela.” (1 Vhakor. 10:13) Ḽeneḽo fulufhedziso ḽi khuthadza lungafhani!

8-10. Ndi mini zwe zwa thusa Yesu uri a pfele vhaṅwe vhuṱungu?

⁸ Musi Yesu e kha ḽifhasi, o vha a tshi pfela vhaṅwe vhathu vhuṱungu. Maṅwe a masia mararu e a thusa Yesu uri a vhe na ndavha na vhaṅwe vhathu ndi a tevhelaho. Ḽa u thoma, samusi zwo bulwa ngei nṱha, Yesu o sumbedza pfaneleo i fanaho na ya Khotsi awe. Yesu o vha a tshi funa vhathu u fana na Khotsi awe. Naho Yesu o takalela zwithu zwoṱhe zwe a thusa Yehova u zwi ita, zwihuluhulu o “takalela vhana vha vhathu.” (Mir. 8:31) Lufuno lwo ita uri Yesu a vhe na ndavha na nḓila ine vhaṅwe vha ḓipfa ngayo.

⁹ Ḽa vhuvhili, Yesu o vha a tshi ḓivha zwi re mbiluni u fana na Yehova. O vha a tshi ḓivha zwiṱuṱuwedzi zwa vhathu na nḓila ine vha ḓipfa ngayo. (Mat. 9:4; Yoh. 13:10, 11) Nga zwenezwo, musi Yesu a tshi ṱhogomela uri vhathu vho vha vho tsikeledzea, o vha pfela vhuṱungu nahone zwenezwo zwa mu ita uri a vha khuthadze.—Yes. 61:1, 2; Luka 4:17-21.

¹⁰ Ḽa vhuraru, Yesu o tshenzhela dziṅwe dza khaedu dze vhathu vha dzi tshenzhela. Sa tsumbo, Yesu o alutshela muṱani u si na zwawo. Yesu o guda u ita mushumo wa zwanḓa u konḓaho vhukuma musi a tshi shuma na Yosefa khotsi awe vha si vha malofhani. (Mat. 13:55; Marko 6:3) Zwi vhonala u nga Yosefa o lovha musi Yesu a sa athu fhedza vhuḓinḓa hawe kha ḽifhasi. Nga zwenezwo, zwi vhonala u nga Yesu o tshenzhela vhuṱungu ha u felwa nga ane a mu funa. Nahone o vha a tshi ḓivha uri zwi hani u vha na mashaka ane a si tende zwine wa tenda khazwo. (Yoh. 7:5) Honoho vhuimo na vhuṅwe, hu nga vha ho thusa Yesu uri a pfesese khaedu dzine vhathu vha ṱangana nadzo na nḓila ine vha ḓipfa ngayo.

11. Ndi lini he Yesu a sumbedza uri u na ndavha na vhathu? Ṱalutshedzani. (Sedzani tshifanyiso tshi re kha gwati.)

¹¹ Uri Yesu u na ndavha na vhathu zwo vhonala zwihuluhulu musi a tshi ita vhuṱolo. Yesu ho ngo sokou ita vhuṱolo ngauri o vha a tshi tea u vhu ita. O “pfela vhuṱungu” vhe vha vha vha tshi khou tambula. (Mat. 20:29-34; Marko 1:40-42) Sa tsumbo, vhonani nga maṱo a muhumbulo uri Yesu o ḓipfa hani musi a tshi dzhia munna o dzingaho  nḓevhe a sa koni u amba we a vha e vhukati ha gogo ḽa vhathu nahone a mu fhodza kana musi a tshi vusa muṱhannga, we a vha e ene ṅwana e eṱhe kha mme awe. Nahone mme awe vho vha vhe tshilikadzi. (Marko 7:32-35; Luka 7:12-15) Yesu o vha a tshi pfela vhenevho vhathu vhuṱungu nahone a tshi ṱoḓa u vha thusa.

12. Yohane 11:32-35 i sumbedza hani uri Yesu o pfela vhuṱungu Marita na Maria?

¹² Yesu o pfela vhuṱungu Marita na Maria. “Yesu [o] lila” musi a tshi vhona vha tshi khou lilela khaladzi avho Lazaro. (Vhalani Yohane 11:32-35.) Ho ngo lilela uri o xelelwa nga khonani yawe ya tsini fhedzi. Ngoho ndi ya uri o vha a tshi zwi ḓivha uri u ḓo vusa Lazaro. Nṱhani hazwo, o lila nga nṱhani ha uri o vha a tshi pfesesa vhuṱungu vhune khonani dzawe dza khou vhu pfa.

13. U ḓivha uri Yesu u a pfela vhuṱungu zwi ri khuthadza hani?

¹³ Ri a vhuyelwa musi ri tshi ḓivha uri Yesu u a pfela vhuṱungu. Ngoho ndi ya uri u fhambana na Yesu, a ro ngo fhelela. Fhedzi, ri a mu funa nga nṱhani ha nḓila ye a fara ngayo vhaṅwe. (1 Pet. 1:8) U ḓivha uri u khou vhusa sa Khosi Muvhusoni wa Mudzimu zwi a ri khuthadza. Hu si kale u ḓo fhelisa thambulo yoṱhe. Nga nṱhani ha uri Yesu o no vhuya a vha muthu, u kha vhuimo havhuḓi ha u thusa vhathu uri vha fhole kha thaidzo dzoṱhe dze dza vhangiwa nga muvhuso wa Sathane. Ngoho ndi ya uri ro fhaṱutshedzwa nga u vha na Muvhusi ane a ri “pfela vhuṱungu kha vhushayanungo hashu.”—Vhaheb. 2:17, 18; 4:15, 16.

14. Vhaefesa 5:1, 2 i ri sudzulusela uri ri ite mini?

¹⁴ Musi ri tshi humbula tsumbo yo vheiwaho nga Yehova na Yesu, zwi ri sudzulusela uri ri pfele vhaṅwe vhuṱungu. (Vhalani Vhaefesa 5:1, 2.) A ri koni u vhona zwi re mbiluni u fana navho. Naho zwo ralo, ri nga lingedza u pfesesa nḓila ine vhaṅwe vha ḓipfa ngayo na zwine vha zwi ṱoḓa. (2 Vhakor. 11:29) U fhambana na vhathu vha ḽino shango vhane vha humbulela vhone vhaṋe fhedzi, a ri lweli u ‘vha na dzangalelo kha mafhungo ashu fhedzi, fhedzi ri lwela u vha na dzangalelo na kha mafhungo a vhaṅwe.’—Vhafil. 2:4.

15. Ndi vhafhio vhane zwihuluhulu vha fanela u sumbedza uri vha a pfela vhuṱungu?

¹⁵ Vhahulwane vha tshivhidzo vha fanela u pfela vhuṱungu. Vha a ḓivha uri Yehova o vha ṋea vhuḓifhinduleli ha u ṱhogomela nngu dzawe. (Vhaheb. 13:17) Vhahulwane vha tshivhidzo vha fanela u pfela vhuṱungu u itela u thusa vhahavho. Vhahulwane vha tshivhidzo vha nga sumbedza hani uri vha a pfela vhuṱungu?

16. Muhulwane ane a pfela vhuṱungu u ita mini, nahone ndi ngani zwenezwo zwi zwa ndeme?

¹⁶ Muhulwane wa tshivhidzo ane a pfela vhuṱungu u fhedza tshifhinga na Vhakriste ngae. U vhudzisa mbudziso nahone nga murahu a thetshelesa nga vhuronwane a sa fheli mbilu. Zwenezwo ndi zwa ndeme, zwihuluhulu arali iṅwe nngu i tshi khou ṱoḓa u mu swomolela zwa haṋwani fhedzi i tshi kundelwa u zwi amba. (Mir. 20:5) Musi muhulwane a tshi fhedza tshifhinga na vhahawe nga u ḓifunela zwi ita uri vha mu fulufhele, vha vhe na vhukonani nae nahone vha funane.—Mish. 20:37.

17. Ndi pfaneleo ifhio ine vhunzhi ha vhahashu vha i dzhiela nṱha kha vhahulwane? Ṋeani tsumbo.

¹⁷ Vhunzhi ha vhahashu vha amba uri pfaneleo ine vha i dzhiela nṱha kha vhahulwane vha tshivhidzo ndi ya uri vha a pfela vhuṱungu. Ndi ngani? Adelaide o ri: “Zwi a leluwa u amba navho ngauri u a ḓivha uri vha ḓo u pfesesa.” O dovha a ri: “U a zwi vhona uri vha a u pfela vhuṱungu nga nḓila ine vha aravha ngayo musi u tshi amba navho.” Wahashu wa tshinnani a dzhielaho nṱha nḓila ye muhulwane a mu fara ngayo o ri: “Ndo vhona muṅwe muhulwane a tshi tsengisa miṱodzi musi ndi tshi mu vhudza nga ha thaidzo  yanga. Ndi ḓo dzulela u zwi humbula.”—Vharoma 12:15.

18. Ri nga pfela hani vhaṅwe vhuṱungu?

¹⁸ Ngoho ndi ya uri a si vhahulwane fhedzi vhane vha fanela u pfela vhuṱungu. Roṱhe ri nga vha na yeneyi pfaneleo. Nga nḓila-ḓe? Lingedzani u pfesesa zwine miraḓo ya muṱa waṋu na Vhakriste nga inwi vha khou sedzana nazwo. Sumbedzani vhaswa vha re tshivhidzoni tshaṋu, vhane vha vha na mutakalo u si wavhuḓi, vhalala na vhe vha felwa nga vhane vha vha funa uri ni na ndavha navho. Vha vhudziseni uri vha khou vuwa hani. Thetshelesani nga vhuronwane musi vha tshi ni vhudza nḓila ine vha ḓipfa ngayo. Vha thuseni uri vha zwi vhone uri ni a pfesesa vhuimo havho. Vha thuseni nga hune na nga kona ngaho. Musi ri tshi ita nga u ralo, ri vha ri tshi khou vha sumbedza uri ri vha funa zwi tshi bva mbiluni.—1 Yoh. 3:18.

19. Ndi ngani ri tshi fanela u tendelana na zwiimo musi ri tshi lingedza u thusa vhaṅwe?

¹⁹ Ri fanela u tendelana na zwiimo musi ri tshi lingedza u thusa vhaṅwe. Ndi ngani? Ngauri musi vhathu vha tshi khou sedzana na vhuimo vhu konḓaho vha fhindula nga nḓila dzi sa fani. Vhaṅwe vha ṱoḓa u amba nga ha thaidzo dzavho, fhedzi vhaṅwe a vha ṱoḓi. Naho ri tshi ṱoḓa u vha thusa, ri fanela u iledza u vhudzisa mbudziso dzine dza ḓo ita uri vha pfe vho shona. (1 Vhathes. 4:11) Naho vha ri vhudza nḓila ine vha ḓipfa ngayo, zwi nga itea ri si tendelane na zwine vha khou zwi amba. Fhedzi ri fanela u humbula uri yeneyo ndi nḓila ine vha ḓipfa ngayo. Ri ṱoḓa u ṱavhanya u thetshelesa na u lenga u amba.—Mat. 7:1; Yak. 1:19.

20. Ri ḓo ṱolisisa mini kha thero i tevhelaho?

²⁰ Nga nnḓa ha u pfela vhuṱungu vhathu vha tshivhidzoni, ri fanela u sumbedza yeneyi pfanelo yavhuḓi na vhuḓinḓani. Ri nga sumbedza hani uri ri pfela vhuṱungu musi ri tshi khou ita vhafunziwa? Ri ḓo ṱolisisa zwenezwo kha thero i tevhelaho.