Evangeli Ya Marko 1:1-45
-
Yohane Mulovhedzi u a huwelela (1-8)
-
Yesu u a lovhedziwa (9-11)
-
Saṱhane u linga Yesu (12, 13)
-
Yesu u thoma u huwelela Galilea (14, 15)
-
Vhafunziwa vha Yesu vha u thoma (16-20)
-
Hu pandelwa dimoni (21-28)
-
Yesu u fhodza vhanzhi ngei Kapernaume (29-34)
-
U rabela e fhethu hu re kule na miḓi (35-39)
-
Hu fhodzwa a re na mapele (40-45)
1 Mafhungo maḓifha a ambaho nga ha Yesu Kristo a thoma hafha.
2 Samusi zwo ṅwaliwa nga muporofita Yesaya, a ri: “(Ndi khou ruma muḓinḓa wanga phanḓa hau ane a ḓo u lugiselela nḓila.)+
3 Hu na muthu ane a khou vhidzelela e sogani, u ri: ‘Lugisani nḓila ya Yehova!* Kunakisani nḓila dzawe.’”+
4 Yohane Mulovhedzi o vha a tshi khou huwelela e sogani, a tshi ri vhathu vha lovhedzwe u itela u sumbedza uri vho rembuluwa, vha kone u hangwelwa zwivhi.+
5 Vhoṱhe vha bvaho kha ḽa Yudea na vhadzulapo vhoṱhe vha Yerusalema vha ya khae vha ḓibula zwivhi, a vha lovhedza* Mulamboni wa Yorodane.+
6 Yohane o vha a tshi ambara zwiambaro zwo itwaho nga mamvele a gamela, a tshi vhofha khundu nga bannda ḽa mukumba.+ O vha a tshi ḽa nzie na mutoli.+
7 O vha a tshi huwelela a tshi ri: “Ane a khou ḓa murahu hanga u na maanḓa u mphira, a thi fanelei u vhofholola thambo dza thovho* dzawe.+
8 Ndo ni lovhedza nga maḓi, ene u ḓo ni lovhedza nga muya mukhethwa.”+
9 Misini yeneyo, Yesu a bva Nazaretha shangoni ḽa Galilea a lovhedzwa nga Yohane Mulamboni wa Yorodane.+
10 Yesu a tshi tou bva maḓini a vhona ḽiṱaḓulu ḽi tshi vulea, a vhona muya wa Mudzimu u tshi tsa u tshi ḓa khae u tshi nga ḽiivha.+
11 Ha pfala ipfi ḽi bvaho ṱaḓulu ḽi tshi ri: “U Murwa wanga, ane nda mu funa; ndi a u takalela.”+
12 Nga u ṱavhanya muya mukhethwa wa mu isa sogani.
13 A dzula henefho sogani maḓuvha a 40, a tshi khou lingwa nga Saṱhane.+ Ho vha hu na zwivhanda, fhedzi vharuṅwa vho vha vha tshi khou mu ṱhogomela.+
14 Musi Yohane o no farwa, Yesu a ya a huwelela mafhungo maḓifha+ a Mudzimu ngei Galilea,+
15 a ri: “Tshifhinga tsho vhewaho tsho swika na Muvhuso wa Mudzimu u tsini. Rembuluwani,+ ni vhe na lutendo kha mafhungo maḓifha.”
16 Musi a tshi khou tshimbila tsini na Lwanzhe lwa Galilea, a vhona Simoni na murathu wawe Andrea+ vha tshi khou posa mambule lwanzheni,+ ngauri vho vha vhe vharei vha khovhe.+
17 Yesu a amba navho a ri: “Ntevheleni, ndi ḓo ni ita vharei vha vhathu.”+
18 Vha sia mambule avho vha mu tevhela.+
19 Musi a tshi tou fhirela phanḓanyana, a vhona Yakobo murwa wa Sebedeo na murathu wawe Yohane vhe tshikepeni vha tshi khou luka mambule avho,+
20 a vha vhidza nga u ṱavhanya. Vha sia khotsi avho Sebedeo na vhashumi tshikepeni, vha mu tevhela.
21 Vha ya nae ngei Kapernaume.
Musi Savhatha i tshi tou thoma, a dzhena sinagogoni a funza.+
22 Vha mangadzwa nga nḓila ye a vha a tshi funza ngayo, ngauri musi a tshi vha funza zwo vha zwi tshi pfala uri o ṋewa maanḓa, o vha a sa fani na vhamaṅwalo.+
23 Henefho sinagogoni ho vha hu na muṅwe munna we a vha e na dimoni, a ṱavha mukosi a ri:
24 “Wo ḓela mini iwe Yesu wa Nazaretha?+ Naa wo ḓela u ri fhelisa? Ndi a zwi ḓivha uri u Mukhethwa wa Mudzimu.”+
25 Fhedzi Yesu a kaidza dimoni a ri: “Fhumula u bve khae.”
26 Musi ḽeneḽo dimoni ḽo no ita uri onoyo munna a rahe-rahe* na u ṱavha mukosi, ḽa bva khae.
27 Vhathu vha mangala lwe vha amba nga tshavho vha ri: “Ndi mini izwi? Nḓila ine a funza ngayo i a mangadza! U na maanḓa a u pandela madimoni, a a mu thetshelesa.”
28 Zwe a zwi ita zwa ḓivhiwa nga u ṱavhanya u mona na ḽoṱhe ḽa Galilea.
29 Vha bva sinagogoni vha ya nḓuni ya Simoni na Andrea vhe na Yakobo na Yohane.+
30 Mme a mufumakadzi+ wa Simoni o vha o eḓela ngauri o vha o farwa nga mukhushwane, vha vhudza Yesu nga ha vhulwadze hawe.
31 Yesu a ya khae a mu fara tshanḓa, a mu vusa. A fhola, a vha itela zwiḽiwa.
32 Musi ḽo no kovhela, vhathu vha ḓisa vhoṱhe vha lwalaho na vha re na madimoni;+
33 vhathu vhoṱhe vha wonoyo muḓi vho vha vho kuvhangana muṋangoni.
34 A fhodza vhathu vhanzhi vha re na malwadze o fhambanaho,+ a pandela madimoni manzhi, fhedzi a si a tendele a tshi amba, ngauri o vha a tshi ḓivha uri ndi ene Kristo.*
35 A bva nga maḓautsha a ya fhethu hu re kule na miḓi, a thoma u rabela.+
36 Simoni na vhe a vha e navho vha ya vha mu ṱoḓa,
37 vha tshi mu wana vha ri: “Vhathu vhoṱhe vha khou u ṱoḓa.”
38 Fhedzi a vha fhindula a ri: “Kha ri ye miḓini ya tsini uri ndi huwelele na henefho, ngauri ndo ḓela zwone.”+
39 A ya a huwelela sinagogoni dzavho u mona na ḽoṱhe ḽa Galilea, a pandela na madimoni.+
40 Ha ḓa na muthu a re na mapele, a gwadama a mu humbela, a ri: “Arali u tshi funa, u nga mphodza.”+
41 A tshi pfa zwenezwo, a mu pfela vhuṱungu, a isa tshanḓa tshawe a mu kwama, a ri: “Ndi a funa, fhola.”+
42 Mapele a fhola nga u ṱavhanya.
43 Musi onoyo munna a sa athu u ṱuwa, Yesu a mu laya,
44 a ri: “U songo vhudza muthu, fhedzi tshimbila u ye kha tshifhe a u vhone, u ṋekedze tshifhiwa tshe Mushe a ri tshi ṋekedzwe+ u itela u sumbedza uri wo kuna.”+
45 Musi onoyo munna o no ṱuwa, a phaḓaladza eneo mafhungo hoṱhe. Yesu a si tsha kona u dzhena muḓini, a dzula fhethu hu re kule na muḓi. Naho zwo ralo, vhathu vha dzula vha tshi ḓa khae vha tshi bva thungo dzoṱhe.+
