Evangeli Ya Marko 10:1-52
-
Mbingano na ṱhalano (1-12)
-
Yesu u fhaṱutshedza vhana (13-16)
-
Munna o pfumaho u a vhudzisa (17-25)
-
Zwe vha ḓidzima vha tshi itela Muvhuso (26-31)
-
Hu dovha ha porofitiwa nga ha lufu lwa Yesu (32-34)
-
Zwe Yakobo na Yohane vha zwi humbela (35-45)
-
Yesu ndi tshirengululi tsha vhanzhi (45)
-
-
Hu fhodzwa Baratimeo a sa vhoni (46-52)
10 Yesu a tshi ṱuwa henefho a ya mikanoni ya Yudea seli ha Mulambo wa Yorodane, gogo ḽa mu kuvhanganela. A dovha a vha funza sa nga misi.+
2 Vhafarisei vha ḓa khae uri vha mu linge, vha mu vhudzisa arali zwo tendelwa uri munna a ṱale mufumakadzi wawe.+
3 A ri: “Mushe o ri ni ite mini?”
4 Vha ri: “Mushe o ri hu ṅwaliwe luṅwalo lwa u mu pandela na u mu ṱala.”+
5 Yesu a vha fhindula a ri: “O ni ṅwalela wonoyo mulayo ngauri mbilu dzaṋu dzo rindila.+
6 Naho zwo ralo, u bva mathomoni a tsiko, ‘Mudzimu o sika munna na mufumakadzi.+
7 Ndi ngazwo munna a tshi ḓo sia khotsi awe na mme awe,+
8 vhuvhili havho vha vha ṋama nthihi,’+ a vha tsha ḓo vha vhavhili, fhedzi vha ḓo vha ṋama nthihi.
9 Zwo vhofhekanywaho nga Mudzimu muthu a songo zwi fhandekanya.”+
10 Musi vhe nḓuni, vhafunziwa vhawe vha thoma u mu vhudzisa nga hazwo.
11 A amba navho a ri: “Ane a ṱala mufumakadzi wawe a vhinga muṅwe, u khakhela mufumakadzi wawe nga u ita vhupombwe,+
12 na mufumakadzi u ita vhupombwe arali a ṱala munna wawe a vhingwa nga muṅwe.”+
13 Vhathu vha mu ḓisela vhana uri a vha vhee zwanḓa,* fhedzi vhafunziwa vha vha kaidza.+
14 Musi Yesu a tshi vhona zwenezwo, a sinyuwa a amba navho a ri: “Litshani vhana vha ḓe kha nṋe; ni songo vha thivhela, ngauri Muvhuso wa Mudzimu ndi wa vhane vha nga vhenevha.+
15 Ngoho ndi a ni vhudza ndi ri, ane a si ṱanganedze Muvhuso wa Mudzimu u fana na ṅwana, a nga si dzhene khawo na luthihi.”+
16 A kuvhatedza vhenevho vhana, a vha vhea zwanḓa, a vha fhaṱutshedza.+
17 Musi a tshi khou ṱuwa, muṅwe munna a mu gidimela a gwadama phanḓa hawe, a mu vhudzisa a ri: “Mufunzi wavhuḓi, ndi ite mini uri ndi wane vhutshilo vhu sa fheli?”+
18 Yesu a ri: “Ndi ngani u tshi ri ndi wavhuḓi? Ndi Mudzimu fhedzi ane a vha wavhuḓi.+
19 Milayo u a i ḓivha ine ya ri: ‘U songo vhulaya,+ u songo vha phombwe,+ u songo tswa,+ u songo amba vhuṱanzi ha u zwifha,+ u songo fhura,+ hulisa khotsi au na mme au.’”+
20 Ene a ri: “Mufunzi, hezwo zwoṱhe ndo zwi ita u bva vhuṱukuni.”
21 Yesu a mu lavhelesa, a mu funa, a amba nae a ri, “Hu tshee na tshiṅwe tshithu tshine wa fanela u tshi ita: Tshimbila u rengise zwithu zwine wa vha nazwo u ṋee vhashai, ndi hone u tshi ḓo vha na lupfumo ngei ṱaḓulu; u ḓe u ntevhele.”+
22 Zwenezwo zwa mu pfisa vhuṱungu, a ṱuwa o ṱungufhala, ngauri o vha e na thundu nnzhi.+
23 Yesu a rembuluwa a amba na vhafunziwa vhawe a ri: “Zwi ḓo konḓa vhukuma uri vho pfumaho vha dzhene Muvhusoni wa Mudzimu!”+
24 Zwe a zwi amba zwa mangadza vhafunziwa vhawe. Yesu a amba navho a ri: “Vhananga, zwi ḓo konḓa vhukuma u dzhena Muvhusoni wa Mudzimu!
25 Zwi ḓo konḓela mupfumi u dzhena Muvhusoni wa Mudzimu, zwi ḓo tou nga gamela i tshi lingedza u dzhena nga lubuli lwa ṋeleṱe.”+
26 Vhafunziwa vha tou ṋaṋa u mangala, vha amba nae* vha ri: “Ndi nnyi ane a nga tshidzwa?”+
27 Yesu a vha lavhelesa, a ri: “Vhathu a vha zwi koni, fhedzi zwi konwa nga Mudzimu, ngauri a hu na tshine Mudzimu a si tshi kone.”+
28 Petro a ri: “Ro sia zwoṱhe ra u tevhela.”+
29 Yesu a ri: “Ngoho ndi a ni vhudza ndi ri, ane a sia nnḓu, vharathu kana vhakomana kana khaladzi kana mme kana khotsi kana vhana kana masimu a tshi itela nṋe na mafhungo maḓifha+
30 u ḓo wana zwinzhi kha tshino tshifhinga. U ḓo wana dzinnḓu, vharathu, vhakomana, dzikhaladzi, vhomme, vhana, masimu na u tovholwa.+ U ḓo wana na vhutshilo vhu sa fheli shangoni* ḽiswa.
31 Fhedzi vhanzhi vhane vha vha vha u thoma vha ḓo vha vha u fhedza, vha u fhedza vha vha vha u thoma.”+
32 Musi vhe nḓilani vha tshi khou ya Yerusalema, Yesu o vha o ranga phanḓa vhafunziwa vhawe, vho vha vho mangala, na vha mu tevhelaho vha ofha. A dovha a vhidzela thungo vhaapostola vha 12, a vha vhudza zwithu zwine zwa ḓo itea khae, a ri:+
33 “Ri khou gonya Yerusalema, Murwa muthu u ḓo kumedzelwa kha vhahulwane vha vhotshifhe na kha vhamaṅwalo. Vha ḓo mu haṱulela lufu na u mu kumedzela kha vhathu vha dzitshaka.
34 Vhenevho vha ḓo mu goḓa, vha mu pfela mare, vha mu rwa, vha mu vhulaya, fhedzi u ḓo vuswa nga murahu ha maḓuvha mararu.”+
35 Yakobo na Yohane, vharwa vha Sebedeo,+ vha ḓa khae vha ri: “Mufunzi, ri itele zwine ra humbela.”+
36 Ene a ri: “Ndi ni itele mini?”
37 Vhone vha ri: “Ri tendele uri muṅwe a dzule kha tshanḓa tshau tsha u ḽa muṅwe a dzule kha tsha monde Muvhusoni wau.”+
38 Yesu a ri: “A ni ḓivhi zwine na khou humbela zwone. Naa ni nga kona u nwa tshinwelo tshine nda khou ya u tshi nwa kana u lovhedzwa nga ndovhedzo ine nda ḓo lovhedzwa ngayo?”+
39 Vhone vha ri: “Ri nga tshi nwa.” Musi vha tshi ralo, Yesu a ri: “Tshinwelo tshine nda ḓo tshi nwa, ni ḓo tshi nwa, na ndovhedzo ine nda ḓo lovhedzwa ngayo, ni ḓo lovhedzwa ngayo.+
40 Fhedzi u dzula kha tshanḓa tshanga tsha u ḽa kana tsha monde a si zwine nda nga ni ṋea zwone, ndi zwa vhe vha lugiselelwa nga Khotsi anga.”
41 Musi vhaṅwe vhafunziwa vha fumi vha tshi zwi pfa, vha sinyutshela Yakobo na Yohane.+
42 Fhedzi Yesu a vha vhidza, a ri: “Ni a zwi ḓivha uri vhavhusi vha dzitshaka vha vhusa vhathu nga nḓila ine vha funa, na vharangaphanḓa vha shumisa maanḓa avho u langa vhathu.+
43 Inwi a no ngo fanela u ita nga u ralo, ane a ṱoḓa u vha muhulwane kha inwi nga a shumele vhaṅwe,+
44 ane a ṱoḓa u vha wa u thoma vhukati haṋu nga a vhe mulanda.
45 Ngauri na Murwa muthu ho ngo ḓa u shumelwa, fhedzi o ḓa u shumela+ vhaṅwe na u ṋekedza vhutshilo hawe sa tshirengululi a tshi itela vhanzhi.”+
46 Yesu a swika Yeriko na vhafunziwa vhawe. Musi vha tshi vho ṱuwa vhe na gogo, vha ṱangana na Baratimeo (murwa wa Timeo), we a vha a sa vhoni, o dzula tsini na nḓila a tshi humbela.+
47 Musi a tshi pfa uri ndi Yesu wa Nazaretha, a vhidzelela a ri: “Yesu, Murwa wa Davida,+ nkhathutshele!”+
48 Vha tshi pfa zwenezwo, vhanzhi vha mu kaidza, vha ri a fhumule, fhedzi a tou ṋaṋa u vhidzelela a ri: “Murwa wa Davida, nkhathutshele!”
49 Yesu a ima a ri: “Mu vhidzeni.” Vha amba na onoyo munna vha ri: “U songo ofha! Takuwa; u khou u vhidza.”
50 A bvula tshiambaro tshawe, a ya kha Yesu nga u ṱavhanya.
51 Yesu a amba nae a ri: “Ndi u itele mini?” Onoyo munna a ri: “Raboni,* ita uri ndi vhone.”
52 Yesu a ri: “Tshimbila. Lutendo lwau lwo u fhodza.”+ Nga u ṱavhanya a thoma u vhona,+ a mu tevhela.
Ṱhaluso dzi re magumoni a siaṱari
^ Kana “uri a vha fhaṱutshedze.”
^ Kana khamusi, “nga tshavho.”
^ Sedzani Mutevhe Wa Ṱhalutshedzo Ya Maipfi.
^ Zwine zwa amba uri “Mufunzi.”
