Evangeli Ya Marko 8:1-38
-
Yesu u ṋea zwiḽiwa vha 4 000 (1-9)
-
Vha humbela u itelwa vhuṱolo (10-13)
-
Mbiliso ya Vhafarisei na Herode (14-21)
-
Hu fhodzwa munna a sa vhoni ngei Betsaida (22-26)
-
Petro u amba uri Yesu ndi Kristo (27-30)
-
Hu porofitiwa nga ha lufu lwa Yesu (31-33)
-
Zwine u vha mufunziwa wa ngoho zwa amba zwone (34-38)
8 Misini yeneyo, gogo ḽe ḽa vha ḽi si na zwiḽiwa ḽa dovha ḽa mu kuvhanganela. A vhidza vhafunziwa vhawe a amba navho a ri:
2 “Havha vhathu ndi vha pfela vhuṱungu+ ngauri ho no fhela maḓuvha mararu vhe na nṋe vha si na zwiḽiwa.+
3 Arali nda vha litsha vha ya mahayani vhe na nḓala, vha ḓo ṋoka nḓilani, vhaṅwe vhavho vha bva kule.”
4 Fhedzi vhafunziwa vhawe vha ri: “Ri nga vhu wana ngafhi vhurotho ha u fusha vhenevha vhathu henefha sogani?”
5 A vha vhudzisa a ri: “Ni na ḽofo nngana?” Vha ri: “Ri na ḽofo dza sumbe.”+
6 A vhudza vhathu uri vha dzule fhasi. A dzhia ḽofo dza sumbe, a rabela, a dzi ṅwatekanya, a ṋea vhafunziwa vhawe uri vha ṋee vhathu, vhafunziwa vhawe vha vha ṋea.+
7 Vho vha vhe na khovhe dzi si gathi, musi o no dzi fhaṱutshedza, a vha vhudza uri vha vha ṋee dzone.
8 Vha ḽa vha fura, matshakatshaka e vha a kuvhanganya a ḓadza mimanngi mihulu ya sumbe.+
9 Ho vha hu na vhanna vha ṱoḓaho u vha 4 000. A vha litsha vha ṱuwa.
10 Nga u ṱavhanya a ṋamela tshikepe na vhafunziwa vhawe vha dzhena dzinguni ḽa Dalmanutha.+
11 Ha ḓa Vhafarisei vha thoma u mu pikisa, vha tshi ṱoḓa uri a vha itele vhuṱolo vhu bvaho ṱaḓulu, uri vha mu linge.+
12 A ṱungufhala zwihulu a ri: “Ndi ngani uyu murafho u tshi ṱoḓa u itelwa vhuṱolo?+ Ngoho ndi a ni vhudza uri, a hu na vhuṱolo vhune wonoyu murafho wa ḓo itelwa hone.”+
13 A tshi fhedza u amba, a ṱuwa a vha sia, a dovha a ṋamela tshikepe a wela seli.
14 Naho zwo ralo, vho vha vho hangwa u dzhia vhurotho ho eḓanaho, vha tshi tou vha na ḽofo nthihi fhedzi tshikepeni.+
15 A vha sevha a ri: “Ni dzule no fhaṱuwa, ni thanyele mbiliso ya Vhafarisei na ya Herode.”+
16 Vha thoma u ṱaṱisana nga tshavho nga ha vhurotho.
17 Musi a tshi zwi ṱhogomela, a amba navho a ri: “Ndi ngani ni tshi khou ṱaṱisana nga ha vhurotho? Naa a ni athu u zwi ṱalukanya na u zwi pfesesa? Naa a ni pfesesi?
18 ‘Naho ni na maṱo, naa a ni vhoni, naho ni na nḓevhe, naa a ni pfi?’ Naa a ni tsha humbula
19 musi ndi tshi ṅwatela vhanna vha 5 000 ḽofo ṱhanu?+ No ḓadza mimanngi mingana nga matshakatshaka e na a kuvhanganya?” Vha fhindula vha ri: “Ya fumi-mbili.”*+
20 “Musi ndi tshi ṅwatela vhanna vha 4 000 ḽofo dza sumbe, no ḓadza mimanngi mihulu mingana nga matshakatshaka e na a kuvhanganya?” Vha fhindula vha ri: “Ya sumbe.”+
21 Nga zwenezwo, a amba navho a ri: “Naa a ni athu u zwi pfesesa?”
22 Vha swika Betsaida. Henefho vhathu vha mu ḓisela munna a sa vhoni, vha mu humbela uri a mu kwame.+
23 A fara onoyo munna nga tshanḓa a bvela nae nnḓa ha muḓana. A mu pfela mare maṱoni,+ a vhea zwanḓa zwawe khae, a mu vhudzisa a ri: “U khou vhona mini?”
24 Ene a lavhelesa a ri: “Ndi khou vhona vhathu, vha nga miri ine ya khou tshimbila.”
25 Yesu a dovha a mu kwama maṱo, a thoma u vhona zwavhuḓi tshiṅwe na tshiṅwe.
26 A mu rumela hayani, a ri: “U songo dzhena muḓanani.”
27 Yesu na vhafunziwa vhawe vha ya miḓanani ya Kesarea ngei Filipi, musi vhe nḓilani a thoma u vhudzisa vhafunziwa vhawe, a ri: “Vhathu vha ri ndi nṋe nnyi?”+
28 Vhone vha ri: “Vhaṅwe vha ri ndi iwe Yohane Mulovhedzi,+ vhaṅwe vha ri ndi iwe Elia,+ ngeno vhaṅwe vha tshi ri u muṅwe wa vhaporofita.”
29 A vha vhudzisa a ri: “Inwi ni ri ndi nṋe nnyi?” Petro a ri: “Ndi iwe Kristo.”+
30 A vha laya uri vha si vhudze muthu.+
31 A thoma u vha funza uri Murwa muthu u tea u tambudzwa nga maanḓa na u landulwa nga vhahulwane na nga vhahulwane vha vhotshifhe na nga vhamaṅwalo, u ḓo vhulawa,+ a vuswa nga murahu ha maḓuvha mararu.+
32 O amba eneo mafhungo a sa dzumbi na tshithihi. Fhedzi Petro a mu vhidzela thungo a mu kaidza.+
33 A rembuluwa a lavhelesa vhafunziwa vhawe, a kaidza Petro a ri: “Ibva phanḓa hanga Saṱhane! Ngauri zwine wa humbula ndi zwa vhathu, a si zwa Mudzimu.”+
34 A vhidza gogo na vhafunziwa vhawe a ri: “Arali muthu a tshi ṱoḓa u ntevhela, nga a ḓihangwe, a hwale danda* ḽawe a dzule a tshi ntevhela.+
35 Ngauri ane a ṱoḓa u tsireledza vhutshilo hawe u ḓo fa, ane a fa a tshi itela nṋe na mafhungo maḓifha u ḓo tshila.+
36 Ngauri muthu u ḓo vhuyelwa ngani arali a wana zwithu zwoṱhe shangoni, fhedzi a fa?+
37 Ndi mini tshine muthu a nga tshi bvisa u itela u renga vhutshilo hawe?+
38 Ngauri kha wonoyu murafho muvhi na u sa fhulufhedzei ane a shona nṋe na zwine nda zwi amba, na Murwa muthu u ḓo mu shona+ musi a tshi ḓa e vhugalani ha Khotsi awe e na vharuṅwa vhakhethwa.”+
