Evangeli Ya Marko 11:1-33
11 Musi vha tshi vho swika tsini na Yerusalema, vha ima Bethefage na Bethania+ hune ha vha Thavhani ya Miṱwari, Yesu a ruma vhafunziwa vhawe vhavhili,+
2 a ri: “Iyani muḓanani we na livhana nawo, musi ni tshi swika ni ḓo wana tshidonngana tsho vhofhiwa, tshi sa athu u ṋamelwa nga muthu. Ni tshi vhofholole ni tshi ḓise.
3 Arali muṅwe muthu a ni vhudzisa a ri, ‘Ndi ngani ni tshi khou tshi vhofholola?’ Ni ri, ‘Murena u khou tshi ṱoḓa, u ḓo tshi vhuisa nga u ṱavhanya.’”
4 Vhafunziwa vha ṱuwa vha wana tshidonngana tsho vhofhiwa muṋangoni, tsini na nḓila, vha tshi vhofholola.+
5 Fhedzi vhaṅwe vho imaho henefho vha ri: “Ndi ngani ni tshi khou tshi vhofholola?”
6 Vha vha vhudza zwe Yesu a zwi amba, vha vha litsha vha ṱuwa.
7 Vha ḓisa tshidonngana+ kha Yesu, vha vhea zwiambaro zwavho khatsho, a tshi ṋamela.+
8 Vhathu vhanzhi vha adza zwiambaro zwavho nḓilani, ngeno vhaṅwe vha tshi khou rema matavhi masimuni.+
9 Vho rangaho phanḓa na vha re murahu vha vhidzelela vha tshi ri: “Mu tshidze!+ Nga hu fhaṱutshedzwe a ḓaho nga dzina ḽa Yehova!*+
10 Nga hu fhaṱutshedzwe Muvhuso u ḓaho wa khotsi ashu Davida!+ Mu tshidze, u ngei ṱaḓulu!”
11 A dzhena Yerusalema, a ya thembeleni, a lavhelesa zwithu zwoṱhe, samusi ḽo vha ḽi tshi vho kovhela, a ṱuwa a ya Bethania na vhaapostola vha 12.+
12 Nga ḓuvha ḽi tevhelaho, musi vha tshi khou bva Bethania, Yesu a farwa nga nḓala.+
13 A tshi kha ḓi vha kule a vhona muhuyu, a ya khawo a tshi ṱoḓa u vhona arali a tshi nga wana mahuyu. Fhedzi a tshi swika khawo, a wana u songo aṋwa u na maṱari fhedzi, ngauri ho vha hu si tshifhinga tsha mahuyu.
14 A amba nawo a ri: “U songo tsha dovha wa aṋwa.”+ Vhafunziwa vho vha vho thetshelesa.
15 Vha swika Yerusalema. A dzhena thembeleni a pandela vha rengaho na u rengisa henefho, a thudzekanya maṱafula a vhatshintshi vha tshelede na bannga dza vha rengisaho maivha,+
16 a si tendele muthu a tshi fhira nga thembeleni o hwala thundu.
17 A vha funza a ri: “Naa a ho ngo ṅwaliwa u pfi: ‘Nnḓu yanga i ḓo vhidzwa nnḓu ya thabelo ya tshaka dzoṱhe’?+ Fhedzi no i ita bako ḽa mavemu.”+
18 Vhamaṅwalo na vhahulwane vha vhotshifhe vha zwi pfa, vha thoma u ṱoḓa nḓila dza u mu vhulaya,+ ngauri vho vha vha tshi mu ofha, ngauri gogo ḽo vha ḽi tshi mangadzwa nga zwine a zwi funza.+
19 Musi ḽi tshi kovhela, vha ṱuwa muḓini.
20 Vha tshi fhira nga matsheloni-tsheloni, vha vhona muhuyu wo oma na midzi.+
21 Petro a tshi humbula zwe zwa itea, a ri: “Rabi, vhona! Uḽa muhuyu we wa u sema wo oma.”+
22 Yesu a ri: “Ivhani na lutendo kha Mudzimu.
23 Ngoho ndi a ni vhudza uri, arali ni na lutendo, ni sa timatimi mbiluni yaṋu, ni ḓo vhudza heyi thavha na ri, ‘Ibva hafha u ye lwanzheni,’ zwa itea.+
24 Ndi ngazwo ndi tshi ni vhudza uri, ni vhe na lutendo lwa uri zwoṱhe zwine na zwi rabelela na u zwi humbela, ni ḓo zwi wana, ndi hone ni tshi ḓo zwi wana.+
25 Musi ni tshi khou rabela, hangwelani vhoṱhe vhe vha ni khakhela, uri na Khotsi aṋu wa ṱaḓulu a ni hangwele vhutshinyi haṋu.”+
26 * ——
27 Vha dovha vha ya Yerusalema. Musi a tshi khou tshimbila thembeleni, vhahulwane vha vhotshifhe, vhamaṅwalo na vhahulwane vha ḓa khae
28 vha ri: “Izwi zwithu u zwi ita nga maanḓa a nnyi? Kana ndi nnyi o u ṋeaho enea maanḓa a u ita zwenezwi zwithu?”+
29 Yesu a ri: “Na nṋe ndi ḓo ni vhudzisa mbudziso nthihi. Na mphindula, ndi ḓo kona u ni vhudza uri zwenezwi zwithu ndi zwi ita nga maanḓa a nnyi.
30 Ndi nnyi we a ri Yohane a lovhedze,+ naa ndi Mudzimu kana ndi vhathu? Mphinduleni.”+
31 Vha amba nga tshavho vha ri: “Arali ra ri, ‘Ndi Mudzimu,’ u ḓo ri, ‘Ndi ngani ni songo mu tenda?’
32 Fhedzi ri songo vhuya ra ri, ‘Ndi vhathu.’” Vho vha vha tshi ofha vhathu, ngauri vhoṱhe vho vha vha tshi ri Yohane o vha e muporofita wa vhukuma.+
33 Vha fhindula Yesu vha ri: “A ri ḓivhi.” Yesu a ri: “Na nṋe a thi nga ni vhudzi uri zwenezwi zwithu ndi zwi ita nga maanḓa a nnyi.”
