Evangeli Ya Marko 14:1-72
-
Vhotshifhe vha ṱoḓa u vhulaya Yesu (1, 2)
-
Yesu u ḓodzwa mapfura a nukhelelaho (3-9)
-
Yudasi u fheṱa Yesu (10, 11)
-
Paseka ya u fhedza (12-21)
-
U thoma ha Tshilalelo tsha Murena (22-26)
-
Hu porofitiwa uri Petro u ḓo landula Yesu (27-31)
-
Yesu u rabela e Getsemane (32-42)
-
Yesu o fariwa (43-52)
-
U sengiswa phanḓa ha Sanihedrini (53-65)
-
Petro u landula Yesu (66-72)
14 Ho vha ho sala maḓuvha mavhili+ uri hu swike Paseka+ na Vhuṱambo ha Vhurotho vhu si na Mbiliso.+ Vhamaṅwalo na vhahulwane vha vhotshifhe vha langana uri vha itele Yesu vhukwila, uri vha mu fare vha mu vhulaye,+
2 fhedzi vho vha vha tshi ri: “Ri songo mu fara vhuṱamboni; vhathu vha nga ḓo vusa bonyongo.”
3 Musi a tshi khou ḽa e ngei Bethania nḓuni ya Simoni we kale a vha e na mapele, muṅwe mufumakadzi a ḓa khae o fara mudzio wa alabasita u re na mapfura a ḓuraho vhukuma, a nukhelelaho, a songo ṱanganyiswaho na tshithu, o itwaho nga nadi.* A vula wonoyo mudzio wa alabasita a ḓodza Yesu kha ṱhoho.+
4 Vha tshi vhona zwenezwi, vhaṅwe vha sinyuwa vha ri: “Ndi ngani a tshi khou tambisa enea mapfura a nukhelelaho?
5 Ngauri enea mapfura a nukhelelaho o vha a tshi nga vha o rengiswa nga dinari* dza 300, tshelede ya ṋewa vhashai.” Vha sinyutshela* onoyo mufumakadzi.
6 Fhedzi Yesu a ri: “Mu litsheni. Ni mu dinela mini? O nnyitela zwithu zwavhuḓi.+
7 Vhashai ni ḓo dzula ni navho,+ ni nga vha itela zwivhuya tshifhinga tshiṅwe na tshiṅwe, fhedzi a ni nga vhi na nṋe misi yoṱhe.+
8 O ita zwe a vha a tshi nga kona; o ḓodza muvhili wanga enea mapfura, a tshi lugiselela mbulungo yanga.+
9 Ngoho ndi a ni vhudza uri, hu ḓo ambiwa nga ha zwe onoyu mufumakadzi a zwi ita+ hoṱhe hune mafhungo maḓifha a ḓo ḓivhadzwa hone.”+
10 Yudasi Iskariote, muṅwe wa vhaapostola vha 12, a ya kha vhahulwane vha vhotshifhe uri a fheṱe Yesu.+
11 Musi vha tshi zwi pfa, vha takala vha fhulufhedzisa u mu ṋea tshelede ya siḽiva.+ Ngauralo, a ṱoḓa tshibuli tsha u mu fheṱa.
12 Nga ḓuvha ḽa u thoma ḽa Vhuṱambo ha Vhurotho vhu si na Mbiliso,+ ḽe vha vha vha tshi ita ngaḽo tshiṱhavhelo tsha Paseka,+ vhafunziwa vhawe vha ḓa khae vha ri: “U ṱoḓa ri tshi u lugiselela ngafhi Paseka?”+
13 Musi vha tshi ralo, a ruma vhafunziwa vhawe vhavhili, a amba navho a ri: “Iyani muḓini, ni ḓo ṱangana na munna o hwala mudzio wa maḓi. Ni mu tevhele,+
14 henefho hune a ḓo dzhena hone, ni vhudze muṋe wa nnḓu ni ri, ‘Mufunzi u ri: “I ngafhi kamara ya vhaeni ine nda ḓo ḽela khayo Paseka na vhafunziwa vhanga?”’
15 U ḓo ni sumbedza kamara khulwane ya nṱha, yo dzudzanywaho. Ni ri lugiselele Paseka henefho.”
16 Vhafunziwa vha ṱuwa, vha dzhena muḓini, vha wana zwi nga nḓila ye a vha vhudza ngayo, vha lugiselela Paseka.
17 Musi ḽo no kovhela, a ḓa na vhaapostola vha 12.+
18 Musi vho dzula ṱafulani vha tshi khou ḽa, Yesu a ri: “Ngoho ndi a ni vhudza ndi ri, muṅwe waṋu ane a khou ḽa na nṋe u ḓo mpheṱa.”+
19 Vha ṱungufhala, vhoṱhe vha mu vhudzisa vha ri: “Kani ndi nṋe?”
20 A amba navho a ri: “Ndi muṅwe kha inwi vhaapostola vha 12 ane a ḓo thotha na nṋe tshigoḓeloni.+
21 Ndi ngoho uri Murwa muthu u khou ṱuwa, samusi zwo ṅwaliwa nga hae, fhedzi khombo kha ane a fheṱa Murwa muthu!+ Zwo vha zwi tshi ḓo vha zwi khwine arali a songo vhuya a bebwa.”+
22 Musi vha tshi khou ḽa, Yesu a dzhia vhurotho, a vhu fhaṱutshedza, a vhu ṅwata, a vha ṋea a ri: “Dzhiani, vhu imela muvhili wanga.”+
23 A dzhia tshinwelo, a livhuwa, a vha ṋea tshone, vhoṱhe vha nwa ngatsho.+
24 A amba navho a ri: “Tshi imela ‘malofha anga+ a mulanga,’+ ane a ḓo shululelwa vhanzhi.+
25 Ngoho ndi a ni vhudza uri, a thi tsha ḓo dovha nda nwa waini u swikela ndi tshi nwa waini ntswa Muvhusoni wa Mudzimu.”
26 Musi vho no renda Mudzimu nga u mu imbela,* vha ya Thavhani ya Miṱwari.+
27 Yesu a amba navho a ri: “Noṱhe ni ḓo nṱutshela, ngauri ho ṅwaliwa u pfi: ‘Ndi ḓo rwa mulisa,+ nngu dza balangana.’+
28 Musi ndo no vuswa, ndi ḓo ni ranga phanḓa ra ṱangana Galilea.”+
29 Fhedzi Petro a ri: “Naho vhaṅwe vhoṱhe vha tshi ḓo u ṱutshela, nṋe ndi nga si ḓo vhuya nda u ṱutshela.”+
30 Yesu a tshi pfa zwenezwo, a ri: “Ngoho ndi a u vhudza ndi ri, ṋamusi, vhusiku vhuno, mukukulume u sa athu u lila luvhili, u ḓo vha wo no nndandula luraru.”+
31 Fhedzi Petro a bvela phanḓa a tshi ri: “Ndi nga si vhuye nda u landula, naho ha pfi ndi fe na iwe.” Na vhaṅwe vhafunziwa vhoṱhe vha amba zwi fanaho.+
32 Ndi hone vha tshi ya fhethu hune ha pfi Getsemane, a amba na vhafunziwa vhawe a ri: “Dzulani hafha, nṋe ndi kha ḓi ya u rabela.”+
33 A ṱuwa na Petro, Yakobo na Yohane.+ A ṱungufhala na u tsikeledzea zwihulu.
34 A amba navho a ri: “Ndo ṱungufhala zwihulu+ lune nda tou nga ndi sa fa. Dzulani hafha, ni dzule no fhaṱuwa.”+
35 A fhirela phanḓanyana, a gwadama, a rabela uri arali zwi tshi konadzea, tshifhinga itsho tshi mu pfuke.
36 A dovha a ri: “Aba,* Khotsi,+ iwe u kona zwoṱhe; bvisa tshinwelo itshi kha nṋe. Naho zwo ralo, hu songo itwa zwine nṋe nda zwi funa, fhedzi hu itwe zwi funwaho nga iwe.”+
37 A tshi vhuya a wana vho eḓela, a amba na Petro a ri: “Simoni, naa wo eḓela? Naa u tou kundwa u dzula wo fhaṱuwa na nṋe awara nthihi fhedzi?+
38 Dzulani no fhaṱuwa, ni bvele phanḓa ni tshi rabela uri ni si dzhene mulingoni.+ Mbilu i a zwi funa, fhedzi ṋama a i na maanḓa.”+
39 A dovha a ṱuwa a ya u rabela, a amba zwi fanaho.+
40 A dovha a vhuya a wana vho eḓela, ngauri maṱo avho o vha a tshi khou lemela nga khofhe, vha si tsha ḓivha uri vha nga mu fhindula vha ri mini.
41 A vhuyelela lwa vhuraru, a amba navho a ri: “Ndi ngani no eḓela na u awela nga tshifhinga tsho raliho? Vuwani! Tshifhinga tsho swika+ tsha uri Murwa muthu a kumedzwe zwanḓani zwa vhaitazwivhi.
42 Vuwani ri ṱuwe. O mpheṱaho o swika.”+
43 Musi a tshi kha ḓi amba, ha swika Yudasi, muṅwe wa vhaapostola vha 12, e na vhathu vhanzhi vho faraho mabanga na thonga, vho rumiwa nga vhahulwane vha vhotshifhe, vhamaṅwalo na vhahulwane.+
44 O mu fheṱaho o vha o no vha ṋea tshiga, a ri: “Ane nda ḓo mu khisa ndi ene; ni mu fare ni ṱuwe nae, ni songo mu litsha a tshi ponyoka.”
45 A ya kha Yesu a ri: “Rabi!” A mu khisa.
46 Vha ḓa vha mu fara.
47 Muṅwe wa vha re na Yesu a bvisa banga, a tumula nḓevhe ya mulanda wa tshifhe muhulu.+
48 Yesu a amba navho a ri: “Naa no bva no fara mabanga na thonga zwa tou nga ni khou ḓa u fara ḽivemu?+
49 Ndo vha ndi tshi ṱwa thembeleni ḓuvha ḽiṅwe na ḽiṅwe ndi tshi khou funza,+ fhedzi a no ngo mpfara. Fhedzi zwenezwi zwo itea uri hu itee zwo ṅwaliwaho Maṅwaloni.”+
50 Vhafunziwa vhoṱhe vha mu ṱutshela vha shavha.+
51 Fhedzi ho vha hu na muṅwe muṱhannga we a vha o ambara tshiambaro tshavhuḓi tsha ḽinene, we a vha a tshi khou mu tevhela, vha lingedza u mu fara,
52 fhedzi a sia tshiambaro tshawe tsha ḽinene a shavha e fhedzi.
53 Vha isa Yesu kha tshifhe muhulu,+ vhahulwane vhoṱhe vha vhotshifhe na vhahulwane na vhamaṅwalo vha kuvhangana.+
54 Fhedzi Petro a tevhela nga kule a vhuya a swika muṱani wa tshifhe muhulu; o vha o dzula na vhaḓinḓa a tshi khou ora mulilo.+
55 Nga tshenetsho tshifhinga, vhahulwane vha vhotshifhe na vha Sanihedrini* vho vha vha tshi khou ṱoḓa zwine vha nga pomoka ngazwo Yesu uri vha mu vhulaye, fhedzi vha si wane tshithu.+
56 Ṱhanzi nnzhi dzo vha dzi tshi khou amba mazwifhi nga hae.+ Fhedzi vhuṱanzi hadzo ho vha vhu tshi hanedzana.
57 Vhaṅwe vho vha vha tshi takuwa vha tshi amba mazwifhi nga hae, vha tshi ri:
58 “Ro mu pfa a tshi ri, ‘Ndi ḓo thutha thembele ye ya fhaṱwa nga zwanḓa, nda fhaṱa iṅwe i songo fhaṱwaho nga zwanḓa nga maḓuvha mararu.’”+
59 Na kha zwenezwi, vhuṱanzi havho ho vha vhu sa tendelani.
60 Tshifhe muhulu a takuwa vhukati havho a vhudzisa Yesu a ri: “Naa a u fhinduli? Naa a u pfi zwine avha vhathu vha khou u pomoka zwone?”+
61 Yesu a sokou fhumula a si fhindule tshithu.+ Tshifhe muhulu a dovha a mu vhudzisa a ri: “Naa u Kristo Murwa wa Mudzimu Mukhethwa?”
62 Yesu a ri: “Ndi nṋe; ni ḓo vhona Murwa muthu+ o dzula thungo ya tshanḓa tsha u ḽa+ tsha Wa maanḓa a tshi ḓa e kha makole a ṱaḓulu.”+
63 A tshi pfa zwenezwo, tshifhe muhulu a kherula zwiambaro zwawe a ri: “Ri kha ḓi ṱoḓa dziṅwe ṱhanzi dza mini?+
64 No mu pfa a tshi khou semana. Inwi ni ri mini?” Vhoṱhe vha ri o tewa nga u fa.+
65 Vhaṅwe vha mu pfela mare khofheni,+ vha mu thivha tshifhaṱuwo, vha mu rwa nga mavili, vha ri: “Arali u muporofita, ri vhudze uri wo rwiwa nga nnyi.” Vhaḓinḓa vha mu rwa khofheni, vha ṱuwa nae.+
66 Musi Petro o dzula muṱani, ha ḓa mushumeli wa mufumakadzi wa tshifhe muhulu.+
67 Musi a tshi vhona Petro a tshi khou ora mulilo, a amba nae o tou mu lavhelesa a ri: “Na iwe wo vha u na Yesu wa Nazaretha.”
68 Fhedzi Petro a hanedza a ri: “A thi mu ḓivhi na zwine wa amba a thi zwi ḓivhi,” a ya khoroni.
69 Onoyo mufumakadzi a mu vhona, a dovha a vhudza vho imaho henefho a ri: “Hoyu ndi muṅwe wavho.”
70 A dovha a hanedza. Nga murahu ha tshifhinganyana, na vho imaho henefho vha amba na Petro vha ri: “Iwe u muṅwe wavho, u Mugalilea.”
71 Fhedzi a ana a ri: “Munna ane na khou amba nga hae a thi mu ḓivhi!”
72 Nga u ṱavhanya mukukulume wa lila lwa vhuvhili,+ Petro a humbula zwe Yesu a zwi amba, a tshi ri: “Musi mukukulume u sa athu u lila luvhili, u ḓo vha wo no nndandula luraru.”+ A ṱungufhala zwihulu a lila.
