Evangeli Ya Marko 3:1-35
3 A dovha a dzhena sinagogoni, henefho ho vha hu na munna o omaho tshanḓa.+
2 Vha mu sedza uri vha vhone arali a tshi ḓo fhodza onoyu munna nga Savhatha, uri vha mu vhone mulandu.
3 Yesu a amba na munna o omaho tshanḓa a ri: “Takuwa u ḓe ngeno vhukati.”
4 A kona u vha vhudzisa a ri: “Naa zwo tendelwa u ita zwithu zwavhuḓi kana zwo khakheaho nga Savhatha, zwi ngaho u tshidza kana u vhulaya?”+ Fhedzi vha fhumula.
5 Musi o no vha lavhelesa o sinyuwa, a ṱungufhala nge mbilu dzavho dza vha dzo rindila,+ a amba na onoyo munna a ri: “Onyolosa tshanḓa tshau.” A tshi onyolosa tsha fhola.
6 Musi vha tshi vhona zwenezwo, Vhafarisei vha bva nga u ṱavhanya vha fara muṱangano na vhatevheli vha Herode+ uri vha langane u vhulaya Yesu.
7 Fhedzi Yesu na vhafunziwa vhawe vha ya lwanzheni, vhathu vhanzhi vha bvaho Galilea na Yudea vha mu tevhela.+
8 Ha ḓa na vha bvaho Yerusalema, Idumea na seli ha Mulambo wa Yorodane na u mona na Tiro na Sidoni, nge vha pfa nga ha zwithu zwinzhi zwe a zwi ita.
9 Yesu a vhudza vhafunziwa vhawe uri vha mu lugiselele tshikepe tshiṱuku uri gogo ḽi si mu kwanyeledze.
10 Vhoṱhe vha lwalesaho vha mu kuvhanganela uri vha mu kwame ngauri o vha o no fhodza vhathu vhanzhi.+
11 Na madimoni+ a tshi mu vhona, o vha a tshi gwadama phanḓa hawe a ṱavha mukosi a ri: “Iwe u Murwa wa Mudzimu.”+
12 Kanzhi o vha a tshi a laya uri a songo vhudza muthu.+
13 Yesu a gonya thavha a vhidza vhe a vha a tshi vha ṱoḓa,+ vha ya khae.+
14 A nanga vha 12, a vha vhidza vhaapostola. Vhenevho ndi vhe vha tshimbila nae na vhe a vha ruma u huwelela
15 na u vha ṋea maanḓa a u pandela madimoni.+
16 Madzina a vha 12+ ndi haya: Ndi Simoni, we a ri u pfi Petro,+
17 Yakobo murwa wa Sebedeo na Yohane murathu wawe (we a ri vha pfi Benehargeme, zwine zwa amba uri “Vharwa vha Mubvumo”),+
18 Andrea, Filipo, Baratholomeo, Mateo, Thomasi, Yakobo murwa wa Alifeo, Thadeo, Simoni wa Kanania*
19 na Yudasi Iskariote we nga murahu a fheṱa Yesu.
Yesu a dzhena nḓuni.
20 Gogo ḽa dovha ḽa kuvhangana, lwe vha si kone na u ḽa zwiḽiwa.
21 Musi mashaka awe a tshi zwi pfa, a ḓa a tshi ṱoḓa u mu fara, ngauri o vha a tshi ri: “U khou penga.”+
22 Na vhamaṅwalo vhe vha ḓa vha tshi bva Yerusalema vha ri: “U na Belesebubu,* u pandela madimoni nga maanḓa a muvhusi wa madimoni.”+
23 Musi o no vha vhidza, a amba navho nga zwifanyiso a ri: “Saṱhane a nga pandela hani Saṱhane?
24 Arali muvhuso wo fhandekana, u ḓo wa;+
25 arali nnḓu yo fhandekana, i ḓo wa.
26 Arali Saṱhane a tshi lwa na ene muṋe, a fhandekana, ha nga koni u ima, hu ḓo vha u fhela hawe.
27 Zwi re zwone ndi uri a hu na ane a nga dzhena nḓuni ya munna a re na maanḓa a tswa thundu dzawe, arali a songo thoma a mu vhofha. Ndi hone a tshi ḓo kona u tswa thundu dzawe.
28 Ngoho ndi a ni vhudza uri vhathu vha ḓo hangwelwa zwivhi zwoṱhe, hu sa londwi uri vho ita zwivhi zwifhio na uri ndi maṱamba afhio ane vha a amba.
29 Fhedzi ane a sema muya mukhethwa ha nga hangwelwi,+ u ḓo dzula e na tshivhi.”+
30 O amba zwenezwi ngauri vho vha vha tshi ri: “U na dimoni.”+
31 Ha ḓa mme awe na vharathu vhawe,+ vha ima nnḓa vha ruma muthu uri a ye a mu vhidze.+
32 Ngauri o vha o tangiwa nga gogo, vha amba nae vha ri: “Mme au na vharathu vhau vho ima nnḓa, vha khou u ṱoḓa.”+
33 Ene a ri: “Mme anga ndi nnyi, vharathu vhanga ndi vhonnyi?”
34 A lavhelesa vhathu vho dzulaho vho mu tanga a ri: “Mme anga na vharathu vhanga khevha!+
35 Ane a ita zwine Khotsi anga a zwi funa, ndi ene murathu wanga, khaladzi anga na mme anga.”+
