Bugu Ya U Thoma Ya Samuele 1:1-28
1 Zwino ho vha hu na muṅwe munna wa Ramathaimi-tsofimi*+ dzinguni ḽa thavhani dza Efuraimi+ we a vha a tshi pfi Elikana,+ murwa wa Yerohamu, murwa wa Elihu, murwa wa Thohu, murwa wa Tsufi, wa Muefuraimi.
2 O vha e na vhafumakadzi vhavhili; muṅwe o vha a tshi pfi Hanna, muṅwe a tshi pfi Penina. Penina o vha e na vhana, fhedzi Hanna o vha a si na vhana.
3 Ṅwaha muṅwe na muṅwe onoyo munna o vha a tshi ya Shiḽo+ u itela u rabela* Yehova wa mavhuthu na u mu itela zwiṱhavhelo. Ndi henefho he vharwa vhavhili vha Eli, Hofuni na Finiasi+ vha vha vha tshi shuma hone sa vhotshifhe vha Yehova.+
4 Ḽiṅwe ḓuvha Elikana a ṋekedza zwiṱhavhelo, a ṋea mikovhe Penina mufumakadzi wawe khathihi na vharwa vhawe na vhananyana vhawe vhoṱhe,+
5 fhedzi a ṋea Hanna mukovhe muthihi. Naho zwo ralo, Elikana o vha a tshi funesa Hanna, fhedzi Yehova o vha a songo mu ṋea vhana.*
6 Zwiṅwe hafhu, muhadzinga wawe o vha a tshi dzulela u mu goḓa u itela u mu pfisa vhuṱungu ngauri Yehova o vha a songo mu ṋea vhana.
7 O vha a tshi ita zwenezwo ṅwaha muṅwe na muṅwe; musi Hanna a tshi ya nḓuni ya Yehova+ o vha a tshi mu kolela lwe a vha a tshi lila a sa ḽi.
8 Fhedzi Elikana munna wawe o vha a tshi amba nae a ri: “Hanna, u lilela mini, ndi ngani u sa ḽi, ndi ngani wo ṱungufhala? Naa a thi fhiri vharwa vha fumi kha iwe?”
9 Ngauralo, Hanna a takuwa musi vho no fhedza u ḽa na u nwa ngei Shiḽo. Nga tshenetsho tshifhinga, tshifhe Eli o vha o dzula kha tshidulo muṋangoni wa thembele*+ ya Yehova.
10 Hanna o vha o ṱungufhala vhukuma, a thoma u rabela Yehova,+ a lila lu ṱungufhadzaho.
11 A ita muano a ri: “Iwe Yehova wa mavhuthu, arali wa lavhelesa u tambula ha mushumeli wau, wa nkhumbula, u si hangwe mushumeli wau, wa mu ṋea ṅwana wa mutukana,+ ndi ḓo mu ṋea iwe Yehova uri a vhe wau maḓuvha oṱhe a vhutshilo hawe, ha nga vheulwi ṱhoho.”+
12 Eli o vha o lavhelesa mulomo wa Hanna we a vha a tshi khou rabela tshifhinga tshilapfu phanḓa ha Yehova.
13 Hanna o vha a tshi khou ambela mbiluni, meme dzi tshi khou tetemela, fhedzi ipfi ḽawe ḽi sa pfali. Ngauralo, Eli a humbula uri Hanna o kambiwa.
14 Eli a amba nae a ri: “U ḓo dzula wo kambiwa u swika lini? Litsha u nwa waini.”
15 Musi Hanna a tshi pfa zwenezwo a fhindula a ri: “Aiwa muṋe wanga! Nṋe ndi mufumakadzi o tsikeledzeaho nga maanḓa; a tho ngo kambiwa nga waini kana halwa, fhedzi ndi khou vhudza Yehova zwi re mbiluni yanga.+
16 U songo dzhia mushumeli wau sa mufumakadzi a sa ḓivhalei, ngauri ndo vha ndi tshi khou amba ndi tshi khou pfa vhuṱungu, ndo tsikeledzea.”
17 Eli a ri: “Tshimbila nga mulalo, ngavhe Mudzimu wa Isiraele a tshi u ṋea zwe wa mu humbela.”+
18 Hanna a ri: “Ngavhe u tshi sumbedza mushumeli wau vhuthu.” Ndi hone a tshi ṱuwa a ya u ḽa, o vha a songo tsha ṱungufhala.
19 Vha vuwa hu tshee nga matsheloni-tsheloni, vha gwadama phanḓa ha Yehova, nga murahu vha vhuyelela hayani havho ngei Rama.+ Elikana a ita zwa vhudzekani na mufumakadzi wawe Hanna, Yehova a mu humbula.+
20 Hu sa athu u fhela ṅwaha,* Hanna a vhifha muvhilini, a beba ṅwana wa mutukana+ a mu ira dzina ḽa Samuele,* ngauri o ri: “Ndo mu wana nge nda mu humbela kha Yehova.”
21 Nga u ya ha tshifhinga Elikana na muṱa wawe vha ya vha ṋekedza Yehova zwiṱhavhelo+ zwine vha zwi ita ṅwaha muṅwe na muṅwe na u ṋekedza tshifhiwa tshawe tsha muano.
22 Fhedzi Hanna ho ngo ṱuwa navho,+ nge a vhudza munna wawe a ri: “Musi mutukana a tshi litshiswa u mama, ndi ḓo mu isa phanḓa ha Yehova, u ḓo dzula henefho lwa tshoṱhe.”+
23 Elikana munna wawe a ri: “Ita zwine wa vhona zwo luga. Dzula hayani u swika u tshi mu litshisa u mama. Ngavhe Yehova a tshi ita zwe wa amba.” Ngauralo, Hanna a sala hayani a ṱhogomela ṅwana wawe u swika a tshi mu litshisa u mama.
24 Nga u ṱavhanya musi o no mu litshisa u mama, a ṱuwa nae, khathihi na mboho i re na miṅwaha miraru na tshikalo tsha efa* nthihi ya fuḽauru, na mvuvhelo khulwane ya waini,+ a dzhena nḓuni ya Yehova ngei Shiḽo+ e na ṅwana wawe.
25 Ngauralo, vha ṱhavha mboho vha isa mutukana kha Eli.
26 Hanna a ri: “Mpfarele muṋe wanga! Nga vhutshilo ha muṋe wanga ndi nṋe uḽa mufumakadzi we a vha o ima na iwe hafha a tshi khou rabela Yehova.+
27 Ndo vha ndi khou rabelela u wana uyu mutukana, Yehova o fhindula zwe nda mu humbela.+
28 Zwino nṋe ndi khou mu ṋea* Yehova. Vhutshilo hawe hoṱhe, o ṋewa Yehova.”
Elikana a gwadama henefho phanḓa ha Yehova.
Ṱhaluso dzi re magumoni a siaṱari
^ Kana “wa Rama, wa Mutsufi.”
^ Kana “gwadamela.”
^ Thevhedz., “o vala mbumbelo yawe.”
^ Ndi dennde ḽikhethwa.
^ Kana khamusi, “Nga tshifhinga tsho vhewaho.”
^ Zwine zwa amba uri “Dzina Ḽa Mudzimu.”
^ Efa i lingana na ḽithara dzi ṱoḓaho u vha 22. Sedzani Ṱhume. B14.
^ Nga Tshihevheru, “hadzima.”
