Evangeli Ya Mateo 9:1-38
9 Yesu a ṋamela tshikepe, a wela seli a swika muḓini wa hawe.+
2 Vha mu ḓisela munna o omaho lurumbu o eḓela kha vhulalo. Yesu a tshi vhona uri vha na lutendo, a amba na onoyo munna a ri: “Ṅwananga, u songo vhilaela! Wo hangwelwa zwivhi.”+
3 Vhaṅwe vhamaṅwalo vha amba nga tshavho vha ri: “Hoyu munna u khou sema Mudzimu.”
4 Nge Yesu a ḓivha zwine vha khou zwi humbula, a ri: “Ndi ngani ni tshi khou humbula zwithu zwivhi?+
5 Ndi zwifhio zwo leluwaho, naa ndi uri, ‘Wo hangwelwa zwivhi,’ kana ndi uri, ‘Takuwa u tshimbile’?+
6 Naho zwo ralo, uri ni ḓivhe uri Murwa muthu u na maanḓa a u hangwela zwivhi kha ḽifhasi—,” ndi hone a tshi amba na onoyo munna a ri: “Takuwa u hwale vhulalo hau u ye hayani.”+
7 Onoyo munna a takuwa a ya hayani.
8 Gogo ḽi tshi vhona zwenezwo ḽa tshuwa, ḽa renda Mudzimu we a ṋea vhathu eneo maanḓa.
9 Yesu a tshi ṱuwa henefho, a vhona muṅwe munna ane a pfi Mateo o dzula ofisini ya vhathelisi, a amba nae a ri: “Ntevhele.” A takuwa a mu tevhela.+
10 Musi o dzula nḓuni ya Mateo vha tshi khou ḽa, ha ḓa vhathelisi vhanzhi na vhaitazwivhi vha ḽa na Yesu na vhafunziwa vhawe.+
11 Vhafarisei vha tshi vhona zwenezwo, vha amba na vhafunziwa vhawe vha ri: “Ndi ngani mufunzi waṋu a tshi ḽa na vhathelisi na vhaitazwivhi?”+
12 A tshi pfa zwenezwo, a ri: “Vhathu vha sa lwaliho a vha ṱoḓi dokotela, fhedzi u ṱoḓwa nga vha lwalaho.+
13 Nga zwenezwo, tshimbilani ni ye ni pfesese uri zwenezwi zwi amba mini: ‘Ndi ṱoḓa khathutshelo hu si tshiṱhavhelo.’+ Ngauri ndo ḓela u vhidza vhaitazwivhi, hu si vho lugaho.”
14 Vhafunziwa vha Yohane vha ḓa vha vhudzisa Yesu vha ri: “Ndi ngani riṋe na Vhafarisei ri tshi ḓidzima zwiḽiwa, ngeno vhafunziwa vhau vha sa ḓidzimi?”+
15 Yesu a amba navho a ri: “Naa khonani dza mukwasha+ dzi na tshiitisi tsha u mu lilela a tshi kha ḓi vha navho? Hu khou ḓa maḓuvha ane vha ḓo dzhielwa mukwasha,+ ndi hone vha tshi ḓo ḓidzima.
16 A hu na ane a nga rungelela labi ḽiswa kha tshiambaro tsha kale, ngauri labi ḽiswa ḽo khwaṱha, ḽi nga kokodza ḽa kale zwa ita uri buli ḽi engedzee.+
17 A hu na ane a nga shela waini ntswa kha zwikumbu zwa kale zwa mukumba.* Arali a ita zwenezwo, zwi ḓo phamuwa waini ya tevhuwa. Fhedzi vhathu vha shela waini ntswa kha zwikumbu zwiswa, zwoṱhe zwa vhulungea.”
18 A tshi kha ḓi vha vhudza zwenezwo zwithu, ha ḓa muṅwe muvhusi a mu losha* a ri: “Ṅwananyana wanga a nga vha o no fa zwino, fhedzi iḓa u mu vhee tshanḓa uri a dovhe a tshile.”+
19 Yesu a takuwa a mu tevhela, na vhafunziwa vhawe vha tevhela.
20 Ho vha hu na muṅwe mufumakadzi we a vha o no fhedza miṅwaha ya 12 o farwa nga vhulwadze ha u shuluwa malofha.+ A ḓa kha Yesu nga murahu a kwama lupendelo lwa tshiambaro tshawe,+
21 ngauri o vha a tshi dzula a tshi ri: “Arali nda tou kwama lupendelo lwa tshiambaro tshawe, ndi ḓo fhola.”
22 Yesu a rembuluwa a mu vhona a ri: “Rudza mbilu ṅwananga! Lutendo lwau lwo u fhodza.”+ Onoyo mufumakadzi a fhola nga tshenetsho tshifhinga.+
23 Musi a tshi swika nḓuni ya muvhusi a vhona vhalidzi vha zwiṱiringo na gogo ḽi tshi khou ṱavha mukosi,+
24 Yesu a ri: “Ibvani, ngauri ṅwananyana ho ngo fa, o eḓela.”+ Musi vha tshi pfa zwenezwo vha mu sea na u mu goḓa.
25 Musi o no bvisela gogo nnḓa, a dzhena nḓuni a fara tshanḓa tshawe,+ ṅwananyana a vuwa.+
26 Zwe Yesu a zwi ita zwa phaḓalala dzinguni ḽeneḽo ḽoṱhe.
27 Musi Yesu a tshi khou fhira henefho, vhanna vhavhili vha sa vhoni+ vha mu tevhela vha tshi vhidzelela vha tshi ri: “Murwa wa Davida, ri khathutshele.”
28 Musi o no dzhena nḓuni vhenevho vhanna vha ḓa khae, Yesu a vha vhudzisa a ri: “Naa ni a tenda uri ndi nga ita uri ni vhone?”+ Vha fhindula vha ri: “Ee, Murena.”
29 A kwama maṱo avho,+ a ri: “Nga hu itee zwine na zwi tenda.”
30 Vha thoma u vhona. Yesu a vha laya a ri: “Ni songo vhudza muthu.”+
31 Fhedzi vha tshi bvela nnḓa, vha amba nga hae dzinguni ḽeneḽo ḽoṱhe.
32 Musi vhenevho vhanna vha tshi kha ḓi tou bva u ṱuwa, vhathu vha ḓisa munna we a vha a sa koni u amba we a vha e na dimoni;+
33 musi dimoni ḽo no pandelwa, munna we a vha a sa koni u amba a thoma u amba.+ Vhathu vha mangala, vha ri: “A ri athu u vhuya ra vhona zwithu zwi ngaho izwi kha ḽa Isiraele.”+
34 Fhedzi Vhafarisei vha ri: “U pandela madimoni nga maanḓa a muvhusi wa madimoni.”+
35 Yesu a fara lwendo a ya miḓini na miḓanani yoṱhe, a funza sinagogoni dzavho na u huwelela mafhungo maḓifha a Muvhuso na u fhodza malwadze oṱhe na maṱungu oṱhe.+
36 A tshi vhona gogo a ḽi pfela vhuṱungu,+ ngauri ḽo vha ḽo vhaisala na u kulea nungo sa nngu dzi si na mulisa.+
37 A amba na vhafunziwa vhawe a ri: “Khaṋo ndi khulu, fhedzi vhakaṋi a si vhanzhi.+
38 Humbelani Muṋe wa khaṋo uri a rumele vhakaṋi khaṋoni yawe.”+
Ṱhaluso dzi re magumoni a siaṱari
^ Sedzani “Zwikumbu zwa mukumba” kha Mutevhe Wa Ṱhalutshedzo Ya Maipfi.
^ Kana “gwadama.”
