Evangeli Ya Mateo 21:1-46
-
Yesu u dzhena Yerusalema (1-11)
-
Yesu u kunakisa thembele (12-17)
-
Hu semiwa muri wa muhuyu (18-22)
-
Yesu u vhudziswa uri maanḓa u a wana ngafhi (23-27)
-
Tshifanyiso tshi ambaho nga ha vharwa vhavhili (28-32)
-
Tshifanyiso tshi ambaho nga ha vhalimi vhe vha vhulaya (33-46)
-
Hu laṱwa tombo ḽine ḽa vha thikho ya tshifhaṱo (42)
-
21 Musi vha tshi swika tsini na Yerusalema na Bethefage hune ha vha Thavhani ya Miṱwari, Yesu a ruma vhafunziwa vhawe vhavhili,+
2 a vha vhudza a ri: “Iyani muḓanani we na livhana nawo, musi ni tshi swika ni ḓo wana donngi yo vhofhiwa na tshidonngana tshayo. Ni dzi vhofholole ni dzi ḓise kha nṋe.
3 Arali muṅwe muthu a ni vhudzisa, ni ri, ‘Murena u khou dzi ṱoḓa.’ U ḓo ni tendela ni tshi dzi dzhia nga u ṱavhanya.”
4 Zwenezwo zwo itea uri hu itee zwe zwa ambiwa nga muporofita, a tshi ri:
5 “Vhudzani ṅwananyana wa Tsioni, ni ri: ‘Khosi yau i khou ḓa kha iwe,+ i a ḓiṱukufhadza,+ yo ṋamela donngi, ine ya vha tshidonngana, ṅwana wa tshifuwo tshine tsha hwala mihwalo.’”+
6 Vhafunziwa vha ṱuwa vha ita zwe Yesu a vha laedza.+
7 Vha ḓisa donngi na tshidonngana tshayo, vha vhea zwiambaro zwavho khadzo, a ṋamela tshidonngana.+
8 Vhathu vhanzhi vha adza zwiambaro zwavho nḓilani,+ ngeno vhaṅwe vha tshi khou rema matavhi vha tshi a adza nḓilani.
9 Vhathu vhanzhi vho mu rangaho phanḓa na vha mu tevhelaho, vha vhidzelela vha ri: “Tshidza Murwa wa Davida!+ Nga hu fhaṱutshedzwe a ḓaho nga dzina ḽa Yehova!*+ Mu tshidze, u ngei ṱaḓulu!”+
10 Musi a tshi dzhena Yerusalema, vhathu vha vusa bonyongo muḓini woṱhe, vha ri: “Ndi nnyi uyu?”
11 Vhathu vho vha vha tshi khou ri: “Hoyu ndi Yesu,+ muporofita a bvaho Galilea muḓini wa Nazaretha!”
12 Yesu a dzhena thembeleni a pandela vhoṱhe vha rengaho na u rengisa henefho, a thudzekanya maṱafula a vhatshintshi vha tshelede na bannga dza vha rengisaho maivha.+
13 A amba navho a ri: “Ho ṅwaliwa u pfi, ‘Nnḓu yanga i ḓo vhidzwa nnḓu ya thabelo,’+ fhedzi no i ita bako ḽa mavemu.”+
14 Vha sa vhoni na vho holefhalaho vha ḓa khae thembeleni, a vha fhodza.
15 Vhamaṅwalo na vhahulwane vha vhotshifhe vha tshi vhona zwithu zwavhuḓi zwe a zwi ita na u vhona vhatukana vha tshi khou vhidzelela thembeleni vha tshi ri, “Tshidza Murwa wa Davida!”+ vha sinyuwa+
16 vha amba nae vha ri: “Naa u khou zwi pfa zwine avha vha amba zwone?” Yesu a vha fhindula a ri: “Ee, ndo zwi pfa. Naa a ni athu u vhala maipfi ane a ri, ‘Wo ita uri milomo ya vhana na dzitshetshe i u rende’?”+
17 A ṱuwa Yerusalema, a ya Bethania, a eḓela henengei.+
18 Musi a tshi khou vhuya Yerusalema nga matsheloni-tsheloni, a farwa nga nḓala.+
19 A vhona muhuyu tsini na nḓila, a ya khawo, a wana u songo aṋwa u na maṱari fhedzi,+ a amba nawo a ri: “U songo tsha dovha wa aṋwa.”+ Wonoyo muhuyu wa oma nga u ṱavhanya.
20 Musi vhafunziwa vha tshi zwi vhona, vha mangala vha ri: “Ndi ngani muhuyu wo ṱavhanya u oma?”+
21 Yesu a ri: “Ngoho ndi a ni vhudza uri, arali ni na lutendo, ni sa timatimi, a ni nga ḓo ita zwenezwo fhedzi, fhedzi ni ḓo dovha na vhudza heyi thavha na ri, ‘Ibva hafha u ye lwanzheni,’ zwa itea.+
22 Zwoṱhe zwine na zwi humbela nga thabelo, ni na lutendo, ni ḓo zwi wana.”+
23 Musi o no dzhena thembeleni, vhahulwane vha vhotshifhe na vhahulwane vha vhathu vha ḓa khae musi a tshi khou funza vha ri: “Izwi zwithu u zwi ita nga maanḓa a nnyi? Ndi nnyi o u ṋeaho enea maanḓa?”+
24 Yesu a ri: “Na nṋe ndi ḓo ni vhudzisa tshithu tshithihi. Arali na mphindula, ndi ḓo ni vhudza uri zwenezwi zwithu ndi zwi ita nga maanḓa a nnyi.
25 Ndi nnyi we a ri Yohane a lovhedze, naa ndi Mudzimu kana ndi vhathu?” Vha amba nga tshavho vha ri: “Arali ra ri, ‘Ndi Mudzimu,’ u ḓo ri, ‘Ndi ngani ni songo mu tenda?’+
26 Arali ra ri, ‘Ndi vhathu,’ ri ḓo sinyutshelwa nga vhathu, ngauri vhoṱhe vha ri Yohane ndi muporofita.”
27 Vha fhindula Yesu vha ri: “A ri ḓivhi.” Na ene a ri: “Na nṋe a thi nga ni vhudzi uri zwenezwi zwithu ndi zwi ita nga maanḓa a nnyi.
28 “Ni humbula mini nga zwi tevhelaho? Muṅwe munna o vha e na vhana vhavhili. A ya kha wa u thoma a ri, ‘Ṅwananga, ṋamusi iya u shume tsimuni ya minḓirivhe.’
29 A tshi fhindula a ri, ‘A thi nga yi,’ fhedzi nga murahu a ḓisola a ya.
30 A ya kha wa vhuvhili, a mu humbela zwi fanaho. A fhindula a ri, ‘Ndi ḓo ya,’ fhedzi a si ye.
31 Ndi ufhio kha vhenevho vhavhili we a ita zwi funwaho nga khotsi awe?” Vha fhindula vha ri: “Ndi wa u thoma.” Yesu a amba navho a ri: “Ngoho ndi a ni vhudza uri vhathelisi na vha rengisaho muvhili vha ḓo dzhena Muvhusoni wa Mudzimu ni sa athu u dzhena.
32 Ngauri Yohane o ḓa a ni sumbedza nḓila ya u luga, fhedzi ni si mu tende. Naho zwo ralo, vhathelisi na dziphombwe vho mu tenda,+ inwi naho no vhona zwenezwo, a no ngo ḓisola na mu tenda.
33 “Ipfani tshiṅwe tshifanyiso: Muṅwe munna o vha o ṱavha minḓirivhe tsimuni yawe,+ a ita luhura u mona nayo, a bwa hune a ḓo sukela hone nḓirivhe, a fhaṱa mutsheṱo,+ a ri vhalimi vha i ṱhogomele, a ya shangoni ḽa kule.+
34 Musi tshifhinga tsha u fula nḓirivhe tshi tshi swika, a ruma vhalanda vhawe kha vhalimi uri a wane nḓirivhe.
35 Naho zwo ralo, vhalimi vha fara vhalanda vhawe, muṅwe vha mu rwa, muṅwe vha mu vhulaya, muṅwe vha mu kanḓa nga matombo.+
36 A dovha a ruma vhaṅwe vhalanda, vha fhiraho vha u thoma, fhedzi vha vha ita zwi fanaho na zwa vhenevho.+
37 A fhedzisela nga u ruma murwa wawe khavho, a ri, ‘Vha ḓo ṱhonifha murwa wanga.’
38 Musi vhalimi vha tshi vhona murwa wawe, vha amba nga tshavho vha ri, ‘Hoyu ndi ene muḽaifa.+ Kha ri mu vhulaye uri ri wane ifa ḽawe.’
39 Vha mu fara vha mu posela nnḓa ha tsimu vha mu vhulaya.+
40 Ngauralo, musi muṋe wa tsimu a tshi ḓa, vhenevho vhalimi u ḓo vha ita mini?”
41 Vha mu fhindula vha ri: “U ḓo vha vhulaya ngauri ndi vhavhi, a ṋea vhaṅwe vhalimi tsimu yawe, vhane vha ḓo mu ṋea mitshelo nga tshifhinga tshayo.”
42 Yesu a amba navho a ri: “Maṅwalo a ri, ‘Tombo ḽe ḽa laṱwa nga vhafhaṱi ḽo vha thikho ya tshifhaṱo.+ Ḽeneḽi tombo ḽi bva kha Yehova,* ḽi takadza maṱo ashu.’ Naa a ni athu u vhala zwenezwi Maṅwaloni?+
43 Ndi ngazwo ndi tshi ri, ni ḓo dzhielwa Muvhuso wa Mudzimu wa ṋewa lushaka lune lwa ḓo aṋwa mitshelo.
44 Ane a wela nṱha ha ḽeneḽi tombo u ḓo vunḓekana.+ Ane ḽa mu wela, ḽi ḓo mu kwaṱula.”+
45 Musi vhahulwane vha vhotshifhe na Vhafarisei vha tshi pfa zwenezwo zwifanyiso, vha zwi ḓivha uri o vha a tshi khou amba nga havho.+
46 Naho vho vha vha tshi ṱoḓa u mu fara, vho vha vha tshi ofha vhathu ngauri vhathu vho vha vha tshi ri ndi muporofita.+
