ROṰHE ri ṱoḓa vhathu vha tshi humbula uri ri vhathu vhavhuḓi. Fhedzi zwi a konḓa u vha na vhulenda kana u vha muthu wavhuḓi * ṋamusi. Tshiṅwe tshiitisi ndi uri vhathu vhanzhi a vha “funi zwivhuya.” (2 Tim. 3:3) A vha ṱoḓi u tshila nga zwilinganyo zwa Yehova. Zwine a ri a zwo luga, vhone vha ri “ndi zwivhi” nahone zwine a ri ndi zwivhi, vhone vha ri “ndi zwivhuya.” (Yes. 5:20) Zwi nga konḓa uri ri vhe na vhulenda nga nṱhani ha zwithu zwi si zwavhuḓi zwe zwa itea tshifhingani tsho fhiraho na nga nṱhani ha u sa fhelela. Ri nga ḓipfa u fana na wahashu wa tshifumakadzini we a shumela Yehova lwa miṅwaha minzhi. O ri: “Zwi a nkonḓela u tenda uri ndi nga vha muthu wavhuḓi.”

Zwi takadzaho ndi uri roṱhe ri nga kona u ṱahulela vhulenda! Vhulenda ndi tshiaṋwiwa nga muya mukhethwa wa Mudzimu nahone muya wawe u na maanḓa u fhira ṱhuṱhuwedzo ya ḽino shango na vhathu vho ri tangaho u katela na u sa fhelela hashu. Kha ri haseledze uri vhulenda ndi mini na uri ri nga sumbedza hani yeneyi pfaneleo nga vhuḓalo.

Vhulenda vhu katela u ḓifara nga nḓila yavhuḓi, hu si nga nḓila i si yavhuḓi. Muthu a re na vhulenda u dzula a tshi ṱoḓa nḓila dza u thusa vhaṅwe na u vha itela zwithu zwavhuḓi.

Ni nga vha no no zwi ṱhogomela uri vhaṅwe vha a ṱavhanya u itela vhathu vha havho na ṱhama dzavho zwithu zwavhuḓi, fhedzi naa vhulenda vhu tea u guma henefho? Ndi ngoho uri ri nga si dzule ri tshi ita zwithu zwavhuḓi tshifhinga tshoṱhe. Bivhili i ri: “Fhano shangoni a hu na muthu muvhuya, ane a ḓi ita zwavhuḓi a si vhuye a tshinya.” (Muh. 7:20) Muapostola Paulo o ri: “Ndi a zwi ḓivha uri kha ṋama yanga a hu na zwivhuya.” (Vharoma 7:18) Nga zwenezwo, arali ri tshi ṱoḓa u vha na vhulenda, zwi tou vha khagala uri ri fanela u guda kha Yehova, ane a vha tshisima tsha vhulenda.

Yehova Mudzimu ndi ene ane a amba uri zwithu zwo lugaho ndi zwifhio. Bivhili i amba zwi tevhelaho nga ha Yehova: “Wavhuḓi ndi Iwe, Mudzia-zwivhuya; mpfunze milayo yau.” (Ps. 119:68) Kha ri haseledze zwithu zwivhili zwi re kha yeneyo ndimana zwine zwa amba nga ha vhuḓi ha Yehova.

Yehova ndi wavhuḓi. Yehova ndi wavhuḓi ngauri a hu na tshithu tshine tsha nga ita uri a si vhe wavhuḓi. Ṱhogomelani zwe zwa itea musi Yehova a tshi vhudza Mushe u ri: “Vhuḓi hanga hoṱhe ndi ḓo vhu fhirisa phanḓa hau.” Yehova o sumbedza Mushe vhugala hawe u katela na vhuḓi hawe. Mushe o pfa ipfi ḽi tshi khou ṱalusa nḓila ine Yehova a vha ngayo ḽi tshi ri: “Yehova, Yehova! Mudzimu wa khathutshelo na wa vhuthu, wa u sa fhela mbilu, wa vhuhwavho vhuhulu na u fulufhedzea, ane vha maḓana na maḓana a vha ita nga tshilidzi, ane a hangwela vhatshinyi na vhapambuwi na vha-ita-zwivhi; ane a si litshe na u lifhedza.” (Ek. 33:19; 34:6, 7) Zwenezwi zwi sumbedza uri Yehova ndi wavhuḓi kha zwithu zwoṱhe. Naho Yesu o vha e muthu wavhuḓi u fhira vhathu o ri: “Ndi Mudzimu fhedzi ane a vha wavhuḓi.”—Luka 18:19.

Mishumo ya Yehova ndi yavhuḓi. Zwoṱhe zwine Yehova a zwi ita ndi zwavhuḓi. Bivhili i ri: ‘Yehova  ndi wavhuḓi kha vhoṱhe, u khathutshela zwivhumbwa zwawe zwoṱhe.’ (Ps. 145:9) Ngauri Yehova u na vhulenda nahone ha ṱaluli, o ṋea vhathu vhutshilo na zwoṱhe zwine vha zwi ṱoḓa uri vha bvele phanḓa vha tshi khou tshila. (Mish. 14:17) Vhulenda hawe hu dovha ha vhonala nga u ri hangwela. Mupsalme o ṅwala uri: “Ngauri Iwe Muṋe wanga, U wa vhuḓi na vhulenda.” (Ps. 86:5) Ri nga vha na vhungoho ha uri “Yehova ndi Ene mukovhi wa tshilidzi na vhurena; vhané vha tshimbila kha dzo lulamaho, ha vha dzimi zwivhuya.”—Ps. 84:11.

Ro sikwa nga tshifanyiso tsha Mudzimu, nga zwenezwo, ri nga vha vhathu vhavhuḓi na u ita zwithu zwavhuḓi. (Gen. 1:27) Fhedzi Ipfi ḽa Mudzimu ḽi ṱuṱuwedza vhashumeli vhawe uri vha “[ḓi-funze] u ita zwivhuya.” (Yes. 1:17) Fhedzi ri nga vha hani na yeneyo pfaneleo yavhuḓi? Ṱhogomelani nḓila tharu dzine ra nga ita ngadzo zwenezwo.

Ya u thoma, ri nga humbela muya mukhethwa nga thabelo une wa nga thusa Vhakriste uri vha vhe na vhulenda. (Vhagal. 5:22) Muya mukhethwa wa Mudzimu u nga ri thusa uri ri fune zwivhuya na u vhenga zwivhi. (Vharoma 12:9) Bivhili i sumbedza uri Yehova a nga ri “khwaṱhisa uri tshifhinga tshoṱhe [ri] ite na u amba zwithu zwavhuḓi.”—2 Vhathes. 2:16, 17.

Ya vhuvhili, ri fanela u vhala Ipfi ḽa Mudzimu ḽo hevhedzwaho. Musi ri tshi vhala Bivhili, Yehova u ri funza “nḓila dzoṱhe dzavhuḓi” na u ri lugiselela uri ri ite “mushumo muṅwe na muṅwe wavhuḓi.” (Mir. 2:9; 2 Tim. 3:17) Musi ri tshi vhala Bivhili na u elekanya nga zwe re zwi vhala, ri ita uri mbilu dzashu dzi ḓale zwithu zwavhuḓi zwa Yehova na u ita zwine a zwi funa. Ri vha ri tshi khou zwi vhulunga lune nga murahu ra ḓo kona u zwi shumisa.—Luka 6:45; Vhaef. 5:9.

Ya vhuraru, ri lingedza u ita zwoṱhe zwine ra nga kona u itela “u [edzisa] zwo lugaho.” (3 Yoh. 11) Ri wana tsumbo dzine ra nga dzi edzisa Bivhilini. Tsumbo ya khwine ndi ya Yehova na Yesu. Fhedzi ri nga dovha ra ṱhogomela na vhaṅwe vhe vha ḓivhelwa u ita zwo lugaho. Vhathu vhavhili vhane ra nga humbula nga havho ndi Tabita na Baranaba. (Mish. 9:36; 11:22-24) Ni nga vhuyelwa musi ni tshi guda nga ha tsumbo dzavho dzi re Bivhilini nahone ṱhogomelani zwe vha zwi itela vhaṅwe musi ni tshi khou vhala nga havho. Humbulani nga ha zwine na nga zwi ita u itela u thusa vhaṅwe muṱani kana tshivhidzoni. Dovhani ni humbule nga ha zwithu zwavhuḓi zwe zwa itea kha Tabita na Baranaba nge vha itela vhaṅwe zwithu zwavhuḓi. Na inwi ni nga vhuyelwa.

Ri nga dovha ra humbula nga vhathu vha musalauno vhe vha ita zwithu zwavhuḓi. Sa tsumbo,  humbulani nga ha vhahulwane vha tshivhidzo vha shumaho nga maanḓa, vhane vha vha ‘vhafuni vha zwivhuya.’ Ni humbule na nga ha vhahashu vha tshifumakadzini vha fulufhedzeaho vhane vha “gudis[a] zwivhuya” nga zwine vha zwi ita na u zwi amba. (Tito 1:8; 2:3) Wahashu wa tshifumakadzini ane a pfi Roslyn o ri: “Khonani yanga u ita vhuḓidini u itela u thusa na u ṱuṱuwedza vhaṅwe tshivhidzoni. U humbula nga ha vhuimo havho nahone kanzhi u vha ṋea zwifhiwa zwiṱuku kana a vha thusa nga dziṅwe nḓila. Ndi mu dzhia sa muthu wavhuḓi.”

Yehova u ṱuṱuwedza vhathu vhawe uri vha ‘tevhedze zwo lugaho.’ (Amosi 5:14) U ita nga u ralo, zwi ḓo ri thusa uri ri fune zwine Yehova a ri zwo luga na u ri ṱuṱuwedza uri ri zwi ite.

A ro ngo fanela u humbula uri u vha vhathu vhavhuḓi ri tea u itela vhathu zwithu zwihulwane kana u vha ṋea zwifhiwa zwi ḓuraho. Sa tsumbo: Muoli ha sokou swika a pennda luthihi kana luvhili. Nṱhani hazwo, u shumisa bulatsho yawe lunzhi-lunzhi uri tshinepe tshawe tshi bve zwavhuḓi. Nga hu fanaho, arali ra ita zwithu zwiṱuku u itela u thusa vhaṅwe vhathu zwi sumbedza uri ri na vhulenda.

Bivhili i ri ṱuṱuwedza uri ri vhe vho “lugelaho” u ita zwithu zwavhuḓi. (2 Tim. 2:21; Tito 3:1) Arali ra livhisa ṱhogomelo kha zwine zwa khou itea kha vhaṅwe ri nga kona u vhona nḓila dzine ra nga thusa vhahashu ngadzo ‘nga zwivhuya uri ri vha khwaṱhise.’ (Vharoma 15:2) Zwenezwo zwi nga katela u vha ṋea zwithu zwine ra vha nazwo. (Mir. 3:27) Ri nga ramba muṅwe muthu uri a ḓe a ḽe na riṋe kana u vha na vhukonani vhune ha ṱuṱuwedza. Arali ri tshi ḓivha uri muṅwe muthu u khou vhaisala, ri nga mu rumela khadi, u mu dalela kana u mu rwela luṱingo. Ndi ngoho uri ri nga wana zwibuli zwinzhi zwa u amba “zwivhuya zwine zwa fhaṱa nga hune zwa ṱoḓea ngaho, uri zwi vhuyedze vhathetshelesi.”—Vhaef. 4:29.

Ri ṱoḓa u itela vhaṅwe vhathu zwithu zwavhuḓi u fana na Yehova. Nga zwenezwo, a ro ngo fanela u vha na tshiṱalula. Iṅwe nḓila ine ra nga ita ngayo zwenezwo ndi nga u huwelela mafhungo maḓifha a Muvhuso kha vhathu vhoṱhe. Samusi Yesu o laedza, ri ṱoḓa u itela vhathu vhoṱhe zwivhuya u katela na vhane vha ri vhenga. (Luka 6:27) A zwo ngo khakhea u vha na vhuthu na u itela vhathu zwithu zwavhuḓi ngauri “mulayo a u lwi na zwithu zwo raloho.” (Vhagal. 5:22, 23) Hu sa londwi u hanedzwa kana u sedzana na thaidzo, arali ra ḓifara nga nḓila yavhuḓi ri nga kokodzela vhathu ngohoni na u hulisa Mudzimu.—1 Pet. 3:16, 17.

“Munna muvhuya u ḓo fura zwawe.” (Mir. 14:14) Ndi dzifhio dziṅwe mbuyelo? Musi ri tshi itela vhaṅwe zwivhuya, vha ḓo ri fara zwavhuḓi. (Mir. 14:22) Naho vhaṅwe vha sa ri fari zwavhuḓi, ri fanela u bvela phanḓa ri tshi vha itela zwivhuya. Nga u ya ha tshifhinga vha nga shandula mavhonele avho nahone vha ri fara zwavhuḓi.—Vharoma 12:20.

Ri a vhuyelwa musi ri tshi ita zwithu zwavhuḓi na u litsha u ita zwithu zwivhi. Ṱhogomelani tsumbo ya Nancy. O ri: “Musi ndi tshi aluwa ndo vha ndi si na ndavha, ndi tshi ḓifara nga nḓila i si yavhuḓi nahone ndi na lunyadzo. Fhedzi musi ndi tshi guda na u thetshelesa Yehova, ndo thoma u takala. Zwino ndi na tshirunzi nahone ndi a ḓiṱhonifha.”

Tshiitisi tshihulwanesa tshine tsha ita uri ri ṱahulele u vha na vhulenda ndi uri zwi takadza Yehova. Naho vhathu vhanzhi vha sa vhoni zwine ra zwi ita, Yehova u a zwi vhona. U a ḓivha zwithu zwavhuḓi zwine ra zwi humbula na zwine ra zwi ita. (Vhaef. 6:7, 8) U ri lambedza hani? “Muthu muvhuya tshawe ndi u takalelwa nga Yehova.” (Mir. 12:2) Nga zwenezwo, kha ri bvele phanḓa ri tshi ṱahulela vhulenda. Yehova u fulufhedzisa uri “muṅwe na muṅwe ane a ita zwivhuya u ḓo wana vhugala, u huliswa, na mulalo.”—Vharoma 2:10.