Genesi 43:1-34
43 Nḓala yo vha i khulu shangoni.+
2 Musi vho no fhedza goroi ye vha vhuya nayo Egipita,+ khotsi avho a amba navho a ri: “Humelani ni ye u ri rengela zwiḽiwanyana.”
3 Yuda a amba na khotsi awe a ri: “Uḽa munna o amba na riṋe o tou khwaṱhisa a ri: ‘Ni songo tsha ḓa phanḓa hanga arali na sa ḓa na murathu waṋu.’+
4 Arali wa ri ruma na murathu washu, ri ḓo ya ra u rengela zwiḽiwa.
5 Fhedzi arali wa sa tenda ri tshi ṱuwa nae, ri nga si ye, ngauri uḽa munna o amba na riṋe a ri: ‘Ni songo tsha ḓa phanḓa hanga arali ni si na murathu waṋu.’”+
6 Isiraele+ a ri: “Ndi ngani ni tshi nga mmbaisa nga u rali? Ndi ngani no vhudza onoyo munna uri ni na muṅwe murathu?”
7 Vhone vha ri: “Onoyo munna o vhudzisa nga ha riṋe na nga mashaka ashu a ri: ‘Naa khotsi aṋu u kha ḓi tshila? Naa ni kha ḓi vha na muṅwe murathu?’ Riṋe ra mu fhindula zwe a ri vhudzisa zwone.+ Ro vha ri tshi ḓo zwi ḓivha hani uri u ḓo ri: ‘Ni ḓe na murathu waṋu fhano’?”+
8 Mafheleloni Yuda a amba na Isiraele khotsi awe a ri: “Ntendele ndi ṱuwe na onoyo mutukana,+ kha ri ṱuwe uri ri tshile ri si fe,+ riṋe na iwe na vhana vhashu.+
9 Ndi ḓo ita vhungoho ha uri ndi mu tsireledze.+ Ndi nṋe ane a ḓo vha na vhuḓifhinduleli. Arali nda kundwa u vhuya nae nda mu ḓisa phanḓa hau, ndi ḓo vha ndo u khakhela vhutshilo hanga hoṱhe.
10 Arali ri vhe ri songo lenga, ro vha ri tshi ḓo vha ro no ya luvhili ra dovha ra vhuya.”
11 Isiraele khotsi avho a amba navho a ri: “Arali zwo ralo, itani hezwi: Dzhiani zwibveledzwa zwavhuḓi zwa ḽino shango ni zwi dzhenise masagani* aṋu, ni zwi isele onoyo munna sa tshifhiwa:+ zwiḓolonyana zwa baḽisamu,+ mutolinyana, ṋonzhe,+ thebvu na alimondo.
12 Dzhiani tshelede yo linganaho u renga kavhili; ni dovhe ni humise tshelede ye na i wana masagani aṋu.+ Khamusi vho tou khakha.
13 Ṱuwani na murathu waṋu ni humele kha onoyo munna.
14 Ngavhe Mudzimu Ramaanḓaoṱhe a tshi nga ita uri onoyo munna a ni pfele vhuṱungu, a vhofholole Simioni na Benyamini. Arali ndi tshi nga felwa nga vhana vhanga, ndi ḓo ḓi vha ndo felwa zwanga!”+
15 Nga zwenezwo, vha dzhia tshenetsho tshifhiwa, vha dzhia na tshelede ya u renga kavhili na Benyamini. Vha ya Egipita vha ima phanḓa ha Yosefa.+
16 Musi Yosefa a tshi vhona Benyamini e na vhakomana vhawe, a ṱavhanya a amba na munna we a vha a tshi ṱhogomela nnḓu yawe a ri: “Isa avha vhanna nḓuni, u ṱhavhe zwifuwo u vha lugiselele zwiḽiwa, ngauri vhenevha vhanna vha ḓo ḽa na nṋe nga masiari.”
17 Onoyo munna a ṱavhanya a ita zwe Yosefa a amba.+ Ngauralo, a vha dzhia a vha isa nḓuni ya Yosefa.
18 Fhedzi vhenevho vhanna vho vha vho tshuwa musi vha tshi iswa nḓuni ya Yosefa, vha thoma u ri: “Ri khou ḓiswa hafha nga nṱhani ha tshelede ye ya vhuyedzedzwa masagani ashu tshifhingani tsho fhiraho. Zwino vha ḓo ri vutshela vha ri ita vhalanda, vha dzhia donngi dzashu!”+
19 Vha ya muṋangoni wa nnḓu vha amba na munna we a vha a tshi ṱhogomela nnḓu ya Yosefa.
20 Vha ri: “Pfarelo, muṋe washu! Ro vhuya ra ḓa fhano u renga zwiḽiwa.+
21 Fhedzi musi ri tshi swika fhethu ha u eḓela hone, ra ri ri tshi vula masaga ashu, muṅwe na muṅwe a wana tshelede yo fhelelaho sagani ḽawe.+ Zwino ro vha ri tshi khou ṱoḓa u i vhuisa nga riṋe vhaṋe.
22 Ro ḓa na iṅwe tshelede ya u renga zwiḽiwa. A ri ḓivhi uri ndi nnyi o dzhenisaho tshelede masagani ashu.”+
23 A amba navho a ri: “Zwo luga. Ni songo ofha. Ndi Mudzimu waṋu na Mudzimu wa khotsi aṋu we a ni ṋea lupfumo. Ndi a zwi ḓivha uri no badela.” Nga murahu a vha ḓisela Simioni.+
24 Onoyo munna a vha isa nḓuni ya Yosefa, a vha ṋea maḓi a u ṱamba milenzhe, a ṋea donngi dzavho furu.
25 Vha bvisa tshifhiwa+ uri vha tshi ṋee Yosefa musi a tshi ḓa nga masiari, ngauri vho vha vho pfa uri vha ḓo ya vha ḽa zwiḽiwa henengei.+
26 Musi Yosefa a tshi dzhena nḓuni vha mu ṋea tshifhiwa, vha mu losha.+
27 Nga murahu a vha vhudzisa nga ha mutakalo wavho, a dovha a ri: “Khotsi aṋu wa mukalaha we na amba nga hae o vuwa hani? Naa u kha ḓi tshila?”+
28 Vhone vha ri: “Khotsi ashu, mushumeli wau u tshee o takala. U kha ḓi tshila.” Vha losha vha luvha.+
29 Musi a tshi lavhelesa a vhona Benyamini murathu wawe, ṅwana wa mme awe,+ a ri: “Naa uyu ndi ene murathu waṋu, ene muṱuku we na mmbudza nga hae?”+ A dovha a ri: “Ṅwananga, ngavhe Mudzimu a tshi u sumbedza vhuthu.”
30 Yosefa a bva nga u ṱavhanya, ngauri o vha a si tsha kona u ḓifara musi a tshi vhona murathu wawe, a ya u ṱoḓa fhethu hune a nga lilela hone. A ya kamarani he ha vha hu si na muthu a lilela hone.+
31 Nga murahu a ṱamba khofheni a bvela nnḓa a dovha a ḓikhwaṱhisa, a amba na vhashumeli vhawe a ri: “Avhani zwiḽiwa.”
32 Vha mu avhela e eṱhe, vha vha avhela zwavho vhe vhoṱhe, na Vhaegipita vha re nae vha ḽa nga tshavho; ngauri Vhaegipita vho vha vha sa ḽi zwiḽiwa na Vhahevheru, ngauri zwo vha zwi zwithu zwi nengisaho kha Vhaegipita.+
33 Vhakomana vhawe na murathu wawe vho vha vho dzula phanḓa hawe, wa tanzhe o vha o dzula u ya nga ndugelo yawe ya vhutanzhe+ na muṱuku o dzula u ya nga vhuṱuku hawe; vha lavhelesana vho mangala.
34 A vha avhela zwiḽiwa zwi bvaho ṱafulani ḽawe, fhedzi a engedza mukovhe wa Benyamini kaṱanu u fhira wa vhaṅwe vhoṱhe.+ Vha bvela phanḓa vha tshi ḽa na u nwa nae vha fura.
Ṱhaluso dzi re magumoni a siaṱari
^ Kana “mikhwamani.”
