Genesi 37:1-36
37 Yakobo a bvela phanḓa a tshi dzula shangoni ḽa Kanana, he khotsi awe a vha a tshi dzula hone sa mutsinda.+
2 Haya ndi mafhungo a Yakobo.
Musi Yosefa+ e na miṅwaha ya 17, o vha a tshi lisa sambi+ na vharwa vha Biliha+ na vha Silipa,+ vhafumakadzi vha khotsi awe. Huno Yosefa a vhudza khotsi awe mafhungo a si avhuḓi nga havho.
3 Isiraele o vha a tshi funesa Yosefa u fhira vhaṅwe vharwa vhawe vhoṱhe,+ ngauri o mu beba o no vha mualuwa; o vha o rungelwa tshiambaro tsho nakaho tshilapfu.
4 Musi vhakomana vhawe vha tshi vhona uri khotsi avho u mu funesa u fhira vhone, vha thoma u mu vhenga, vha sa ambi nae zwavhuḓi.
5 Nga murahu Yosefa a ḽora, a vhudza vhakomana vhawe wonoyo muḽoro,+ vha wana tshiṅwe tshiitisi tsha u mu vhenga.
6 A amba navho a ri: “Ndi humbela uri ni thetshelese zwe nda ḽora.
7 Ro vha ri tshi khou vhofha khuḽane tsimuni musi khuḽane yanga i tshi takuwa ya ima, dzaṋu dza tanga yanga dza i losha.”+
8 Vhakomana vhawe vha amba nae vha ri: “Naa zwa vhukuma u ṱoḓa u ḓiita khosi yashu wa ri vhusa?”+ Vha dovha vha wana tshiitisi tsha u mu vhenga nga nṱhani ha miḽoro yawe na zwe a zwi amba.
9 A dovha a ḽora muṅwe muḽoro, a u vhudza vhakomana vhawe a ri: “Ndo ḽora muṅwe muḽoro. Ndo ḽora ḓuvha na ṅwedzi na ṋaledzi dza 11 dzi tshi khou ngwadamela.”+
10 Nga murahu a dovha a u vhudza khotsi awe khathihi na vhakomana vhawe, khotsi awe a mu kaidza, a amba nae a ri: “Wonoyu muḽoro wau u amba mini? Naa nṋe na mme au na vhakomana vhau ri ḓo ḓa ra u gwadamela zwa vhukuma?”
11 Vhakomana vhawe vha vha na vivho khae,+ fhedzi khotsi awe a dzula a tshi humbula zwenezwo.
12 Vhakomana vhawe vha isa sambi ḽa khotsi avho pfuloni tsini na Shikeme.+
13 Nga murahu Isiraele a amba na Yosefa a ri: “A thi ri vhakomana vhau vha khou lisa masambi tsini na Shikeme? Iḓa ndi u rume khavho.” Yosefa a mu fhindula a ri: “Zwo luga!”
14 Isiraele a amba nae a ri: “Ndi humbela uri u ye u vhone arali zwifuwo na vhakomana vhau vha tshee vho takala, u vhuye u tshi mmbudza.” Ngauralo, Yosefa a ṱuwa henefho govhani ḽa Heburoni,+ a ya thungo ya Shikeme.
15 Nga murahu muṅwe munna a mu wana a tshi khou tendeleka ḓakani. Onoyo munna a mu vhudzisa a ri: “U khou ṱoḓa mini?”
16 Yosefa a fhindula a ri: “Ndi khou ṱoḓa vhakomana vhanga. Ndi khou humbela uri u mmbudze uri vha khou lisa ngafhi masambi?”
17 Onoyo munna a ri: “Vho ṱuwa fhano, ndo vha pfa vha tshi ri: ‘Kha ri ye Dothani.’” Yosefa a tevhela vhakomana vhawe, a vha wana Dothani.
18 Vha mu vhona a tshi kha ḓi vha kule, musi a sa athu u swika khavho vha vhamba maano a u mu vhulaya.
19 Vha amba nga tshavho vha ri: “Vhonani muḽori khouḽa u khou ḓa!+
20 Kha ri mu vhulaye ri mu pose kha ḽiṅwe ḽa madindi a maḓi; ri ḓo amba uri o ḽiwa nga tshivhanda. Ri ḓo vhona uri hu ḓo itea mini nga miḽoro yawe.”
21 Musi Rubeni+ a tshi pfa zwenezwo a lingedza u mu tshidza zwanḓani zwavho. A ri: “Ri songo mu vhulaya.”+
22 Rubeni a amba navho a ri: “Ni songo shulula malofha.+ Mu poseni kha heḽi dindi ḽa maḓi ḽi re sogani, ni songo mu huvhadza.”*+ O vha o ḓiimisela u mu tshidza zwanḓani zwavho uri a mu humisele ha khotsi awe.
23 Musi Yosefa a tshi tou swika kha vhakomana vhawe, vha mu bvula tshiambaro tshawe tsho nakaho tshe a vha o tshi ambara,+
24 vha mu dzhia vha mu posa dindini ḽa maḓi. Nga tshenetsho tshifhinga dindi ḽo vha ḽi si na maḓi.
25 Vha dzula fhasi vha ḽa. Musi vha tshi lavhelesa, vha vhona tshigwada tsha Vhaishimaele+ tshi tshi khou bva Giḽiada. Gamela dzavho dzo vha dzo hwala zwiḓolo zwa baḽisamu na ṋonzhe,+ vhe nḓilani ya u ya Egipita.
26 Yuda a amba na vhakomana vhawe a ri: “Arali ra vhulaya murathu washu ra fukedza malofha awe ri ḓo vhuyelwa nga mini?+
27 Kha ri mu rengisele+ Vhaishimaele, ri songo mu huvhadza. Huufha e murathu washu, ri malofha mathihi nae.” Ngauralo, vha thetshelesa murathu wavho.
28 Musi vharengisi vha Vhamidiani+ vha tshi khou pfuka nga henefho, vha bvisa Yosefa dindini ḽa maḓi vha mu rengisela Vhaishimaele nga shekele* dza 20 dza siḽiva.+ Mafheleloni vhenevha vhanna vha isa Yosefa Egipita.
29 Nga murahu musi Rubeni a tshi humela dindini ḽa maḓi a wana Yosefa a si tsheeho, a kherukanya zwiambaro zwawe.
30 Musi a tshi humela kha vhaṅwe vharathu vhawe a ri: “Uḽa ṅwana ha tsheeho! Zwino ndi ḓo ita mini?”
31 Naho zwo ralo, vha dzhia tshiambaro tsha Yosefa, vha ṱhavha tshibokoṱo, vha lovhea tshiambaro kha malofha a tshibokoṱo.
32 Nga murahu ha zwenezwo, vha rumela tshiḽa tshiambaro tshawe tsho nakaho ha khotsi avho vha ri: “Ro wana hetshi tshiambaro. Ri khou humbela uri u sedze uri u vhone arali tshi tsha murwa wau.”+
33 A sedza tshiambaro, a ṱavha mukosi a ri: “Ndi tshiambaro tsha murwa wanga! U tea u vha o ḽiwa nga tshivhanda! Ngoho Yosefa o ṱhukhukanywa!”
34 Yakobo a kherukanya zwiambaro zwawe a kanyela dzanganda, a lilela murwa wawe maḓuvha manzhi.
35 Vharwa vhawe vhoṱhe na vhananyana vhawe vhoṱhe vha lingedza u mu fhumudza, fhedzi a hana u fhumudzwa a ri: “Ndi ḓo vhuya nda ya Vhiḓani*+ ndi tshi khou lilela murwa wanga!” Yakobo a bvela phanḓa a tshi mu lilela.
36 Naho zwo ralo, Vhamidiani vha mu rengisela Potifara muḓinḓa wa Farao,+ muhulwane wa vhalindi,+ ngei Egipita.
Ṱhaluso dzi re magumoni a siaṱari
^ Kana “ni songo mu rwa.”
^ Shekele nthihi i lemela gramu dza 11,4. Sedzani Ṱhume. B14.
^ Kana “Sheol.” Sedzani Mutevhe Wa Ṱhalutshedzo Ya Maipfi.
