Genesi 30:1-43
30 Musi Rahele a tshi vhona uri ha athu u bebela Yakobo vhana, a thoma u vha na vivho kha mukomana wawe, a amba na Yakobo a ri: “Mphe vhana arali zwa sa ralo ndi ḓo fa.”
2 Yakobo a sinyutshela Rahele zwihulu a ri: “Naa ndi nga ḓivhea vhuimoni ha Mudzimu, we a u thivhela uri u si vhe na vhana?”
3 Rahele a ri: “Biliha+ phuli yanga ya mufumakadzi khoyu. Ita zwa vhudzekani nae uri a mbebele vhana na nṋe ndi kone u vha na vhana.”
4 A mu ṋea Biliha mushumeli wawe uri a vhe mufumakadzi wawe, Yakobo a ita zwa vhudzekani nae.+
5 Biliha a vhifha muvhilini, nga u ya ha tshifhinga a bebela Yakobo murwa.
6 Rahele a ri: “Mudzimu o nkhaṱhulela a dovha a thetshelesa zwe nda amba, a nṋea murwa.” Ndi ngazwo o mu ira dzina ḽa Dani.*+
7 Biliha mushumeli wa Rahele a dovha a vhifha muvhilini a bebela Yakobo muṅwe murwa.
8 Rahele a ri: “Ndo lwa nndwa khulu na mukomana wanga. Ndo kunda!” A mu ira dzina ḽa Nafutali.*+
9 Musi Lea a tshi vhona zwa uri ha tsha kona u beba, a dzhia Silipa mushumeli wawe a mu ṋea Yakobo uri a vhe mufumakadzi wawe.+
10 Silipa mushumeli wa Lea a bebela Yakobo murwa.
11 Lea a ri: “Zwo ntshimbilela zwavhuḓi!” Ngauralo, a mu ira dzina ḽa Gada.*+
12 Nga murahu ha zwenezwo, Silipa mushumeli wa Lea, a bebela Yakobo murwa wa vhuvhili.
13 Lea a ri: “Ndo takala vhukuma. Vhananyana vha ḓo ri ndo takala.”+ A mu ira dzina ḽa Ashere.*+
14 Rubeni+ a tshi khou tshimbila tsimuni nga tshifhinga tsha khaṋo a wana mitshelo.* A i ḓisa ha Lea mme awe. Rahele a amba na Lea a ri: “Ndi khou humbela miṅwe ya mitshelo ya murwa wau.”
15 Lea a amba nae a ri: “Naa a zwo ngo eḓana u tshi ndzhiela munna?+ Naa zwino u khou ṱoḓa u dovha wa dzhia na mitshelo ya murwa wanga?” Ngauralo, Rahele a ri: “Yakobo u ḓo lala na iwe vhusiku vhuno arali wa nṋea mitshelo ya murwa wau.”
16 Musi Yakobo a tshi vhuya masimuni nga madekwana, Lea a ya a mu ṱanganedza, a ri: “Ita zwa vhudzekani na nṋe ngauri ndo u renga nga mitshelo ya murwa wanga.” A lala nae honoho vhusiku.
17 Mudzimu a pfa thabelo ya Lea, a ita uri a vhifhe muvhilini, a bebela Yakobo murwa wa vhuṱanu.
18 Lea a ri: “Mudzimu o nṋea malamba ngauri munna wanga ndo mu ṋea mushumeli wanga.” Ngauralo, a mu ira dzina ḽa Isashari.*+
19 Lea a dovha a vhifha muvhilini a bebela Yakobo murwa wa vhurathi.+
20 Lea a ri: “Mudzimu o nṋea tshifhiwa tshavhuḓi. Zwino munna wanga u ḓo nkonḓelela,+ ngauri ndo mu bebela vharwa vha rathi.”+ A mu ira dzina ḽa Sebuloni.*+
21 Nga murahu a mu bebela ṅwananyana, a mu ira dzina ḽa Dina.+
22 Mudzimu a pfa thabelo ya Rahele, a ita uri a vhifhe muvhilini.+
23 A vhifha muvhilini a beba murwa. A ri: “Mudzimu o ita uri ndi si tsha nyadziwa!”+
24 A mu ira dzina ḽa Yosefa,*+ a ri: “Yehova o nṋea muṅwe murwa.”
25 Musi Rahele o no beba Yosefa, Yakobo a amba na Labani a ri: “Nnditshe ndi ṱuwe ndi ye hayani ha hashu na shangoni ḽa hashu.+
26 Mphe vhafumakadzi vhanga na vhananga, vhe nda vha shumela uri ndi ṱuwe, ngauri u a ḓivha uri ndo u shumela.”+
27 Labani a amba nae a ri: “Arali wo nndavhelesa nga vhuthu, ndo vhona zwiga zwe zwa ntsumbedza uri Yehova u khou mphaṱhutshedza nga nṱhani ha iwe.”
28 A dovha a ri: “Mmbudze malamba ane wa a ṱoḓa, ndi ḓo u ṋea.”+
29 Yakobo a ri: “U a zwi ḓivha uri ndo u shumela vhukuma na nḓila ye sambi ḽau ḽa engedzea ngayo ḽi na nṋe;+
30 wo vha u na zwiṱuku musi ndi tshi swika, fhedzi sambi ḽau ḽo engedzea ḽa anda, Yehova o u fhaṱutshedza u bva tshee nda swika. Zwino muṱa wanga ndi ḓo u shumela lini?”+
31 Labani a ri: “Ndi u ṋee mini?” Yakobo a fhindula a ri: “U songo nṋea tshithu! Arali wa nnyitela tshithu tshithihi fhedzi, ndi ḓo bvela phanḓa ndi tshi lisa sambi ḽau na u ḽi ṱhogomela.+
32 Ndi ḓo ya sambini ḽau ḽoṱhe ṋamusi. Iwe u nange nngu dzoṱhe dza mavhala na dzoṱhe dza buraweni vhukati ha ngwana dza nduna na mbudzi dza tsadzi. U bva zwino zwenezwi zwi tea u vha malamba anga.+
33 Zwivhuya* zwanga zwi ḓo nṱanzielela musi u tshi ḓa u sedza malamba anga; arali wa wana ndi na mbudzi i si na mavhala vhukati ha mbudzi dza tsadzi na dza buraweni vhukati ha ngwana dza nduna ndi ḓo vha ndo tswa.”
34 Labani a ri: “Zwo luga! Nga zwi vhe nga u ralo.”+
35 Nga ḽeneḽo ḓuvha Labani a nanga mbudzi dza nduna dzi re na mavhala na dza tsadzi dzi re na mavhala, tshena na dza buraweni dzi re vhukati ha ngwana dza nduna a dzi ṋea vharwa vhawe uri vha dzi ṱhogomele.
36 Nga murahu ha zwenezwo, a fara lwendo lwa maḓuvha mararu, Yakobo a sala a tshi khou lisa masambi a Labani o salaho.
37 Yakobo a dzhia matavhi maṋu a muri wa musiterokisi, wa mualimondo na wa muṋengeledzi a swarula makwati khayo ha vhonala thanda tshena.
38 Matavhi e a a swarula a a vhea phanḓa ha sambi mikungwani ya maḓi, hune masambi a ḓo ḓa a nwa hone, uri a hwelwe* phanḓa ha eneo matavhi musi a tshi ḓa u nwa maḓi.
39 Masambi a hwelwa* henefho phanḓa ha matavhi, a dzwala dzine dza vha na mavhala.
40 Yakobo a nanga ngwana dza nduna, a ita uri masambi a lavhelese dzi re na mavhala na dzoṱhe dza buraweni vhukati ha masambi a Labani. A nanga masambi awe, a si a ṱanganyise na a Labani.
41 Musi a tshi vhona zwifuwo zwo khwaṱhaho zwi tshi hwelwa,* Yakobo o vha a tshi vhea matavhi phanḓa ha masambi uri zwi hwelane* phanḓa ha matavhi.
42 Fhedzi musi hu zwifuwo zwi si na nungo, o vha a sa vhei matavhi henefho. Zwi si na nungo zwo vha zwi tshi vha zwa Labani, fhedzi zwo khwaṱhaho zwo vha zwi tshi vha zwa Yakobo.+
43 Yakobo a pfuma vhukuma, a vha na masambi mahulwane na vhashumeli vha vhanna na vha vhafumakadzi na gamela na donngi.+
Ṱhaluso dzi re magumoni a siaṱari
^ Zwine zwa amba uri “Muhaṱuli.”
^ Zwine zwa amba uri “Nndwa Dzanga.”
^ Zwine zwa amba uri “Zwo Ntshimbilela Zwavhuḓi.”
^ Zwine zwa amba uri “U Takala; Dakalo.”
^ “Mitshelo ya muvhala wa swiri i ṱoḓaho u fana na maḓabula; ya dovha ya ṱoḓa u fana na marumbuḓane.”
^ Zwine zwa amba uri “U Malamba.”
^ Zwine zwa amba uri “U Konḓelela.”
^ Ḽo fhelela ndi Yosifia, zwine zwa amba uri “Ngavhe Yehova A Tshi Engedza (Andisa).”
^ Kana “U fhulufhedzea.”
^ Kana “a ṱoḓe u ita vhana.”
^ Kana “a ṱoḓa u ita vhana.”
^ Kana “ṱoḓa u ita vhana.”
^ Kana “ṱoḓe u ita vhana.”
