Genesi 40:1-23
40 Nga murahu ha zwenezwo zwithu, mufari wa tshinwelo+ tsha khosi ya Egipita na mubaki vha tshinya phanḓa ha muṋe wavho, khosi ya Egipita.
2 Farao a sinyutshela vhenevho vhaḓinḓa vhawe vhavhili, muhulwane wa vhafari vha zwinwelo na muhulwane wa vhabaki,+
3 a vha valela dzhele ya muhulwane wa vhalindi+ he Yosefa a vha o valelwa hone.+
4 Ngauralo, muhulwane wa vhalindi a laedza Yosefa uri a vhe e navho, a vha ṱhogomele,+ vha fhedza tshifhinga* tshilapfu vhe dzhele.
5 Mufari wa tshinwelo na we a vha a tshi bakela khosi ya Egipita, vha ḽora nga vhusiku vhuthihi, muḽoro muṅwe na muṅwe wo vha u na ṱhalutshedzo yawo.
6 Nga ḽa matshelo nga matsheloni, Yosefa a ḓa khavho a vhona vho ṱungufhala.
7 A vhudzisa vhaḓinḓa vha Farao vho valelwaho nae nḓuni ya muṋe wawe a ri: “Ndi ngani no ṱungufhala ṋamusi?”
8 Vha amba nae vha ri: “Vhuvhili hashu ro ḽora, fhedzi a hu na muthu ane a nga ri ṱalutshedza.” Yosefa a amba navho a ri: “Naa a ni ḓivhi uri ṱhalutshedzo dzi bva kha Mudzimu?+ Ndi khou humbela uri ni mmbudze.”
9 Nga zwenezwo, muhulwane wa vhafari vha zwinwelo a vhudza Yosefa muḽoro wawe a ri: “Ndo ḽora hu na munḓirivhe phanḓa hanga.
10 Wonoyo munḓirivhe wo vha u na matavhi mararu, u tshi vhonala u tshi khou kulukusha. Wa bva maluvha wa vha na zwiṱokola zwa nḓirivhe dzo vhibvaho.
11 Ndo vha ndo fara tshinwelo tsha Farao, nda dzhia nḓirivhe nda dzi hamulela khatsho. Nga murahu ha zwenezwo, nda tshi ṋekedza Farao.”
12 Yosefa a amba nae a ri: “Ṱhalutshedzo ya hone ndi heyi: Matavhi mararu a imela maḓuvha mararu.
13 Maḓuvha mararu u bva zwino Farao u ḓo u vhofholola, a u vhuyedzedza vhuimoni hau;+ iwe u ḓo ṋekedza Farao tshinwelo tshawe+ sa zwe wa vha u tshi zwi ita.
14 Naho zwo ralo, u tea u nkhumbula musi zwithu zwi tshi u tshimbilela zwavhuḓi. Ndi humbela uri u ntsumbedze lufuno lu sa shanduki, u vhudze Farao nga ha nṋe u itela uri a mbvise hafha fhethu.
15 Ngauri ndo tou tswiwa shangoni ḽa Vhahevheru;+ a tho ngo ita tshithu fhano tshine tsha nga ita uri ndi valelwe dzhele.”*+
16 Musi muhulwane wa vhabaki a tshi vhona uri Yosefa o ṋea ṱhalutshedzo yavhuḓi, na ene a amba na Yosefa a ri: “Na nṋe ndo ḽora ndo hwala mimanngi miraru ya vhurotho vhutshena kha ṱhoho yanga,
17 kha manngi wa nga nṱha hu na zwithu zwa mifuda yoṱhe zwo bakelwaho Farao, ho vha hu na zwiṋoni zwe zwa vha zwi tshi khou ḽa zwe zwa vha zwi kha manngi we wa vha u nṱha ha ṱhoho yanga.”
18 Yosefa a fhindula a ri, “Ṱhalutshedzo ya hone ndi heyi: Mimanngi miraru i imela maḓuvha mararu.
19 Maḓuvha mararu u bva zwino Farao u ḓo u ṱhukhula ṱhoho a u fhahea kha danda; zwiṋoni zwi ḓo ḽa ṋama yau.”+
20 Zwino ḓuvha ḽa vhuraru ḽa vha ḽa mabebo a Farao,+ a itela vhashumeli vhawe vhoṱhe tshimima. Musi vhashumeli vhawe vhe henefho a bvisa muhulwane wa vhafari vha zwinwelo na muhulwane wa vhabaki.
21 A vhuyedzedza muhulwane wa vhafari vha zwinwelo vhuimoni hawe ha u vha mufari wa tshinwelo, a bvela phanḓa a tshi ṋekedza Farao tshinwelo.
22 Fhedzi a fhahea muhulwane wa vhabaki, sa zwe Yosefa a vha o vha ṱalutshedza zwone.+
23 Naho zwo ralo, muhulwane wa vhafari vha zwinwelo a si humbule Yosefa; o vha o no mu hangwa.+
