Genesi 20:1-18
-
Sara u tsireledzwa kha Abimeleke (1-18)
20 Abrahamu a pfuluwa henefho+ a ya shangoni ḽa Negebe, a dzula vhukati ha Kadese+ na Shuru.+ Musi a tshi vho dzula* Gerara,+
2 Abrahamu a dovha a amba zwi fanaho nga ha Sara mufumakadzi wawe a ri: “Ndi khaladzi anga.”+ Ndi hone Abimeleke khosi ya Gerara a tshi amba uri Sara a ḓiswe khae.+
3 Mudzimu a ḓa vhusiku kha Abimeleke muḽoroni a amba nae a ri: “U ḓo fa nga nṱhani ha mufumakadzi we wa mu dzhia,+ ngauri o vhingwa nga muṅwe munna.”+
4 Naho zwo ralo, Abimeleke o vha a sa athu u ita zwa vhudzekani nae. Ngauralo, a ri: “Yehova, naa u ḓo vhulaya lushaka lu si na mulandu?*
5 Naa ho ngo amba a ri: ‘Ndi khaladzi anga’? Na ene Sara a ri: ‘Ndi khaladzi anga’? Ndo zwi ita nga u sa ḓivha.”
6 Mudzimu wa ngoho a amba nae muḽoroni a ri: “Ndi a zwi ḓivha uri wo zwi ita nga u sa ḓivha, nda u thivhela uri u songo ita tshivhi. Ndi ngazwo ndi songo u tendela u tshi mu kwama.
7 Zwino humisa mufumakadzi wa onoyo munna ngauri ndi muporofita,+ huno u ḓo u rabelela+ uri u tshile. Fhedzi arali wa sa mu humisa, ḓivha zwa uri iwe u ḓo fa na vhoṱhe vha re vhau.”
8 Abimeleke a vuwa nga matsheloni-tsheloni, a vhidza vhashumeli vhawe vhoṱhe a vha vhudza zwenezwo zwithu zwoṱhe, vha ofha zwihulu.
9 Abimeleke a vhidza Abrahamu a amba nae a ri: “Ndi zwithu-ḓe zwe wa ri ita? Ndo u khakhela ngani u tshi dzhenisa nṋe na muvhuso wanga tshivhini tshingafha? Zwe wa nnyita zwone a zwo ngo tea.”
10 Abimeleke a dovha a amba na Abrahamu a ri: “Wo vha u tshi khou humbula mini u tshi ita zwenezwi?”+
11 Abrahamu a ri: “Ndi ngauri ndo humbula uri: ‘Afha fhethu a hu ofhiwi Mudzimu, vha ḓo mmbulaya vha tshi ṱoḓa mufumakadzi wanga.’+
12 Ngoho ndi uri ndi khaladzi anga, ṅwananyana wa khotsi anga, fhedzi a si ṅwananyana wa mme anga, ndo mu vhinga a vha mufumakadzi wanga.+
13 Musi Mudzimu a tshi ita uri ndi ṱuwe muṱani wa khotsi anga,+ ndo amba na Sara nda ri: ‘Ntsumbedze lufuno lu sa shanduki: Hoṱhe hune ra ya, u ambe uri, “Ndi khaladzi anga.”’”+
14 Nga murahu ha zwenezwo, Abimeleke a ṋea Abrahamu nngu na kholomo na vhashumeli vha vhanna na vha vhafumakadzi, a mu ṋea na Sara mufumakadzi wawe.
15 Abimeleke a dovha a ri: “Shango ḽanga ngeḽi. Dzula hune wa funa.”
16 A amba na Sara a ri: “Ndi khou ṋea khaladzi au+ shekele* dza 1 000 dza siḽiva. Ndi tshiga tsha u sumbedza u sa vha hau na mulandu kha vhoṱhe vhane wa vha navho na phanḓa ha muṅwe na muṅwe, a u na mulandu.”
17 Abrahamu a rabela Mudzimu wa ngoho, Mudzimu a fhodza Abimeleke na mufumakadzi wawe na phuli dzawe dza vhafumakadzi, vha vha na vhana;
18 ngauri Yehova o vha o thivhela vhafumakadzi vha muṱa wa Abimeleke uri vha si bebe* nga nṱhani ha Sara, mufumakadzi wa Abrahamu.+
Ṱhaluso dzi re magumoni a siaṱari
^ Kana “a tshi vho dzula sa mutsinda.”
^ Kana “lushaka lwo lugaho.”
^ Shekele nthihi i lemela gramu dza 11,4. Sedzani Ṱhume. B14.
^ Kana “o vha o vala mbumbelo dza vhafumakadzi vha muṱa wa Abimeleke.”
