Genesi 12:1-20
12 Yehova a amba na Abramu a ri: “Ṱuwa shangoni ḽa hau, u sie na mashaka au na muṱa wa khotsi au, u ye shangoni ḽine nda ḓo u sumbedza ḽone.+
2 Ndi ḓo u ita lushaka luhulu, nda fhaṱutshedza dzina ḽau nda ḽi ita ḽihulu, vhathu vha ḓo fhaṱutshedzwa nga nṱhani hau.+
3 Ndi ḓo fhaṱutshedza vhane vha u fhaṱutshedza, ndi ḓo sema ane a u sema,+ huno miṱa yoṱhe ya kha ḽifhasi i ḓo fhaṱutshedzwa nga nṱhani hau.”+
4 Abramu a pfuluwa samusi Yehova o mu vhudza uri a ite nga u ralo, a ṱuwa na Loto. Abramu o vha e na miṅwaha ya 75 musi a tshi pfuluwa Harani.+
5 Abramu a dzhia Sarai+ mufumakadzi wawe na Loto murwa wa murathu wawe+ na thundu yoṱhe ye vha i kuvhanganya+ na vhashumeli vhe vha vha wana ngei Harani, vha pfulutshela shangoni ḽa Kanana.+ Musi vha tshi pfulutshela shangoni ḽa Kanana,
6 Abramu a tshimbila a swika Shikeme+ tsini na miri mihulu ya More.+ Nga tshenetsho tshifhinga ho vha hu na Vhakanana kha ḽeneḽo shango.
7 Yehova a ḓa kha Abramu a ri: “Heḽi shango+ ndi ḓo ḽi ṋea vhana* vhau.”+ Nga murahu Abramu a fhaṱela Yehova aḽeṱare we a ḓivhonadza khae henefho.
8 Nga murahu a pfulutshela dzinguni ḽa thavhani dza vhubvaḓuvha ha Bethele,+ a atha dennde vhukovhela ha Bethele na vhubvaḓuvha ha Ai.+ Henefho a fhaṱela Yehova aḽeṱare,+ a thoma u renda dzina ḽa Yehova.+
9 Nga murahu ha zwenezwo, Abramu a pfuluwa a tshimbila a tshi atha madennde a tshi ya thungo ya Negebe.+
10 Ha vha na nḓala shangoni ḽeneḽo, Abramu a tsela Egipita uri a dzule henefho lwa tshifhinganyana,*+ ngauri nḓala yo vha i khulu kha ḽeneḽo shango ḽa Kanana.+
11 Musi e tsini na u swika Egipita, a amba na mufumakadzi wawe Sarai a ri: “Ndi khou humbela uri u nthetshelese! Ndi a zwi ḓivha uri u mufumakadzi o nakaho.+
12 Musi Vhaegipita vha tshi u vhona vha ḓo ri: ‘Hoyu ndi mufumakadzi wawe.’ Nga zwenezwo, vha mmbulaya, fhedzi iwe vha u litsha.
13 Ndi humbela uri u ambe uri u khaladzi anga, uri vha mpfare zwavhuḓi vha tshi itela iwe, vha si mmbulaye.”+
14 Musi Abramu a tshi tou swika Egipita, Vhaegipita vha vhona uri onoyo mufumakadzi o vha o naka vhukuma.
15 Na vhakololo vha Farao vha mu vhona vha thoma u mu khoḓa kha Farao, onoyo mufumakadzi a iswa nḓuni ya Farao.
16 Nga nṱhani ha onoyo mufumakadzi, Farao a fara Abramu zwavhuḓi, a mu ṋea nngu, kholomo, donngi dza nduna na dza tsadzi, vhashumeli vha vhanna na vha vhafumakadzi na gamela.+
17 Ngauralo, Yehova a ḓisela Farao na muṱa wawe madwadze mahulu nga nṱhani ha Sarai, mufumakadzi wa Abramu.+
18 Farao a vhidza Abramu a ri: “Ndi zwithu-ḓe zwe wa nnyita zwone? Ndi ngani u songo mmbudza uri Sarai ndi mufumakadzi wau?
19 Ndi ngani wo ri: ‘Ndi khaladzi anga,’+ ndo ṱoḓou mu dzhia nda mu ita mufumakadzi wanga? Zwino khoyu mufumakadzi wau. Mu dzhie u ṱuwe!”
20 Farao a laedza vhashumeli vhawe uri vha fhelekedze Abramu na mufumakadzi wawe na zwoṱhe zwe a vha e nazwo.+
