Genesi 16:1-16
-
Hagara na Ishimaele (1-16)
16 Sarai mufumakadzi wa Abramu o vha a songo mu bebela vhana,+ fhedzi o vha e na mushumeli wa mufumakadzi wa Muegipita we a vha a tshi pfi Hagara.+
2 Sarai a amba na Abramu a ri: “Yehova ho ngo nṋea vhana. Ndi khou humbela uri u ite zwa vhudzekani na mushumeli wanga. Khamusi a nga mbebela vhana.”+ Abramu a thetshelesa zwe Sarai a mu vhudza zwone.
3 Musi Abramu o no dzula miṅwaha ya fumi shangoni ḽa Vhakanana, Sarai mufumakadzi wa Abramu a dzhia Hagara mushumeli wawe wa Muegipita, a mu ṋea Abramu munna wawe uri a vhe mufumakadzi wawe.
4 A ita zwa vhudzekani na Hagara, a vhifha muvhilini. Musi a tshi vhona uri o vhifha muvhilini, a thoma u nyadza Sarai mufumakadzi wa muṋe wawe.
5 Sarai a amba na Abramu a ri: “Hwala vhuḓifhinduleli ha u nyadziwa hanga. Ndi nṋe we nda u ṋea mushumeli wanga wa mufumakadzi, huno musi a tshi vhona uri o vhifha muvhilini, a thoma u nnyadza. U nga ri Yehova a nga haṱula a vhona uri ndi nnyi a re na mulandu vhukati hau na nṋe.”
6 Abramu a amba na Sarai a ri: “Mushumeli wau u zwanḓani zwau. Mu ite zwiṅwe na zwiṅwe zwine wa vhona zwi khwine kha iwe.” Sarai a mu tambudza, Hagara a shavha.
7 Nga murahu, muruṅwa wa Yehova a mu wana e tshisimani tshi re sogani, tshisima tshi re nḓilani ya u ya Shuru.+
8 Muruṅwa a ri: “Iwe Hagara mushumeli wa Sarai u bva ngafhi, u khou ya ngafhi?” Hagara a ri: “Ndi khou shavha Sarai mufumakadzi wa muṋe wanga.”
9 Muruṅwa wa Yehova a amba nae a ri: “Humela kha mufumakadzi wa muṋe wau, u ḓiṱukufhadze khae.”
10 Muruṅwa wa Yehova a amba nae a ri: “Vhana* vhau ndi ḓo vha andisa zwihulu, vha ḓo vha vhanzhi lune a vha nga ḓo vhalea.”+
11 Muruṅwa wa Yehova a dovha a amba nae a ri: “Wo vhifha muvhilini, u ḓo beba murwa ane wa tea u mu ira dzina ḽa Ishimaele,* ngauri Yehova o pfa nga ha u tambula hau.
12 Ṅwana wau u ḓo nga donngi. U ḓo lwa na vhathu vhoṱhe, vhoṱhe vha lwa nae, a dzula tsini na vharathu vhawe vhoṱhe.”*
13 Hagara a renda dzina ḽa Yehova, we a vha a tshi khou amba nae a ri: “U Mudzimu a vhonaho,+ ndo vhona we a mmbona.”
14 Ndi ngazwo tshenetsho tshisima tsho vhidzwa Beera-lahai-roi.* (Tshi vhukati ha Kadese na Bereda.)
15 Nga murahu, Hagara a bebela Abramu murwa, Abramu a ira murwa wawe we Hagara a mu bebela ene dzina ḽa Ishimaele.+
16 Abramu o vha e na miṅwaha ya 86 musi Hagara a tshi mu bebela Ishimaele.
