Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tenuare 2017

A haafaufaa i ta oe ô o te tiamâraa e maiti

A haafaufaa i ta oe ô o te tiamâraa e maiti

“Te vahi tei reira te varua o Iehova, tei reira atoa ïa te tiamâraa.”—Kor. 2, 3:17, New World Translation.

HIMENE: 62, 65

1, 2. (a) Eaha te mana‘o o te taata no nia i te tiamâraa e maiti? (b) Eaha ta te Bibilia e haapii mai ra no nia i te tiamâraa e maiti (c) Eaha te mau uiraa ta tatou e hi‘opoa mai?

A RAVE ai i te hoê faaotiraa, ua parau te hoê vahine i te hoê hoa: “Eiaha oe e parau mai ia feruri, a parau noa mai eaha te rave. Mea ohie a‘e ïa.” Mea au a‘e na teie vahine ia parauhia ’tu eaha te rave, eiaha râ e faaohipa i to ’na tiamâraa e maiti, te hoê ô faahiahia no ǒ mai i to ’na Atua poiete. E oe? Mea au anei na oe e rave i ta oe iho mau faaotiraa? Aore ra mea au a‘e na oe na vetahi ê e faaoti no oe? Eaha no oe te tiamâraa e maiti?

2 Mea taa ê roa te mana‘o o te taata no nia i te tiamâraa e maiti. Te parau ra vetahi e aita e tiamâraa e maiti no te mea ua faaoti a‘ena te Atua i ta tatou mau haaraa atoa. Area no vetahi ê, e tiamâraa to tatou no te maiti mai te peu noa e tiamâraa otia ore to tatou. Te parau nei râ te Bibilia e ua poietehia tatou e te aravihi e te tiamâraa e rave i ta tatou iho mau faaotiraa ferurihia. (A taio i te Iosua 24:15.) E ite atoa tatou i  roto i te Bibilia te mau pahonoraa i teie mau uiraa: Ua taotiahia anei to tatou tiamâraa e maiti? E nafea tatou e faaohipa ’i i to tatou tiamâraa e maiti no te rave i te mau faaotiraa? E nafea ta tatou mau faaotiraa e faaite ai i to tatou here rahi mau no Iehova? E nafea tatou e faatura ’i i te mau faaotiraa a vetahi ê?

EAHA TE HAAPII MAI NO NIA IA IEHOVA E IESU?

3. E nafea Iehova e faaohipa ’i i to ’na tiamâraa otia ore?

3 E tiamâraa otia ore to Iehova e e nehenehe tatou e haapii mai i ta ’na huru faaohiparaa i to ’na tiamâraa. Ei hi‘oraa, ua maiti Iehova i te nunaa Iseraela ei nunaa no ’na, ta ’na “pǔpǔ taata hau ê.” (Deut. 7:6-8) E tumu i na reira ’i oia. Ua hinaaro Iehova e tapea i ta ’na i fafau i to ’na hoa ia Aberahama. (Gen. 22:15-18) Hau atu â, e Atua here e te parau-tia Iehova ia faaohipa oia i to ’na tiamâraa. E nehenehe tatou e ite i te reira i roto i ta ’na huru a‘oraa i te mau Iseraela a faaroo ore ai ratou ia ’na. Ia tatarahapa mau ratou, e faaite atu Iehova i te here e te aroha hamani maitai ia ratou. Ua parau oia: “Na ’u e faaora i to ratou pahee i muri, na ’u e aroha noa ’tu ia ratou.” (Hos. 14:4) Ua horoa Iehova i te hi‘oraa maitai no tatou a faaohipa ’i oia i to ’na tiamâraa no te tauturu ia vetahi ê!

Hou oia a haere mai ai i te fenua nei, ua maiti Iesu i te vai taiva ore i te Atua e eiaha e apiti ia Satani e ta ’na orureraa hau

4, 5. (a) O vai tei fana‘o na mua i ta te Atua ô o te tiamâraa e maiti? (b) Mea nafea oia i te faaohiparaa i te reira? (c) Eaha te uiraa mea tia ia tatou tataitahi ia ui?

4 Ua maiti Iehova i te poiete i te mau melahi e te taata ma te horoa i te tiamâraa e maiti. O Iesu ta Iehova i poiete na mua roa. Ua poietehia oia ma to te Atua ra huru e e tiamâraa to ’na e maiti. (Kol. 1:15, NWT) Mea nafea Iesu i te faaohiparaa i to ’na tiamâraa? Hou oia a haere mai ai i te fenua nei, ua maiti Iesu i te vai taiva ore i te Atua e eiaha e apiti ia Satani e ta ’na orureraa hau. I te fenua nei, ua maiti Iesu i te patoi i te mau faahemaraa a Satani. (Mat. 4:10) I te po hou oia a pohe ai, ua haapapu Iesu i to ’na Metua e e hinaaro oia e rave i to ’Na hinaaro. Ua parau oia: “E tau Metua, ia tia ia oe ra, e hopoi ê atu i teie nei au‘a; ia tupu râ to oe hinaaro eiaha to ’u.” (Luka 22:42) E nehenehe mau anei tatou e pee i to Iesu hi‘oraa, a faaohipa ’tu ai i to tatou tiamâraa e maiti no te faahanahana ia Iehova e no te rave i to ’na hinaaro?

5 E nehenehe tatou e pee i to Iesu hi‘oraa no te mea ua hamanihia tatou ma to te Atua ra huru. (Gen. 1:26) Tera râ, aita to tatou e tiamâraa otia ore mai to Iehova. Te faataa ra te Bibilia e ua taotia Iehova i to tatou tiamâraa e te titau mai ra oia ia farii tatou i tera mau taotiaraa. Ei hi‘oraa, i roto i te utuafare, mea titauhia ia auraro te vahine faaipoipo i ta ’na tane, e te mau tamarii, ia faaroo i to ratou mau metua. (Eph. 5:22; 6:1) E nafea teie mau taotiaraa e ohipa ’i i nia i ta tatou huru faaohiparaa i te tiamâraa e maiti? E nehenehe te pahonoraa i teie uiraa e faaite mai i to tatou a muri a‘e mure ore.

 TE FAAOHIPARAA I TE TIAMÂRAA E MAITI

6. A faataa no te aha mea faufaa ia taotiahia to tatou tiamâraa.

6 E nehenehe anei e parau e e tiamâraa mau te tiamâraa taotiahia? E. No te aha? No te mea e nehenehe te mau taotiaraa e paruru ia tatou. Ei hi‘oraa, e rave paha tatou i te pereoo no te haere i te hoê oire atea. A feruri na râ e aita e ture no te tereraa o te mau pereoo, na te taata e faaoti eaha te tere e tano e teihea pae purumu e tere. Eita anei oe e mǎta‘u i te rave i tera purumu? Oia ïa. Mea titauhia te mau taotiaraa ia nehenehe te taatoaraa e faufaahia i te tiamâraa mau. E hi‘o ana‘e i te tahi mau hi‘oraa o te Bibilia e faaite ra mea nafea tatou e faufaahia ’i i te mau taotiaraa ta Iehova i tuu mai.

7. (a) Eaha te taa-ê-raa i rotopu ia Adamu e te mau animara? (b) A faataa hoê hi‘oraa mea nafea Adamu i te faaohiparaa i to ’na tiamâraa e maiti.

7 A poiete ai Iehova i te taata matamua, ia Adamu, ua horoa oia i te hoê â ô ta ’na i horoa i te mau melahi, te ô o te tiamâraa e maiti. Aita râ te Atua i horoa i te tiamâraa e maiti i te mau animara. Mea nafea Adamu i te faaohipa-maitai-raa i to ’na tiamâraa e maiti? Ua horoa Adamu i te i‘oa o te mau animara. “Ua aratai mai [te Atua] ia Adamu ra, ia itea ta ’na i‘oa e mairi.” Ua hi‘o Adamu i te mau animara tataitahi e ua horoa i te i‘oa e tano no tera e tera animara. Aita Iehova i taui noa ’‘e i ta Adamu i faaoti: “Ta Adamu i‘oa e mairi i taua mau mea ora atoa ra, ia riro te reira ei i‘oa mau.”—Gen. 2:19.

8. Mea nafea Adamu i te faaohiparaa i to ’na tiamâraa e maiti ma te tano ore, e eaha te faahopearaa?

8 Ua horoa Iehova ia Adamu te hopoia e faariro i te fenua ei paradaiso a na ô ai oia: “Ia fanau orua, e ia rahi roa, e faaî i te fenua nei, e e haavi iho; e ia mana orua i nia iho i te i‘a o te tai, e i nia iho i te mau manu o te reva, e i nia iho i te mau mea atoa e nee haere i nia iho i te fenua nei.” (Gen. 1:28) Ua maiti râ Adamu i te amu i te maa opanihia, e ma te na reira, aita oia i tâu‘a i te mau taotiaraa ta Iehova i tuu mai. No to Adamu faaohiparaa i to ’na tiamâraa e maiti ma te tano ore, ua mauiui te taata e rave rahi matahiti e tae roa mai i teie mahana. (Roma 5:12) E haamana‘o ana‘e i te mau faahopearaa iino o ta Adamu faaotiraa. E turai te reira ia tatou ia faaohipa maitai i to tatou tiamâraa e ia farii i te mau taotiaraa ta Iehova i tuu mai.

Ua maiti te nunaa Iseraela i te riro mai ei nunaa no te Atua e ua farii i te mau taotiaraa ta Iehova i tuu atu

9. Eaha te maitiraa ta Iehova i horoa i to ’na nunaa, ia Iseraela, e eaha ta ratou i fafau i te rave?

9 Ua tutuu mai Adamu e Eva ia tatou pauroa te huru tia ore e te pohe. Tera râ, e nehenehe â tatou e faaohipa i te ô o te tiamâraa e maiti. E ite tatou i te reira na roto i ta te Atua huru raveraa i nia i te nunaa Iseraela. Ua vaiiho Iehova ia ratou ia maiti e riro mai ei tao‘a here rahi na ’na aore ra aita. (Exo. 19:3-6) Ua maiti te nunaa i te riro mai ei nunaa no te Atua e ua farii i te mau taotiaraa ta Iehova i tuu atu. Ua parau ratou: “Te mau parau atoa ta  Iehova i parau, e rave ïa matou.” (Exo. 19:8) I muri iho râ, aita te nunaa i tapea i ta ratou i parau ia Iehova. E nehenehe tatou e huti mai i te haapiiraa faufaa i teie hi‘oraa. E haafaufaa ana‘e i ta tatou ô o te tiamâraa e maiti, a vai piri noa ’tu ai ia Iehova e a auraro noa ’tu ai i ta ’na mau ture.—Kor. 1, 10:11.

10. Eaha te mau hi‘oraa i roto i te Hebera pene 11 e haapapu ra e e nehenehe te taata tia ore e faaohipa i to ratou tiamâraa e maiti no te faahanahana i te Atua? (A hi‘o i te hoho‘a matamua.)

10 I roto i te Hebera pene 11, te itehia ra te i‘oa o e 16 tane e vahine taiva ore o tei maiti i te farii i te mau taotiaraa ta Iehova i tuu. Ma te na reira, ua fana‘o ratou e rave rahi haamaitairaa e te tiaturiraa faahiahia mau no a muri a‘e. Ei hi‘oraa, e faaroo rahi to Noa e ua maiti i te auraro i te mau faaueraa a te Atua no te hamani i te hoê araka ia ora to ’na utuafare e te mau u‘i no a muri a‘e. (Heb. 11:7) Ua auraro Aberahama e Sara i te Atua ma te aau tae e ua haere raua i te fenua ta ’na i tǎpǔ ia raua. Noa ’tu ua nehenehe raua e “ho‘i” i te oire no Ura, ua tiatonu noa raua i ta te Atua i fafau no a muri a‘e. Te parau ra te Bibilia e “ua hinaaro . . . ratou i te fenua maitai” a‘e. (Heb. 11:8, 13, 15, 16) Ua patoi Mose i te tao‘a a to Aiphiti e ua maiti i “te rave atoa i te pohe i te amuiraa i te taata no te Atua,” eiaha râ e “rave i te navenave poto noa o te parau ino.” (Heb. 11:24-26) E pee ana‘e i te faaroo o tera mau tane e vahine, a haafaufaa ’tu ai i ta tatou ô o te tiamâraa e maiti no te rave i to te Atua hinaaro.

11. (a) Eaha hoê o te mau haamaitairaa rahi roa ’‘e o te tiamâraa e maiti? (b) Eaha te turai ia oe ia faaohipa maitai i to oe tiamâraa e maiti?

11 Peneia‘e mea ohie a‘e ia faaoti te tahi atu taata no tatou, eita râ tatou e ite hoê o te mau haamaitairaa rahi roa ’‘e o te tiamâraa e maiti. Eaha ïa te reira? Te faataa ra te Bibilia i roto i te Deuteronomi 30:19, 20. (A taio.) I te irava 19, te taio ra tatou e ua vaiiho te Atua ia maiti te mau Iseraela. I te irava 20, te haapii ra tatou e ua horoa faahou Iehova ia ratou i te ravea no te faaite i to ratou here ia ’na. E nehenehe atoa tatou e maiti i te haamori ia Iehova. E ravea otahi atoa ta tatou no te faaohipa i ta tatou ô o te tiamâraa e maiti no te faahanahana ia Iehova e no te faaite i to tatou here rahi ia ’na!

EIAHA E FAAOHIPA MA TE TANO ORE I TE Ô O TE TIAMÂRAA E MAITI

12. Eaha te ore roa ’tu e rave ia faaohipa tatou i ta tatou ô o te tiamâraa e maiti?

12 A feruri na e ua pûpû oe i te hoê ô na te hoê hoa. Eaha to oe huru ia faarue o ’na ta oe ô i roto i te afata pehu, aore ra, ino roa ’tu â, ia faaohipa o ’na i tera ô no te haamauiui i te hoê taata? E inoino oe. Ua horoa mai Iehova te ô o te tiamâraa e maiti. Aita ïa e ore e e mauiui oia ia ite i te taata ia faaohipa i to ratou tiamâraa ma te tano ore, a maiti atu ai i te rave i te mea ino aore ra e haamauiui ia vetahi ê. Ua parau te Bibilia e i te “anotau hopea,” e riro te taata ei “mauruuru ore”. (Tim. 2, 3:1, 2) E nafea ïa tatou e nehenehe ai e faaite i to tatou mauruuru no te ô ta Iehova i pûpû mai ia tatou? E e nafea tatou e nehenehe ai e ape i te faaohipa i te reira ma te tano ore?

13. Nafea tatou e nehenehe ai e ape i te faaohipa i to tatou tiamâraa Kerisetiano ma te tano ore?

13 E tiamâraa to tatou pauroa e maiti i to tatou mau hoa, te ahu e te huru faanehenehe e ta tatou atoa mau faaanaanataeraa. Tera râ, e nehenehe tatou e faaohipa  i to tatou tiamâraa ei otoheraa no te maiti i ta te Atua e ore e au aore ra no te pee i te huru faaahuraa a te taata o teie nei ao. (A taio i te Petero 1, 2:16.) Ia faaohipa tatou i to tatou tiamâraa no te rave i “te mau mea atoa . . . ma te haamaitai i te Atua,” eiaha râ no te rave i te mea ino.—Kor. 1, 10:31; Gal. 5:13.

14. No te aha mea titauhia ia tiaturi tatou ia Iehova a faaohipa ’i tatou i te tiamâraa e maiti?

14 Ua parau Iehova: “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te e‘atia maitai ia haere oe ra.” (Isa. 48:17) Mea tia ia tiaturi tatou ia Iehova e ia farii i te mau taotiaraa ta ’na i tuu mai ia nehenehe tatou e rave i te mau maitiraa maitatai. E fa‘i tatou ma te haehaa “e ere tei te taata iho to ’na haerea; e ere hoi tei taua taata e haere ra i te haapao i to ’na taahiraa.” (Ier. 10:23) Ua maiti Adamu e te mau Iseraela taiva i te patoi i te mau taotiaraa ta Iehova i tuu e ua tiaturi ia ratou iho. E huti ana‘e i te haapiiraa i to ratou hi‘oraa ino. Eiaha e tiaturi ia tatou iho, e tiaturi ana‘e râ “ia Iehova ma to [tatou] aau atoa.”—Mas. 3:5.

A FAATURA I TO VETAHI Ê TIAMÂRAA E MAITI

15. Eaha ta tatou e haapii mai i te faaueraa tumu i roto i te Galatia 6:5?

15 Mea titauhia ia faatura tatou i to vetahi ê tiamâraa ia rave ratou i ta ratou iho mau faaotiraa i roto i te oraraa. No te aha? I te mea hoi e te fana‘o ra tatou pauroa i te ô o te tiamâraa e maiti, eita ïa e piti Kerisetiano e rave noa i te hoê â mau faaotiraa. Teie mau faaotiraa, no nia atoa ïa i to tatou haerea e ta tatou haamoriraa. A haamana‘o i te faaueraa tumu i roto i te  Galatia 6:5. (A taio.) Ia feruri tatou e na te Kerisetiano tataitahi e amo i te hopoia no ta ’na iho mau faaotiraa, e faatura tatou i to vetahi ê tiamâraa e faaohipa i to ratou tiamâraa e maiti.

E nehenehe tatou e rave i ta tatou iho mau faaotiraa ma te ore e faahepo ia vetahi ê ia rave i te hoê â mau faaotiraa (A hi‘o i te paratarafa 15)

16, 17. (a) E nafea te tiamâraa e maiti e riro ai ei fifi i Korinetia? (b) Ua aha Paulo no te tauturu i te mau Kerisetiano, e eaha te haapiiraa e huti mai?

16 E hi‘o ana‘e i te hoê hi‘oraa Bibilia o te faaite ra no te aha mea tia ia faatura tatou i te tiamâraa e maiti o to tatou mau taeae. Ua mârô te tahi mau Kerisetiano no Korinetia no nia i te amuraa i te i‘o pûpûhia na te mau idolo e tei hoohia i te matete i muri a‘e. Aita te mana‘o haava o to te tahi mau Kerisetiano i hauti no te amuraa i te i‘o, ua ite hoi ratou e aita to te idolo e faufaa. Tera râ, no vetahi tei haamori na i tera mau idolo na mua ’‘e, mai te huru ra e e ohipa haamoriraa ta ratou e rave ra ia amu ratou i te i‘o. (Kor. 1, 8:4, 7) E fifi rahi mau teie o tei nehenehe e faaamahamaha i te amuiraa. Mea nafea Paulo i te tautururaa i te mau Kerisetiano ia faaafaro i teie tupuraa?

17 A tahi, ua haamana‘o Paulo i na pǔpǔ e piti e eita te maa e haapuai i to ratou auhoaraa e te Atua. (Kor. 1, 8:8) I muri iho, ua faaara Paulo ia ratou eiaha roa ta ratou e maiti i te rave, e haafifi i te mana‘o haava o te feia paruparu. (Kor. 1, 8:9) I muri a‘e, ua parau oia i te feia e hauti ohie noa to ratou mana‘o haava eiaha e haava i te feia o tei maiti i te amu i te i‘o. (Kor. 1, 10:25, 29, 30) No reira, i roto i te mau tupuraa o tei tuati i te haamoriraa, ua titauhia i te Kerisetiano tataitahi ia rave i ta ’na iho faaotiraa. Eita anei ïa tatou e faatura atoa i te tiamâraa o to tatou mau taeae ia rave ratou i ta ratou iho mau faaotiraa, i roto atoa i te mau ohipa haihai?—Kor. 1, 10:32, 33.

18. E nafea oe e faaite ai e te haafaufaa ra oe i te ô o te tiamâraa e maiti?

18 Ua horoa mai Iehova i te ô o te tiamâraa e maiti, o te hopoi mai i te tiamâraa mau. (Kor. 2, 3:17) Te haafaufaa ra tatou i teie ô no te mea maoti te reira e nehenehe ai tatou e rave i te mau faaotiraa o te faaite ra i to tatou here ia Iehova. E tamau ana‘e ïa i te rave i te mau faaotiraa o te faahanahana ia ’na e e faatura ana‘e i te tiaraa o vetahi ê ia maiti i ta ratou huru faaohiparaa i teie ô faahiahia.