Deuteronomi 7:1-26
7 “Ia aratai Iehova to Atua ia oe i te fenua ta oe e tomo e e fatu,+ e tiahi atoa oia i te mau nunaa rahi mai mua ia oe:+ te ati Heta, te ati Geregasi, te ati Amori,+ te ati Kanaana, te ati Perizi, te ati Hevi e te ati Iebusi,+ e hitu nunaa mea rahi aˈe e mea puai aˈe ia oe.+
2 E tuu atu Iehova to Atua ia ratou ia oe ra, e e pau ratou ia oe.+ Ia faataa mau â oe ia ratou no te haamouraa.+ Eiaha oe e faaau i te tahi faufaa ia ratou, eiaha atoa e aroha ia ratou.+
3 Eiaha oe e taati atu ia ratou na roto i te faaipoiporaa.* Eiaha oe e horoa i ta oe mau tamahine na ta ratou mau tamaiti, eiaha atoa e rave mai i ta ratou mau tamahine na ta oe mau tamaiti.+
4 E faafariu ê hoi ratou i ta oe mau tamaiti ia ˈu no te tavini i te tahi atu mau atua,+ a ura ˈtu ai to Iehova riri ia oe, e a haamou oioi atu ai oia ia oe.+
5 “Teie râ ta outou e rave ia ratou: A huri i ta ratou mau fata i raro, a faahuˈahuˈa roa i ta ratou mau pou haamoriraa,+ a tâpû i ta ratou mau raau haamoriraa,*+ e a tanina i ta ratou mau tii nanaˈohia.+
6 E nunaa moˈa hoi outou no Iehova to outou Atua, e ua maiti Iehova to outou Atua ia outou no te riro ei nunaa no ˈna, ei faufaa taa ê* na ˈna, i rotopu i te mau nunaa atoa e vai ra i te fenua.+
7 “E ere no te mea o outou te mea rahi roa ˈˈe o te mau nunaa atoa i here ai e i maiti ai Iehova ia outou,+ o outou hoi te mea haihai roa ˈˈe o te mau nunaa atoa.+
8 No to Iehova râ here ia outou e no te haapao i ta ˈna i horeo i to outou mau tupuna+ i aratai ai Iehova ia outou i rapae ma te rima puai, no te hoo mai ia outou i te fenua* o te faatîtîraa,+ i te mana* o Pharao arii o Aiphiti.
9 Ua ite maitai outou e o Iehova to outou Atua te Atua mau, te Atua haapao maitai, o te haapao i ta ˈna faufaa e o te faaite noa i te here taiva ore e tausani noa ˈtu te uˈi o te feia e here ra ia ˈna e e auraro ra i ta ˈna mau faaueraa.+
10 Area te feia e hae ra ia ˈna, e faahoˈi roa ˈtu oia i ta ratou ma te haamou atu.+ Eita oia e faataere i te faautua i te feia e hae ra ia ˈna, e faahoˈi roa ˈtu iho â oia i ta ratou.
11 No reira, a auraro maitai i te mau faaueraa e ture e faaotiraa haavaraa ta ˈu e faaue nei ia outou i teie mahana, ma te haapao i te reira.
12 “Ia tamau outou i te faaroo i tera mau faaotiraa haavaraa, ia haapao e ia faaohipa outou i te reira, e haapao Iehova to outou Atua i ta ˈna faufaa e e faaite noa oia i te here taiva ore, mai ta ˈna i horeo i to outou mau tupuna.
13 E here oia ia outou, e haamaitai oia ia outou e e faarahi oia i to outou huaai.+ Oia mau, e haamaitai oia ia outou i te tamarii e rave rahi e i te hotu o to outou fenua, ta outou huero maa, ta outou uaina apî, ta outou hinu,+ te fanauˈa o ta outou mau nǎnǎ puaatoro e nǎnǎ mamoe, i te fenua ta ˈna i horeo i to outou mau tupuna e horoa no outou.+
14 E riro outou ei nunaa haamaitai-roa-hia aˈe o te mau nunaa atoa.+ Aita e tane e vahine i rotopu ia outou eita ta ˈna tamarii e noaa, e aita e animara ta outou eita e fanau i te fanauˈa.+
15 E faaatea ê Iehova i te mau maˈi atoa ia outou, e e ore oia e faatae mai i nia ia outou i te tahi o te mau maˈi ino mau ta outou i ite i Aiphiti.+ E faatae mai râ oia i te reira i nia i te feia atoa e hae ra ia outou.
16 E haamou outou* i te mau nunaa atoa ta Iehova to outou Atua e tuu atu ia outou ra.+ Eiaha outou* e aroha ia ratou,+ e eiaha outou e tavini i to ratou mau atua,+ no te mea e riro te reira ei marei no outou.+
17 “Ia na ô oe i roto i to aau: ‘Mea rahi aˈe tera mau nunaa ia matou. E nahea ïa vau e nehenehe ai e tiahi ia ratou?,’+
18 eiaha oe e mǎtaˈu ia ratou.+ Ia haamanaˈo oe i ta Iehova to Atua i rave ia Pharao e pauroa to Aiphiti,+
19 te mau faautuaraa* rahi ta to oe mata i ite, te mau tapao, te mau semeio,+ te rima puai e te rima faatorohia i aratai ai Iehova to Atua ia outou i rapae.+ Tera ta Iehova to Atua e rave i te mau nunaa atoa ta oe e riaria ra.+
20 E faatae mai Iehova to Atua i te huru aau faatoaruaru* i nia ia ratou e ia mou roa te feia e toe ra+ e e tapuni ra mai mua ia oe.
21 Eiaha oe e mehameha no ratou aˈe, tei ia oe ra hoi Iehova to Atua,+ e Atua rahi ia mǎtaˈuhia.+
22 “E tiahi riirii mau â Iehova to Atua i tera mau nunaa mai mua ia oe.+ Eiaha oe e haamou oioi ia ratou, a rahi aˈe hoi te mau animara oviri ia oe a fifi atu ai oe ia ratou.
23 E tuu Iehova to Atua ia ratou ia oe ra e e pau roa ratou ia ˈna, a mou roa ˈtu ai ratou.+
24 E tuu atu oia i to ratou mau arii i to rima,+ e e faaore oe i to ratou mau iˈoa mai raro aˈe i te raˈi.+ Aita e taata e faaû ia oe+ e mou pauroa ˈtu ai ratou ia oe.+
25 E tanina oe i te mau tii nanaˈohia o to ratou mau atua.+ Eiaha oe e nounou i te ario e te auro i nia iho,+ eiaha atoa e rave mai na oe, ia ore oe ia hema i te reira, mea faufau hoi te mau tii nanaˈohia no Iehova to Atua.+
26 Eiaha oe e hopoi mai i te tahi mea faufau i roto i to fare, a faataahia ˈtu ai oe no te haamouraa mai taua mea ra. E faufau roa oe i te reira e e ore roa ˈtu e au atu, no te mea ua faataahia te reira no te haamouraa.
Nota i raro i te api
^ Aore ra “Eiaha ei faaipoiporaa i rotopu ia oe e ratou.”
^ Aore ra “poiherehia.”
^ Heb: “fare.”
^ Heb: “rima.”
^ Heb: “E pau ia outou.”
^ Heb: “to outou mata.”
^ Aore ra “tamataraa.”
^ Huri-atoa-hia “mehameha.”
