Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tenuare 2017

No te aha mea faufaa te aau faahaihai?

No te aha mea faufaa te aau faahaihai?

“Tei te feia haehaa . . . te paari.”—MAS. 11:2.

HIMENE: 38, 69

1, 2. No te aha te Atua i faarue ai ia Saula? (A hi‘o i te hoho‘a matamua.)

I TO Iehova maitiraa ia Saula ei arii, e aau faahaihai to Saula. (Sam. 1, 9:1, 2, 21; 10:20-24) I muri a‘e râ i to ’na ariiraa mai, ua riro oia ei taata teoteo. I te hoê taime, e tausani Philiseti tei haere mai e aro i te mau Iseraela. Ua parau te peropheta Samuela ia Saula e e haere mai o ’na e pûpû atu ai i te tusia ia Iehova. Tera râ, hou Samuela a tae mai ai, ua haamata te mau Iseraela i te mǎta‘u e e rave rahi o ratou tei faarue ia Saula. Aita ’tura o ’na i tiai ia tae mai Samuela, ua pûpû o ’na i te tusia. Aita e tiaraa to Saula no te na reira, e aita Iehova i mauruuru.—Sam. 1, 13:5-9.

2 I to Samuela taeraa mai, ua faahapa oia ia Saula no to ’na faaroo-ore-raa ia Iehova. Aita râ Saula i mana‘o e ua rave oia i te tahi ohipa hape. Ua tamata oia i te imi i te otoheraa, e ua pari ia vetahi ê no ta ’na hape. (Sam. 1, 13:10-14) Mai reira mai, e rave rahi ohipa teoteo ta Saula i rave. No reira Iehova i faarue ai ia ’na, eiaha o ’na ei arii faahou. (Sam. 1, 15:22, 23) Mea maitai te haamataraa o to Saula oraraa, ua ino roa râ i te pae hopea.—Sam. 1, 31:1-6.

3. (a) Eaha te mana‘o o te taata e rave rahi no nia i te aau faahaihai? (b) Eaha te mau uiraa ta tatou e pahono?

 3 E rave rahi taata i teie mahana e mana‘o ra e eita ratou e nehenehe e faatupu i te aau faahaihai e i te hoê â taime e fana‘o i te hoê oraraa aore ra toroa maitai roa. E faatietie ratou ia ratou iho ia hau a‘e ratou ia vetahi ê. Ei hi‘oraa, ua parau te hoê taata hauti teata tuiroo e tia poritita: “E ere roa ’tu no ’u te parau o te aau faahaihai, eiaha roa atoa ’tu tera parau ia tano ia ’u.” No te aha râ mea faufaa ia faatupu te hoê Kerisetiano i te aau faahaihai? Eaha mau te aau faahaihai? I roto i teie tumu parau, e pahono mai tatou i teie mau uiraa. E i roto i te tumu parau i muri nei, e hi‘opoa mai tatou e nafea ia faatupu noa i te aau faahaihai noa ’tu mea fifi ia na reira.

NO TE AHA MEA FAUFAA TE AAU FAAHAIHAI?

4. Eaha te hoê ohipa teoteo?

4 Te faaite ra te Bibilia e mea taa ê roa te teoteo i te aau faahaihai. (A taio i te Maseli 11:2.) Ua taparuparu Davida ia Iehova: “A paruru mai oe i to tavini nei i te hara teoteo.” (Sal. 19:14, Te Bibilia Mo’a V.C.J.S., 1976) Eaha te hoê “hara,” aore ra ohipa “teoteo”? O te raveraa ïa i te tahi mea, aita râ to tatou e tiaraa aore ra e mana no te na reira. Peneia‘e no to tatou faaoromai ore aore ra faaoru i na reira ’i tatou. Ua rave tatou pauroa i te hoê taime i te tahi ohipa teoteo, no te mea e taata tia ore tatou. Mai ta tatou râ i haapii i te hi‘oraa o te arii Saula, ia riro roa te reira ei peu matau na tatou, eita Iehova e mauruuru. Te parau ra te Salamo 119:21 e e a‘o Iehova i te feia teoteo. No te aha oia e na reira ’i?

E faatura tatou ia Iehova ma te faatupu i te aau faahaihai

5. No te aha e hape ino te ohipa teoteo?

5 A tahi roa, ia rave tatou i te tahi ohipa teoteo, aita tatou e faatura ra ia Iehova, to tatou Atua e Faatere. Te piti, ia rave tatou i te mau mea aita e tiaraa to tatou no te na reira, e nehenehe tatou e peapea e te tahi atu mau taata. (Mas. 13:10) Te toru, e au ïa tatou i te maamaa ia taa vetahi ê e ua rave tatou i te tahi ohipa teoteo. (Luka 14:8, 9) Te taa maitai ra ïa tatou no te aha Iehova e hinaaro ai ia faatupu tatou i te aau faahaihai.

EAHA MAU TE AAU FAAHAIHAI?

6, 7. E nafea te aau faahaihai e tuati ai i te haehaa?

6 Mea piri roa te aau faahaihai i te haehaa. Eita te hoê Kerisetiano haehaa e faaoru. No ’na, ua hau a‘e vetahi ê ia ’na. (Phil. 2:3) E aau faahaihai atoa to te taata haehaa. Ua ite o ’na i to ’na mau taotiaraa e e farii oia ma te haehaa i ta ’na mau hape. E hinaaro oia e faaroo i to vetahi ê mana‘o e e haapii mai ia ratou ra. E mauruuru roa Iehova i te taata haehaa.

7 Te faaite ra te Bibilia e ua ite te hoê taata aau faahaihai i to ’na iho huru e ua taa ia ’na e te vai ra te tahi mau ohipa eita ta ’na e nehenehe e rave aore ra aita o ’na e faatiahia ia rave. E tauturu te reira ia ’na ia faatura e ia hamani maitai ia vetahi ê.

8. No te tapea i te aau faahaihai, eaha te huru feruriraa te tia ia haapae?

 8 E nehenehe râ tatou, ma te ore atoa hoi e haapao, e haamata i te feruri ma te teoteo. E nafea? E haamata paha tatou i te mana‘o e mea faufaa a‘e tatou ia vetahi ê no te mea, i roto i te amuiraa, e hopoia ta tatou aore ra ta te feia ta tatou i matau maitai. (Roma 12:16) Aore ra e haamata tatou i te huti rahi roa i te ara-maite-raa o vetahi ê i nia ia tatou. (Tim. 1, 2:9, 10) E haamata atoa paha tatou i te parau ia vetahi ê eaha te rave aore ra eaha te ore e rave.—Kor. 1, 4:6.

9. No te aha vetahi i teoteo ai? A horoa i te hoê hi‘oraa Bibilia.

9 Ia ore tatou e haavî i to tatou mau hinaaro tano ore, e nehenehe tatou e haamata i te haa ma te teoteo. E rave rahi o tei riro mai ei taata teoteo no te mea ua hinaaro ratou i te hanahana no ratou iho, ua feii ia vetahi ê aore ra aita i haavî i to ratou riri. Ua faahiti te Bibilia i tei tupu no vetahi, mai ia Abasaloma, Uzia e Nebukanesa. Ua faaite roa ’tu Iehova e mea titauhia ia faatupu ratou i te haehaa.—Sam. 2, 15:1-6; 18:9-17; Par. 2, 26:16-21; Dan. 5:18-21.

10. No te aha eiaha tatou e haava i te mau mana‘o turai o te taata? A horoa i te hoê hi‘oraa Bibilia.

10 Te vai ra paha te tahi atu â mau tumu e ore ai te taata e faaite i te aau faahaihai i te tahi taime. A haamana‘o na i te hi‘oraa o Abimeleka e Petero. (Gen. 20:2-7; Mat. 26:31-35) Mea teoteo anei na tane e piti? Peneia‘e aita raua i ite pauroa te mau haamaramaramaraa aore ra ua haa ma te ore e feruri? No te mea eita tatou e nehenehe e hi‘o i roto i te aau, eiaha ïa tatou e haava i te mau mana‘o turai o te taata.—A taio i te Iakobo 4:12.

TA TATOU TUHAA I ROTO I TE FAANAHORAA A TE ATUA

11. Ia taa ia tatou i te aha?

11 Ua taa i te taata aau faahaihai i ta ’na tuhaa i roto i te faanahoraa a te Atua. E Atua naho o Iehova. Ua horoa oia te hoê tuhaa e rave na te mau mero tataitahi o te amuiraa. Mea faufaa tatou pauroa. Ua horoa mai Iehova na tatou tataitahi i te mau ô e aravihi taa ê e ua vaiiho oia ia tatou ia maiti e nafea ia faaohipa i te reira. Mai te peu e aau faahaihai to tatou, e faaohipa ïa tatou i taua mau ô ra mai ta Iehova e hinaaro. (Roma 12:4-8) Ua taa ia tatou e te tiai ra Iehova ia faaohipa tatou i te reira no te faahanahana ia ’na e no te tauturu ia vetahi ê.—A taio i te Petero 1, 4:10.

Eaha te haapiiraa ta tatou e huti mai i te hi‘oraa o Iesu ia tauihia ta tatou hopoia? (A hi‘o i te paratarafa 12-14)

12, 13. Eaha ta tatou e haamana‘o ia ite tatou i te mau tauiraa i roto i ta tatou taviniraa ia Iehova?

12 E taui paha te mau mea ta tatou e rave i roto i ta Iehova taviniraa a mairi ai te tau. Ei hi‘oraa, a haamana‘o i te mau tauiraa e rave rahi ta Iesu i ite. I te omuaraa, o ’na ana‘e e to ’na Metua. (Mas. 8:22) I muri iho, ua tauturu oia ia Iehova ia poiete i te mau melahi, te ao nui e te taata. (Kol. 1:16) I muri a‘e, ua tonohia mai oia i te fenua nei. Ua fanauhia mai oia e ua paari roa mai. (Phil. 2:7) I muri a‘e i to ’na poheraa, ua ho‘i Iesu i te ra‘i, e i 1914, ua riro mai oia ei Arii no te Faatereraa a te Atua. (Heb. 2:9) I muri a‘e i na tausani matahiti oia e faatere ai ei Arii, e faaho‘i Iesu i te Faatereraa ia Iehova, “ia riro . . . te Atua i nia iho i te mau mea atoa.”—Kor. 1, 15:28.

13 E ite atoa paha tatou e rave rahi tauiraa i roto i te oraraa. I te tahi taime, e nehenehe ta tatou mau hopoia e taui no  ta tatou iho mau faaotiraa. Ei hi‘oraa, ei taata faaea taa noa, ua faaoti tatou e faaipoipo. Aore ra e fanau mai paha tatou i te tamarii. I muri a‘e, e faaoti paha tatou e rave i te tahi mau tauiraa ia nehenehe tatou e tavini ia Iehova ma te taime taatoa. I te tahi atu taime, e taui paha ta tatou mau hopoia ia au i to tatou tupuraa. E nehenehe paha tatou e rave hau atu â aore ra e titauhia ia faaiti mai i te ohipa. Noa ’tu râ mea apî tatou aore ra mea paari a‘e, e ea maitai to tatou aore ra aita, ua ite Iehova e nafea tatou tataitahi e tutava ’i i te tavini ia ’na. Eita oia e titau hau atu â i ta tatou e nehenehe e rave. E oaoa roa oia i ta tatou e rave no ’na.—Heb. 6:10.

14. E nafea te hoê huru feruriraa aau faahaihai e tauturu ai ia tatou ia mauruuru noa e ia oaoa i roto i te mau tupuraa atoa?

14 Ua oaoa Iesu i te mau hopoia atoa ta Iehova i horoa ia ’na, ia oaoa atoa ïa tatou i ta tatou mau hopoia. (Mas. 8:30, 31) E mauruuru noa te taata aau faahaihai i ta ’na mau hopoia e ohipa i roto i te amuiraa. Eita oia e tamau noa i to ’na feruriraa i ta vetahi ê e rave ra. E mauruuru râ oia i ta ’na iho tuhaa i roto i ta te Atua faanahonahoraa. No ’na, no ǒ mai te reira ia Iehova ra. E faatura atoa te taata aau faahaihai ia vetahi ê e e oaoa oia i te turu ia ratou. Ua taa ia ’na e ua horoa atoa Iehova i te hoê tuhaa na ratou.—Roma 12:10.

TE MANA‘O TANO NO NIA I TE AAU FAAHAIHAI

15. Eaha ta tatou e nehenehe e haapii mai i te hi‘oraa o Gideona?

15 E hi‘oraa maitai o Gideona no nia i te aau faahaihai. I to Iehova parauraa ia ’na ia faaora ia Iseraela i te ati Midiana, ua na  ô Gideona: “E fetii haehaa to ’u ia Manase nei, e o vau hoi tei iti roa i te fetii o to ’u ra metua.” (Tav. 6:15) Ua tiaturi râ o Gideona ia Iehova e ua farii i teie hopoia. Ua hinaaro Gideona i te haapapuraa no te ite e ua taa maitai anei ia ’na ta Iehova e titau ra ia ’na e ua ani i ta ’na aratairaa. (Tav. 6:36-40) E taata puai e te itoito o Gideona, e haerea paari to ’na e te haapao maitai. (Tav. 6:11, 27) I muri a‘e, a hinaaro ai te nunaa ia faatere oia ia ratou, ua patoi oia. Ua rave oia i ta Iehova i faaue ia ’na e ua ho‘i i te fare i muri iho.—Tav. 8:22, 23, 29.

16, 17. E nafea te hoê taata aau faahaihai e haere ai i mua?

16 Ia farii te hoê taata i te hoê hopoia apî aore ra ia hinaaro oia e rave hau atu â i roto i te amuiraa, e ere ïa te auraa e e ere oia i te taata aau faahaihai. Te parau ra te Bibilia e mea maitai no te hoê tavini a Iehova ia hinaaro oia e tavini maite atu â i to ’na mau taeae e ia haere i mua. (Tim. 1, 4:13-15) Tera râ, mea titauhia anei i te hoê hopoia apî no te haere i mua? Aita. E nehenehe tatou pauroa e haamaitai i to tatou huru Kerisetiano e te aravihi ta Iehova i horoa mai ia nehenehe tatou e tavini maitai atu â ia ’na, a tauturu atoa ’tu ai ia vetahi ê.

17 Hou oia a farii ai i te hoê hopoia, e imi te taata aau faahaihai eaha te titauhia ia ’na. E pure oia no nia i te reira e e hi‘opoa maitai oia e nehenehe anei ta ’na e rave i tera ohipa. E toe ra anei te taime e te puai no te rave i te tahi atu mau ohipa faufaa? Mai te peu e aita, e nehenehe anei te tahi ohipa ta ’na e rave ra i teie nei, e ravehia e te tahi atu taata? I muri a‘e i te feruriraa i te reira, e faaoti paha te taata aau faahaihai e eita ta ’na e nehenehe e amo i teie hopoia apî. Mai te peu e aau faahaihai to tatou, e parau atu paha ïa tatou, aita.

18. (a) Eaha ta te taata aau faahaihai e rave ia horoahia ’tu te hoê hopoia apî? (b) E nafea te Roma 12:3 e tauturu ai ia tatou ia riro ei taata aau faahaihai?

18 Te hinaaro mai ra Iehova ia tatou ia “haere ma te haehaa” e o ’na. (Mika 6:8) No reira, ia horoahia mai te hoê hopoia apî, e imi tatou i ta ’na aratairaa e e ani tatou i ta ’na tauturu, mai ia Gideona i na reira. Mea titauhia ia feruri maite tatou eaha ta Iehova e parau mai ra na roto i te Bibilia e ta ’na faanahonahoraa. E haamana‘o ana‘e e te mau mea atoa ta tatou e rave i roto i ta ’na taviniraa, e ere maoti to tatou aravihi, no to Iehova râ haehaa e to ’na hinaaro e tauturu ia tatou. (Sal. 18:35) No te taata aau faahaihai, “eiaha ia hau te mana‘o ia ’na iho.”—A taio i te Roma 12:3.

19. No te aha mea tia ia faatupu tatou i te aau faahaihai?

19 Ua ite te taata aau faahaihai e no Iehova ana‘e te hanahana atoa no te mea o ’Na te Atua poiete e te Teitei i roto i te ao taatoa. (Apo. 4:11) Mai te peu e aau faahaihai to tatou, e oaoa tatou i te rave i te mau mea atoa i roto i ta Iehova taviniraa. E faatura tatou i te mau mana‘o e huru aau o to tatou mau taeae e tuahine. Ma te na reira, e hoê tatou pauroa. E feruri maite te taata aau faahaihai hou oia a rave ai i te tahi mea, eita ïa oia e rave i te tahi mau hape ino. E mauruuru roa Iehova i te feia aau faahaihai. No reira, mea faufaa te aau faahaihai no te nunaa o te Atua. I roto i to muri mai tumu parau, e hi‘o mai tatou e nafea ia faatupu noa i te aau faahaihai noa ’tu mea fifi ia na reira.