Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TENUARE 2017

A horoa i te hopoia i te mau tane haapao maitai

A horoa i te hopoia i te mau tane haapao maitai

“Te mau parau ta oe i faaroo . . . , o ta oe ïa e tuu atu i te feia parau mau [oia hoi, tane haapao maitai], o te au ia haapii atu ia vetahi ê.”—TIM. 2, 2:2.

HIMENE: 123, 53

1, 2. Eaha te mana‘o o te taata e rave rahi no ta ratou ohipa?

E RAVE rahi te mana‘o nei e tei te ohipa ta ratou e rave e faitohia ’i to ratou faufaaraa. I roto i te tahi mau ta‘ere, no te ite no nia i te hoê taata, e peu matauhia i te ani: “Eaha ta oe ohipa?”

2 E faataa te Bibilia i te tahi taime i te taata ma te parau eaha ta ratou ohipa. Ei hi‘oraa, ua faahiti te Bibilia i “te telona ra o Mataio,” ia “Simona rapaau iri” e ia “Luka rapaau ma‘i herehia.” (Mat. 10:3; Ohi. 10:6; Kol. 4:14) E faahiti atoa te Bibilia i te mau hopoia a te taata i roto i ta Iehova taviniraa. A feruri na i te arii Davida, te peropheta Elia e te aposetolo Paulo. Ua haafaufaa teie mau tane i te mau hopoia ta Iehova i horoa ’tu. Mai ia ratou, e tia ia haafaufaa tatou i te mau hopoia atoa i roto i ta Iehova taviniraa.

3. No te aha ia faaineine te feia paari i te feia apî? (A hi‘o i te hoho‘a matamua.)

3 Mea au na tatou e tavini ia Iehova e e haafaufaa tatou i  ta tatou mau hopoia. E rave rahi i rotopu ia tatou tei au roa i ta ratou ohipa a hinaaro atu ai ratou e tamau noa i te rave i tera ohipa. Tera râ, ia ruau te taata, eita ratou e nehenehe faahou e ohipa mai i na mua ’‘e. (Koh. 1:4) E riro ïa te reira ei fifi no te mau tavini a Iehova. I teie mahana, te rahi noa ’tura te ohipa pororaa e te faaohipa ra te faanahonahoraa a Iehova i te mau ravea apî ia nehenehe te taata e faaroo i te parau apî oaoa. Tera râ, i te tahi taime, mea fifi no te feia paari ia haapii i te mau raveraa apî. (Luka 5:39) Hau atu â, e paruparu iho â te taata ia ruau ratou. (Mas. 20:29) Mea maitai ïa ia faaineine te feia paari i te feia apî no te amo hau atu â hopoia i roto i ta Iehova faanahonahoraa.—A taio i te Salamo 71:18.

4. No te aha mea fifi no vetahi ia horoa i te hopoia? (A hi‘o i te tumu parau tarenihia “ No te aha paha mea fifi ia horoa i te hopoia.”)

4 E ere i te mea ohie noa no te feia o tei faatoroahia ia horoa i te hopoia na te mau tane apî. E oto paha te mau taeae ia feruri e erehia ratou i te hopoia ta ratou e au roa. E mauiui atoa paha ia mana‘o e e vaiiho ratou i te hopoia taa ê ta ratou e au. Aore ra e haapeapea paha ratou mai te peu e aita ana‘e ratou e aratai i te ohipa, eita te reira e rave-maitai-hia. Peneia‘e e mana‘o ratou e aita to ratou e taime no te faaineine ia vetahi ê. E titau-atoa-hia ia tiai â te mau tane apî aita ana‘e i horoahia ’tura hau atu â hopoia ia ratou.

5. Eaha te mau uiraa ta tatou e hi‘opoa mai i roto i teie tumu parau?

5 No te aha ïa mea faufaa no te feia paari ia tauturu i te feia apî no te amo hau atu â hopoia? E nafea ratou? (Tim. 2, 2:2) No te aha mea titauhia ia faatupu te feia apî i te huru feruriraa tano ia ohipa ratou e te mau taeae paari e aravihi a‘e, a haapii atu ai ia ratou ra? E hi‘o mai ïa tatou na mua mea nafea te arii Davida i te faaineineraa i ta ’na tamaiti no te hoê ohipa faufaa roa.

UA FAAINEINE DAVIDA IA SOLOMONA

6. Eaha ta Davida i hinaaro e rave? Eaha ta Iehova i parau ia ’na?

6 E rave rahi matahiti, ua hamani-ino-hia o Davida e ua titauhia ia haere oia mai te hoê vahi i te tahi atu vahi. I muri a‘e râ i to ’na riroraa mai ei arii, ua ora oia i roto i te hoê fare au mau. Ua parau ïa oia i te peropheta Natana: “Te parahi nei au i roto i te fare arezi, o te afata faufaa râ a Iehova, te vai noa nei i roto i te paruru [aore ra tiahapa].” Ua hinaaro Davida e patu i te hoê hiero nehenehe mau no Iehova. Pahono atura Natana ia ’na: “O ta to aau e mana‘o ra e rave ïa; tei ia oe hoi te Atua.” E ere râ tera ta Iehova i hinaaro. Ua faaite oia ia Natana eaha te parau ia Davida: “Eiaha oe e faatia i te tahi fare ei parahiraa no ’u.” Noa ’tu ua fafau Iehova ia Davida e ei pihaiiho noa Oia ia ’na, ite atura Davida e na te hoê o ta ’na mau tamaiti e patu i te hiero. Ua aha Davida?—Par. 1, 17:1-4, 8, 11, 12; 29:1.

7. Eaha to Davida huru i ta Iehova aratairaa?

7 Ua hinaaro mau Davida e patu i te hoê hiero na Iehova, peneia‘e ïa ua oto oia. Ua turu maite râ oia i te opuaraa ta ta ’na tamaiti Solomona e aratai. Ua tauturu atu Davida no te faanaho i te  feia rave ohipa e no te haaputu i te auri, te veo, te ario, te auro e te raau. Aita oia i mana‘ona‘o o vai te haapopouhia no te paturaa o te hiero, o tei parauhia i muri a‘e te hiero a Solomona. Ua faaitoito râ oia ia Solomona ma te parau: “E tena na, e tau tamaiti, e riro Iehova ei pihaiiho ia oe, e riro i te tupu to oe hinaaro, e oti te fare o to Atua o Iehova ia oe, ta ’na hoi i parau maira ia oe.”—Par. 1, 22:11, 14-16.

8. No te aha e nehenehe ai Davida e mana‘o aita Solomona i aravihi atura no te patu i te hiero? Eaha râ ta Davida i rave?

8 A taio i te Paraleipomeno 1, 22:5. Ua mana‘o paha Davida e aita o Solomona i ineine atura no te aratai i tera opuaraa rahi. Ua titauhia hoi ia hau ê te “unauna” o te hiero. Mea “apî” atoa o Solomona, e ere oia i te mea aravihi no tera ohipa. Ua ite râ Davida e e tauturu Iehova ia Solomona ia rave i teie ohipa taa ê. Ua rave Davida i te mau mea atoa ta ’na e nehenehe e rave no te tauturu ia ’na ia faaineine no teie opuaraa rahi mau.

A OAOA I TE FAAINEINE IA VETAHI Ê

Mea oaoa ia ite i te mau tane apî ia amo hau atu â hopoia (A hi‘o i te paratarafa 9)

9. E nafea te feia paari e ore ai e toaruaru ia horoa ratou i te mau hopoia ia vetahi ê? A horoa i te hoê hi‘oraa.

9 Eiaha te mau taeae paari e toaruaru ia titauhia ia horoa ratou i te hopoia na te mau tane apî. Ua papu ia tatou pauroa e o te ohipa a Iehova te mea faufaa roa ’‘e. E tauturu te faaineineraa no te amo i te mau hopoia ia rave maite i teie ohipa. A feruri na i teie hi‘oraa. I to oe tamariiriiraa, ua hi‘o oe i to oe papa ia faahoro i to ’na pereoo. A paari mai ai oe, ua faataa ’tu oia eaha ta ’na e rave ra. I muri iho, ua noaa mai ta oe parau faahoro pereoo e ua haamata oe i te faahoro i te pereoo. Noa ’tu râ, ua tamau to  oe papa i te haapii ia oe. I te tahi taime na oe e faahoro e i te tahi taime, na ’na. A paari ai râ to oe papa, na oe i faahoro i te rahiraa o te taime. Ua huru ê anei to oe papa? Aita e ore e ua oaoa oia e na oe e faahoro ia ’na. Hoê â huru, e oaoa te mau taeae paari i te ite i te mau tane apî ta ratou i faaineine ia amo i te mau hopoia i roto i ta Iehova faanahonahoraa.

10. Eaha to Mose mana‘o no nia i te faahanahanaraa e te faatoroaraa?

10 Mea tia ia vai ara tatou eiaha e pohehae i te mau hopoia a vetahi ê. E nehenehe tatou e haapii mai no nia i ta Mose i rave a haamata ’i te tahi mau Iseraela i te tohu ei peropheta. (A taio i te Numera 11:24-29.) Ua hinaaro Iosua e tapea ia ratou, ua parau râ Mose: “Te feii ra oe ia ’u? o to ’u ïa hinaaro ei peropheta atoa to Iehova ra taata e ati noa ’‘e, e ia tuu oia i to ’na varua i nia iho ia ratou.” Ua ite Mose e na Iehova i aratai i te ohipa. Aita oia i imi i te hanahana no ’na iho, ua hinaaro Mose ia amo te mau tavini atoa a Iehova i te mau hopoia. E o tatou? Te oaoa nei tatou ia horoahia te hopoia ia vetahi ê i roto i te taviniraa a Iehova?

11. Eaha ta te hoê taeae i parau no nia i te horoaraa i te hopoia ia vetahi ê?

11 E rave rahi taeae o tei haa rahi i roto i te taviniraa a Iehova tau ahuru matahiti e ua faaineine i te mau tane apî ia amo hau atu â hopoia. Ei hi‘oraa, a hi‘o na i te hoê taeae o Peter to ’na i‘oa. I na 74 matahiti i roto i te taviniraa taime taatoa, ua tavini oia 35 matahiti i te hoê amaa i Europa. Mea maoro oia i te taviniraa ei tiaau o te Tuhaa taviniraa. I muri a‘e, ua horoahia teie hopoia ia Paul, te hoê tane apî o ta Peter i faaineine. Ua inoino anei Peter no teie tauiraa? Aita. Ua parau oia: “Mauruuru roa vau e te vai ra te mau taeae o tei faaineinehia no te amo i te mau hopoia rahi atu â e o te aravihi ra no te haapao i te ohipa.”

A HAAFAUFAA I TE FEIA PAARI

12. Eaha ta tatou e haapii mai i te hi‘oraa o Rehoboama?

12 A riro mai ai te tamaiti a Solomona, o Rehoboama, ei arii, ua ani oia i te feia paari te aratairaa e nafea oia e amo ai i ta ’na hopoia apî. I muri iho râ, ua patoi oia i ta ratou aratairaa! Ua pee oia i te aratairaa a te mau tane apî tei paari e o ’na. Mea ino mau â te faahopearaa.  (Par. 2, 10:6-11, 19) Eaha ta tatou e haapii mai? E haerea î i te paari ia ani i te aratairaa a te feia paari e aravihi a‘e ia tatou. Aita i titauhia ia tamau te feia apî i te rave i te ohipa mai tei ravehia na mua ’‘e. Ia faatura râ ratou i te mau mana‘o o te feia paari. Eiaha atoa ratou ia ru i te mana‘o e eita ta ratou huru raveraa e manuïa.

13. E nafea te feia apî e ohipa ’i e te feia paari?

13 I te tahi taime, e horoahia i te feia apî te hopoia e tiaau i te ohipa a te mau taeae paari e aravihi atu â. E haerea paari ia huti ratou i te haapiiraa i te feia paari ra. I roto i te hi‘oraa i faahitihia na, i muri a‘e i to Paul monoraa ia Peter ei tiaau o te hoê Tuhaa i te Betela, ua parau oia, “Ua rave au i te taime no te imi i te aratairaa a Peter e ua faaitoito vau ia vetahi ê i roto i tera tuhaa ia na reira atoa.”

Ua rave Paulo i te taime no te haapii ia Timoteo e ua apo maitai o Timoteo i te mau haapiiraa

14. Eaha ta tatou e haapii mai i to Timoteo e te aposetolo Paulo ohipa-amui-raa?

14 Mea apî roa Timoteo ia faaauhia i te aposetolo Paulo, ua ohipa amui râ raua e rave rahi matahiti. (A taio i te Philipi 2:20-22.) Ua parau Paulo i to Korinetia: “I tono atu ai au i tau tamaiti here e te haavare ore i te Fatu nei, ia Timoteo, ia outou na, na ’na e faaite atu ia outou i to ’u mau haerea i te Mesia nei, ta ’u haapiiraa i te mau vahi atoa ra, e i te mau ekalesia atoa.” (Kor. 1, 4:17) Te ite-papu-hia ra e ua haa amui Paulo e Timoteo e ua turu noa te tahi i te tahi. Ua rave Paulo i te taime no te haapii ia Timoteo to ’na “mau haerea i te Mesia nei,” e ua apo maitai o Timoteo i te mau haapiiraa. Mea here na Paulo ia Timoteo e ua papu ia ’na e e haapao maitai oia i te mau taeae e tuahine i Korinetia. E nehenehe te mau matahiapo e pee i te hi‘oraa o te aposetolo Paulo a faaineine ai ratou i te tahi atu â mau tane no te haapao i te amuiraa.

E HOPOIA RAHI TA TATOU TATAITAHI

15. E nafea te Roma 12:3-5 e tauturu mai ai i mua i te mau tauiraa?

15 Te ora nei tatou i te hoê tau faahiahia mau. Te rahi mai ra te tuhaa o ta Iehova faanahonahoraa i te fenua nei. Te auraa ïa e e ite-noa-hia te mau tauiraa. E ohipa te tahi o teie mau tauiraa i nia ia tatou e e ere i te mea ohie ia faaruru. E tauturu mai te reira mai te peu e mea haehaa tatou e e tiatonu tatou i te mea maitai no te ohipa a te Faatereraa arii, eiaha râ i nia i ta tatou iho e hinaaro ra. Ia na reira tatou, e vai hoê noa tatou. Ua papai Paulo i te mau Kerisetiano no Roma: “Teie ta ’u parau ia outou atoa e ati noa a‘e, . . . eiaha ia hau te mana‘o ia ’na iho, i tei au ia ’na ia mana‘o ra.”—Roma 12:3-5.

Te hinaaro ra pauroa te mau tavini a Iehova e turu i te Faatereraa arii e e rave i te mau mea atoa e anihia ia ratou

16. Eaha ta te Kerisetiano tataitahi e nehenehe e rave ia vai te hau e te auhoêraa i roto i ta Iehova faanahonahoraa?

16 Te hinaaro ra pauroa te mau tavini  a Iehova e turu i te Faatereraa arii e e rave i te mau mea atoa e anihia ia ratou. E nehenehe te mau taeae paari e faaineine i te feia apî. E nehenehe te mau taeae apî e amo hau atu â hopoia ma te aau faahaihai e te faatura. E mauruuru atoa te mau taeae faaipoipo ia turu ta ratou vahine ia ratou noa ’tu e taui te mau tupuraa. E nehenehe tera mau vahine e pee i te hi‘oraa o Perisila, o tei ohipa ma te haapao maitai i pihaiiho i ta ’na tane ia Akuila.—Ohi. 18:2.

17. Ua faaineine Iesu i ta ’na mau pǐpǐ no teihea ohipa?

17 Ua vaiiho mai Iesu i te hi‘oraa maitai roa ’‘e no te hinaaro e faaineine ia vetahi ê. Ua ite Iesu e e titauhia te tahi atu mau taata no te tamau i te rave i ta ’na ohipa. Mea papu, ua ite oia e e taata tia ore ta ’na mau pǐpǐ. Ua papu râ ia ’na e e rahi atu â ta ratou e rave no te haaparare i te parau apî oaoa, i ta ’na iho i rave. (Ioa. 14:12) Ua faaineine maitai oia ia ratou e ua nehenehe atura ratou e poro i te mau fenua atoa e haere ai ratou.—Kol. 1:23.

18. Eaha te ohipa ta tatou e rave a muri a‘e? Eaha te ohipa ta tatou e rave ra i teie nei?

18 I muri a‘e te poheraa o Iesu, ua faatia faahou Iehova ia ’na e ua horoa ’tu hau atu â ohipa e rave, oia atoa te mana “i nia ê roa i te mau arii, e te feia mana, e te puai, e te rahi.” (Eph. 1:19-21) Noa ’tu e pohe tatou ei tavini taiva ore a Iehova hou Aramagedo, e ora faahou tatou e e horoahia mai e rave rahi ohipa i roto i te ao apî. I teie nei, e ohipa faahiahia mau ta tatou, oia hoi, te pororaa i te parau apî oaoa e te faariroraa i te taata ei pǐpǐ. No reira, noa ’tu e taata apî aore ra e taata paari tatou, “ia rahi â te rave [i roto] i te ohipa a te Fatu.”—Kor. 1, 15:58.