Iosua 24:1-33

  • Haamanaˈo Iosua i te aamu o Iseraela (1-13)

  • Faaitoitoraa ia tavini ia Iehova (14-24)

    • “Area vau e to ˈu utuafare, e tavini matou ia Iehova” (15)

  • Faufaa ta Iosua e faaau ia Iseraela (25-28)

  • Poheraa Iosua e to ˈna hunaraa (29-31)

  • Hunahia te mau ivi o Iosepha i Sekema (32)

  • Poheraa Eleazara e to ˈna hunaraa (33)

24  Haaputuputu atura Iosua i te mau opu atoa o Iseraela i Sekema e titau atura i te mau matahiapo o Iseraela, to ˈna mau raatira, to ˈna mau haava e to ˈna feia toroa,+ e tia aˈera ratou i mua i te Atua mau.  Parau atura Iosua i te nunaa taatoa: “Teie ta Iehova te Atua o Iseraela i parau: ‘Tei te tahi atu pae o te Anavai* te oraraa to outou mau tupuna+ mea maoro aˈenei,+ mai ia Tera te metua tane o Aberahama e o Nahora, e i tavini na ratou i te tahi atu mau atua.+  “‘I muri aˈe, rave maira vau i to outou tupuna ia Aberahama+ mai te tahi atu pae o te Anavai* e faahaere ihora vau ia ˈna na te fenua taatoa o Kanaana e faarahi ihora vau i to ˈna huaai.+ Horoa ˈtura vau na ˈna ia Isaaka,+  e horoa ˈtura vau na Isaaka ia Iakoba raua Esau.+ I muri aˈe, horoa ˈtura vau no Esau i te mouˈa Seira ia fatu oia,+ e pou ihora Iakoba e ta ˈna mau tamarii i Aiphiti.+  I muri aˈe, tono atura vau ia Mose raua Aarona,+ tairi ihora vau ia Aiphiti i te ati,+ e aratai maira vau ia outou i rapae.  I to ˈu aratairaa mai i to outou mau metua i rapae i Aiphiti+ e i to ratou taeraa i te miti, te aˈuaˈu ra to Aiphiti i to outou mau metua na nia i te pereoo tamaˈi e te faehau faahoro puaahorofenua tae roa i te miti Uteute.+  Tiaoro aˈera ratou ia Iehova,+ tuu ihora oia i te poiri i rotopu ia outou e to Aiphiti, haamairi ihora i te miti i nia ia ratou e tapoˈi ihora ia ratou,+ e ite mata aˈera outou i ta ˈu i rave i Aiphiti.+ Parahi ihora outou i te medebara e rave rahi matahiti.*+  “‘Aratai atura vau ia outou i te fenua o te ati Amori e parahi ra i te tahi atu pae* o Ioridana, e aro maira ratou ia outou.+ Tuu atura râ vau ia ratou i to outou rima ia nehenehe outou e haru i to ratou fenua, e haamou ihora vau ia ratou mai mua ia outou.+  Tia aˈera Balaka, te tamaiti a Tipora, te arii o Moabi e aro atura ia Iseraela. Titau atura ïa oia ia Balaama te tamaiti a Beora no te faatae i te ino i nia ia outou.+ 10  Aita râ vau i hinaaro e faaroo ia Balaama.+ Haamaitai noa ˈtura ïa oia ia outou,+ e faaora ihora vau ia outou i to ˈna rima.+ 11  “‘Na roto atura outou ia Ioridana+ e tae atura i Ieriko.+ Aro maira te mau raatira* o Ieriko, te ati Amori, te ati Perizi, te ati Kanaana, te ati Heta, te ati Geregasi, te ati Hevi e te ati Iebusi ia outou. Tuu atura râ vau ia ratou i to outou rima.+ 12  Tuu atura ïa vau i te manaˈo haaparuparu* na mua ia outou, i horo ê ai na piti arii o te ati Amori mai mua ia outou,+ e ere na ta outou ˈoˈe e ta outou fana.+ 13  Horoa ˈtura ïa vau no outou i te tahi fenua aita outou i rohi ia noaa mai, e te mau oire aita outou i patu+ e parahi ihora outou i reira. Te amu nei outou i te maa o te faaapu vine e te faaapu olive ta outou i ore i tanu.’+ 14  “No reira, a mǎtaˈu ia Iehova e a tavini ia ˈna ma te hapa ore e te haapao maitai,*+ e a tatara i te mau atua ta to outou mau tupuna i tavini na i te tahi atu pae o te Anavai* e i Aiphiti,+ e a tavini ia Iehova. 15  Mai te peu râ mea ino no outou ia tavini ia Iehova, a maiti no outou i teie mahana o vai ta outou e haamori,+ te mau atua anei ta to outou mau tupuna i tavini i te tahi atu pae o te Anavai*+ aore ra te mau atua o te ati Amori no ratou te fenua ta outou e faaea nei.+ Area vau e to ˈu utuafare, e tavini matou ia Iehova.” 16  Pahono maira te nunaa: “Aita matou i manaˈo aˈenei e faarue ia Iehova e e tavini i te tahi atu mau atua. 17  Na Iehova to matou Atua i aratai mai ia matou e to matou mau metua i rapae i Aiphiti,+ te fenua* o te faatîtîraa.+ Na ˈna i faatupu i teie mau tapao faahiahia i mua i to matou mata,+ e na ˈna i paruru noa ia matou na te roaraa o te eˈa ta matou i haere e i rotopu i te mau nunaa atoa ta matou i na roto atu.+ 18  Ua tiahi Iehova i te mau nunaa atoa, oia atoa te ati Amori tei ora na i teie fenua na mua ia matou. No reira, e tavini atoa matou ia Iehova no te mea o ˈna to matou Atua.” 19  Na ô atura Iosua i te nunaa: “Eita outou e nehenehe e tavini ia Iehova, e Atua moˈa+ hoi oia. E Atua oia o te titau ia haamorihia o ˈna anaˈe.+ Eita oia e faaore i ta outou mau hapa* e ta outou mau hara.+ 20  Ia faarue noa ˈtu outou ia Iehova e ia tavini i te mau atua ěê, e hiˈo mau â atoa oia ia outou ma te riri e e haamou oia ia outou noa ˈtu e i hamani maitai na oia ia outou.”+ 21  Na ô maira râ te nunaa ia Iosua: “Eita, e tavini matou ia Iehova!”+ 22  Na ô atura Iosua i te nunaa: “Ei ite outou ia au i ta outou iho faaotiraa, ua maiti outou e tavini ia Iehova.”+ Parau maira ratou: “Ei ite matou.” 23  “No reira, a tatara i te mau atua ěê mai rotopu ia outou, e a fariu i to outou aau ia Iehova te Atua o Iseraela.” 24  Na ô maira te nunaa ia Iosua: “E tavini matou ia Iehova to matou Atua, e e faaroo matou i to ˈna reo!” 25  Faaau ihora ïa Iosua i te tahi faufaa i te nunaa i taua mahana ra e haamau ihora oia i te tahi faaueraa e te tahi faaotiraa haavaraa no ratou i Sekema. 26  Papai ihora ïa Iosua i teie mau parau i roto i te buka o te Ture a te Atua,+ rave maira i te tahi ofai rahi+ e tuu ihora i raro aˈe i te tahi tumu raau rahi i pihai iho i te nao* o Iehova. 27  Parau faahou atura Iosua i te nunaa taatoa: “Inaha, e riro teie ofai ei ite no tatou,+ no te mea ua faaroo teie ofai i te mau mea atoa ta Iehova i parau ia tatou, e e riro te reira ei ite no outou, ia ore outou ia taiva i to outou Atua.” 28  I muri iho, vaiiho atura Iosua i te nunaa ia haere, e haere aˈera te taata tataitahi i to ˈna tuhaa fenua.+ 29  I muri iho i te reira, pohe ihora Iosua, te tamaiti a Nuna, te tavini a Iehova, i te 110raa o to ˈna matahiti.+ 30  Hunahia ihora oia i te fenua i tufahia na ˈna i Timina-sera,+ tei te tuhaa fenua mouˈa o Epheraima, i apatoerau o te mouˈa Gaasa. 31  Ua tavini noa Iseraela ia Iehova i te mau mahana atoa o Iosua e te mau mahana atoa o te mau matahiapo tei ora â i muri mai ia Iosua e tei ite i te mau ohipa atoa ta Iehova i rave no Iseraela.+ 32  Hunahia ihora te mau ivi o Iosepha+ i Sekema, ta te ati Iseraela i hopoi mai Aiphiti mai, i te tâpû fenua ta Iakoba i hoo mai i te mau tamaiti a Hamora,+ to Sekema metua tane, no 100 kesita.*+ E riro atura te reira ei tuhaa na te mau tamarii a Iosepha.+ 33  Pohe+ atoa ihora Eleazara te tamaiti a Aarona. Hunahia ihora oia i te aivi o Phinehasa ta ˈna tamaiti,+ tei horoahia no ˈna i te tuhaa fenua mouˈa o Epheraima.

Nota i raro i te api

Oia hoi Eupharate.
Oia hoi Eupharate.
Heb: “mahana.”
Oia hoi te pae hitia o te râ.
Huri-atoa-hia “fatu fenua.”
Huri-atoa-hia “mehameha,” “riaria.”
Aore ra “parau mau.”
Oia hoi Eupharate.
Oia hoi Eupharate.
Heb: “fare.”
Aore ra “orure-hau-raa.”
Hiˈo i te titionare.
E moni no tahito aita tatou i ite i to ˈna hoo.