Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Tesema 2014

E Mata, e “Malamalama ‵Lei “ Koe i te Uiga o Tusitusiga Tapu?

E Mata, e “Malamalama ‵Lei “ Koe i te Uiga o Tusitusiga Tapu?

“Ne fakamaina faka‵lei atu ne ia ki a latou te uiga o Tusitusiga Tapu ko te mea ke malamalama ‵lei latou i ei.”LUKA 24:45.

1, 2. Ne fakamalosi pefea ne Iesu ana soko i te aso ne toetu ei a ia?

I TE aso eiloa telā ne toe fakatu aka ei a Iesu, ne sa‵sale atu ei se tokolua soko ki se fa‵kai telā e nofo ki te (11.2 km) te ‵mao mai Ielusalema. Ona ko te seiloa tonu me ko oti ne fakatu aka a Iesu, ne fanoa‵noa lāua ona ko mea ne fatoā oti ne ‵tupu. Se mea fakapoi me ne fakasae atu a Iesu kae sa‵sale fakatasi mo lāua. Ne mafai o fakamafanafana ne ia lāua. E pefea la? “Ne fakamatala atu ei ne ia a mea e uiga ki a ia i Tusitusiga Tapu, e kamata mai i a Mose mo te kau Pelofeta katoa.” (Luka 24:13-15, 27) I te taimi tenā, ne otia lā loto me ne “fakamaina faka‵lei” atu ne ia a te Tusi Tapu ki a lāua.— Luka 24:32.

2 I te afiafi eiloa tenā, ne toe ‵foki atu a soko e tokolua ki Ielusalema. Ne maua ne lāua a apositolo kae ne fakamatala atu te lā tala ki a latou. I te taimi koi fai‵pati ei lāua, kae fakasae atu Iesu ki a latou katoa. Ne pole‵pole ana apositolo. Kae ne kamata o fakalotolotolua latou. Ne fakamalosi pefea ne Iesu latou? E fai mai te tala: “Ne fakamaina faka‵lei atu ne ia ki a latou te uiga o Tusitusiga Tapu ko te mea ke malamalama ‵lei latou i ei.”—Luka 24:45.

3. Ne a fakalavelave e mafai o fe‵paki mo tatou, kae se a te mea ka fesoasoani mai ke maua se kilokiloga paleni e uiga ki te ‵tou galuega talai?

3 E pelā loa mo soko o Iesu, e mafai o loto māfatia tatou i nisi taimi. Kāti e fakalave‵lave tatou i te galuega a te Aliki, kae e loto vāi‵vai tatou ona ko te seai ne ikuga ‵lei e lavea atu ne tatou i ei. (1 Koli. 15:58) Io me e foliga mai i a latou kolā e fai olotou akoga  mo tatou e ga‵solo malielie ki mua. A nisi tino kolā ne fesoasoani tatou ki ei ko fulitua atu foki ki a Ieova. Se a te mea e mafai ne tatou o fai ke maua se kilokiloga paleni e uiga ki te ‵tou galuega talai? A te auala e tasi e mafai o fesoasoani mai ko te malamalama katoatoa o tatou i te uiga o tala fakatusa a Iesu kolā ne fakamau i te Tusi Tapu. Ke na sau‵tala nei tatou ki tala fakatusa e tolu konā mo akoakoga e mafai o tauloto ne tatou mai i ei.

TE TAGATA ‵TOKI FUAGA TELĀ E MOE

4. Se a te uiga o te tala fakatusa a Iesu e uiga ki te tagata ‵toki fuaga telā e moe?

4 Faitau te Maleko 4:26-29. Se a te uiga o te tala fakatusa a Iesu e uiga ki te tagata ‵toki fuaga telā e moe? A te tagata i te tala fakatusa e fakasino atu ki tino talai takitokotasi o te Malo. A ko te fuaga, e fakatusa ki te fekau o te Malo telā e talai atu ki tino loto ‵lei. E pelā mo te olaga masani, a te tagata ‵toki fuaga e “moe i te po kae ala aka i te ao.” Ne ola aka te fuaga i te taimi eiloa tenā mai te taimi ne kamata ei o ‵toki ke oko loa ki te taimi ko tau ei a fuataga. I te vaitaimi tenā, ka “‵somo aka a fuaga kae ko maluga foki.” Ne ola malielie aka te lakau “i a ia eiloa” kae fakasolo loa i vaega takitasi. I se auala tai ‵pau, a te gasolo faka-te-agaga e fano malielie kae fakasolo i vaega takitasi. Kafai ko taumafai se tino ki te tulaga telā e fakamalosigina ei a ia ke tavini atu ki te Atua, e lavea atu tena gasolo ki mua i tena tukuatuga ki a Ieova kae papatiso.

5. Kaia ne fai mai ei ne Iesu te tala fakatusa o te tagata ‵toki fuaga telā e moe?

5 Kaia ne fai mai ei ne Iesu te tala fakatusa tenei? Ne fesoasoani mai a Iesu ke iloa ne tatou me i a Ieova ko te tino telā e fakaola aka ne ia te munatonu i loto o “tino loto ‵lei.” (Galu. 13:48; 1 Koli. 3:7) A tatou ko te ‵toki fua kae fakasiusiu, kae se mafai o pule atu io me faimālō ne tatou a te gasolo ki mua o te tino. E pelā loa mo te tagata i te tala fakatusa, e seiloa ne tatou te auala e tupu aka ei te munatonu. E mafai o sē lavea ne tatou te tupuakaga o fuaga o te Malo ona ko te fakalave‵lave i mea masani o te olaga. Kae ui i ei, ka ‵fua mai eiloa a fuataga o te Malo i te taimi tonu. Ka ga‵lue fakatasi tatou mo te soko fou tenā i te faiga o soko, kae ka maua ne tatou a mea aoga mai te fesoasoani o te soko fou tenā.—Ioa. 4:36-38.

6. Se a te mea e ‵tau o iloa ne tatou e uiga ki te gasolo ki mua o te tino akoga i te feitu faka-te-agaga?

6 Ne a mea e mafai o tauloto ne tatou mai te tala fakatusa tenei? Muamua la, e ‵tau o iloa ne tatou me se mafai o pule atu tatou ki te gasolo ki mua o se tino akoga ki te Tusi Tapu i te feitu faka-te-agaga. Ka fesoasoani mai te loto maulalo ke ‵kalo keatea tatou mai te faimālō ne tatou se tino akoga ke papatiso. E ‵tau fua o fesoasoani kae ‵lago atu tatou ki te tino akoga, kae e iloa ne tatou me i a te tino loa te fakaikuga ke fai tena tukuatuga. A te tukuatuga o se tino e ‵tau o fai mo te loto kātoa telā e fakamalosi aka ne te alofa ki te Atua, kae kafai e se māfua mai i te loto a te alofa ki te Atua, e se talia ne Ieova te mea tenā.Sala. 51:12; 54:6; 110:3.

7, 8. (a) Ne a nisi akoakoga e tauloto ne tatou mai te tala fakatusa a Iesu e uiga ki te tagata ‵toki fuaga telā e moe? Taku mai se fakaakoakoga. (e) Se a te mea e akoako mai i te tala fakatusa tenei e uiga ki a Ieova mo Iesu?

7 A ko te lua, kafai e maina ‵lei tatou i te tala fakatusa tenei, ka fesoasoani mai ke mo a e loto vāi‵vai tatou māfai e se lavea ne tatou a ikuga o ‵tou galuega i te taimi muamua. E ‵tau o kufaki tatou. (Iako. 5:7, 8) Faitalia me seai ne ikuga ‵lei e maua ne tatou mai te tino akoga, kafai e fai ne tatou te ‵toe mea e mafai o fai ke fesoasoani ki a ia, e fakaasi atu ei te ‵tou fakamaoni o fai a ‵tou tusaga. E talia ne Ieova ke ola aka te munatonu i loto o tino loto maulalo kolā e fia‵fia o fai a ‵fuliga. (Mata. 13:23) Ke mo a e mafau‵fau tatou me e se magoi te ‵tou galuega ona ko ikuga e maua mai i ei. I te kilokiloga a Ieova, e se faka‵na a te gasolo ki mua o te ‵tou galuega ki te uke o tino e akoako  ne tatou. Kae e fakatāua ne ia ‵tou taumafaiga fakamaoni faitalia me ne a mea e iku mai i ei.Faitau te Luka 10:17-20; 1 Kolinito 3:8.

8 Te tolu o mea, e se mafai o iloa katoa ne tatou a ‵fuliga e fai ne te tino. E pelā me se fakaakoakoga, ne fakamolemole atu se tauavaga e suke‵suke mo se misionale me e ma‵nako lāua ke fai pelā me ne tino talai seki papatiso. Ne fakamasaua atu ne ia me e ‵tau o ‵kalo keatea muamua lāua mai te ‵pusi. Kae ne poi a ia me ko oti ne tiakina ne lāua te ‵pusi i se fitu masina ko ‵teka. Kaia ne tiaki ei ne lāua te ‵pusi? Ne iloa aka ne lāua me e mafai o lavea ne Ieova a lāua e ‵pusi kae takalialia a ia ki tino amio ‵pelo. Tela la, ne fakamalosi atu ei ke fai ne lāua se fakaikuga—me e ‵pusi lāua i mua o te misionale io me ke ‵kalo katoatoa keatea mai te ‵pusi. Ne fesoasoani atu te alofa telā ne ati aka ne lāua mō Ieova ke fai ne lāua se fakaikuga tonu. Ne ga‵solo lāua ki mua i te feitu faka-te-agaga, faitalia me ne seki iloa ne te misionale a ‵fuliga kolā ne fai ne lāua.

TE TILI

9. Se a te uiga o te tala fakatusa e uiga ki te tili?

9 Faitau te Mataio 13:47-50. Se a te uiga o te tala fakatusa a Iesu e uiga ki te tili? Ne fakatusa ne Iesu a te talaiga o te fekau o te Malo ki tino katoa ki te ‵peiifoga o se tili ki lalo i te tai. E pelā mo te tili telā e ‵tu i ei se aofaki lasi o “ika valevale,” e fia‵fia eiloa te fia miliona o tino ki te ‵tou galuega talai. (Isa. 60:5) A te aofaki lasi o tino kolā e ‵kau atu ki fono o atufenua mo te Fakamanatuga i tausaga takitasi se fakamaoniga o te mea tenei. A nisi ika fakatusa konei e “‵lei” kae ne fakamaopoopo mai ki te fakapotopotoga Kelisiano. A ko nisi ika e “ma‵sei”; e fakauiga i ei me e se ko tino katoa kolā ne fakamaopoopo mai e talia ne Ieova.

Mai tua o te faitauga o te Mataio 13:47-50 . . .

10. Kaia ne fai ei ne Iesu a te tala fakatusa tenei e uiga ki te tili?

10 Kaia ne fai mai ei ne Iesu te tala fakatusa tenei? A te vaevaega fakatusa o ika e se fakasino loa ki te fakamasinoga fakaoti i te taimi o te fakalavelave lasi. Kae e faka‵mafa mai i ei a mea ka ‵tupu i te vaitaimi o aso fakaoti o te olaga masei tenei. Ne fakaasi mai ne Iesu me e se ko tino katoa kolā e fia‵fia ki te munatonu ka tavini atu ki a Ieova. E tokouke e ‵kau fakatasi mo tatou i ‵tou fakatasiga. Nisi ne loto fia‵fia o sukesuke ki te Tusi Tapu mo tatou kae seai se loto fia‵fia o fai olotou tukuatuga ki a Ieova. (1 Tupu 18:21) A ko nisi tino ko se ‵kau mai eiloa ki te fakapotopotoga Kelisiano. E isi ne talavou ne puti aka ne mātua Kelisiano kae seki ati aka eiloa ne latou te alofa mō tulaga amio‵tonu o Ieova. Faitalia me se a te tulaga, ne faka‵mafa mai ne Iesu me e ‵tau mo tino katoa o fai olotou fakaikuga totino. E kilo atu a ia ki a latou konā e pelā me ne “koloa tāua” mai fenua katoa.—Haka. 2:7.

. . . ke mafaufau ki se fakaakoakoga i aso nei

11, 12. (a) Ne a mea aoga e maua ne tatou mai te tala fakatusa e uiga ki te tili? (e) Se a te mea e akoako mai i te tala fakatusa tenei e uiga ki a Ieova mo Iesu?

11 Ne a mea aoga e maua ne tatou mai te tala fakatusa e uiga ki te tili? E fesoasoani mai a te maina ‵lei i te akoakoga o te tala fakatusa tenei, ke ‵kalo keatea tatou mai te fanoanoa māfai e se puke ‵mau se akoga faka-te-Tusi Tapu io me se tokotasi o ‵tou tamaliki ki te munatonu. E mafai o tupu te mea tenei faitalia a taumafaiga e fai ne tatou. A te talia ke fai se akoga faka-te-Tusi Tapu io me ko te puti aka i loto i te munatonu e se fakauiga i ei me ko maua ne te tino se fesokotakiga pili mo Ieova. A latou kolā e se ma‵nako o faka‵logo ki te pulega a Ieova ka ‵vae kea‵tea fakamuli mai tino o te Atua.

A nisi tino kolā ne fia‵fia ki te munatonu ka tavini atu ki a Ieova (Ke onoono ki te palakalafa e 9-12)

12 E mata, e fakauiga i ei me i tino kolā ko tiakina ne latou te munatonu ka se toe talia ke ‵foki mai ki loto i te fakapotopotoga? Io me kafai e se fai ne se tino tena tukuatuga ki a Ieova, ka taku eiloa a ia ki te se-gata-mai e pelā me se tino “masei”? Ikai. E isi eiloa se avanoaga e matala atu ki vaegā tino penā mai mua malie o kamata te  fakalavelave lasi. E pelā eiloa me kalaga atu a Ieova ki a latou: “Toe ‵foki mai ki a au, kae ka toe ‵fuli atu au ki a koutou.” (Mala. 3:7) E faka‵mafa mai a te manatu tonu tenei i te suā tala fakatusa ne tuku mai ne Iesu e uiga ki te tamaliki fakamāumāu mea.—Faitau te Luka 15:11-32.

TE TAMALIKI FAKAMĀUMĀU MEA

13. Se a te uiga o te tala fakatusa e uiga ki te tamaliki fakamāumāu mea?

13 Se a te uiga o te tala fakatusa a Iesu e uiga ki te tamaliki fakamāumāu mea? A te tamana alofa i te tala fakatusa tenei e fakaata mai ei te ‵tou Tamana alofa ko Ieova. A te tamaliki tagata telā ne manako ki tena vaega kae fakamāumāu ne ia e fakatusa loa ki a latou kolā ne olo keatea mai te fakapotopotoga. E pelā me tiaki kae faima‵laga atu latou ki se “fenua ‵mao,” ko te lalolagi a Satani telā e ‵vae keatea mai i a Ieova. (Efe. 4:18; Ko. 1:21) Fakamuli loa, ka oko atu ki nisi tino se mafaufau ‵lei, kae taumafai ke toe ‵foki mai ki te fakapotopotoga a Ieova. A tino loto maulalo konei kolā ko sala‵mo ka talia eiloa ne te ‵tou Tamana telā e alofa fakamagalo.Isa. 44:22; 1 Pe. 2:25.

14. Kaia ne fai mai i ei ne Iesu te tala fakatusa o te tamaliki fakamāumāu mea?

14 Kaia ne fai mai ei ne Iesu te tala fakatusa tenei? I se auala fakafiafia, ne fakamatala mai ne Iesu me e manako a Ieova ke toe ‵foki mai tino kolā ne olo keatea mai i a Ia. Ne fakamoemoe faeloa te tamana i te tala fakatusa ki te ‵toe foki mai o tena tamaliki tagata. I te laveaga ne ia tena tama ko foki mai faitalia me “koi ‵mao ‵ki a ia,” ne tele fakavave atu te tamana o fakafetaui atu ki tena tama. A te mea nei se fakamalosiga eiloa mō tino kolā ne tiaki ne latou te munatonu ke toe ‵foki mai ki a Ieova e aunoa mo se fakatalave! E mafai o vāivāi latou i te feitu faka-te-agaga, kae e foliga atu pelā me se mea fakamā kae faigata ke toe ‵foki mai latou. Kae e aoga eiloa a taumafaiga konei me ka fiafia eiloa a Ieova, Iesu e pelā foki mo te kau agelu māfai ko toe ‵foki mai latou.Luka 15:7.

15, 16. (a) Se a te akoakoga e tauloto ne tatou mai te tala fakatusa a Iesu e uiga ki te tamaliki fakamāumāu mea? Taku mai ne fakaakoakoga. (e) Se a te mea e akoako mai i te tala fakatusa tenei e uiga ki a Ieova mo Iesu?

15 Ne a mea aoga e mafai o maua ne tatou mai te tala fakatusa e uiga ki te tamaliki fakamāumāu mea? E ‵tau o tau‵tali tatou i te fakaakoakoga a Ieova. Ke mo a eiloa e ma‵nako tatou ke “fia amiotonu” mai te ‵kalo keatea mai te se fakafetaui atu ki tino agasala kolā ko sala‵mo. E mafai o iku atu ki te “masei” i te feitu faka-te-agaga. (Fai. 7:16) E mafai o tauloto ne tatou se akoakoga  mai konei. E ‵tau o ‵kilo atu tatou ki te tino telā e tiaki ne ia te fakapotopotoga e pelā me se “mamoe ko galo,” kae e se pelā me se mamoe ko seai sena aoga. (Sala. 119:176) Kafai e fetaui tatou mo se tino telā ne fano keatea mai te fakapotopotoga, e mata ka fesoasoani atu tatou ki ei mo te alofa ke toe foki mai? E mata, ka fakailoa fakavave atu ne tatou ki toeaina ko te mea ke mafai o tuku atu a fesoasoani ‵tau ki a latou? Ka fai ne tatou penā māfai e fakagalue ne tatou mo te poto a te akoakoga e tauloto ne tatou mai te tala fakatusa a Iesu e uiga ki te tamaliki fakamāumāu mea.

16 Mafaufau ki te auala ne fakaasi atu ne nisi tino kolā ne olo keatea kae ‵toe ‵foki mai ki te fakapotopotoga a te loto fakafetai mō te loto fakamagalo o Ieova fakatasi mo te alofa mo te fesoasoani o te fakapotopotoga. E fai mai se taina telā ne fakatea atu mō se 25 tausaga: “Ne gasolo aka toku fiafia i te taimi ne toe foki mai ei au, me ne maua ne au “te malosi fou” mai i a Ieova. (Galu. 3:19) A tino katoa ne fakatau fesoasoani kae a‵lofa! Ko maua nei ne au se kāiga fiafia i te feitu faka-te-agaga.” Ne fai mai se tuagane talavou telā ne mate i te feitu faka-te-agaga mō se lima tausaga kae toe foki mai: “E se mafai ne au o fakamatala atu te auala ne fakaasi faka‵lei mai ei ki au a te alofa telā ne faipati ki ei a Iesu. Ko oko eiloa i te tāua ke aofia au i te fakapotopotoga a Ieova!”

17, 18. (a) Ne a akoakoaga tāua e tauloto ne tatou mai tala fakatusa e tolu kolā ne sau‵tala tatou ki ei? (e) Se a ‵tou fakaikuga e ‵tau o fai?

17 Ne a akoakoga tāua ne tauloto ne tatou mai tala fakatusa konei e tolu? Muamua la, e ‵tau o iloa ne tatou me e se mafai o pule atu tatou ki te gasolo ki mua o te tino akoga i te feitu faka-te-agaga. E tuku atu ne tatou a te mea tenā ki a Ieova. A ko te lua, e tonu e se mautinoa i a tatou me ka puke ‵mautakitaki a latou katoa kolā e ‵kau fakatasi kae suke‵suke mo tatou ki te munatonu. A ko te ‵toe mea, e tiga eiloa e tiaki ne nisi tino a te munatonu kae fulitua atu ki a Ieova, ke mo a ma ‵fiu tatou i te fakamoe‵moe me ka se toe ‵foki mai latou. Kae kafai e toe ‵foki mai latou, ke na ‵saga atu tatou ki a latou e ‵tusa mo te kilokiloga a Ieova.

18 Ke na tumau faeloa tatou taki tokotasi i te ‵sala atu ki te iloaga, te malamalama mo te poto. I te taimi e fai‵tau ei tatou ki tala fakatusa a Iesu, ‵sili atu me ne a olotou uiga, te pogai ne fakamau ei ki loto i te Tusi Tapu, te auala e fakagalue ei ne tatou a akoakoga konā, mo mea kolā e mafai o tauloto ne tatou e uiga ki a Ieova mo Iesu. A te faiga tenā se fakaasiga me e malamalama ‵lei tatou i uiga o pati a Iesu.