Te Tusi a Ioane 4:1-54

  • Iesu mo te fafine Samalia (1-38)

    • Tapuaki ki te Atua “i te agaga mo te munatonu” (23, 24)

  • E tali‵tonu tino Samalia e tokouke ki a Iesu (39-42)

  • Ne faka‵lei ne Iesu te tama tagata a se ofisa pule (43-54)

4  I te iloaga ne te Aliki me ko ‵logo te kau Falesaio me ko tokouke a tino ko fai mo soko kae papatiso+ foki ne Iesu i lō Ioane—  faitalia me seki fai ne Iesu a te papatisoga kae ne fai ne ana soko—  ne tiakina ne ia a Iuta kae toe foki atu ki Kalilaia.  Kae ne ‵tau o fanatu a ia i loto i Samalia.  Ne oko atu a ia ki se fakai i Samalia e igoa ki a Sukala i tafa o te laumanafa telā ne tuku ne Iakopo ki tena tama ko Iosefa.+  Ne tu i konā a te vaikeli o Iakopo.+ Ne fi‵ta a Iesu mai te malaga, telā sagasaga ifo ei a ia i tafa o te vaikeli.* Kāti ko te ono o itula.*  Ne fanatu se fafine Samalia o asu vai, kae ne fai atu a Iesu ki a ia: “Aumai aka ne vai ke inu au.”  (Me ko oti ne olo ana soko ki te fakai o ‵togi meakai.)  Tenā ne fai atu ei te fafine Samalia ki a ia: “E mafai pefea o fai mai koe ki a au ke inu koe i a koe se tino Iutaia kae ko au se fafine Samalia?” (Me e seai ne fesokotakiga e fai sāle i te va o tino Iutaia mo tino Samalia.)+ 10  Ne tali atu a Iesu ki a ia: “Moi ne iloa ne koe te meaalofa faivasaga a te Atua+ penā foki loa mo te tino telā e fai atu ki a koe, ‘Aumai aka ne vai ke inu au,’ penei ko fakamolemole mai koe ki a ia, ko tuku atu ei ne ia ki a koe a te vai o te ola.”+ 11  Ne fai atu tou fafine: “Tou ‵malu, e seai sau paketi mo asu a vai, kae e ‵poko a te vaikeli. Tela la, e maua ne koe i fea a te vai o te ola tenei? 12  E a, e sili atu koe i te motou tupuga ko Iakopo, telā ne tuku mai ne ia te vaikeli tenei ki a matou kae ne inu ei a ia mo ana tama mo ana pulumakau?” 13  Ne tali atu a Iesu ki a ia: “A tino katoa kolā e inu ki te vai tenei e toe fiainu foki. 14  So se tino e inu ki te vai telā ka tuku atu ne au ka se toe fiainu eiloa,+ kae ko te vai telā ka tuku atu ne au ki a ia ka fai pelā me se vaipuna i loto i a ia telā ka ‵puna aka ke tuku mai ei te ola se-gata-mai.”+ 15  Ne fai atu te fafine ki a ia: “Tou ‵malu, tuku mai ki a au a te vai tenā, ko au ke se toe fiainu io me toe vau ki te koga tenei o asu vai.” 16  Ana muna ki a ia: “Fano o kalaga ki tau avaga kae o‵mai ki te koga tenei.” 17  Ne tali atu te fafine: “E seai saku avaga.” Ne fai atu a Iesu ki a ia: “E tonu eiloa koe i au pati, ‘E seai saku avaga.’ 18  Me ko oti ne avaga koe ki tāgata e tokolima, kae ko te tagata tenā e ‵nofo mo koe e se ko tau avaga. Ne faipati ‵tonu eiloa koe.” 19  Ne fai atu te fafine ki a ia: “Tou ‵malu, ko iloa nei ne au i a koe se pelofeta.+ 20  A omotou tupuga ne tapuaki i te mauga tenei; kae e fai mai koutou me ko Ielusalema te koga e ‵tau o tapuaki i ei a tino.”+ 21  Ne fai atu a Iesu ki a ia: “Talitonu mai ki a au, e toku fafine, ka oko mai eiloa te itula ka se toe tapuaki ei a koutou ki te Tamana i te mauga tenei io me ko Ielusalema. 22  A koutou e tapuaki ki te mea e se iloa ne koutou;+ a matou e tapuaki ki te mea e iloa ne matou, me i te fakaolataga ne kamata mai i tino Iutaia.+ 23  E tiga te feitu tenā, ka oko mai te itula, kae ko oko eiloa ki ei, ka tapuaki atu ei a tino tapuaki ‵tonu ki te Tamana i te agaga mo te munatonu, me e ‵sala eiloa te Tamana ki tino penei ke tapuaki atu ki a ia.+ 24  A te Atua se agaga,+ kae ko tino kolā e tapuaki ki a ia e ‵tau o tapuaki atu i te agaga mo te munatonu.”+ 25  Ne fai atu te fafine ki a ia: “E iloa ne au i te Mesia e vau telā e taku ki te Keliso. Kafai e oko mai a te tino tenā, ka folafola mai ne ia a mea katoa ki a matou.” 26  Ne fai atu a Iesu ki a ia: “Au ko te tino tenā, ko te tino tenei e faipati atu ki a koe.”+ 27  I te taimi eiloa tenā kae oko atu ana soko, kae ne ofo latou me i a ia e fai‵pati mo se fafine. Kae e seai eiloa se tino i a latou ne fai atu penei: “Se a te mea e ‵sala koe ki ei?” io me, “Kaia e faipati ei koe ki te fafine tenā?” 28  Tenā ne tiaki ei ne te fafine tena tiā vai kae fano ki te fakai o fakailoa atu ki tino i ei: 29  “O‵mai o onoono ki te tagata telā ne fai mai ne ia ki a au a mea katoa kolā ne fai ne au. E a, e se ko ia tenei te Keliso?” 30  Ne tiaki ne latou te fakai kae kamata o olo atu ki a ia. 31  I te vaitaimi tenei ne fakamalosi atu ana soko ki a ia: “Te Faiakoga,+ na kai.” 32  Kae ne fai atu a ia ki a latou: “E isi ne aku meakai e kai ei au kolā e se iloa ne koutou.” 33  Ne fai‵pati ana soko i a latou eiloa: “E a, e isi se tino ne avatu ne ia ki ei ne meakai?” 34  Ne fai atu a Iesu ki a latou: “A taku meakai ko te faiga o te loto o ia telā ne uga mai ne ia au+ kae ke fakaoti foki tena galuega.+ 35  E a, e se fai mai koutou me e toe fa masina kae oko ki te taimi e tau ei a fuataga? Kiloke! Au e fai atu ki a koutou: ‵Kilo aka ki luga kae onoono atu ki fatoaga, me ko ‵kena eiloa i fuataga e ‵tau o ‵kati.+ Ko oti 36  ne maua ne te tino tau fuataga a tena ‵togi kae ko ‵luku mai a fuataga mō te ola se-gata-mai, ko te mea ke fia‵fia fakatasi a te tino ‵toki lakau mo te tino tau fuataga.+ 37  I te feitu tenei ko tonu ei te faigamuna penei: E tokotasi e ‵toki kae e tau ne te suā tino. 38  Ne uga atu ne au koutou ke tau a fuataga kolā ne seki ga‵lue eiloa koutou ki ei. Ne ga‵lue a nisi tino, kae maua ne koutou a mea aoga mai i olotou galuega.” 39  E tokouke a tino Samalia mai te fakai tenā ne fakatuanaki ki a ia ona ko te molimau a te fafine telā ne fai atu ki a latou: “Ne fai mai ne ia ki a au a mea katoa kolā ne fai ne au.”+ 40  Tela la, i te oloatuga a tino Samalia ki a ia, fakamolemole atu ei ke nofo a ia i a latou, kae ne nofo eiloa a ia i konā i aso e lua. 41  Ona ko te mea tenā, ne tali‵tonu a nisi tino e tokouke ona ko ana pati kolā ne fai atu, 42  kae ne fai atu latou ki te fafine: “Ko se toe tali‵tonu matou ona fua ko au pati ne fai; me ko oti eiloa ne lagona ne matou kae ko iloa ne matou mo te mautinoa me i te tagata tenei ko te fakaola o te lalolagi.”+ 43  I te otiga o aso e lua ne tiaki ei ne ia te koga tenā o fano ki Kalilaia. 44  Kae ne molimau mai a Iesu me i te pelofeta e se ‵malu i tena fenua tonu.+ 45  Tela la, i tena okoatuga ki Kalilaia, ne fakafetaui atu ki a ia a tino Kalilaia, me ko oti ne lavea ne latou a mea katoa ne fai ne ia i Ielusalema i te taimi o te ‵kaiga fiafia,+ me ne ‵nofo foki latou i te ‵kaiga fiafia tenā.+ 46  Tenā ne fanatu ei a ia ki Kana i Kalilaia, ko te koga telā ne ‵fuli ei ne ia a vai ki uaina.+ E isi se ofisa a te tupu e masaki tena tamaliki tagata i Kapanaumi. 47  I te logoga a te tagata tenei me ko oti ne fanatu a Iesu mai i Iuta ki Kalilaia, fanatu ei ki a ia o fakamolemole atu ke vau o faka‵lei aka tena tama, me ko pili eiloa o mate. 48  Kae ne fai atu a Iesu ki a ia: “E se mafai lele eiloa o tali‵tonu koutou, seiloga ke lavea ne koutou a galuega ‵mana mo mea fakaofoofogia.”+ 49  Ne fai atu te ofisa a te tupu ki a ia: “Te Aliki, vau la koi tuai o mate taku tamaliki.” 50  Ne fai atu a Iesu ki a ia: “Fano la me ko ola tau tama.”+ Ne talitonu eiloa te tagata tenā ki pati a Iesu, fano ei a ia. 51  Kae koi fanatu a ia i tena auala ne fakafetaui atu ana pologa ki a ia o fakailoa atu me ko ola* tena tamaliki. 52  Ne fesili atu a ia ki a latou me ko te itula fea ne ‵lei ei a ia. Ne tali atu latou ki a ia: “Ko te aso anafi i te fitu o itula* ne ‵lei ei tena fiva.” 53  Tenā ne iloa ei ne te tamana me ko te itula eiloa tenā ne fai atu ei a Iesu ki a ia: “Ko ola tau tama.”+ Ne talitonu ei a ia fakatasi mo tena kaufale kātoa. 54  Tenei te lua o galuega ‵mana+ ne fai ne Iesu i tena fanatuga mai i Iuta ki Kalilaia.

Fakamatalaga mai lalo

Io me “vaipuna.”
Telā kāti ko te 12:00 i te tutonu.
Io me “ko ‵lei.”
Telā kāti ko te 1:00 i te fakaafiafi.