Galuega a Apositolo 13:1-52

  • Ko uga atu Panapa mo Saulo pelā me ne misionale (1-3)

  • Galuega talai i Kupelu (4-12)

  • Te lāuga a Paulo i Anitioka i Pisitia (13-41)

  • Fakatonuga fakavaloaga ke ‵saga atu ki atufenua (42-52)

13  E isi ne pelofeta mo faiakoga i te fakapotopotoga i Anitioka:+ ko Panapa, Simeona telā ne fakaigoa ki a Nikelu, Lukio mai Kulene, Manaena telā ne a‵koga fakatasi mo Helota, te pule o se vaega o te fenua, mo Saulo ei.  I te faiga o te lotou taviniga ki a Ieova kae fakaliki‵liki foki, ne fai atu te agaga tapu: “Ke na ‵tofi aka i te taimi nei a Panapa mo Saulo,+ ke fai ne lāua te galuega telā ne kalagagina ei ne au a lāua.”+  I te lotou otiga ne fakaliki‵liki kae ‵talo, ne fakaeke atu olotou lima ki luga i a lāua kae uga atu ke olo.  Ne olo atu a tāgata kolā ne uga atu ne te agaga tapu ki Selukeia, kae mai i konā ne fo‵lau atu ei lāua ki Kupelu.  I te lā okoatuga ki Salamina, ne kamata o folafola atu ne lāua te muna a te Atua i sunako o tino Iutaia. Ne fesoasoani atu foki a Ioane ki a lāua.+  I te lotou oloatuga i loto i te fenua kātoa ke oko ki Pafo, ne fetaui latou mo se tagata Iutaia e igoa ki a Pa-Iesu, se tino fai tapune kae se pelofeta loi.  Ne ‵nofo mai a ia mo te kovana o te koga tenā ko Sekio Paulo, se tagata poto. Ne kalaga atu a Sekio Paulo ki a Panapa mo Saulo ke olo atu ki a ia, me ne manako malosi a te tagata tenei ke lagona ne ia te muna a te Atua.  Kae ko Elima te tino fai tapune (ko tena igoa tenā māfai e ‵fuli) ne kamata o ‵teke ki a lāua, kae taumafai ke ‵fuli kea‵tea te kovana mai te fakatuanaki.  Kae ko Saulo, telā e fakaigoa foki ki a Paulo, ne ‵fonu i te agaga tapu, ne kilo ‵tonu atu ki a ia 10  kae fai atu: “A koe se tagata e ‵fonu i te loi mo mea ma‵sei katoa, a koe se tama a te Tiapolo,+ a koe ko te fili o mea ‵tonu katoa, e a, ka se gata au taumafaiga o ‵fuli a auala ‵tonu o Ieova? 11  Kiloke! a te lima o Ieova ko i luga i a koe, kae ko koe ka ‵kivi, ka se lavea ne koe te mainaga o te la i se taimi.” I te taimi eiloa tenā, ne oko atu se ausaga matolu kae pouli ki luga i a ia, kae ne fanofano sāle fua a ia o ‵sala se tino ke takitaki a ia. 12  I te laveaga ne te kovana a te mea tenā ne talitonu eiloa a ia, me ne ofo malosi a ia i akoakoga a Ieova. 13  Ne fo‵lau fakatasi a Paulo mo ana taugasoa mai Pafo kae oko atu ki Peleka i Pafulia. Kae ne tiaki ne Ioane+ a lāua i konā kae toe foki ki Ielusalema.+ 14  Ne olo atu lāua mai Peleka kae oko atu ki Anitioka i Pisitia. Kae i te lā oloatuga ki loto i te sunako+ i te Sapati, ne saga‵saga lāua ki lalo. 15  I te otiga ne faitau te Tulafono+ mo tusi a te kau Pelofeta, ne fai atu ei a ofisa tausi o te sunako ki a lāua, olotou muna: “Taina, kafai e isi ne muna fakamalosi loto a koulua e fia fai ki tino konei, fai mai la.” 16  Ne tu aka a Paulo, fakatu atu tena lima, kae fai atu: “Tino Isalaelu mo nisi o koutou kolā e ma‵taku ki te Atua, faka‵logo mai. 17  A te Atua o tino Isalaelu konei ne filifili ne ia a ‵tou tupuga, kae ne fakamaluga ne ia a latou i te lotou ‵nofoga e pelā me ne tino fakaa‵tea i te fenua o Aikupito kae aumai latou ki tua i te malosi o tena ‵mana.*+ 18  Ne kufaki a ia i olotou mea ne fai i te koga lavaki i tausaga e 40.+ 19  I te otiga ne fakaseai atu a malo e fitu i te fenua o Kanana, ne vaevae ne ia a te lotou laukele e pelā me se tofi.+ 20  Ne fai katoa a mea konā i loto i tausaga kāti e 450. “I te otiga o mea konei ne tuku atu ne ia ki a latou a famasino ke oko ki te pelofeta ko Samuelu.+ 21  Mai tua ifo ne ma‵nako latou ki se tupu,+ kae ne tuku atu ne te Atua ki a latou a Saulo te tama a Kiso, se tagata mai te matakāiga o Peniamina,+ mō tausaga e 40. 22  I te otiga ne tapale kea‵tea a Saulo, ne fai ne ia a Tavita mo fai te tupu,+ telā ne molimau a ia ki ei kae fai atu: ‘Ko oti ne maua ne au a Tavita te tama a Iese,+ se tagata e loto au ki ei;+ ka fai ne ia a mea katoa e manako au ki ei.’ 23  E ‵tusa mo tena folafolaga, ko oti ne avatu ne te Atua ki Isalaelu se fakaola, ko Iesu, mai te tama* a te tagata tenei.+ 24  Kae koi tuai o oko mai a te tino tenā, ne talai atu ne Ioane ki tino Isalaelu katoa a te papatisoga ke fai mo fakailoga o te salamō.+ 25  I te taimi ko fakaotioti ei te galuega a Ioane, ne fai mai sāle a ia: ‘Se a te otou faka‵tau, ko oi au? Au e se ko ia. Kae kiloke! a te tino telā ka vau i oku tua e se ‵tau o ‵tala ne au ana taka mai i ana vae.’+ 26  “Taina, ko koutou kolā ne ‵tupu mai i te kāiga o Apelaamo e pelā foki mo nisi tino i a koutou kolā e ma‵taku ki te Atua, ko oti ne aumai ki a tatou a te muna o te fakaolataga.+ 27  Me ne seki iloa ne tino kolā e ‵nofo i Ielusalema mo olotou takitaki a te tino tenei, kae i te taimi ne fai ei latou e pelā me ne famasino, ne fakataunu ne latou a mea kolā ne ‵valo mai ne te kau Pelofeta,+ kolā e faitau faeloa i se leo maluga i sapati katoa. 28  E tiga eiloa ne seki maua ne latou se pogai ke tamate ei a ia,+ ne faimālō ne latou a Pilato ke tamate a ia.+ 29  Kae i te otiga ne fakataunu ne latou a mea katoa kolā ne tusi e uiga ki a ia, ne puke ifo ne latou a ia mai te pou* kae fakatakato i loto i se tanuga.+ 30  Kae ne toe fakatu aka ne te Atua a ia mai te mate,+ 31  kae e uke a aso ne lavea a ia ne latou kolā ne olo atu mo ia mai Kalilaia ki Ielusalema. Ko fai nei a latou konei mo fai ana molimau ki tino katoa.+ 32  “Tela la, ko fakailoa atu ne māua ki a koutou a te tala ‵lei e uiga ki te folafolaga telā ne fai ki ‵tou tupuga. 33  Ko oti ne fakataunu katoatoa ne te Atua a tena folafolaga ki a tatou, ko olotou fanau, i te ‵toe fakatuakaga ne ia a Iesu;+ e pelā eiloa mo mea e tusi i te lua o salamo: ‘A koe ko taku tama, i te aso nei ko fai au mo fai tou Tamana.’+ 34  Kae ona ko te mea tonu tenei me ne toe fakatu aka a Ia ne te Atua mai te mate ke se toe oko ki a ia te pala, ne fai mai a Ia penei: ‘Ka tuku atu ne au ki a koutou a fakaasiga o te alofa fakamaoni ne folafola ne au ki a Tavita, kolā ne mea ‵tonu eiloa.’+ 35  Ne fai mai foki a ia i te suā salamo: ‘Ka se talia ne koe a tau tino fakamaoni ke oko te pala ki tena foitino.+ 36  I te feitu e tasi, ne tavini atu a Tavita ki te Atua i tena kautama, ne moe atu a ia i te mate, ne tanu fakatasi mo ana tupuga, kae ne oko te pala ki tena foitino.+ 37  I te suā feitu, a te tino telā ne toe fakatu aka ne te Atua ne seki oko te pala ki tena foitino.+ 38  “Tela la, ke iloa ne koutou, e taina, me e auala i te tino tenei ko folafola atu ei ki a koutou te fakamagaloga o agasala,+ 39  kae mai mea katoa kolā e se mafai o taku amiotonugina ei koutou e auala i te tulafono a Mose,+ ka taku amiotonugina a tino katoa kolā e tali‵tonu e auala i te tino tenei.+ 40  Tela la, ke fakaeteete ke mo a ma oko atu ki luga i a koutou a mea kolā ne fai‵pati ki ei a te kau Pelofeta: 41  ‘‵Kilo ki mea konā, koutou e tino fakatauemu, kae ofo i ei, kae ‵mate atu, me ka fai ne au se galuega i otou aso, se galuega telā ka se mafai o tali‵tonu koutou ki ei faitalia me e fakamatala likiliki atu a mea konā ne se tino ki a koutou.’”+ 42  I te taimi ne olo ei a lāua ki tua, ne fakamolemole atu a tino ke toe fakamatala atu a mea konei ki a latou i te suā Sapati. 43  I te otiga o te fakatasiga i te sunako, e tokouke a tino Iutaia mo nisi tino kolā ne tapuaki ki te Atua ne tau‵tali atu i a Paulo mo Panapa, ne fai‵pati kae ne kamata o fakamalosi atu ki a latou ke tumau i te alofa tauanoa o te Atua.+ 44  I te suā Sapati toeitiiti ko ‵kau atu a tino katoa i te fakai o fakalogo‵logo ki te muna a Ieova. 45  I te laveaga ne tino Iutaia a te vaitino, ne ‵fonu latou i te loto masei kae kamata o ‵teke kae fakatauemu atu ki mea kolā e faipati a Paulo ki ei.+ 46  Tenā ne fai‵pati atu ei mo te loto ‵toa a Paulo mo Panapa ki a latou: “Ne ‵tau eiloa o folafola atu muamua ki a koutou te muna a te Atua.+ Ona ko te mea ko ‵teke atu koutou ki ei kae fakaiku aka me e se ‵tau o maua ne koutou te ola se-gata-mai, kiloke! ka ‵saga atu māua ki atufenua.+ 47  Me ko oti ne fakatonu mai a Ieova ki a māua i pati konei: ‘Ko oti ne filifili ne au a koe e pelā me se mainaga ki atufenua, ke fai koe mo fakaolataga ke oko ki koga ‵mao o te lalolagi.’”+ 48  I te lagonaga ne tino o atufenua a te mea tenei, ne fia‵fia kae tavae ne latou te muna a Ieova, kae ko tino loto ‵lei katoa kolā e ‵tau o maua ne latou a te ola se-gata-mai, ne fai pelā me ne tino tali‵tonu. 49  E se gata i ei, ne salalau atu eiloa te muna a Ieova i te fenua kātoa. 50  Kae ko tino Iutaia ne fakamalosi ne latou a fāfine takutakua kolā e ma‵taku ki te Atua mo tāgata ma‵luga o te fakai, kae ne kamata o fakasaua+ ne latou a Paulo mo Panapa kae ‵pei atu ki tua mo te lotou fakai. 51  Ne tuetue atu ne lāua konei a ‵pefu i lā vae kae olo ki Ikonio.+ 52  Kae ne ‵fonu faeloa a soko i te fia‵fia+ mo te agaga tapu.

Fakamatalaga mai lalo

Eleni, “mo tena lima e sisi i luga.”
Io me “fanau.”
Io me “lakau.”