Te Tusi Muamua a Petelu 2:1-25

  • Ati aka se manakoga malosi ki te muna (1-3)

  • Fatu ola e ati aka ei se fale faka-te-agaga (4-10)

  • Ola e pelā me ne tino fakaa‵lofa i te lalolagi (11, 12)

  • Fakalogo ‵tau (13-25)

    • Keliso, se fakaakoakoga mō tatou (21)

2  Tela la, ke tiakina ne koutou a mea ma‵sei katoa+ mo te faitogafiti mo te fia amiotonu mo te loto masei mo pati faka‵mae katoa.  E pelā me ne pepe fatoa fa‵nau,+ fai ke fiainu malosi koutou ki susu sē lai‵lai* o te muna, ko te mea ke mafai o ga‵solo atu koutou ki te fakaolataga e auala i ei,+  māfai ko oti ne tami* koutou ki te atafai o te Aliki.  I te otou olo atu ki a ia, ko te fatu ola telā ne tiaki ne tāgata+ kae ne filifili ne te Atua me e tāua ki a ia,+  a koutou ko fatu ola kolā ne ati aka ke faite ki ei se fale faka-te-agaga+ mo fai se kau faitaulaga tapu, ko te mea ke ofo aka i ei a taulaga faka-te-agaga+ kolā e talia ne te Atua e auala i a Iesu Keliso.+  Me ne tusi mai penei i Tusitusiga Tapu: “Kiloke! ko fakatakato ne au i Siona se fatu filifilia, ko te fatu tulimanu fakavae kae tāua, kae e seai se tino e fakaasi atu te fakatuanaki ki a ia ka fanoanoa.”*+  Tela la, e tāua a ia ki a koutou, me i a koutou ko tino tali‵tonu; kae ki tino sē tali‵tonu, “a te fatu telā ne tiakina ne tufuga fai fale+ ko oti ne fai mo fai te fatu tulimanu tafasili i te aoga”+  kae “se fatu faka‵siga tino mo se kaupapa e ‵lave ei olotou vae.”+ E ‵siga latou me e se faka‵logo ki te muna. Tenei eiloa te mea ko oti ne fakaiku aka mō latou.  Kae ko koutou “se matakāiga ne filifiligina, ne faitaulaga kolā ko fai mo tupu, se fenua tapu,+ ne tino fakapito o te Atua,+ e ‵tau o folafola atu ne koutou ki fenua katoa a uiga fakaofoofogia”*+ o te Atua telā ne kalagagina ne ia koutou mai te pouliga ki tena mainaga fakaofoofogia.+ 10  Me i a koutou ne seki fai mo tino o te Atua i aso mua, kae nei ko fai koutou mo fai ana tino;+ ne seki fakaasi atu ki a koutou te alofa fakamagalo i aso ko ‵teka, kae nei ko oti ne maua ne koutou a te alofa fakamagalo.+ 11  Aku fagasele, e pelā me ne tino fakaa‵tea mo tino e se ‵nofo tumau,+ e fakamalosi atu au ke tumau koutou i te ‵kalo kea‵tea mai manakoga faka-te-foitino+ kolā e taua atu faeloa ki a koutou.+ 12  Ke tausi otou amioga ke ‵lei i mua o tino o te lalolagi,+ ko te mea kafai e fakamasei ne latou koutou e pelā me ne tino fai mea ‵se, e mafai o molimau ne latou ki olotou mata otou galuega ‵lei,+ kae e iku atu ei ki te ‵viki atu o latou ki te Atua i te aso o tena asiga. 13  Ke faka‵logo koutou ki pulega katoa a tāgata* ona ko te Aliki,+ faitalia me se tupu+ telā e maluga 14  io me ko kovana kolā e uga atu ne ia ke fakasala a tino fai mea ‵se kae ke tavae atu ki tino fai mea ‵lei.+ 15  Me tenā eiloa te loto o te Atua, ke fakafilemu* ne koutou a pati va‵lea a tāgata sē loto malamalama ona ko te fai ne koutou o mea ‵lei.+ 16  Ke fai pelā me ne tino saoloto,+ mai te fakaaogaga o te otou saolotoga ke fai pelā me ne pologa a te Atua+ kae ke se ‵funa* aka i ei a te faiga o mea ma‵sei.+ 17  Āva ki vaegā tino katoa,+ a‵lofa ki te kautaina kātoa,+ ma‵taku ki te Atua,+ kae āva ki te tupu.+ 18  Ke faka‵logo a tavini ki olotou matai mo te mataku ‵tau,+ e se gata fua ki matai ‵lei kae loto malamalama kae e penā foki ki matai faiga‵ta. 19  Me kafai e fa‵ki se tino i mea faiga‵ta* kae logo‵mae i se auala sē tonu ona ko tena loto lagona i mua o te Atua, se mea fakafiafia tenā ki a Ia.+ 20  Me se a te aoga māfai e ‵kini koutou ona ko te agasala kae fa‵ki koutou i ei?+ Kae kafai e fa‵ki koutou i logo‵maega ona ko te faiga o mea ‵lei, se mea fakafiafia te mea tenā ki te Atua.+ 21  Se mea tonu me tenei eiloa te pogai ne kalagagina ei koutou, me ne puapuaga a Keliso mō koutou,+ kae tuku mai ne ia se fakaakoakoga mō koutou ke tau‵tali fakapili‵pili atu i ana kalafaga.+ 22  E seai sena agasala ne fai,+ io me se pati loi ne tō mai i tena gutu.+ 23  I taimi ne pati masei atu ei ki a ia,+ ne seki taui atu ne ia ki pati ma‵sei.+ I taimi ne logo‵mae ei a ia,+ ne seki fakamatakutaku atu a ia, kae ne tuku atu ne ia a ia eiloa ki te Atua telā e fai ne ia a te fakamasinoga+ amiotonu. 24  Ne tauave ne ia a ‵tou agasala+ i tena foitino i luga i te pou,*+ ko te mea ke ‵mate tatou ki* te fai agasala kae ola ki te amiotonu. Kae “e auala i ana pa‵kiaga, ne faka‵lei aka ei koutou.”+ 25  Me i a koutou e pelā me ne mamoe kolā ne takasē‵se,+ kae nei ko oti ne ‵foki atu koutou ki te tausi mamoe+ mo te ovasia o otou ola.

Fakamatalaga mai lalo

Io me “‵mā pakipaki.”
Io me “ko oti ne iloa.”
Eleni, “fakamasiasigina.”
Eleni, “ko uiga ‵lei,” telā ko ana uiga mo faifaiga kolā e tavaegina.
Io me “fakapotopotoga.”
Eleni, “‵sai a gutu.”
Io me “se fakamasakoga.”
Io me “mafatia; logo‵mae.”
Io me “lakau.”
Io me “ke oti fakatasi mo.”