Te Tusi a Luka 15:1-32

  • Tala fakatusa e uiga ki te mamoe ne galo (1-7)

  • Tala fakatusa ki te tupe siliva telā ne galo (8-10)

  • Tala fakatusa ki te tama telā ne galo (11-32)

15  Ne maopoopo atu faeloa a tino ‵tae lafoga mo tino agasala katoa ki tafa o Iesu ko te mea ke fakalogo‵logo latou ki a ia.+  Kae ne musu‵musu faeloa a Falesaio mo failautusi: “E talia ne te tagata tenei a tino agasala kae e ‵kai fakatasi foki mo latou.”  Tenā ne fai atu ei ne ia ki a latou te tala fakatusa tenei, ana muna:  “Ko oi te tagata i a koutou e 100 ana mamoe, kafai e galo se mamoe e tasi, ka se tuku ne ia te 99 i te koga lavaki kae fano o ‵sala te mamoe telā ko galo ke oko ki te taimi e maua ei ne ia?+  Kafai ko maua ne ia, e amo ne ia te mamoe tenā ki tena tuauma mo te fiafia.  Kae i te taimi e oko atu ei a ia ki tena fale, e ‵kami mai ne ia ana taugasoa mo ana tuakoi, kae fai atu ki a latou, ‘Ke fia‵fia fakatasi tatou me ko oti ne maua ne au taku mamoe telā ne galo.’+  Au e fai atu ki a koutou me ka penā foki te lasi o te fiafia e maua i te lagi māfai e salamō se tino agasala e tokotasi+ i lō te toko 99 o tino amio‵tonu kolā e se ‵tau o sala‵mo.  “Io me ko oi foki la se fafine e isi ne ana tupe siliva* e sefulu, kafai e galo sena tupe siliva e tasi, e se faka‵ka ne ia se moli kae ‵teu tena fale kae salasala faka‵lei atu ki ei ke oko ki te taimi e maua ei ne ia?  Kafai ko maua ne ia, e ‵kami ne ia ana taugasoa* mo ana tuakoi, kae fai atu, ‘Ke fia‵fia fakatasi tatou me ko oti ne maua taku tupe siliva* telā ne galo.’ 10  Au e fai atu ki a koutou, e penā foki te fiafia ka maua ne agelu a te Atua i se tino agasala e tokotasi ko salamō.”+ 11  Tenā ne fai atu ei a ia: “E isi se tagata e tokolua ana tamaliki tāgata. 12  Kae ne fai atu te tamaliki foliki ki tena tamana, ‘Toku tamana, tuku mai te vaega telā e ‵tau o maua ne au. Tenā ne ‵vae ei ne te tamana ana mea i a lāua. 13  I nai aso mai tua ifo, ne puke ne te tamaliki foliki ana mea katoa kae faimalaga atu ki se fenua ‵mao kae fakamāumāu ne ia i konā ana mea katoa mai te ola i se olaga fai valevale. 14  I te otiga ne fakamāumāu ana mea katoa, ne poko se oge lasi i te fenua kātoa, kae ne mativa ei a ia. 15  Ne fano a ia o nofo i se tino tonu e tokotasi o te fenua tenā, kae ne uga atu a ia ke tausi ana puaka i te vao.+ 16  Kae ne fiakai sāle tou tagata ki meakai a puaka, me e seai se tino e fia tuku atu ne mea ki a ia. 17  “I te taimi ne ala aka ei tena mafaufau, ana muna, ‘E tokouke a tino ga‵lue a toku tamana e lava kae ‵toe olotou falaoa, kae tenei au ka mate i te fiakai! 18  Au ka tu ki luga o fano ki toku tamana kae fai atu ki ei: “Toku tamana, au ko oti ne agasala ki te lagi e pelā foki ki a koe. 19  Ko se aoga au o taku ko tau tama. Kae ke fai fua au mo fai se tokotasi o au tino ga‵lue.”’ 20  Tenā ne tu aka ei tou tagata kae fano ki tena tamana. Kae koi ‵mao a ia kae lavea a ia ne tena tamana, kae ne ‵fonu te loto o tena tamana i te alofa, tele atu ei, ‵sai ki a ia kae sogi atu ki ei. 21  Tenā ne fai atu ei te tama ki a ia, ‘Toku tamana, au ko oti ne agasala ki te lagi e pelā foki ki a koe.+ Ko se aoga au o taku ko tau tama.’ 22  Kae ne fai atu te tamana ki ana pologa, ‘Fakavave! aumai se gatu ‵loa e tafasili i te ‵lei, kae fakapei atu ki a ia. Faulu atu se mama ki tena lima mo taka ki ana vae. 23  Puke mai foki se tamā pulumakau putaputa o ta, ko te mea ke ‵kai kae fia‵fia tatou, 24  me i taku tama tenei ne mate kae ko toe ola mai;+ ne galo kae ko toe maua.’ Kamata ei o fia‵fia latou. 25  “I te taimi nei a tena tama matua ne nofo i te fatoaga, kae i tena fokimaiga kae ko pili atu ki te fale, lagona ei ne ia a te ‵tagi o pese mo tino e ‵saka. 26  Tenā ne kalaga atu ei a ia ki se tavini e tokotasi kae fesili atu me se a te mea e fai. 27  Ne fai atu a ia ki ei, ‘Ko oti ne vau tou taina kae ko tou tamana ne ta ne ia se tamā pulumakau putaputa me ko foki mai tou tagata mo te malosi.’ 28  Kae ne kaitaua tou tagata kae se manako o ulu atu ki loto. Tenā ne vau ei tena tamana ki tua kae fakamolemole atu ki a ia ke fanatu ki loto. 29  Ne tali atu tou tagata ki tena tamana, ‘Kiloke! Ko oti au ne galue fakapologa mō koe i tausaga e uke kae ne seki soli aka eiloa ne au au fakatonuga, kae ne seki tuku mai eiloa ne koe se tamā kouti ke fia‵fia fakatasi ei au mo oku taugasoa. 30  Kae i te taimi eiloa ne oko mai ei tau tama telā ne fakamāumāu ne ia a mea e ola ei koe fakatasi mo fāfine talitāgata, ta ei ne koe se tamā pulumakau putaputa ma ia.’ 31  Ne fai atu te tamana ki a ia, ‘Taku tama, a koe ne nofo faeloa i oku tafa, kae ko aku mea katoa e a koe. 32  Kae e ‵tau mo tatou o ‵lifu kae fia‵fia, i tou taina tenei ne mate kae ko toe ola mai, ne galo kae ko toe maua.’”

Fakamatalaga mai lalo

Eleni, “talakama.” A te talakama e ‵pau mo te tolu-vae-fa o te peofuga o te tino i te aso. Onoono ki te MF E14.
Io me “ana taugasoa fāfine.”
Eleni, “talakama.” Onoono ki te MF E14.