Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Tesema 2014

E Mata, e ‵Tau o ‵Fuli Tau Fakaikuga?

E Mata, e ‵Tau o ‵Fuli Tau Fakaikuga?

E FAKAIKU aka ne se potukau o talavou Kelisiano ke olo latou o onoono i se ata tamunei. Ne fatoā ‵logo latou me i te tokoukega o olotou taugasao i te a‵koga ne fia‵fia ki ei. I te taimi e oko ei latou ki te tamunei, ne ‵kilo atu latou ki luga i ata i te ‵pui kae lavea ne latou a ata o meatau kolā e fakaaoga mō tatino mo ata o fafine e ‵pei ki gatu fai fakaa‵tea. Ne a mea ka fai ne latou? E mata, ka olo latou ki loto i te tamunei kae onoono atu fua ki te ata?

E fakaasi mai i te tulaga tenei me e fakafesagai atu tatou ki filifiliga e uke kolā e mafai o pokotia ei tatou—i se auala ‵lei io me i se auala masei i te feitu faka-te-agaga pelā foki mo ‵tou fesokotakiga mo Ieova. I nisi taimi, e mafai o ma‵nako tatou o fai se mea, kae oti aka ko toe iloilo aka ne tatou te tulaga tenā kae ‵fuli ‵tou fakaikuga. E mata, e ‵fuli tau fakaikuga ona ko te fakalotolotolua io me se mea loa e ‵tau o fai ne koe?

TAIMI E SE ‵TAU EI O ‵FULI ‵Tou Fakaikuga

A te ‵tou a‵lofa ki a Ieova e fai ne ia ke tuku atu ‵tou ola ki a ia kae papatiso. Ko ‵tou manakoga kolā e fai mo te loto kātoa ke tumau i te fakamaoni ki te Atua. Kae e manako eiloa a te ‵tou fili ko Satani o fakamasei ‵tou fakamaoni. (Faka. 12:17) Ko oti ne fai ne tatou te filifiliga ke tavini atu ki a Ieova kae tau‵tali ki ana tulafono. Se mea fakafanoanoa māfai e ma‵nako tatou ke ‵fuli ‵tou fakaikuga e uiga ki ‵tou tukuatuga ki a Ieova! E mafai eiloa o pokotia i ei a ‵tou ola.

I senitenali e silia atu mo te 26 ko ‵teka, ne fakatu aka ne te tupu ko Nepukanesa se tupua aulo kae fakatonu atu ki tino katoa ke ifo ki lalo kae tapuaki atu ki ei. So se tino telā e se fakalogo ka ‵pei atu ki loto i te afi ‵ka ulaula. Ne seki faka‵logo eiloa a tamataene konei e tokotolu ko Satalaka, Mesako, mo Apeteniko—ne tino tapuaki kolā e ma‵taku ki a Ieova.  Ona me ne seki ifo latou ki te tupua tenā, ne ‵pei ei latou ki loto i te afi ‵ka ulaula. Ne faka‵sao fakavavega latou ne Ieova, kae ne lotoma‵lie ke ‵tu olotou ola i se tulaga fakamataku i lō te gutugutulua i te lotou fakaikuga ke tavini atu ki te Atua.—Tani. 3:1-27.

Fakamuli ifo, ne tumau eiloa te pelofeta ko Tanielu i te ‵talo faitalia te fakamataku o te ‵pei atu ki loto i te lua leona. Ne ‵mautakitaki eiloa a ia ki tena faifaiga masani i te faiga o ‵talo ki a Ieova fakatolu taimi i te aso. Ne seki ‵fuli te kilokiloga a Tanielu ke tapuaki atu ki te Atua tonu. I te fakaotiga, ne fakasao eiloa te pelofeta mai “gutu o leona.”—Tani. 6:1-27.

E ola eiloa a tavini a te Atua i aso nei e ‵tusa mo te lotou tukuatuga ki a ia. I se akoga i Afelika, ne seki talia ne se potukau o tamaliki Molimau a Ieova ke aofia latou i se faigāmea ke ifo atu ki se fakailoga o se fenua. Ne fakatonu atu ki a latou me kafai e se ‵kau atu latou ki nisi tamaliki, ka faka‵tea latou mai te akoga. Fakamuli ifo, ne āsi atu te sui o te malo i mea tau akoakoga ki te fa‵kai kae ne faipati atu ki nisi tamaliki Molimau. E aunoa mo te ma‵taku, ne fakamatala atu ne tamaliki mo te āva a te lotou tulaga. Mai konā loa, ne seki toe fakasae aka eiloa te mataupu tenā. Ko mafai nei o toe ‵foki atu a tamaliki Molimau a Ieova ki te akoga e aunoa mo se fakamalosiga ke gutugutulua latou i te lotou fesokotakiga mo Ieova.

Mafaufau la ki a Joseph, telā tena avaga ne logo‵mae i te kenisa kae mate atu fakamuli. Ne malamalama kae āva ana kāiga ki tena fakatokaga e uiga ki te fanoanoa. A kāiga o tena avaga e se ‵nofo i loto i te munatonu, kae ne ma‵nako latou ke fai a tuu e uiga ki te mate o tena avaga e aofia ei a faifaiga kolā e se fakafiafia atu ki te Atua. E fai mai a Joseph: “I te taimi ne fai atu au me i au e se manako ke gutugutulua, ne taumafai latou o fakamalosi aka aku tamaliki kolā ne ‵mautakitaki foki i te lotou fakaikuga. Ne ma‵nako foki a olotou kāiga ke fai se fanoanoa i toku fale e pelā mo tuu masani, kae ne fai atu au me kafai e tumau latou i te fakamalosi mai ke fai se fanoanoa, ka se talia ne au ke fai te mea tenā i toku fale. Ne iloa ne latou me e fe‵paki a te faifaiga tenā mo oku talitonuga e penā foki mo taku avaga, tela la mai tua o se sau‵talaga, ne olo atu ei latou o fai te fanoanoa i te suā koga.

“I te taimi faigata tenei, ne fakatagi atu au ki a Ieova mō se fesoasoani ke mō a ma ofa ne toku kāiga ana tulafono. Ne lagona ne ia taku ‵talo kae fesoasoani mai ke ‵mautakitaki matou faitalia fakamalosiga se ‵lei mai kāiga. E pelā mo Joseph mo ana tamaliki, ne seki fai te lotou fakaikuga e uiga ki te lotou tapuakiga e pelā me se mea ke filifili ki ei.

E Mafai o Fai se Filifiliga Ke ‵Fuli ‵tou Fakaikuga

Mai tua malie eiloa o te Paseka i te 32 T.A., ne fanatu se fafine Foinikia ki a Iesu Keliso i se koga e pili ki Saitonu. Ne fakamolemole atu faeloa a ia ki tou tagata ke ‵tuli se temoni mai tena tama fafine. I te taimi muamua, ne seki ai se pati a Iesu ne fai atu ki tou fafine. Ne fai atu Iesu ki ana soko: “Au ne uga mai fua ki mamoe ‵galo o te kāiga o Isalaelu.” I te taimi ne toe fakamolemole atu a ia, ne fai atu ei a Iesu: “E se ‵tau o tuku atu a mea‵kai a tama‵liki ki kuli.” Mai te fakaasiatuga o te fakatuanaki lasi, ne tali atu a ia: “Te Aliki, e tonu eiloa koe, ka ko kuli e ‵kai foki ki ma‵tutuga o mea kolā e ta‵tela mai i te laulau a olotou pule.” Ne talia ne Iesu tena fakamolemole kae ne faka‵lei ei ne ia tena tamaliki fafine.Mata. 15:21-28.

I te faiga tenā, ne fakaakoako atu eiloa a Iesu ki a Ieova i te fakaasiatuga o te loto fiafia o ‵fuli māfai ko manakogina ke fai penā. E pelā me se fakaakoakoga, ne manako eiloa te Atua ke fakaseai atu a tino Isalaelu i te taimi ne faite ei ne latou se pulumakau aulo, kae ne fakamolemole atu a Mose ke toe ‵fuli Tena fakaikuga.Eso. 32:7-14.

Ne fakaakoako atu eiloa te apositolo ko Paulo ki a Ieova mo Iesu. I se taimi e tasi, ne mafaufau a Paulo me e se ‵lei ke puke ne lāua a Ioane Maleko i lā malaga faka-misionale, ona me ne tiakina ne ia a Paulo mo Panapa i te lotou malaga faka-misionale muamua. Kae fakamuli loa, ne lavea ‵lei ne Paulo me ko saga tonu mai a Maleko kae ko mafai foki o fai pelā me se fesoasoani  aoga ki a ia. Ne fai atu ei a Paulo ki a Timoteo: “Puke mai a Maleko ke o‵mai mo koe me e mafai o fesoasoani mai ki a au i te faiga o te galuega.”2 Timo. 4:11.

Kae pefea la tatou? Mai te fakaakoako atu ki te ‵tou tamana faka-te-lagi telā e alofa fakamagalo, loto kufaki kae alofa, ko mafai ei o ‵fuli ne tatou a ‵tou fakaikuga. E pelā me se fakaakoakoga, e mafai o ‵fuli ‵tou kilokiloga ne nisi tino. E se pelā mo Ieova mo Iesu, a tatou e se ‵lei katoatoa. Kafai e loto fiafia latou o ‵fuli, e mata, e se mafai o mafau‵fau tatou ki pogai e ‵fuli ei a mafaufauga o nisi tino kae fai ei ke ‵fuli ‵tou fakaikuga?

E mafai o fai a te ‵fuliga o ‵tou fakaikuga e pelā me se filifiliga ‵lei māfai e mafau‵fau tatou ki fakamoemoega faka-te-agaga. A nisi tino kolā e suke‵suke ki te Tusi Tapu kae ko oti foki ne ‵kau sāle ki fakatasiga a te fakapotopotoga e fakatalave sāle o papatiso. Io me e taofi aka ne nisi taina ke aofia i te galuega faka-paenia, faitalia loa me e avanoa latou ke fakalauefa atu te galuega talai i te auala tenā. A ko nisi taina e se ma‵nako o kausaki atu ki nisi tiute i te fakapotopotoga. (1 Timo. 3:1) E mata, e pokotia koe i se mea e tasi mai mea konei? E ‵kami eiloa ne Ieova mo te alofa a koe ke tofotofo aka vaegā tauliaga penā. Tela la, kaia e se ‵fuli aka ei tau fakaikuga kae ke fiafia o tuku atu koe ki a Ieova e pelā foki ki nisi tino?

Changing your mind may result in a blessing

E fai mai a Ella e uiga ki tena taviniga i se ofisa lagolago o Molimau a Ieova i Afelika: “I te taimi muamua o oku ki te Peteli, ne seki iloa tonu ne au me ka pefea toku leva. Ne manako au o tavini atu ki a Ieova mo te loto kātoa, kae ne ‵pili malosi foki au ki toku kāiga. I te taimi muamua, au ne solopū ki oku kāiga! Kae ona ko fakamalosiga mai toku taugasoa e potu tasi māua, ne fakaiku ei ke nofo au. Mai tua o te sefulu tausaga ne galue i te Peteli, ne nofo mo au te lagonoga ke tumau eiloa i te tavini fakatasi atu mo taina mo tuagane mai te galue tumau i te Peteli.”

 Te Taimi e ‵Tau o ‵Fuli i ei a ‵Tou Fakaikuga

E mata, e masaua ne koe te mea ne tupu ki a Kaino i te taimi ne loto masei ei a ia ki tena taina kae ati aka te uiga kaitaua? Ne fai atu te Atua ki te tagata kaitaua tenei me e mafai o maua ne ia tena taliaga māfai fua e ‵fuli o fai te mea ‵lei. Ne polopoloki atu te Atua ki a Kaino ke pule faka‵lei atu ki te agasala telā e “pili faatu eiloa ki [tena] mataloa.” Ne mafai o ‵fuli ne Kaino tena kilokiloga mo ana mafaufauga, kae ne filifili eiloa ke ‵teke atu a ia ki polopolokiga a te Atua. Se mea fakanoanoa me ne tamate ne Kaino tena taina kae taku ei a ia ko te tino tatino muamua eiloa!Kene. 4:2-8.

Kae a la moi ne fai ne ‵fuli te mafaufau o Kaino?

Ke mafaufau foki ki te fakaakoakoga o te tupu ko Usia. I te taimi muamua, ne fai ne ia te mea tonu i mua o Ieova kae tumau i te ‵sala atu ki te Atua. Se mea fakafanoanoa, me ne fakamasei ne ia tena tulaga ‵lei ona ko te fakamatamata. Ne ulu atu a ia ki te faletapu ke ofo atu taulaga ma‵nogi, e tiga eiloa a ia e sē se faitaulaga. I te fakailoaatuga ne te faitaulaga me e se ‵tau o fai ne ia te faifaiga sē āva tenei, e mata, ne ‵fuli tena fakaikuga? Ikai. Ne “kaitaua” a Usia kae ne seki fakalogo ki ei. Tela la, ne fakasala ne Ieova a ia ki te lepela.2 Nofo. 26:3-5, 16-20.

E tonu, e isi ne taimi e ‵tau ei o fai ne tatou a ‵fuliga ki ‵tou fakaikuga. A Joachim se fakaakoakoga e tasi i ‵tou aso nei. Ne papatiso a ia i te 1955, kae ne fakatea atu i te 1978. I tausaga e 20 fakamuli ifo, ne salamo tonu a ia kae toe fai pelā me se Molimau a Ieova. Ne fesili atu se toeaina fakamuli nei me kaia ne fui foki fakavave mai ei a ia ki te fakapotopotoga. Ne tali atu a Joachim: “Ona fua ko toku kaitaua kae fakamatamata. Ne salamo au ona ko toku fui foki fakavave mai. I taimi koi fakatea ei au, ne iloa ‵lei eiloa ne au me ko Molimau a Ieova e akoako fua ne latou te munatonu.” Ne ‵tau eiloa o ‵fuli tena kilokiloga kae salamō.

Kāti e mafai o ‵tu atu tatou i se tulaga telā e manakogina ei ke ‵fuli ‵tou fakaikuga mo ‵tou faifaiga. Tela la, ke na loto fia‵fia tatou o fai penā ko te mea ke fakafiafia atu ki a Ieova.Sala. 34:8.