Te Tusi a Mataio 13:1-58

  • TALA FAKATUSA O TE MALO (1-52)

    • Tino ‵toki lakau (1-9)

    • Pogai ne fakaaoga ei ne Iesu a tala fakatusa (10-17)

    • Te uiga o te tala fakatusa ki te tino ‵toki lakau (18-23)

    • Saito mo mouku ma‵sei (24-30)

    • Te fuaga o te sinapi mo te mea faka‵fete (31-33)

    • Te fakaaogaga o tala fakatusa e fakataunu ei se valoaga (34, 35)

    • Te uiga o te tala fakatusa ki saito mo mouku ma‵sei (36-43)

    • Koloa ‵funa mo te penina gali (44-46)

    • Te tili (47-50)

    • Koloa ‵fou mo koloa mua (51, 52)

  • Ko ‵teke atu ki a Iesu i tena fakai (53-58)

13  Ne tiaki ne Iesu a te fale i te aso tenā, kae ne sagasaga a ia i te tafatai.  Kae ne olo atu ki a ia se vaitino e tokouke, sopo ei a ia ki te pōti, sagasaga ki lalo, kae ko tino katoa ne ‵tu i te tafatai.+  Tenā ne fai atu ei ne ia ki a latou a mea e uke e auala i tala fakatusa,+ ana muna: “Kiloke! E isi se tino ‵toki lakau ne fano o ‵toki a fuaga.+  I te taimi ne ‵toki ei ana fuaga, ne ‵to atu a nisi fuaga i tafa o te auala, ne o‵mai a manu eva, kai ei ne latou.+  Ne ‵to atu a nisi fuaga ki te laukele fatufatua telā e se uke a one i ei, kae ne ‵somo fakavave aka a fuaga konā me e se matolu te one i ei.+  Kae i te taimi ne ‵kasa ei te la, velasia ei a fuaga konā kae mage‵mage me seai ne olotou aka.  Ne ‵to atu a nisi fuaga i va o lakau tala‵tala, ne ola aka a lakau tala‵tala, ola sai‵tia ei a fuaga konā.+  Kae ko nisi fuaga ne ‵to ki luga i te laukele ‵lei kae ne kamata o ‵fua mai i taki 100, taki 60, mo taki 30.+  A te tino telā e isi ne ana taliga ke na fakalogo la ki ei.”+ 10  Ne olo atu ana soko kae fai atu ki a ia: “Kaia e faipati ei koe ki a latou e auala i te fakaaogaga o tala fakatusa?”+ 11  Ne tali atu a ia: “Ko oti ne talia koutou ke malama‵lama i mea ‵funa kae tapu+ o te Malo o te lagi, kae e se ko tino konā. 12  Me ko so se tino telā e isi ne ana mea ka toe tuku atu ki ei a nisi mea, ko te mea ke uke ana mea; kae ko te tino telā e seai ne ana mea ka ave foki kea‵tea mai i a ia a nai mea kolā ne maua ne ia.+ 13  Tenā te pogai e faipati atu ei au ki a latou e auala i te fakaaogaga o tala fakatusa; me e kilo‵kilo fua, kae e se lavea ne latou, e fakalogo‵logo, kae e se lagona ne latou, io me malama‵lama latou i te uiga o mea konā.+ 14  Kae ko oti ne fakataunu ne latou te valoaga a Isaia. E fai mai penei: ‘Ka lagona eiloa ne koutou kae ka se malama‵lama i te uiga o mea konā, kae ka ‵kilo atu eiloa koutou, kae ka se lavea ne koutou.+ 15  Me i tino konei e loto ma‵keke, ko oti ne lagona ne latou ki olotou taliga kae e se fia ‵saga atu ki ei, kae ko ‵moe olotou mata ko te mea ke se lavea eiloa ne latou ki olotou mata kae ke se lagona ki olotou taliga kae ke se malama‵lama i te uiga o mea konā i olotou loto, ko ‵fuli mai ei ke faka‵lei ne au latou.’+ 16  “Tela la, ke fia‵fia otou mata me e lavea ne koutou mo otou taliga me e lagona ne koutou.+ 17  Me e fai ‵tonu atu au ki a koutou, e tokouke a pelofeta mo tino amio‵tonu ne ma‵nako o ‵kilo atu ki mea ko lavea ne koutou kae seki lavea ne latou,+ kae fia faka‵logo foki ki mea ko lagona ne koutou kae seki lagona ne latou. 18  “Nei la, faka‵logo mai ki te tala fakatusa e uiga ki te tagata ‵toki fuaga.+ 19  Kafai e lagona ne se tino a te muna e uiga ki te Malo kae e se malamalama i ei,+ e vau a te tino masei, ave ei ne ia kea‵tea a mea kolā ne ‵toki i tena loto; tenei eiloa te fuaga telā ne ‵toki i tafa o te auala.+ 20  Kae ko te fuaga telā ne ‵toki i laukele fatufatua, tenei eiloa te tino ne lagona ne ia te muna kae ne talia fakavave ne ia mo te fiafia.+ 21  Kae e seai ne ana aka ne ‵lave ki lalo. Ne ola aka te tino tenā i se taimi toetoe, kae i te okomaiga o fakalavelave mo fakasauaga ona ko te muna, ne pakū fakavave ei a ia. 22  Kae ko te fuaga telā ne ‵toki i va o lakau tala‵tala, tenei eiloa te tino ne lagona ne ia te muna kae ne ola sai‵tia te muna tenā i loto i a ia ona ko te manavase ki mea o te olaga tenei+ mo te ‵gali fakaloi‵loi o koloa, telā ko seai ei ne ana fuataga.+ 23  Kae ko te fuaga telā ne ‵toki i luga i te laukele ‵lei, tenei eiloa te tino ne lagona ne ia te muna kae ne malamalama i ei, ko ia telā e fua mai i taki 100, taki 60, mo taki 30.”+ 24  Ne fai atu ne ia ki a latou a te suā tala fakatusa, ana muna: “A te Malo o te lagi e mafai o fakatusa ki se tagata telā ne ‵toki ne ia a fuaga ‵lei i tena fatoaga. 25  I te taimi ne ‵moe ei a tino, ne fanatu tena fili kae ‵toki ne ia a mouku ma‵sei i va o saito kae fano. 26  I te taimi ne ola aka ei a saito kae ‵fua mai, ne ‵sae aka foki a mouku ma‵sei. 27  Tenā ne o‵mai ei a pologa a te matai o te fale kae fai atu ki a ia, ‘Te Matai, e a, e se ko fuaga ‵lei fua ne ‵toki ne koe i te fatoaga? Kae ne ola aka pefea a mouku ma‵sei i ei?’ 28  Ne fai atu a ia ki a latou, ‘Ko te fili, se tagata ne fai ne ia te mea tenei.’+ Ne fai atu a pologa ki a ia, ‘E manako koe ke olo matou o unu kea‵tea?’ 29  Ana muna, ‘Ikai, me kafai e unu ne koutou a mouku ma‵sei, ka unu foki ne koutou a saito. 30  Tuku ke ola fakatasi aka latou ke oko ki te taimi e ‵kati ei a saito, kae i te ‵tau e ‵kati ei a saito; ko fai atu ei au ki tino ‵kati saito: Unu muamua a mouku ma‵sei kae saisai ki saitaga ko ‵sunu ei; ka oti ko ‵luku mai ei a saito ki loto i toku fale saito.’”+ 31  Ne fai atu ne ia ki a latou te suā tala fakatusa, ana muna: “A te Malo o te lagi e fai pelā me se fuaga o te sinapi telā ne puke ne se tagata kae ‵toki i tena fatoaga.+ 32  A te fuaga tenā ko te ‵toe fuaga foliki eiloa i fuaga katoa, kae kafai e ola aka, ko fai ei mo fai te ‵toe lakau lasi eiloa i lakau kaina kae fai pelā me se lakau, ko olo atu ei a manu eva o te lagi o fai olotou ofaga i ana kaula.” 33  Ne toe fai atu foki ne ia a te suā tala fakatusa: “A te Malo o te lagi e fai pelā me se mea faka‵fete telā ne puke ne se fafine kae palu fakatasi ne ia mo palugā falaoa ‵lasi e tolu* ke oko ki te taimi ne ‵fete ei a te paluga kātoa.”+ 34  Ne fai atu ne Iesu a mea katoa konei ki te vaitino e auala i tala fakatusa. E tonu, e se mafai o faipati atu a ia ki a latou e aunoa mo se tala fakatusa,+ 35  ko te mea ke fakataunu ei a pati konei a te pelofeta: “Ka ‵tala ne au toku gutu o faipati ki tala fakatusa; ka folafola atu ne au a mea kolā ne ‵funa talu mai te kamataga.”*+ 36  I te otiga ne olo te vaitino, fanatu ei a ia ki loto i te fale. Ne o‵mai ana soko ki a ia kae fai atu: “Fakamatala mai ki a matou te tala fakatusa e uiga ki mouku ma‵sei i te fatoaga.” 37  Ne tali atu a ia: “A te tino ‵toki lakau telā ne ‵toki ne ia a fuaga ‵lei ko te Tama a te tagata; 38  a te fatoaga ko te lalolagi.+ Kae ko fuaga ‵lei ko tama o te Malo, kae ko mouku ma‵sei ko tama a te tino masei,+ 39  kae ko te fili telā ne ‵toki ne ia a mouku ma‵sei ko te Tiapolo. A te ‵katiga o saito ko te vaitaimi o te gataga o te olaga tenei, kae ko tino ‵kati saito ko agelu. 40  Tela la, e pelā mo mouku ma‵sei kolā ka unu kae ‵sunu ki te afi, e penā foki te mea ka fai i te vaitaimi o te gataga o te olaga tenei.+ 41  Ka uga atu ne te Tama a te tagata ana agelu, kae ka unu kea‵tea ne latou mai tena Malo a mea katoa kolā e fakavāivāi ei a tino e pelā foki mo tino solitulafono, 42  kae ka ‵pei ne latou ki loto i te afi ‵ka ulaula.+ Tenā eiloa te koga ka ‵tagi mautuutu kae ū olotou nifo i ei. 43  I te taimi tenā, a tino amio‵tonu ka maina malosi mai e pelā mo te la+ i te Malo o te lotou Tamana. A te tino telā e isi ne ana taliga ke na fakalogo la ki ei. 44  “A te Malo o te lagi e fai pelā me se koloa e ‵funa i te laukele kae ne maua ne se tagata, kae toe ‵funa ne ia; kae ona ko tena fiafia, fano ei o fakatau atu ana mea katoa kae ‵togi ne ia te laukele tenā.+ 45  “E se gata i ei, a te Malo o te lagi e fai pelā me se tino faipisinisi faimalaga telā e salasala ki penina ‵gali. 46  I te mauaga ne ia se penina ‵togi ‵mafa, fano ei o fakatau fakavave atu ana mea katoa kae ‵togi ne ia te penina tenā.+ 47  “E se gata i ei, a te Malo o te lagi e fai pelā me se tili telā ne ‵pei ki te tai kae ne ‵tu i ei a ika valevale. 48  I te taimi ne ‵fonu ei te tili, ne ‵futi aka ne latou ki te tafatai, saga‵saga ki lalo kae ‵fao ne latou a ika ‵lei+ ki loto i tapola, kae ko ika ma‵sei+ ne ‵pei kea‵tea. 49  Tenā eiloa te mea ka fai i te vaitaimi o te gataga o te olaga tenei. Ka olo atu a agelu kae ‵vae kea‵tea ne latou a tino amio ma‵sei mai tino amio‵tonu 50  kae ka ‵pei atu latou ki loto i te afi ‵ka ulaula. Tenā eiloa te koga ka ‵tagi mautuutu kae ū olotou nifo i ei. 51  “E a, e malama‵lama koutou i te uiga o mea katoa konei?” Ne fai atu latou ki a ia: “Ao.” 52  Tenā ne fai atu ei a ia ki a latou: “Ona ko te mea tenā, a faiakoga katoa kolā e akoakogina e uiga ki te Malo o te lagi, e fai pelā me se tagata, ko te matai o te fale telā e aumai ne ia mai tena fale koloa a mea ‵fou mo mea mua.” 53  I te otiga o tala fakatusa konei a Iesu, tiaki ei ne ia a te koga tenā. 54  Mai tua o tena okoatuga ki tena fenua,+ kamata ei a ia o akoako atu ki a latou i loto i olotou sunako. Ne ofo latou kae fai aka: “Ne maua i fea ne te tagata tenei a te poto mo galuega ‵mana konei?+ 55  E se ko ia tenei te tama a te kamuta?+ E se ko Malia tena mātua, kae ko ana taina ko Iakopo mo Iosefa mo Simona mo Iuta?+ 56  E se ko ana tuagane katoa konei e ‵nofo mo tatou? Tela la, tefea te koga ne maua ei ne te tagata tenei a mea katoa konei?”+ 57  Tenā ne kamata ei latou o se fia‵fia ona ko ia.+ Kae ne fai atu a Iesu ki a latou: “A te pelofeta e se ‵malu i tena fenua tonu mo tena fale.”+ 58  Kae ne seki toe fai ne ia a galuega ‵mana e uke i konā ona ko te sē lava o te lotou fakatuanaki.

Fakamatalaga mai lalo

Eleni, “sea.” A te sea e ‵pau mo te 7.33 L. Onoono ki te MF E14.
Io me kāti, “te kamataga o te lalolagi.”