Galuega a Apositolo 3:1-26

  • Ne faka‵lei ne Petelu se tino ‵pili kae akai mea (1-10)

  • Te lāuga a Petelu i te Fakaosoga o Solomona (11-26)

    • “Toe faka‵fou ei a mea katoa” (21)

    • Se pelofeta e pelā mo Mose (22)

 Ne olo atu a Petelu mo Ioane ki te faletapu me ko oko ki te itula e fai ei a ‵talo, telā ko te iva o itula,*  kae ne sausau mai se tagata telā ne ‵pili talu tena fanaumaiga. I aso katoa ne tuku sāle ne latou a ia i tafa o te mataloa o te faletapu telā e fakaigoa ki te Mataloa Gali, ko te mea ke akai atu ki tino kolā e ulu ki loto i te faletapu ke maua ne ana meaalofa.  I te laveaga ne ia a Petelu mo Ioane ka fai o ulu atu ki loto i te faletapu, ne akai atu a ia ki a lāua ke maua sena meaalofa.  Ne ‵kilo ‵tonu atu a Petelu mo Ioane ki a ia kae fai atu: “Kilo mai ki a māua.”  Ne saga ‵tonu atu a ia ki a lāua, mo tena fakamoemoega ke maua se mea mai i a lāua.  Kae ne fai atu a Petelu: “E seai ne aku siliva mo aulo, kae e isi saku mea telā ka tuku atu ki a koe. I te igoa o Iesu Keliso te Nasaleta, tu ki luga kae sasale!”+  Ne puke atu a Petelu ki tena lima fakaatamai o fakatu aka a ia ki luga.+ I konā loa, ne ma‵losi ei ana vae mo ana fatugugu;+  ne tafuke+ aka a ia ki luga kae kamata o sasale kae ulu atu a ia fakatasi mo lāua ki loto i te faletapu, e sasale kae evaeva kae tavae atu ki te Atua.  Kae ne lavea ne tino katoa a ia e sasale kae tavae atu ki te Atua. 10  Kae ne kamata o iloa ne latou i a ia ko te tagata telā ne sagasaga sāle i tafa o te Mataloa Gali o te faletapu+ o akai atu ke maua ne ana meaalofa, kae ne ofo masei latou kae fia‵fia malosi i te mea telā ko oti ne tupu ki a ia. 11  I te taimi koi ‵piki atu ei a ia ki a Petelu mo Ioane, ne ‵tele fakatasi atu a tino katoa ki a latou i te koga e fakaigoa ki te Fakaosoga o Solomona,+ me ne ofo masei latou. 12  I te laveaga ne Petelu a te mea tenei, fai atu ei a ia ki tino: “Tāgata Isalaelu, kaia e ofo ei koutou i te mea tenei, kae kaia e ‵pula ‵toka mai ei koutou ki a māua, e pelā eiloa me ne fai ne māua te tagata tenei ke sasale ona ko te ‵mana o māua io me ko te mā tapuaki fakamaoni ki te Atua? 13  Ko oti ne faka‵malu ne te Atua o Apelaamo mo Isaako mo Iakopo,+ ko te Atua o ‵tou tupuga, a tena Tavini+ ko Iesu,+ telā ne tuku atu+ ne koutou kae fakafiti ne koutou i mua o Pilato, faitalia me ko oti ne fakaiku aka ne ia ke fakasaoloto a te tino tenā. 14  Ao, ne fakafiti ne koutou a te tino tapu kae amiotonu tenā, kae ne fakatagi atu koutou ke fakasaoloto mai se tagata tatino ki a koutou,+ 15  kae ne tamate ne koutou te Sui Sili o te ola.+ Kae ne fakatu aka ne te Atua a te tino tenā mai te mate, ko te mea tonu telā ne molimau māua ki ei.+ 16  Kae e auala i tena igoa mo te mā fakatuanaki ki tena igoa, ko malosi ei te tagata tenei e pelā mo te mea ko lavea kae iloa ne koutou. A te fakatuanaki e auala i a ia ne fai ei te tagata tenei ke katoatoa tena malosi i mua o koutou katoa. 17  Kae nei la, e oku taina, e iloa ne au me ne fai ne koutou a mea konei mo te sē iloa,+ e pelā eiloa mo mea ne fai ne otou takitaki.+ 18  Kae e auala i te mea tenei ne fakataunu ei ne te Atua a mea kolā ko leva ne folafola mai ne ia e auala i gutu o pelofeta katoa, me ka puapuagatia tena Keliso.+ 19  “Tela la, ke sala‵mo+ koutou, kae ‵fuli mai,+ ko te mea ke mafai o ‵solo kea‵tea otou agasala,+ kae ka oko mai foki te taimi ka maua ei te malosi fou mai i a Ieova eiloa 20  ko mafai ei o uga atu ne ia a te Keliso telā ne ‵tofi aka mō koutou, ko Iesu. 21  E ‵tau o nofo a ia tenei i te lagi ke oko ki te taimi e toe faka‵fou ei a mea katoa kolā ne faipati ki ei te Atua e auala i gutu o ana pelofeta ‵malu i aso mua. 22  E tonu, ne fai mai a Mose: ‘Ka fakatu aka ne Ieova te otou Atua mō koutou se pelofeta mai i otou taina e penei eiloa mo au.+ E ‵tau mo koutou o faka‵logo ki so se mea e fai atu ne ia ki a koutou.+ 23  E tonu, so se tino telā e se fakalogo ki te Pelofeta tenā ka fakaseai katoatoa eiloa a ia mai i ana tino.’+ 24  Kae ko pelofeta katoa, mai i a Samuelu mo latou kolā mai tua i a ia, ne fakaasi manino mai ne latou a aso konei.+ 25  A koutou ko tama a pelofeta mo tama o te feagaiga telā ne fai ne te Atua mo otou tupuga,+ i ana pati konei ki a Apelaamo: ‘E auala i tau tama* ka manuia ei a kāiga katoa o te lalolagi.’+ 26  I te otiga ne fakatu aka ne te Atua a tena Tavini, uga muamua+ atu ei ne ia ke fakamanuia atu ki a koutou mai te ‵fuliga o koutou taki tokotasi kea‵tea mai i otou amioga matagā.”

Fakamatalaga mai lalo

Telā kāti ko te 3:00 i te fakaafiafi.
Eleni, “fanau.”