Te Tusi a Luka 10:1-42

  • Ko uga atu ne Iesu te toko 70 (1-12)

  • Kalofa eiloa i fakai sē sala‵mo (13-16)

  • Ko ‵foki mai te toko 70 (17-20)

  • Ko tavae ne Iesu tena Tamana mo te fakatāua ne ia o tino loto mau‵lalo (21-24)

  • Te tala fakatusa e uiga ki te Samalia alofa (25-37)

  • Ko āsi atu a Iesu ki a Maleta mo Malia (38-42)

10  I te otiga o mea konei, ne fili aka ne te Aliki a nisi tino e toko 70 kae uga atu ne ia taki tokolua+ ke ‵mua i a ia ki fakai katoa mo koga kolā ka fanatu a ia ki ei.  Tenā ne fai atu ei a ia ki a latou: “Ao, ko oko eiloa i te uke o fuataga e ‵tau o ‵kati, kae e mu‵tana a tino ga‵lue. Tela la, fakatagi atu ki te Matai o te galuega ke uga mai ne tino ga‵lue o ‵kati a fuataga.+  Olo! Kiloke! E uga atu ne au koutou e pelā me ne tamā mamoe i va o kuli vao.+  Sa ave ne otou taga tupe io me ne taga meakai io me ne taka,+ kae sa fakatalofa atu ki so se tino* i te auala.  I so se fale e ulu koutou ki ei, fai atu muamua penei: ‘Ke i te fale tenei a te filemu.’+  Kae kafai e nofo i konā se taugasoa o te filemu, ka maua ne ia te otou filemu. Kae kafai e seai, ko foki mai ei ki a koutou.  Tela la, ‵nofo i te fale tenā,+ ‵kai kae inu a mea kolā e avatu ne latou ki a koutou,+ me e ‵tau o maua ne te tino galue tena ‵togi.+ Sa fulifuli faeloa te otou koga ‵nofo mai se fale e tasi ki te suā fale.  “E se gata i ei, i so se fakai e oko atu koutou ki ei kae talia ne latou koutou, ‵kai ki mea kolā e tuku atu ki a koutou,  faka‵lei a tino ma‵saki, kae fai atu ki a latou: ‘A te Malo o te Atua ko pili mai ki a koutou.’+ 10  Kae i so se fakai e ulu koutou ki ei kae e se talia ne latou a koutou, olo i ana auala ‵lasi kae fai atu penei: 11  ‘A ‵pefu mai te otou fakai kolā ne ‵piki ki omotou vae ka tuetue atu ne matou ki a koutou.+ E ui i ei, ke masaua te mea tenei, me i te Malo o te Atua ko pili mai.’ 12  Au e fai atu ki a koutou me ka feoloolo atu a Sotoma i te aso tenā i lō te fakai tenā.+ 13  Kalofa eiloa i a koe e Koasini! Kalofa eiloa i a koe e Petesaita! Me i galuega ‵mana kolā ko oti ne fai i a koutou moi ne fai i Tulo mo Saitonu, penei ko leva ne sala‵mo latou kae saga‵saga mo olotou gatu lautaga i luga i ‵pefu.+ 14  Ka feoloolo atu foki a Tulo mo Saitonu i te fakamasinoga i lō koutou. 15  Kae ko koe e Kapanaumi, e mata, ka fakamaluga aka koe ke oko ki te lagi? A koe ka ‵pei ‵tuki ki lalo i te Tanuga!* 16  “So se tino e fakalogo ki a koutou e fakalogo foki ki a au.+ Kae ko so se tino e se fia saga atu ki a koutou e se fia saga mai foki ki a au. E se gata i ei, so se tino e se fia saga mai ki a au e se fia saga foki ki a Ia telā ne uga mai ne ia au.”+ 17  Ne toe ‵foki atu te toko 70 mo te fia‵fia, olotou muna: “Te Aliki, ne faka‵logo mai foki a temoni ki a matou mai te fakaaogaga o tou igoa.”+ 18  Ne fai atu a ia ki a latou: “Ne lavea ne au Satani ko tō ifo+ mai te lagi e pelā me se uila. 19  Kiloke! ko oti ne tuku atu ne au ki a koutou a te pule ke lakalaka a gata mo akalava, e pelā foki mo malosi katoa o te fili,+ kae ka seai eiloa se mea ka fakalogo‵mae atu ki a koutou. 20  E tiga te feitu tenā, sa fia‵fia me i agaga ma‵sei ko faka‵logo ki a koutou, kae ke na fia‵fia me ko oti ne tusi otou igoa i te lagi.”+ 21  I te itula eiloa tenā, ne ‵fonu a ia i te fiafia ona ko te agaga tapu kae fai atu: “E tavae ne au a koe i mua o tino katoa e toku Tamana, te Aliki o te lagi mo te lalolagi, me ko oti ne ‵funa faka‵lei ne koe a mea konei mai i tino ‵poto mo tino ne akoga ma‵luga,+ kae fakaasi atu a mea konā ki tama‵liki fo‵liki. Ao, e toku Tamana, me tenei eiloa te auala e talia ne koe.+ 22  Ko oti ne tuku mai ki a au a mea katoa ne toku Tamana, kae e seai se tino e iloa ne ia te Tama kae na ko te Tamana. E seai foki se tino e iloa ne ia te Tamana kae na ko te Tama,+ mo so se tino telā e manako te Tama o fakaasi atu ki ei.”+ 23  Ne mafuli atu a ia ki ana soko i a latou eiloa kae fai atu: “E fia‵fia a mata kolā e lavea ne latou a mea kolā e lavea ne koutou.+ 24  Me e fai atu au ki a koutou, e tokouke a pelofeta mo tupu ne ma‵nako o ‵kilo ki mea ko lavea ne koutou kae e seki lavea ne latou,+ kae fia faka‵logo ki mea ko lagona ne koutou kae e seki lagona ne latou.” 25  Kae kiloke! ne tu aka se tagata e poto i te Tulafono o tofotofo a ia kae fai atu: “Te Faiakoga, se a te mea e ‵tau o fai ne au ke maua ei te ola se-gata-mai?”+ 26  Muna a Iesu ki a ia: “Se a te mea e tusi i te Tulafono? Se a te mea ne faitau ne koe?” 27  Ne tali atu a ia: “‘E ‵tau mo koe o alofa ki a Ieova* tou Atua mo tou loto kātoa mo tou ola kātoa mo tou malosi kātoa mo tou mafaufau kātoa’+ kae alofa ki ‘tou tuakoi e pelā mo koe ki a koe eiloa.’”+ 28  Muna a Iesu ki a ia: “E tonu tau tali; ‘Ke na fai faeloa te mea tenā kae ka maua ei ne koe te ola.’”+ 29  Kae ne manako tou tagata ke fakatalitonu atu i a ia e tonu,+ fai atu ei ki a Iesu: “Ko oi la toku tuakoi?” 30  Ne tali atu a Iesu: “E isi se tagata ne fanaifo mai i Ielusalema ki Ieliko kae fetaui mo tino kai‵soa kolā ne tapale ne latou ana gatu kae ta, puke ana mea katoa, kae tiakina atu me ko tai mate. 31  Ne fanatu foki i te auala tenā se faitaulaga, kae i te laveaga ne ia tou tagata, ne fakasili a ia i te suā feitu o te auala o fano. 32  E penā foki te tino Levi, i te okoatuga ki te koga tenā kae lavea ne ia te tagata tenā, fakasili aka foki i te suā feitu o te auala o fano. 33  Kae ne faimalaga atu se tino Samalia+ i te auala kae oko atu ki te tagata tenā, kae i te laveaga ne ia, fanaka ei tena alofa ki a ia. 34  Ne fanatu tou tagata kae fusi ne ia ana pa‵kiaga, kae ‵ligi atu a sinu mo uaina ki luga i ei. Oti aka, fakasopo ei ne ia te tagata tenā ki tena manu kae avatu ki se fale talimalo kae tausi atu ki a ia. 35  I te suā aso, ne puke ne ia a tenali* e lua, tuku atu ki te tausi o te fale talimalo, kae fai atu: ‘Tausi aka ne koe te tagata tenei, kae ka toe ‵togi atu ne au so se aofaki e sili atu i tupe konei māfai e toe foki mai au.’ 36  Ko oi la i a latou tokotolu konei ne fai mo fai se tuakoi+ o te tagata telā ne ta ne tino kai‵soa?” 37  Ana muna: “Ko te tino telā ne fai ne ia a faiga a‵lofa ki a ia.”+ Fai atu ei a Iesu ki a ia: “Fano la, kae fai foki ne koe te mea tenā.”+ 38  I te taimi ne olo ei latou, ne oko atu a ia ki se fakai. E isi se fafine i konā e igoa ki a Maleta+ ne talimalo ne ia tou tagata i tena fale. 39  E isi foki sena taina e igoa ki a Malia, telā ne sagasaga i lalo i vae o te Aliki kae fakalogologo atu faeloa ki ana pati. 40  Kae ko Maleta, ne fakalavelave faeloa i te uke o ana tiute e fai. Ne fanatu tou fafine ki a ia kae fai atu: “Te Aliki, e a, e ‵lei ki a koe ke tiaki mai au ne toku taina ke fai katoa ne au a mea konei? Fai atu la ki ei ke vau o fesoasoani mai ki a au.” 41  Ne tali atu te Aliki ki a ia: “Maleta, Maleta, a koe e manavase kae fakalavelave faeloa i mea e uke. 42  Kae ne nai mea fua io me e tasi fua te mea e manakogina ke fai. Ne filifili ne Malia te vaega ‵lei,*+ kae ka se mafai o ave kea‵tea mai i a ia.”

Fakamatalaga mai lalo

Io me “‵sai o fakatalofa ki so se tino.”
Io me “Heitisi,” telā ko te tanuga masani o tino. Onoono ki te FP.
Onoono ki te MF A5.
Onoono ki te MF E14.
Io me “te ‵toe vaega ‵lei.”