Te Tusi Muamua ki te Kau Kolinito 15:1-58

  • Toetuga o Keliso (1-11)

  • Toetuga ko te fakavae mō te fakatuanaki (12-19)

  • Toetuga o Keliso se fakamaoniga mautinoa (20-34)

  • Te foitino faka-te-foitino, te foitino faka-te-agaga (35-49)

  • Te ola e se mafai o mate kae e se mafai o pala (50-57)

  • E uke a mea e fai i te galuega a te Aliki (58)

15  Nei la, ko fakamasaua atu ne au ki a koutou, e oku taina, e uiga ki te tala ‵lei telā ne folafola atu ne au ki a koutou,+ kae ne talia foki ne koutou, kae ko tumau foki koutou i ei.  Ka ‵sao foki koutou māfai e puke ‵mau koutou ki te tala ‵lei telā ne folafola atu ne au ki a koutou, seiloga ke fai koutou mo tino kolā e tali‵tonu ki mea sē aoga.  Me e aofia i mea muamua kolā ne tuku atu ne au ki a koutou ko mea foki kolā ne maua ne au, me ne mate a Iesu mō ‵tou agasala e ‵tusa mo pati i Tusitusiga Tapu;+  me ne tanu a ia,+ ao, ne toe fakatu aka+ i te tolu o aso+ e ‵tusa mo pati i Tusitusiga Tapu;+  kae ne fakasae atu ki a Kefa,*+ kae oti aka ki te toko Sefululua.+  Mai tua ifo i ei ne fakasae atu a ia ki taina e silia atu i te toko 500 i te taimi e tasi,+ kae ko te tokoukega o latou konei koi ‵nofo eiloa mo tatou, kae ko nisi tino ko oti ne ‵moe i te mate.  Mai tua ifo i ei, ne fakasae atu a ia ki a Iakopo,+ kae oti aka ki apositolo katoa.+  Kae fakamuli loa ne fakasae mai foki a ia ki a au+ e pelā me fakasae atu ki se pepe ne tō moto.  Me ko au eiloa te ‵toe apositolo fatauva i apositolo katoa, kae e se ‵tau o taku au ki se apositolo, me ne fakasaua ne au te fakapotopotoga a te Atua.+ 10  Kae ona ko te alofa tauanoa o te Atua, ko fai ei au penei. Ne seki māumāu tena alofa tauanoa telā ne fakaasi mai ki a au, me ne galue malosi atu au i lō latou katoa; kae e se ko au kae ko te alofa tauanoa o te Atua tenei e maua i a au. 11  Kae faitalia me ko au io me ko latou, tenei eiloa te auala ne talai ei matou, kae tenei foki te auala ne tali‵tonu ei koutou. 12  Tela la, kafai ne talai atu i a Keliso ko oti ne toe fakatu aka mai te mate,+ kaia la e fai mai ei a nisi tino i a koutou me e seai se toetu mai te mate? 13  Kafai e tonu me e seai se toetu mai te mate, ko tena uiga ne seki toe fakatu aka a Keliso. 14  Kae kafai ne seki toetu aka a Keliso, ko seai se aoga o te motou talaiga, kae ko seai foki se aoga o te otou fakatuanaki. 15  E se gata i ei, ko fai matou mo fai ne molimau ‵pelo e uiga ki te Atua,+ me ne molimau atu matou o ‵teke ki te Atua mai te fai atu me ne fakatu aka ne ia a te Keliso,+ se mea telā ne seki ‵tau o fai ne ia moi fai e se toe faka‵tu aka eiloa a tino ‵mate. 16  Me kafai e se toe faka‵tu aka a tino ‵mate, ko tena uiga e seki fakatu aka foki a Keliso. 17  E se gata i ei, kafai e seki fakatu aka a Keliso, ko seai ei se aoga o te otou fakatuanaki; ko tumau eiloa koutou i otou agasala.+ 18  A tino foki kolā ko oti ne ‵moe i te mate i te ‵kau fakatasi mo Keliso ko ‵galo atu eiloa.+ 19  Kafai e fakamoe‵moe fua tatou ki a Keliso i te olaga tenei, ko fakaa‵lofa atu tatou i lō so se isi tino aka. 20  Kae nei la, ko oti ne toe fakatu aka a Keliso mai te mate, ko te fuataga muamua o latou kolā ko oti ne ‵moe i te mate.+ 21  Ona ko te mate ne oko mai e auala i se tagata e tokotasi,+ ne oko mai foki a te toe‵tuga o tino ‵mate e auala i se tagata e tokotasi.+ 22  Me e pelā eiloa mo te ‵mate o tino katoa i a Atamu,+ e penā foki te ‵toe fakaola mai o tino katoa e auala i te Keliso.+ 23  Kae ko tino taki tokotasi e ‵tusa mo olotou tulaga: ko Keliso te fuataga muamua,+ mai tua i ei ko tino o Keliso i te taimi o tena fakatasi mai.+ 24  Kae e ‵tao atu ki ei ko te gataga, ko te taimi ka toe tuku atu ei ne ia te Malo ki tena Atua telā ko tena Tamana, māfai ko oti ne fakaseai ne ia a malo mo pulega mo malosi pule katoa.+ 25  Me e ‵tau mo ia o pule mai e pelā me se tupu ke oko ki te taimi e tuku ei ne te Atua ana fili katoa mai lalo i ana vae.+ 26  Kae ko te ‵toe fili telā e ‵tau o fakaseai atu ko te mate.+ 27  Me i te Atua ko oti ne “tuku atu ne ia a mea katoa mai lalo i ana vae.”+ Kae kafai e fai mai a ia me ‘ko oti ne tuku atu ne ia a mea katoa,’+ e maina ‵lei me e se aofia i ei a te Atua telā ne tuku ne ia a mea katoa ki a ia.+ 28  Kae kafai ko oti ne tuku atu a mea katoa ki a ia, ko nofo foki ei te Tama mai lalo i a Ia telā ne tuku atu ne ia a mea katoa ki a ia,+ ko te mea ke pule katoatoa te Atua ki mea katoa.+ 29  Me kafai e se fai penā, se a la te mea ka fai ne latou kolā e papatiso ke fai latou e pelā me ne tino ‵mate?+ Kafai e se mafai o toe faka‵tu mai a tino ‵mate, kaia la e papatiso ei latou ke fai latou penā? 30  Kaia foki la e ‵tu ei tatou i se tulaga fakamataku i itula katoa?*+ 31  E fepaki au mo te mate i aso takitasi. E mautinoa eiloa te mea tenei e pelā eiloa mo toku fiafia ona ko koutou, e oku taina, telā e maua ne au i a Keliso Iesu te ‵tou Aliki. 32  Kafai ne taua au mo manu fe‵kai i Efeso+ e pelā eiloa mo nisi tāgata, se a la te aoga o te mea tenā ki a au? Kafai e se toe faka‵tu aka a tino ‵mate, “ke na ‵kai kae inu tatou me taeao ko ‵mate ei tatou.”+ 33  Ke se faka‵segina koutou. A taugasoa ma‵sei e fakama‵sei ne latou a amioga ‵lei.+ 34  Fai ke ala otou mafaufau i se auala amiotonu kae sa toe fai a faifaiga o te agasala, me e isi ne tino e seai se lotou iloa e uiga ki te Atua. Au e faipati atu o fakamasiasi koutou. 35  Kae kāti ka fai mai se tino: “Ka toe faka‵tu aka pefea a tino ‵mate? Ao, ne vaegā foitino pefea ka toe faka‵tu mai ei latou?”+ 36  A koe se tino e se malamalama! A te mea telā e ‵toki ne koe e se mafai o ola aka seiloga ke pala* muamua. 37  Kae e pelā mo te mea telā e ‵toki ne koe, e se ‵toki ne koe a te foitino o te lakau ke ola aka, kae ko te fuaga fua, kāti se fuaga o te saito io me se isi fuaga aka; 38  kae e tuku atu ne te Atua ki ei se foitino, e ‵tusa mo te mea e fiafia a ia ki ei, kae tuku atu ki fuaga takitasi olotou foitino. 39  E se ‵pau a foitino katoa, e ‵kese te foitino o te tagata, e ‵kese te foitino o te pulumakau, e ‵kese te foitino o te manu eva, kae e ‵kese foki te foitino o te ika. 40  E isi ne foitino faka-te-lagi+ mo foitino faka-te-lalolagi;+ kae e ‵kese te ‵malu o foitino faka-te-lagi, e ‵kese foki te ‵malu o foitino faka-te-lalolagi. 41  E ‵kese te ‵malu o te la, e ‵kese te ‵malu o te masina,+ kae e ‵kese te ‵malu o fetū; e tonu, e ‵kese te ‵malu o te fetū e tasi mai te suā fetū. 42  E penā foki te toe‵tu mai o tino ‵mate. Ne ‵toki i te pala; ne toe fakatu aka i te sē pala.+ 43  Ne ‵toki mo te masiasi; ne toe fakatu aka i te ‵malu.+ Ne ‵toki mo te vāivāi, kae ne toe fakatu aka i te ‵mana.+ 44  Ne ‵toki i te foitino faka-te-foitino; ne toe fakatu aka i se foitino faka-te-agaga. Kafai e isi se foitino faka-te-foitino, e isi foki se foitino faka-te-agaga. 45  Ne tusi mai penei: “A te tagata muamua ko Atamu ne fai mo fai se tino ola.”+ A te Atamu fakaoti ne fai mo agaga fakaola tino.+ 46  E tiga te feitu tenā, e se ko te foitino faka-te-agaga e mua. Ko te foitino faka-te-foitino e mua, kae fakamuli ko te foitino faka-te-agaga. 47  A te tagata muamua ne faite i te lalolagi ki ‵pefu o te laukele;+ kae ko te tagata i te tokolua ne fanaifo mai te lagi.+ 48  E pelā mo te tino ne faite ki ‵pefu, e penā foki a latou kolā ne faite ki ‵pefu; kae e pelā mo te tino faka-te-lagi, e penā foki a tino faka-te-lagi.+ 49  Kae e pelā eiloa mo tatou e ‵pau ‵tou foliga mo te tino ne faite ki te ‵pefu,+ ka ‵pau foki tatou mo foliga o te tino faka-te-lagi.+ 50  Kae e fai atu ne au te mea tenei, e oku taina, me e se mafai o maua ne tino kolā e faite ki ‵kano mo toto a te Malo o te Atua, e se mafai foki o maua ne te pala a mea kolā e se ‵pala. 51  Kiloke! Ka fakaasi atu ne au ki a koutou se mea ‵funa kae tapu: A tatou katoa ka se ‵to a ‵moe i te mate, kae ko tatou katoa ka ‵fuli+ 52  fakavave e pelā eiloa mo te ‵kemo o te mata, i te taimi o te pu fakaoti. Me ka fakatagi te pu,+ kae ka faka‵tu aka a tino ‵mate e pelā me ne tino e se pala, kae ka ‵fuli ei tatou. 53  Me i te foitino pala tenei e ‵tau o ‵fuli ki te foitino sē pala,+ kae ko te foitino mate tenei e ‵tau o ‵fuli ki te foitino telā e se mafai o toe mate.+ 54  Kae kafai e ‵fuli te foitino pala tenei ki te foitino sē pala mo te foitino mate tenei ki te foitino telā e se mafai o toe mate, tenā ko fakataunu ei a pati kolā ne tusi: “Ka fakaseai* atu a te mate ki te se-gata-mai.”+ 55  “Te mate, tefea tou manumalo? Te mate, tefea tou ū ‵kati?”+ 56  A te ū ‵kati telā e aumai ne ia te mate ko te agasala,+ kae ko te malosi o te agasala ko te Tulafono.+ 57  Kae fakafetai atu ki te Atua, me ne tuku mai ne ia te manumalo ki a tatou e auala i te ‵tou Aliki ko Iesu Keliso.+ 58  Tela la, e oku taina fagasele, ke ‵mautakitaki koutou,+ sa gasue‵sue, kae fai faeloa ke uke+ otou galuega e fai i te galuega a te Aliki, me e iloa ne koutou me e se mafai o māumāu otou galuega+ e fai mō te Aliki.

Fakamatalaga mai lalo

E fakaigoa foki ki a Petelu.
Io me “i taimi katoa.”
Eleni, “mate.”
Eleni, “folo.”