Esera 8:1-36
8 Ngun ka ati a mbayaav kua mba sha icombor ve mba ve due vea mo ken Babilon sha shighe u hemen u Tor Artashaseta la je ne:+
2 Ken ônov mba Pinehashi yô,+ lu Gershom; ken ônov mba Itamar yô,+ lu Daniel; ken ônov mba Davidi yô, lu Hatushi;
3 ken ônov mba Shekania, ônov mba Paroshi yô, lu Sekaria, shi nomso 150 mba i nger ati a ve yô, lu vea na;
4 ken ônov mba Pahati-moabi yô,+ lu Elieho-enai wan u Serahia, shi nomso 200 lu vea na;
5 ken ônov mba Satu yô,+ lu Shekania, wan u Yahashiel, shi nomso 300 lu vea na;
6 ken ônov mba Adin yô,+ lu Ebedi wan u Yonatan, shi nomso 50 lu vea na;
7 ken ônov mba Elam yô,+ lu Yeshaia wan u Atalia, nomso 70 lu vea na;
8 ken ônov mba Shefatia yô,+ lu Sebadia wan u Mikael, shi nomso 80 lu vea na;
9 ken ônov mba Yoabi yô, lu Obadia wan u Yehiel, shi nomso 218 lu vea na;
10 ken ônov mba Bani yô, lu Shelomiti wan u Yoshifia, shi nomso 160 lu vea na;
11 ken ônov mba Bebai yô,+ lu Sekaria wan u Bebai, shi nomso 28 lu vea na;
12 ken ônov mba Asegadi yô,+ lu Yohanan wan u Hakatan, man nomso 110 lu vea na;
13 ken ônov mba Adonikam,+ ve mba ve lu mba masetyô la yô, ka ati a ve je ne: Elifeleti man Yeiel man Shemaia, shi nomso 60 lu vea ve;
14 ken ônov mba Bigevai yô,+ lu Utai man Sabuldi, shi nomso 70 lu vea ve.
15 M kohol ve hen kpe u ifi u a kuan a yemen Ahava la,+ se haa afo her ayange atar. Kpa m yengen ape ior kua upristi haa la yô, m zua a or môm ken Mbalevi her ga.
16 Nahan m tindi mer i va a Elieser man Ariel man Shemaia man Elnatan man Yaribi kua Elnatan man Natan man Sekaria man Meshulam, ve mba ve lu mbahemen la, shi i va a Yoyaribi man Elnatan, ve mba ve lu mbatesen la kpaa.
17 Nahan m tindi ve hen Ido, orhemen u hen ijiir i i yilan ér Kashifia la, m kaa a ve mer ve kaa Ido man anmgbianev nav, ve mbasôrontempel* mba ve lu ken Kashifia la, ve va se a mba eren tom ken iyou i Aôndo wase.
18 Er uwegh ku Aôndo wase lu sha a vese doo doo yô, ve va se a or u fan kwagh ken ônov mba Maheli,+ wan u wan u Levi, wan u Iserael, i yilan un ér Sherebia,+ un vea ônov nav man anmgbianev nav, ve lu nomso 18;
19 man Hashabia, Yeshaia u ken Mbamerari+ gema lu vea na, un kua anmgbianev nav mba nomso man ônov vev, nomso 20.
20 Mbasôrontempel* lu 220, ve mba Davidi kua mbatarev nav yange ve na ér ve wasen Mbalevi tom la, ve cii i ter ve sha ati.
21 Nahan m yôô hen ifi u Ahava, mer i hôr kwaghyan sha er se hide a ayol a ase ijime sha ishigh ki Aôndo wase, se ker iwasen na ken zende wase ne, sha ci wase man sha ci u ônov asev man akaa a ase cii yô.
22 Yange kunya kôrom u pinen tor mer a na se ushoja man mbaanyinyav, sha u kuran se sha gbenda sha ikyev i mbahyomov asev, sha ci u se vande kaan a tor ser: “Uwegh ku Aôndo wase ku sha mba ve keren un la cii doo doo,+ kpa uwegh nagh ku ageegh ku ihyom a mba ve undu un la, shi iyugh na kpa ngi sha a ve.”+
23 Nahan se hôr kwaghyan, shi se sôn Aôndo wase sha kwagh ne, nahan a ungwa zamber wase.+
24 Tsô m tsua mbavesen 12 ken upristi, ve yô, lu Sherebia man Hashabia+ kua anmgbianev vev pue.
25 Maa m kar myohom ma azurufa man zanaria kua ikyav mbigen m na ve, ka iyua i tor kua mbawasen un mhen man mbahemenev man Mbaiserael mba yange ve lu her la cii, ve er sha ci u iyou i Aôndo wase la je la.+
26 Nahan m kar utalenti* mba azurufa 650 m wa ve sha ikyev, kua mkam ma sha azurufa 100 ma kuman utalenti 2, man shi utalenti mba zanaria 100,
27 man agbande a kiriki a sha zanaria 20, a kuman udariki* 1,000, kua agbande a togula u injaa 2, nyian doo, lu kwagh u injaa er ka zanaria nahan.
28 Maa m kaa a ve mer: “Ne mba icighankwagh sha ishigh ki Yehova,+ ikyav mbira kpa mbi icighan; azurufa man zanaria la ka iyua i ior ve ne a ishima ve sha ci u Yehova Aôndo u uter vev yô.
29 Ver nen ishima sha ikyav mbin tsembelee, zan zan ne za kar myohom ma mbi sha ishigh ki mbavesen mba upristi man Mbalevi kua mbayaav mba Iserael ken Yerusalem,+ ken ukpar mba iyoughough mba* ken iyou i Yehova.”
30 Tsô upristi man Mbalevi tôô azurufa man zanaria kua ikyav mbi i kar myohom ma mbi i na ve la, sha er vea va a mi ken Yerusalem ken iyou i Aôndo wase yô.
31 Ken masejime yô, se mough hen ifi u Ahava+ u yemen Yerusalem ken uwer u hiihii la ayange a u 12,+ shi uwegh ku Aôndo wase lu sha a vese, nahan a yima se sha ikyev i mbahyomov man mbanumungbenda, er se lu van sha gbenda la.
32 Maa se va nyôr ken Yerusalem,+ se tsa ker ayange atar.
33 Sha iyange i sha unyiin la, se kar myohom ma azurufa man zanaria kua ikyav mbira cii ken iyou i Aôndo wase,+ se gema mbi se wa sha ikyev i Meremoti+ wan u Uriya u lu pristi la, Eleasar wan u Pinehashi lu vea na, shi Mbalevi, Yosabadi+ wan u Yeshua man Noadia wan u Binui+ lu vea ve.
34 I ôr iyenge i hanma kwagh shi i kar myohom nam, shi i nger myohom mara cii shin inya.
35 Ior mba yange ve lu uikyangen kpa ve va hide ne, ve na Aôndo u Iserael iniav mbi nanden sha anomabua 12+ sha ci u Iserael cii, man anomaiyôngo a vesen 96,+ anomaiyôngo a kiriki di 77, kua ikpev 12+ sha ci u nagh ku isholibo; akaa ne cii lu nagh ku nanden sha ci u Yehova.+
36 Tsô se gema atindi a tor+ se na utyombaiorov* mba tor kua ugomna mba ken haregh u Yande Ifi La,*+ nahan ve wase ior shi ve na akaa a kwagh gba sha mi ken iyou i Aôndo u mimi la.+
Ngeren mba shin kpe
^ Shin “Mbanetinim.” Zwa Heberu, “mba i ne ve la,” ka mba i ne ve ér ve er Aôndo tom je la.
^ Shin “Mbanetinim.” Zwa Heberu, “mba i ne ve la,” ka mba i ne ve ér ve er Aôndo tom je la.
^ Talenti môm yange a yuhwa i kuma ukilogeram 34.2. Nenge Ngeren u Seer u B14 la.
^ Dariki lu gbenger inyar u sha zanaria, u Mbapershia. Nenge Ngeren u Seer u B14 la.
^ Shin “ken ayou a yan kwagh a.”
^ Inja i ititom ne ér, “mbakuran tartor,” heen ne mba ôron kwagh u ugomna mba ken ikpentar i Tartor u Pershia.
^ Shin “Uferati Vegher La.”
