Esera 3:1-13
3 Mba va nyer ken uwer u sha utaankaruhar,+ shighe u Mbaiserael* tema ken agar a ve la yô, ve cii ve due ve va kohol ken Yerusalem a awashima môm.
2 Tsô Yeshua+ wan u Yehosadaki, mough vea upristi mbagen kua Serubabel+ wan u Sheatiel+ man anmgbianev nav, ve ta Aôndo u Iserael atse a nanden nagh, sha u vea nanden nagh sha mi er i nger ken Tindi u Mose+ or u Aôndo u mimi la nahan.
3 Nahan ve ta atse la hen ijiir i yange a vande lun la, shin er ve lu cian ior mba ken ityar i i wa ndor a ve la nahan kpaa,+ shi ve hii u nan Yehova iniav mbi nanden sha a, iniav mbi pepe man mbi aikighe cii.+
4 Maa ve er Iniongo i Atumbe* er i vande ngeren nahan,+ shi ve lu nan iniav ayange ayange sha iyenge i iniav mbi i tese ér gba u a nanden hanma iyange la.+
5 Mba been yô ve na nagh ku i naan hanma shighe la,+ kua iniav mbi iwer i he+ man mbi i naan sha ci u uiniongo mba Yehova mba i tsegha ve,+ i eren sha ashighe ashighe la, kua iniav mbi hanma or vaan a mi a ishima i nan+ u va nan Yehova la kpaa.
6 Sha iyange i hiihii i uwer u sha utaankaruhar+ la je, ve hii u nan Yehova iniav mbi nanden, shin er i lu a wa imaagh ki tempel u Yehova ga nahan kpaa.
7 Ve na mbakuanawen+ man mbavareniwa+ inyaregh, shi ve na Mbashidon kua Mbatiru kwaghyan man kwaghman man mkurem, sha u ve̱ tôô ikyon i sedar ken Lebanon ve̱ va a mi ken mnger ve̱ va na ve hen Yopa yô,+ vough er Shirushi tor u Pershia+ vande nan ve ian nahan.
8 Ken inyom i sha uhar i ve hide hen iyou i Aôndo u mimi ken Yerusalem sha uwer u sha uhar la, Serubabel wan u Sheatiel vea Yeshua wan u Yehosadaki kua anmgbianev vev mbagenev mbara, upristi man Mbalevi, man mbagenev mba ve due ken uikyangen+ ve va ken Yerusalem la cii ve hii tom la. Ve tsua Mbalevi mba hii anyom 20 yem hemen ér ve nengen sha tom u hen iyou i Yehova la.
9 Nahan Yeshua a ônov nav man anmgbianev nav, man Kademiel a ônov nav, kua ônov mba Yuda man ônov mba Henadadi+ a ônov vev man anmgbianev vev, ka Mbalevi je la, ve zua imôngo ve lu nengen sha mba ve lu eren tom hen iyou i Aôndo u mimi la.
10 Mbamaankwagh yange mba we imaagh ki tempel u Yehova yô,+ upristi hua akondo a ve a tom, ve kôr ibusa,+ Mbalevi, ônov mba Asav kpaa kôr myôm ma kuhwan,* ve cii ve tile her sha u wuese Yehova, er Davidi tor u Iserael lu tese nahan.+
11 Tsô ve gba nderan atsam mbagenev lu lumun,+ ve gba wuese Yehova kaan ér, “gadia a doo; Iserael doo un ishima, man dooshima la* ka u been mayange ga.”+ Nahan ior cii ger amo gba wuese Yehova genger genger, sha ci u i we iyou i Yehova ityô yô.
12 Upristi kpishi kua Mbalevi man mbayaav—ve mbabeenyol mba ve vande nengen a iyou i tse la cii+—zum u ve nenge er i wa ityôyoughough la yô, ve vaa genger genger, kpa mbagenev kpishi gema ger amo sha iember tsung.+
13 Nahan ior kera fa mkposo u amo a mba ve lu geren sha iember, man akenge a mba ve lu vaan la ga, gadia ior ger amo kpishi, nahan i ungwa ayôôso la yem ica hiinii.
