Esera 6:1-22
6 Tsô Tor Dariu na zwa, nahan i tôv sha kwagh ne ken iyou i koson akaa* ape i koson akaainjaa a ken Babilon la.
2 Nahan i za zua a ihyurenruamabera ugen hen iyou i taver i lun a gir, i ken Akebatana, ken kpentar* u Mede, i nger sha mi nahan ér:
3 “Ken inyom hiihii i Tor Shirushi la je, Tor Shirushi na zwa sha kwagh u iyou i Aôndo i ken Yerusalem la,+ a kaa ér: ‘I̱ za hide i maa iyou la, i̱ lu ijiir i vea naan iniav her yô, i̱ wa ityôyoughough la i tav aseva 60,* shi i gbanger aseva 60.+
4 Shi ve menger uzegembaawenev ve va wa her ukpo utar,* shi i wa ikpande+ kpo* môm. I̱ dugh inyaregh ki a er akaa ne a mi la ken iyou i tor.+
5 Shi i hide a mkam ma sha zanaria kua ma sha azurufa ma ken iyou i Aôndo, ma Nebukadinesar yange tôô ken tempel u ken Yerusalem va a mi ken Babilon+ la kpaa. Sha er a ver ma ken tempel u ken Yerusalem sha ajiir a ma vough vough, ma a lu ken iyou i Aôndo yô.’+
6 “Sha nahan yô, mo Dariu, m ngu kaan mer, we Tatenai, gomna u hen haregh u Yande Ifi La,* man Shetar-bosenai kua mba ve eren tom a ven imôngo la, ka imue gomna i hen haregh u Yande Ifi La cii+—de kera ze nen heela ga.
7 De we nen ave sha tom u iyou i Aôndo la ga. Gomna u Mbayuda man mbatamen mba Mbayuda, vea hide a maa iyou i Aôndo la hen ijiir i yange i vande lun la.
8 Shi m ngu wan ne tindi sha kwagh u i gbe u ne er sha ci u mbatamen mba Mbayuda mban sha u wasen ve u maan iyou i Aôndo la yô: I dugh inyaregh ken inyaregh ki tor+ ki i zough a mi sha kpandegh ku i ngohol ken haregh u Yande Ifi La cii, i na ior mban fese sha er vea za hemen a tom la a kwagh u yangen ve shio yô.+
9 Shi hanma kwagh u kwagh a gbe ve a mi cii—a lu agumabua+ shin anomaiyôngo+ shin agumaiyôngo+ a nan iniav mbi nanden sha ci u Aôndo u sha, shin a lu alakema+ shin bar+ shin wain+ shin mkurem+ kpaa, hanma kwagh u upristi mba ken Yerusalem ve ôr cii—i naan ve hanma iyange, i de bundu ga,
10 sha er vea za hemen u nan iniav mbi mbia doo Aôndo u sha, shi vea er msen sha ci u tor man ônov nav yô.+
11 Shi m kaa mer aluer or per tindi ne yô, a tsua kon* sha iyou i nan a tim u, a kange nan sha mi,* shi ya u nan una hingir ihyungwa akôngo* sha ci u kwaghbo u nan er la.
12 Man hanma tor shin ior mba ve per tindi ne shi ve lu nôngon ér vea vihi iyou i Aôndo i i lu ken Yerusalem la cii, Aôndo u a ne iti na i lu hen ijiir shon la+ a̱ tsaha ve. Ka mo Dariu m we tindi ne ye. I er nahan fefa.”
13 Tsô Tatenai gomna u hen haregh u Yande Ifi La, kua Shetar-bosenai+ man mbagenev mba ve eren tom imôngo la, er hanma kwagh u Tor Dariu kaa la cii a atimbir shio.
14 Nahan mbatamen mba Mbayuda za hemen u maan kwagh, shi tom la lu zan ikyura kpaa,+ sha ci u profeti Hagai+ man Sekaria+ wan u wan u Ido, lu ôron akaaôron a profeti a taver ve ishima. Nahan ve maa i ve kure sha imo i Aôndo u Iserael,+ man sha imo i Shirushi+ man Dariu+ man Artashaseta+ tor u Pershia.
15 Ve maa iyou la ve kure ken uwer u Adar,* ayange a u atar, ken inyom i sha ataratar i hemen u Tor Dariu la.
16 Tsô Mbaiserael, upristi man Mbalevi+ kua mbagenev mba ve hide uikyangen la cii, er iniongo i tseghan iyou i Aôndo ne a iember.
17 Shi ve na nagh ku tseghan iyou i Aôndo sha anomabua 100 man anomaiyôngo 200 man agumaiyôngo 400, shi ve na ikpev 12 sha ci u nagh ku isholibo, u zuan sha iyenge i uipyaven mba Iserael.+
18 Ve ver upristi sha iniongo ve man Mbalevi kpaa sha ikwe ve, sha u eren tom u Aôndo ken Yerusalem+ vough er i nger ken takeda u Mose nahan.+
19 Shi ve mba ve due ken uikyangen kera ne ve er Paseka sha uwer u hiihii, ayange a u 14.+
20 Upristi man Mbalevi cii vande tseghan ayol a ve kera,+ nahan ve cii ve lu wang; ve sôngo nagh ku Paseka sha ci u mba yange ve due ken uikyangen kera la cii, kua sha ci u mba ve lu upristi vea ve imôngo la man sha ci ve ayol a ve kpaa.
21 Tsô Mbaiserael mba yange ve hide ken uikyangen la ya Paseka la, ve kua mba ve undu hôngor u akuraior a hen tar la, ve va kohol ve sha u civir* Yehova Aôndo u Iserael la cii.+
22 Shi ve er Iniongo i Beredi u I We Kwa sha Mi Ga+ la ayange ataankarahar a iember, gadia Yehova na saan ve iyol, sha ci u a er ishima doo tor u Ashiria a ve,+ nahan a sue ve* sha tom u maan iyou i Aôndo u mimi, Aôndo u Iserael la.
Ngeren mba shin kpe
^ Zwa Aram, “iyou i koson ityakeda.”
^ Shin “ipyaventar.”
^ Ka umita 26.7 (angahar 87.6) je la. Nenge Ngeren u Seer u B14 la.
^ Shin “iniongo itiar.”
^ Shin “nongo.”
^ Shin “Uferati Vegher La.”
^ Shin “hwange.”
^ Shin “ijiir i haan ihyôghonov; igyungumtuhwe.”
^ Shin “a mande nan sha mi.”
^ Nenge Ngeren u Seer u B15 la.
^ Shin “keren.”
^ Zwa Heberu, “a taver ave a ve.”
